गनती 34 - पवित्तर बाइबिल

कनान क चउहद्दी

¹ यहोवा मूसा स बात किहस। उ कहेस,

² “इस्राएल क लोगन क इ हुकुम द्या: तू पचे कनान देस मँ आवत अहा। तू लोग इ देस क हरउब्या। तू पचे पूरा कनान देस लइ लेब्या।

³ दक्खिनी अउ तू लोग एदोम क निअरे सीन रेगिस्तान क हींसा पाइ लेब्या। दक्खिनी सिवान मृत-सागर क दक्खिनी छोर स सुरु होइ।

⁴ इ बिच्छूदरे क दक्खिन कइँती स गुजरी। इ सीन रेगिस्तान स होइके कादेसबर्ने तलक जाइ, अउर तब हसरद्दार तथा तब इ अस्मोन स होइके चली।

⁵ अस्मोन स सिवान मिस्र नदी तलक जाइ अउ एकर आखिर भूमध्य सागर प होइ।

⁶ तोहार पच्छिउ क सिवान भूमध्य सागर होइ।

⁷ तोहार उत्तरी सीमा भूमध्य सागर प सुरु होइ अउ होर पहाड़े तलक जाइ। लबानोन मँ

⁸ इ लबानोन मँ हाँर पहाड़े स लबोहामात तलक जाइ क प्रवेस दुआर अहइ। एकर बाद इ सदद तक जाइ।

⁹ तब इ चउहद्दी जिप्रोन क जाइ अउर इ हसेरनान प खतम होइ। इ तरह इ तोहार उत्तरी चउहद्दी होइ।

¹⁰ तोहार पुर्बिहा चउहद्दी एनान प सुरु होइ अउर इ सपान तक जाइ।

¹¹ सपान स चउहद्दी ऐन क पूरब रिबला तलक जाइ। किन्नरेत समुद्दर गलील क सागर क संग क पहाड़ियन क संग सिवान चलत रही।

¹² तब सिवान यरदन नदी क संग संग चली। ऍकर अन्त मृत-सागर प होइ। तोहरे देस क चारिहुँ कइँती क चउहद्दी हिअँइ बा।”

¹³ मूसा इस्राइल क लोगन क हुकुम दिहस, “इहइ उ देस अहइ जेका तू पउब्या। तू लोग नौ परिवार समूहन अउ मनस्से परिवार समूह क आधा मनइयन बरे धरती बाँटइ खातिर ओनके नाउँ क गोटी डउब्या।

¹⁴ रूबेन, गाद अउ क परिवार समूहन मनस्से क आधा परिवार समूह क मनइयन पहिलेन ही आपन प्रदेस लइ लिहे अहइँ।

¹⁵ उ अढ़ाई परिवार समूहन यरीहो क निचके यरदन नदी क पूरब आपन पहँटा लइ लिहे अहइ।”

¹⁶ तब यहोवा मूसा स बात किहेस। उ कहेस,

¹⁷ “इ सबइ उहइ लोग अहइँ जउन भुइँया बाँटइ मँ तोहार मदद करिहीं: याजक एलीआज़ार, नून क पूत यहोसू,

¹⁸ अउ हर एक परिवार समूहन स तू पचे एक ठु नेता चुनब्या। इ लोग भुइँया क बँटवारा करिहीं।

¹⁹ नेता लोगन क नाउँ इ अहइँ: यहूदा क परिवार समूह स युपुन्ने क पूत कालेब।

²⁰ सिमोन क परिवार समूह स, अम्मीहूद क पूत समूएल।

²¹ बिन्यामीन क परिवार समूह स, किसलेस क पूत एलीहदद।

²² दान क परिवार समूह स, योगिल क पूत बुक्की।

²³ मनस्से (यूसुफ क पूते) क परिवार समूह स, एपोद क पूत हन्नीएल।

²⁴ एप्रैम (यूसुफ क पूते) क परिवार समूह स, सिप्तानी क पूत कमूएल।

²⁵ जबूलून क परिवार समूह स, पर्नाक क पूत एलीसापान।

²⁶ इस्साकार क परिवार समूह स, अज्ज़ान क पूत पलतीएल।

²⁷ आसर क परिवार समूह स, सलोमी क पूत अहीदूद।

²⁸ नपताली क परिवार समूह स, अम्मीहूद क पूत पदहेल।”

²⁹ यहोवा इ मनइयन क इस्राएल क लोगन मँ कनान क भुइँया बाँटइ बरे चुनेस।