गनती 17 - पवित्तर बाइबिल

यहोवा परमान देत हीं कि हारून महा याजक अहइ

¹ यहोवा मूसा स कहेस,

² “इस्राएल क मनइयन स कहा। आपन लोगन स बारह लकड़ी क कुबरी लइ लेइँ। बारहु परिवार समूहन मँ स हर एक नेता स एक कुबरी ल्या। हर एक मनई क कुबरी प नाउँ लिखि द्या।

³ अउ लेवी क कुबरी प हारून क नाउँ लिखि द्या। बारह परिवार समूहन क हर एक मुखिया क कुबरी होइ चाही।

⁴ इ टहरइ वाली कुबरियन क मिलापवाला तम्बू मँ करार क सन्दूख क अगवा धइ द्या। इ उहइ ठउर अहइ जहाँ मइ तोहसे भेंटत अहउँ।

⁵ मइँ एक मनई क सच्चा होइवाला याजक चुनब। तू जानि लेब्या कि कउने मनई क मइँ चुनेउँ ह। काहे की उ कुबरी मँ नई पाती निकरब सुरु होइ। इ तरह मइँ मनइयन क आपन अउ तोहरे खिलाफ सदा ओराहना देइ स रोकब।”

⁶ तउ मूसा इस्राएली मनइयन स बात किहस। प्रधान मँ स हर एक ओका एक ठु कुबरी दिहस। सब कुबरियन क गनती बारह रही। हर ए परिवार दल क नेता क एक कुबरी ओहमाँ रही। हारून क कुबरी ओहमाँ रही।

⁷ मूसा करार क मिलापवाला तम्बू मँ यहोवा क समन्वा कुबरियन क धइ दिहस।

⁸ अगला दिन मूसा तम्बू मँ घुसा। उ लखेस कि हारून क उ कुबरी, जउन लेवी बंस क रही, सिरिफ एक अइसी रही कि जेहसे नई पाती निकरब सुरु भई रहिन। उ कुबरी मँ डारि फूटि आइन अउ ओहमा बदाम लग गए रहेन।

⁹ एह बरे मूसा यहोवा क ठउर स सबहिं कुबरियन क लइ आवा। मूसा इस्राएल क मनइयन क कुबरियन देखँएस अउ हर एक मनई आपन कुबरी वापिस लइ लिहस।

¹⁰ तब यहोवा मूसा स कहेस, “हारून क कुबरी क करार वाला सन्दूखे क समन्वा रख द्या। इ ओनँ मनइयन क चिताउनी होइ जउन हमेसा मोरे खिलाफ जात हीं। इ ओनकइ मोरे खिलाफ सिकाइत क रोकी। इ तरह उ पचे मरिहीं नाहीं।”

¹¹ तउ मूसा ओन हुकुमन क मानेस जउन यहोवा दिहे रहा।

¹² इस्राएल क मनइयन मूसा स कहेस, “हम पचे जानित ह कि हम सबइ मरि जाब। हम विनास होइ गए। हम सबहिं विनास होइ गवा।

¹³ कउनो मनई जउन यहोवा क पवित्तर ठउर क निअरे आवत ह मरि जाइ। का इ फुरइ बा कि हम सबइ मरि गएन?”