गनती 26 - पवित्तर बाइबिल

दूसर जन-गणना

¹ बड़की बेरामी क पाछे, यहोवा मूसा अउ हारून क पूत याजक एलीआज़ार स बात किहस।

² उ कहेस, “सबहिं इस्राएली लोगन क गनती करा। हर एक परिवार क लखा अउ बीस बरिस या ओसे जियादा उमर क हर एक मनसेधू क गना जउन इस्राएल क फउज मँ सेवा करइ जोग्ग अहइँ।”

³ इ टेमॅ लोग मोआब क मइदानन मँ सिबिर डाए रहेन। इ जारिको स लइके यरदन नदी क उस पार तलक बसा भवा रहा। एह बरे मूसा अउ याजक एलीआज़ार मनइयन स बात किहन। उ पचे कहेन,

⁴ “तोहका बीस बरिस या ओसे जियादा उमर क हर एक मनसेधू क गनइ चाही। इहइ उ हुकुम रहा जउन यहोवा मूसा क मानइ बरे दिए रहा।” हिआँ ओन इस्राएल क लोगन क सूची बाटइ जउन मिस्र स आए रहेन:

⁵ इ सबइ रूबेन परिवार क लोग रहेन। (रूबेन इस्राएल क पहिलौटी क पूत रहा) इ सबइ परिवार रहेन: हनोक – हनोकी परिवार पल्लू – पल्लियत परिवार

⁶ हेस्रोन – हेस्रोनी परिवार। कर्मी – कर्मी परिवार।

⁷ रूबेन क परिवार समूह मँ उ सबइ परिवार रहेन। जोड़ मँ सब 43,730 मनसेधू रहेन।

⁸ पल्लू क पूत एलीआब रहा।

⁹ एलीआब क तीन पुत्र रहेन-नमूएल, दातान अउ अबीराम। इ याद राखा कि दातान अउ अबीराम दुइ नेता रहेन जउन मूसा अउ हारून क खिलाफ होइ गएन। उ पचे कोरह क मनवइया रहेन अउ कोरा यहोवा क बिरोधी होइ गवा।

¹⁰ उहइ टेमॅ रहा जब धरती फाटि गइ अउ कोरह अउर ओकरे सबहिं मनवइयन क धरती लील लिहेस। सब 250 मनसेधू मरि गएन। इ इस्राएल क सब मनइयन बरे एक संकेत अउ चिताउनी रही।

¹¹ मुला कोरह क परिवार क दूसर लोग नाहीं मरेन।

¹² सिमोन क परिवार समूह क इ परिवार रहेन। नमूएल – नमूएल परिवार यामीन – यामीन परिवार याकीन – याकीन परिवार

¹³ जेरह – जेराही परिवार साऊल – साऊल परिवार।

¹⁴ सिमोन क परिवार समूहन मँ उ सबइ परिवार रहेन। एहमाँ कुल 22,200 मनसेधू रहेन।

¹⁵ गाद क परिवार दलन मँ इ सबइ परिवार रहेन: सपोन – सपोन परिवार हाग्गी – हाग्गी परिवार सुनी – सुनी परिवार

¹⁶ ओजनी – ओजनी परिवार एरी – एरी परिवार

¹⁷ अरोद – अरोद परिवार अरेली – अरेली परिवार

¹⁸ गाद परिवार समूह क उ सबइ परिवार रहेन। एहमँ कुल 40,500 मनसेधू रहेन।

^19-20 यहूदा परिवार समूह क इ सबइ परिवार रहेन: सेला – सेलनी परिवार पेरेस – पेरेस परिवार जेरह – जेरह परिवार (यहूदा क दुइ पूत एर अउ ओनान कनान मँ मर गए रहेन।)

²¹ पेरेस क इ सबइ परिवार रहेन: हेस्रोन – हेस्रोनी परिवार हामूल – हामूल परिवार

²² यहूदा क परिवार समूह क उ सबइ परिवार रहेन। ऍनके कुल मनसेधुअन क गनती 76,500 रही।

²³ इस्साकर क परिवार समूह क इ सबइ परिवार रहेन: तोला – तोला परिवार पुव्वा – पुव्वा परिवार

²⁴ यासूब – यासूब परिवार सिम्रोन – सिम्रोन परिवार

²⁵ इस्साकार परिवार समूह क इ सबइ परिवार रहेन। एहमाँ कुल मनसेधुअन क गनती 64,300 रही।

²⁶ जबूलून क परिवार समूह क इ सबइ परिवार रहेन: सेरेद – सेरेद परिवार एलोन – एलोन परिवार यहलेल – यहलेल परिवार

²⁷ जबूलून क परिवार समूह क उ सबइ परिवार रहेन। एहमाँ कुल मनसेधुअन क गनती 60,500 रही।

²⁸ यूसुफ क दुइ पूत मनस्से अउ एप्रैम रहेन। हर एक पूत आपन परिवार क संग परिवार समूह बन गवा।

²⁹ मनस्से क परिवार मँ इ सबइ रहेन: माकीर – माकीर परिवार। (माकीर गिलाद क बाप रहा।) गिलाद – गिलाद परिवार

³⁰ गिलाद क परिवार क इ सबइ रहेन: ईएजेर – ईएजेर परिवार हेलेक – हेलेकी परिवार

³¹ अस्रीएल – अस्रीएली परिवार सेकेम – सेकेमी परिवार

³² समीदा – समीदा परिवार हेपेर – हेपेरी परिवार

³³ हेपेर क पूत सलोफाद रहा। मुला ओकर कउनो पूत नाहीं रहा। सिरिफ बिटिया रही। ओकरी बिटियन क नाउँ महला, नोआ, होग्ला, मिल्का अउ तिर्सा रहेन।

³⁴ मनस्से परिवार समूह क इ सबइ परिवार रहेन। एहमाँ कुल मनसेधुअन 52,700 रहेन।

³⁵ एप्रैम क परिवार समूह क इ सबइ परिवार रहेन: सूतेलह – सूतेलही परिवार बेकरे – बेकरी परिवार तहन – तहनी परिवार

³⁶ एरान सुतेलह परिवार क रहा। ओकर परिवार एरनी रहा।

³⁷ एप्रैम क परिवार समूह मँ उ सबइ परिवार रहेन। कुल मनसेधुअन क गनती 32,500 रही। उ पचे अइसे सब लोग रहेन जउन जौसेफ क परिवार समूह क रहेन।

³⁸ बिन्यामीन क परिवार समूह क परिवार इ सबइ रहेन: बेला – बेला परिवार असबेल – असबेली परिवार अहीरम – अहीरमी परिवार

³⁹ सपूपाम – सपूपाम परिवार हूपाम – हुपामी परिवार

⁴⁰ बेला क परिवार मँ इ सबइ रहेन: अर्द – अर्दा परिवार नामान – नामानी परिवार

⁴¹ बिन्यामीन क परिवार समूह क इ सबइ परिवार रहेन। एहमाँ मनइयन क कुल गनती 45,600 रही।

⁴² दान क परिवार समूह मँ इ सबइ परिवार रहेन: सूहाम – सूहामी परिवार समूह। दान क परिवार समूह स उ परिवार समूह रहा।

⁴³ सुहमीत परिवार-दल मँ बहोत स परिवार रहेन। एहमाँ मनसेधुअन क गनती 64,400 रही।

⁴⁴ आसेर क परिवार समूह क इ सबइ परिवार रहेन: यिम्ना – यिम्नी परिवार यिस्र – यस्री परिवार बरीआ-बरीआ परिवार।

⁴⁵ बरीआ क इ सबइ परिवार अहइँ: हेबेर – हेबेरी परिवार मल्कीएल – मल्कीएली परिवार।

⁴⁶ (आसेर क एक बिटिया सेरा नाउँ क रही।)

⁴⁷ आसेर क परिवार समूहँ मँ उ सबइ परिवार रहेन। एहमाँ मनसेधुअन क गनती 53,400 रही।

⁴⁸ नेपताली क परिवार समूह क इ सबइ परिवार रहेन: यहसेल – यहसेली परिवार गूनी – गुनी परिवार

⁴⁹ येसेर – येसेरी परिवार सिल्लेम – सिल्लेमी परिवार

⁵⁰ नपताली क परिवार समूह क उ सबइ परिवार रहेन। एहमाँ मनसेधुअन क कुल गनती 45,400 रही।

⁵¹ इ तरह इस्राएल क कुल मनसेधुअन क गनती 6,01,730 रही।

⁵² यहोवा मूसा स कहेस,

⁵³ “हर एक परिवार क धरती दीन्ह जाइ। इ उहइ प्रदेस अहइ जेकरे बरे मइँ बचन दिहेउँ ह। हर एक परिवार समूह ओन मनइयन बरे ढेर क धरती पाइ जइहीं जेनका गना गवा।

⁵⁴ बड़कवा परिवार समूह जियादा भुइयाँ पाई अउ छोटा परिवार समूह कमती भुइयाँ पाई। मुला हर एक परिवार समूह क भुइयाँ मिली, जेकरे बरे मइँ बचन दिहेउँ ह। अउर जउन भुइयाँ क उ पचे पइहीं। उ ओनके गनी भइ गनती क बराबर होइ।

⁵⁵ हर एक परिवार समूह क पाँसा डाइ के आधार प तय कइके धरती दीन्ह जाइ। अउर उ पहँटा क उहइ नाउँ होइ जउन उ परिवार समूह क होइ।

⁵⁶ उ पहँटा जेका मइँ लोगन क देइ क बचन दिहेउँ ह, ओकरे बपोती मँ होइ। इ बड़के अउ छोटके परिवार समूह क दीन्ह जाइ। तय करइ बरे तोहका पाँसा फेंकइ क होइ।”

⁵⁷ लेवी क परिवार समूह भी गना गवा। लेवी क परिवार समूह क इ परिवार अहइँ: गेर्सोन – गेर्सोन परिवार कहात – कहात परिवार मरारी – मरारी परिवार

⁵⁸ लेवी क परिवार समूह स इ भी परिवार रहेन: लिब्नी परिवार हेब्रानी परिवार महली परिवार मुसी परिवार कहात परिवार अम्राम कहात क परिवार समूह क रहा।

⁵⁹ अम्राम क मेहरारु क नाउँ योकेबेद रहा। उ भी लेवी क परिवार समूह क रही। ओकर जन्म मिस्र मँ भवा रहा। अम्रान अउ याकेबेद क पूत हारून अउ मूसा रहेन। ओनकइ एक बिटिया मिरियम भी रही।

⁶⁰ हारून नादाब, अबीहू, एलीआज़ार अउ इतामार क बाप रहा।

⁶¹ मुला नादाब अउ अबीहू मर गएन। काहे की उ पचे यहोवा क उ आगी स भेंट चढ़ाएन जउन ओनके बरे ओनकइ अधिकार नाहीं रहा।

⁶² लेवी परिवार समूह क सबहिं मनइयन क गनती 23,000 रही। मुला इ सबइ इस्राएल क दूसर लोगन क संग नाहीं गना गएन उ धरती नाहीं पाइ सकेन जेका दूसर लोगन क देइ क बचन यहोवा दिहे रहा।

⁶³ मूसा अउ याजक एलीआज़ार इ सबहिं मनइयन क गनेन। उ पचे इस्राएल क लोगन क मोआब क मइदान मँ गनेन। इ यरीहो स यर्दन नदी क पार रहा।

⁶⁴ बहोत टेमॅ पहिले मूसा अउ याजक हारून इस्राएल क मनइयन क रेगिस्तान, मँ गने रहेन। मुला उ सबइ लोग मरि गवा रहेन। मोआब क मइदान मँ मूसा जउन लोगन क गनेन। उ पचे पहिले गना गए भए मनइयन स अलग रहेन।

⁶⁵ इ एह बरे भवा कि यहोवा इस्राएल क लोगन स इ कहे रहा कि उ सबइ रेगिस्तान मँ मरिहीं। ओकर मारइ क पाछे जउन सिरिफ दुइ बचा रहेन उ यपुन्ने क पूत कालेब अउ नून क पूत यहोसू रहेन।