यिर्मयाह 47 - पवित्तर बाइबिल

पलिस्ती लोगन क बारे मँ सँदेसा

¹ इ सँदेसा यहोवा क अहइ जउन यिर्मयाह नबी क मिला। इ सँदेसा पलिस्ती लोगन क बारे मँ अहइ। इ सँदेसा, जब फिरौन गज्जा नगर पइ हमला किहस, ओहसे पहिले आवा।

² यहोवा कहत ह: “धियान द्या, दुस्मन क फउजी उत्तर मँ एक संग मोर्चा लगावत अहइँ। उ पचे तटन क बारेत तेज नदी क तरह अइहीं उ पचे देस क बाढ़ सा ढकि लेइहीं। उ पचे नगरन अउर ओनमाँ रह रहे निवासियन क ढकि लेइहीं। उ देस क हर एक रहइवाला मदद बरे चिल्लाई।

³ उ सबइ धावत घोड़न क अवाज सुनिहीं, उ पचे रथन क घरघराहट सुनिहीं। उ पचे पहियन क घरघराहट सुनिहीं। पिता आपन बच्चन क सुरच्छा करइ मँ मदद नाहीं कइ सकिहीं। उ पचे पिता मदद करइ मँ एकदम असमर्थ होइहीं।

⁴ सबहिं पलिस्ती लोगन क नस्ट करइ क समइ आइ ग अहइ। सोर अउर सिदोन क बचे सहायकन क नस्ट करइ क समइ आइ ग अहइ। यहोवा पलिस्ती लोगन क हाली नस्ट करी। कप्तोर द्वीप मँ बचे लोगन क उ नस्ट करी।

⁵ गज्जा क लोग सोक मँ बूड़िहीं अउर आपन सिर मुड़ँइहीं। अस्कलोन क लोग चुप कइ दीन्ह जइहीं। घाटी क बचे लोगो, कब तलक तू पचे आपन क काटत रहब्या?

⁶ “ओ! यहोवा क तरवार, तू रूकिउ नाहीं तू कब तलक मार करति रहबिउ? आपन म्यान मँ लउटि जा, रूका, सान्त ह्वा।

⁷ किन्तु यहोवा क तरवार कइसे बिस्राम लेइ? यहोवा एका आदेस दिहस ह। यहोवा एका इ आदेस दिहस ह कि इ अस्कलोन नगर अउर समुद्र तट पइ हमला करइँ।”