ܦܝܠܝܦܣܝ̈ܐ 2 - ܕܝܬܩܐ ܚܕܬܐ ܕܡܪܢ ܝܫܘܥ ܡܫܝܚܐ ܘܡܙܡܘܪ̈ܐ ܒܠܫܢܐ ܐܬܘܪܝܐ

ܡܟܝܟ݂ܘܬ‌ܐ ܡܫܝܚܝܬ‌ܐ

¹ ܒܵܣ ܐܸܢ ܐܝܼܬ ܒܘܼܝܵܐܵܐ ܒܡܫܝܼܚܵܐ، ܘܐܸܢ ܝܵܗܒ݂ܵܠܬܵ‌ܐ ܕܠܸܒܵܐ ܒܚܘܼܒܵܐ، ܘܐܸܢ ܫܲܪܝܼܟܘܼܬܵ‌ܐ ܕܪܘܼܚܵܐ، ܘܐܸܢ ܪܲܚܪܲܚܬܵ‌ܐ ܘܪ̈ܲܚܡܹܐ،

² ܬܲܡܸܡܘܼܢ ܚܲܕܘܼܬ‌ܝܼ ܕܗܵܘܹܝܬܘܿܢ ܒܚܲܕ ܪܸܥܝܵܢܵܐ، ܘܒܚܲܕ ܚܘܼܒܵܐ، ܘܒܚܕܵܐ ܓܵܢܵܐ ܘܒܚܲܕ ܚܘܼܫܵܒ݂ܵܐ.

³ ܠܵܐ ܥܵܒ݂ܕܝܼܬܘܿܢ ܗܸܟ̃ ܡܸܢܕܝܼ ܒܡܲܩܲܪܵܨܘܼܬܵ‌ܐ ܝܲܢ ܒܚܸܩܪܵܐ ܒܲܛܝܼܠܵܐ، ܐܸܠܵܐ ܒܡܲܟܝܼܟ݂ܘܼܬܵ‌ܐ ܗܵܘܹܝܬܘܿܢ ܒܸܚܫܵܒ݂ܵܐ ܐܚܹܪ̈ܢܹܐ ܙܵܘܕܵܐ ܡ̣ܢ ܓܵܢܵܘܟ݂ܘܿܢ.

⁴ ܠܵܐ ܟܠ ܐܢܵܫܵܐ ܡܸܢܵܘܟ݂ܘܿܢ ܓܲܫܸܩ ܠܝܘܼܬܪܵܢܵܐ ܕܓܵܢܹܗ ܐܲܚܟ̰ܝܼ، ܐܸܠܵܐ ܐܘܼܦ ܠܝܘܼܬܪܵܢܵܐ ܕܐܚܹܪ̈ܢܹܐ.

⁵ ܚܵܫܒ݂ܝܼܬܘܿܢ ܗܲܪ ܗ̇ܘ ܡܸܢܕܝܼ ܕܚܫܝܼܒ݂ ܠܹܗ ܐܘܼܦ ܝܼܫܘܿܥ ܡܫܝܼܚܵܐ،

⁶ ܗ̇ܘ ܕܟܲܕ ܝܼܗܘܵܐ ܒܟܝܵܢܹܗ ܐܲܠܵܗܵܐ، ܠܵܐ ܚܫܝܼܒ݂ ܠܹܗ ܕܫܵܘܝܘܼܬܵ‌ܐ ܥܲܡ ܐܲܠܵܗܵܐ ܚܵܛܹܦ ܗܘܵܐ ܠܵܗ̇.

⁷ ܐܸܠܵܐ ܣܘܼܦܩܵܐ ܠܹܗ ܓܵܢܹܗ ܘܫܩܝܼܠ ܠܹܗ ܕܡܘܼܬܵ‌ܐ ܕܪܹܓܵܐ، ܘܗܘܹܐ ܠܹܗ ܒܨܘܼܪܬܵ‌ܐ ܕܒܢܲܝ̈ܢܵܫܵܐ.

⁸ ܘܟܲܕ ܫܩܝܼܠ ܠܹܗ ܐܸܣܟܝܼܡܵܐ ܕܒܲܪܢܵܫܵܐ، ܘܡܘܼܟܸܦܵܐ ܠܹܗ ܓܵܢܹܗ ܘܫܠܝܼܡ ܠܹܗ ܗܲܠ ܡܵܘܬܵ‌ܐ، ܡܵܘܬܵ‌ܐ ܕܙܩܝܼܦܵܐ.

⁹ ܒܘܼܬ ܐܵܗܵܐ ܐܘܼܦ ܐܲܠܵܗܵܐ ܒܘܼܫ ܙܵܘܕܵܐ ܡܘܼܪܸܡ ܠܹܗ ܐܸܠܹܗ، ܘܝܘܼܗܒܹܠ ܠܹܗ ܐܸܠܹܗ ܫܸܡܵܐ ܥܸܠܸܠ ܡ̣ܢ ܟܠ ܫܸܡܵܐ،

¹⁰ ܕܒܫܸܡܵܐ ܕܝܼܫܘܿܥ ܟܠ ܒܸܪܟܵܐ ܟܵܝܦܵܐ، ܒܫܡܲܝܵܐ ܘܒܐܲܪܥܵܐ ܘܕܠܬܸܚܬ ܡ̣ܢ ܐܲܪܥܵܐ،

¹¹ ܘܟܠ ܠܸܫܵܢܵܐ ܡܵܘܕܹܐ ܕܝܼܫܘܿܥ ܡܫܝܼܚܵܐ ܡܵܪܝܵܐ ܝܠܹܗ، ܠܫܘܼܒ݂ܚܵܐ ܕܐܲܠܵܗܵܐ ܒܵܒܵܐ.

ܒܗܪܘܢܐ ܐܝܟ݂ ܟܘܟ݂ܒ݂̈ܐ

¹² ܒܵܣ ܗܵܕܟ݂ܵܐ ܡܘܼܚܸܒܝܼ̈، ܕܵܐܟ݂ܝܼ ܕܒܟܠ ܙܲܒ݂ܢܵܐ ܡܘܼܨܝܸܬ ܠܵܘܟ݂ܘܿܢ، ܠܵܐ ܐܲܚܟ̰ܝܼ ܐܝܼܡܲܢ ܕܝܼܘܸܢ ܗܘܵܐ ܠܟܸܣܠܵܘܟ݂ܘܿܢ، ܐܸܠܵܐ ܒܘܼܫ ܙܵܘܕܵܐ ܐܵܕܝܼܵܐ ܕܪܸܚܩܵܐ ܝܘܸܢ ܡܸܢܵܘܟ݂ܘܿܢ، ܡܲܟܡܸܠܘܼܢ ܦܘܼܪܩܵܢܵܘܟ݂ܘܿܢ ܒܙܕܘܼܥܬܵ‌ܐ ܘܒܪܲܬܪܲܬܬܵ‌ܐ،

¹³ ܣܵܒܵܒ ܐܲܠܵܗܵܐ ܝܠܹܗ ܕܟܹܐ ܦܵܠܹܚ ܒܝܼܵܘܟ݂ܘܿܢ ܕܡܲܥܒܸܕ ܠܵܘܟ݂ܘܿܢ ܕܒܵܥܹܝܬܘܿܢ ܘܥܵܒ݂ܕܝܼܬܘܿܢ ܨܸܒ݂ܝܵܢܹܗ ܛܵܒ݂ܵܐ.

¹⁴ ܥܒ݂ܘܿܕܘܼܢ ܟܠ ܡܸܢܕܝܼ ܕܠܵܐ ܛܲܪܛܲܡܬܵ‌ܐ ܘܕܠܵܐ ܕܘܼܒܵܪܘܼܬܵ‌ܐ،

¹⁵ ܕܗܵܘܹܝܬܘܿܢ ܕܠܵܐ ܡܘܼܡܵܐ ܘܕܸܟ݂ܝܹ̈ܐ، ܒܢܘܿܢܹ̈ܐ ܕܐܲܠܵܗܵܐ ܕܠܵܐ ܠܵܘܡܵܐ ܓܵܘ ܚܲܕ ܕܵܘܪܵܐ ܦܟ̰ܝܼܠܵܐ ܘܚܪܝܼܒ݂ܵܐ، ܘܕܦܵܝܫܝܼܬܘܿܢ ܚܸܙܝܹܐ ܓܵܘܹܗ ܐܲܝܟ݂ ܟܵܘܟ݂ܒܹ̈ܐ ܒܲܗܪܘܼܢܹܐ ܓܵܘ ܥܵܠܡܵܐ،

¹⁶ ܕܒ݂ܝܼܩܹܐ ܒܗܹܡܸܙܡܵܢ ܕܚܲܝܹ̈ܐ، ܕܥܵܒ݂ܕܹܢ ܫܘܼܒ݂ܗܵܪܵܐ ܒܝܵܘܡܵܐ ܕܡܫܝܼܚܵܐ ܕܠܵܐ ܪܚܝܼܛ ܠܝܼ ܘܟܟ̰ܝܼܚ ܠܝܼ ܒܗܵܒܵܣܘܼܬܵ‌ܐ.

¹⁷ ܐܝܼܢܵܐ ܐܘܼܦ ܐܸܢ ܕܦܵܝܫܹܢ ܨܘܼܢܨܸܠܵܐ ܥܲܠ ܕܸܒ݂ܚܵܐ ܘܚܸܠܡܲܬ ܕܗܲܝܡܵܢܘܼܬܵܘܟ݂ܘܿܢ، ܒܸܚܕܵܝܵܐ ܝܘܸܢ ܘܒܸܦܨܵܚܵܐ ܥܲܡ ܟܠܵܘܟ݂ܘܿܢ.

¹⁸ ܘܗܲܪ ܗܵܕܟ݂ܵܐ ܐܘܼܦ ܐܲܚܬܘܿܢ ܚܕܹܝܡܘܼܢ ܘܦܨܘܿܚܘܼܢ ܥܲܡܝܼ.

ܛܝܡܬܐܘܣ ܘܐܦܦܪܘܕܝܛܘܣ

¹⁹ ܒܗܹܒ݂ܝܼ ܝܘܸܢ ܒܡܵܪܲܢ ܝܼܫܘܿܥ ܕܒܸܬ ܫܲܕܪܸܢ ܠܟܸܣܠܵܘܟ݂ܘܿܢ ܛܝܼܡܵܬܹܐܘܿܣ ܒܓ̰ܲܠܕܘܼܬܵ‌ܐ، ܕܐܘܼܦ ܐܵܢܵܐ ܫܵܩܠܹܢ ܠܸܒܵܐ ܐܝܼܡܲܢ ܕܫܵܡܥܹܢ ܒܘܼܬ ܕܝܼܵܘܟ݂ܘܿܢ.

²⁰ ܣܵܒܵܒ ܠܲܝܬ ܠܝܼ ܚܲܕ ܐܚܹܪܢܵܐ ܡܐܲܝܟ݂ ܕܝܼܹܗ، ܕܫܲܪܝܼܪܵܐܝܼܬ ܐܝܼܬ ܠܹܗ ܒܘܼܣܵܡܵܐ ܒܫܘܼܠܵܘܟ݂ܘܿܢ،

²¹ ܣܵܒܵܒ ܟܠܵܝܗ‌ܝ ܒܸܛܥܵܝܵܐ ܝܢܵܐ ܒܵܬܪ ܝܘܼܬܪܵܢܵܐ ܕܓܵܢܵܝܗ‌ܝ ܘܠܵܐ ܕܝܼܫܘܿܥ ܡܫܝܼܚܵܐ.

²² ܐܝܼܢܵܐ ܟܹܐ ܝܵܕܥܝܼܬܘܿܢ ܕܛܝܼܡܵܬܹܐܘܿܣ ܡܘܼܚܙܝܼܘܼܗ̇ ܝܠܹܗ ܓܵܢܹܗ ܚܫܝܼܚܵܐ، ܣܵܒܵܒ ܐܲܝܟ݂ ܚܲܕ ܒܪܘܿܢܵܐ ܕܒܵܒܘܼܗ‌ܝ ܥܒ݂ܝܼܕܵܐ ܝܠܹܗ ܚܸܠܡܲܬ ܥܲܡܝܼ ܒܐܹܘܲܢܓܲܠܝܼܘܿܢ.

²³ ܒܘܼܬ ܐܵܗܵܐ ܒܗܹܒ݂ܝܼ ܝܘܸܢ ܕܫܲܕܪܸܢܹܗ ܠܟܸܣܠܵܘܟ݂ܘܿܢ ܒܓ̰ܲܠܕܘܼܬܵ‌ܐ، ܐܝܼܡܲܢ ܕܚܵܙܹܝܢ ܕܵܐܟ݂ܝܼ ܒܸܬ ܗܵܘܝܼ ܫܘܼܠܵܢܝܼ̈.

²⁴ ܘܒܗܹܒ݂ܝܼ ܝܘܸܢ ܒܡܵܪܝܵܐ ܕܐܘܼܦ ܐܵܢܵܐ ܒܓܵܢܝܼ ܒܸܬ ܐܵܬܹܝܢ ܒܓ̰ܲܠܕܘܼܬܵ‌ܐ.

²⁵ ܐܝܼܢܵܐ ܚܫܝܼܒ݂ ܠܝܼ ܕܐܵܢܲܢܩܵܝܬܵ‌ܐ ܝܗܘܵܐ ܕܫܲܕܪܸܢ ܠܟܸܣܠܵܘܟ݂ܘܿܢ ܐܵܦܵܦܪܘܿܕܝܼܛܘܿܣ، ܐܲܚܘܿܢܝܼ ܘܫܲܪܝܼܟܵܐ ܒܦܘܼܠܚܵܢܝܼ ܘܕܲܚܫܵܐ ܥܲܡܝܼ، ܘܫܠܝܼܚܵܐ ܘܦܲܠܵܚܵܐ ܕܝܼܵܘܟ݂ܘܿܢ ܕܫܘܼܕܸܪܵܘܟ݂ܘܿܢ ܐܸܠܝܼ ܕܬܲܓܒܸܪ ܠܣܢܝܼܩܘܼܬ‌ܝܼ.

²⁶ ܫܲܕܘܼܪܹܐ ܝܘܸܢ ܐܸܠܹܗ ܣܵܒܵܒ ܫܲܗܘܘܼܬܹ‌ܐ ܝܠܹܗ ܠܸܚܙܵܝܵܐ ܠܟܠܵܘܟ݂ܘܿܢ، ܘܪܵܒܵܐ ܦܫܝܼܡܵܐ ܝܗܘܵܐ ܐܝܼܡܲܢ ܕܝܕܝܼܥ ܠܹܗ ܕܫܡܝܼܥ ܠܵܘܟ݂ܘܿܢ ܡܪܝܼܥܵܐ ܝܗܘܵܐ.

²⁷ ܡܸܓ̰ܸܕ ܡܪܝܼܥܵܐ ܝܗܘܵܐ ܗܲܠ ܡܵܘܬܵ‌ܐ، ܐܝܼܢܵܐ ܐܲܠܵܗܵܐ ܪܘܼܚܸܡ ܠܹܗ ܥܲܠܘܼܗ‌ܝ، ܘܠܵܐ ܐܲܚܟ̰ܝܼ ܥܲܠܘܼܗ‌ܝ ܐܝܼܢܵܐ ܐܘܼܦ ܥܲܠܝܼ، ܕܠܵܐ ܗܵܘܹܐ ܠܝܼ ܚܲܫܵܐ ܥܲܠ ܚܲܫܵܐ.

²⁸ ܒܘܼܬ ܐܵܗܵܐ ܒܚܘܼܦܵܛܵܐ ܫܘܼܕܸܪܝܼ ܐܸܠܹܗ ܠܟܸܣܠܵܘܟ݂ܘܿܢ ܕܚܵܙܹܝܬܘܿܢ ܠܹܗ ܡܸܢܕܪܸܫ ܘܕܚܵܕܹܝܬܘܿܢ، ܘܕܚܲܫܝܼ ܗܵܘܹܐ ܒܵܨܘܿܪܵܐ.

²⁹ ܒܵܣ ܩܲܒܠܘܼܢ ܠܹܗ ܒܡܵܪܲܢ ܒܟܠ ܚܲܕܘܼܬܵ‌ܐ، ܘܡܝܲܩܪܘܼܢ ܠܐܢܵܫܹ̈ܐ ܡܐܲܝܟ݂ ܕܝܼܹܗ،

³⁰ ܣܵܒܵܒ ܩܘܼܪܒܸܢܵܐ ܝܗܘܵܐ ܠܡܵܘܬܵ‌ܐ ܒܘܼܬ ܚܵܬܸܪ ܕܦܘܼܠܚܵܢܵܐ ܕܡܫܝܼܚܵܐ، ܡܲܬܘܼܒܹܐ ܓܵܢܹܗ ܓܵܘ ܩܹܘܲܢܕܹܢܘܿܣ ܕܬܲܡܸܡ ܗܘܵܐ ܒܵܨܘܿܪܘܼܬܵ‌ܐ ܕܚܸܠܡܲܬܵܘܟ݂ܘܿܢ ܠܟܸܣܠܝܼ.