योना 2 - पवित्तर बाइबिल

¹ योना जब मछरी क पेटे मँ रहा, तउ उ आपन परमेस्सर यहोवा क पराथना किहेस। योना कहेस,

² “मइँ गहिर विपदा मँ रहेउँ। मइँ यहोवा क दोहाई दिहेउँ अउर उ मोका जवाब दिहस। मइँ गहिर कब्र क बीचउ बीच रहेउँ। हे यहोवा, मइँ तोहका गोहॅराएउँ अउर तू मोर पुकार सुन्या!

³ “तू मोका समुद्दरे मँ लोकॉइ दिहे रह्या। तोहार ताकतवर लहरियन मोका थपेड़ा मारेन, मइँ समुद्दरे क बीच मँ मइँ गहिरा स गहिरा उतरन चला गएउँ। मोरे चारिहुँ कइँती सिरिफ पानी ही पानी रहा।

⁴ फुन मइँ सोचेउँ, ‘अब मइँ, जाइ क मजबूर हउँ, जहाँ तोहार दृस्टि मोका देख नाहीं पाइ।’ मुला मइँ सहायता पावइ क तोहरे पवित्तर मन्दिर कइँती निहारत रहब।

⁵ “समुद्दर क जल मोका लील लिहेस ह। पानी मोर मुँह बंद कइ दिहस, अउर मोर साँस घुटि गइ। मइँ गहिर समुद्दरे क बीच उतरत चला गएउँ मोरे मूँड़े क चारिहुँ ओर खरपतवार लपट गएन ह।

⁶ मइँ समुद्दरे क तलहटी पइ पड़ा रहेउँ, जहाँ पर्वत जन्म लेत हीं। मोका अइसा लाग, जइसे इ बन्दीघरे क बीच सदा सर्वदा बरे मोह पइ ताला जड़ा अहइँ। मुला हे मोर परमेस्सर यहोवा, तू मोका मोर इ कब्र स निकारि लिहा। हे परमेस्सर, तू मोका जिन्नगी दिहा।

⁷ “जब मइँ बेहोस होत रहेउँ। तब मइँ यहोवा क सुमरन किहेउँ हे यहोवा, मइँ तोहसे बिनती किहेउँ अउर तू मोर पराथनन आपन पवित्तर मन्दिर मँ सुन्या।

⁸ “लोग जउन बेकार मूरतियन क पूजा करत हीं यहोवा क छोड़ दिहेस जउन कि ओन लोगन बरे दयालु रहेन।

⁹ मुक्ति तउ बस सिरिफ यहोवा स आवत ह! हे यहोवा, मइँ तोहका सबइ बलि देब, अउर तोहार गुन गाउब। मइँ तोहार धन्यवाद करब। मइँ तोहार मन्नतन माँगब अउर आपन मन्नतन क पूरा करब।”

¹⁰ फुन यहोवा उ मछरी स कहेस अउर उ योना क झुरान धरती पइ आपन पेटे स बाहेर उगलि दिहस।