उत्पत्ति 3 - पवित्तर बाइबिल

पाप क सुरु होब

¹ यहोवा परमेस्सर जउन जंगली जनावरन क बनाएस ओहमाँ स सरप सबन सबन त जिआदा होसियार अउर धोखेबाज रहा। उ मेहरारू क धोखा देइ चाहत रहा। सरप मेहरारु स कहेस, “हे मेहरारु! का फुरइ परमेस्सर तोहसे कहेस ह कि तू बगिया क कउनो फल जिन चख्या?”

² मेहरारु सरप स कहेस, “नाही परमेस्सर इ नाहीं कहेस। हम बगिया क पेड़े स फल खाइ सकित ह।

³ मुला एक ठु बृच्छ बाटइ जेकर फल हम पचे नाहीं खाइ सकित। परमेस्सर हम पचन स कहेस ह, ‘तोहका उ बृच्छ क फल नाही खाइ चाही जउन बगिया क बीच मँ बाटइ। तोहका उ बृच्छ क छुअइ तलक नाही चाहीं नाही तउ मरि जाब्या।’”

⁴ मुला सरप मेहरारु स कहेस, “तू मरिब्या नाही।

⁵ परमेस्सर जानत ह कि तू पचे उ बृच्छ स फल खाब्या तउ नीक अउ बुरा क बारे मँ जानि लेब्या। अउर तब तू उहइ होब्या जइसे परमेस्सर अहइ।”

⁶ फुन मेहरारु निहारेस कि बृच्छ सुन्नर बाटइ। उ लखेस कि फल खाइ बरे नीक बाटइ अउ उ बृच्छ ओका बुद्धिमती बनाइ। तउ बृच्छ स कछू फल तोड़ेस अउ खाएस भी। तब उ अपने भतार क कछू फल खाइ बरे दिहस जउन ओकरे संग रहा।

⁷ तब ओनकइ अखियाँ खुलि गएन। दुइनउँ जानेन कि उ पचे नंगा बाटेन। उ दुइनउँ क लज्जा अनुभव भवा। तउ उ पचे अंजीरे क पत्ता लिहेन ओका सिएन अउ आपन नंगापन क ढाँपि लिहेन।

⁸ तब मनसेधू अउ मेहरारु साँझ क ठंडी बयार मँ यहोवा परमेस्सर क आवइ क अवाज बगिया मँ अनकेन। उ पचे बगिया मँ बृच्छन क बीच लुकाइ गएन,

⁹ यहोवा परमेस्सर गोहराइके मनई स पूछेस, “तू कहा बाट्या?”

¹⁰ मनई जवाब दिहेस, “मइँ तोहरे टहरइ क अवाज बगिया मँ सुनेउँ अउ मइँ डेराइ गएउँ काहेकि मइ नंगा रहेउँ। ऍह बरे मइँ लुकाइ गएउँ।”

¹¹ यहोवा परमेस्सर मनई स पूछेस, “तोहका कउन बताएस ह कि तू नंग धड़ंग अहा? तू कउने वजह स सरमाइ गया ह? का तू उ बिसेख बृच्छ क फल चख्या ह जेका मइँ तोहका न खाइ बरे हुकुम दिहेउँ ह?”

¹² तब मनई कहेस, “तू जउन मेहरारु मोरे बरे बनया ह उ उहइ बृच्छ स मोका फल दिहस ह, अउर मइँ ओका खाएउँ ह।”

¹³ फुन यहोवा परमेस्सर मेहरारु स कहेस, “इ तू का किह्या ह?” मेहरारु कहेस, “सरप मोका बगदाइ दिहस। उ मोका मूरख बनाएस अउर मइँ फल चखि लिहेउँ।”

¹⁴ तब यहोवा परमेस्सर कीरा स कहेस, “तू इ बहोतइ बुरा किहा। ऍह बरे तोहार बुरा ही होइ। दूसर जनावर क बनिस्बत तोहार बहोतइ बुरा होइ। तू आपन पेट क सहारा रेगंइ बरे बेबस होब्या। अउर तू धूरि फाँकइ क बेबस होब्या जिनगी क सब दिन मँ।

¹⁵ मइँ तोहका अउ मेहरारु क एक दूसरे क दुस्मन बनाउब। तोहार गदेलन अउ ऍकर बच्चा आपस मँ दुस्मन होइहीं। तू ऍनकइ गदेलन क गोड़े मँ डसब्या अउ उ तोहार मूँड़ कुचल देइहीँ।”

¹⁶ तब यहोवा परमेस्सर मेहरारु स कहेस, “मइँ तोहका गाभिन होइ क हालत मँ बहोतइ दुखी करब। अउर जब तू लरिका पइदा करिबिउ, तोहका बहोत जियादा पीरा होइ। तू आपन भतार क बहोतइ चहिबिउ, मुला उ तोह प प्रभुताई करी।”

¹⁷ तब यहोवा परमेस्सर मनई स कहेस, “मइँ हुकुम दिहेउँ रहे कि तू विसेख बृच्छ क फल जिन खाया। मुला तू आपन मेहरारु क बात सुन्या अउर उ बृच्छ क फल खाया ह। ऍह बरे मइँ तोहरे कारण इ भुइँया क सराप देत हउँ आपन जिन्नगी क पूरे टेमँ तलक उ भोजन बरे जउन धरती देत ह तोहका कठिन मेहनत करइ क पड़ी।

¹⁸ मुला धरती तोहरे बरे काँटन अउर खर-पतवार पइदा करी। अउर तू ओन पौधन क खाब्या जउन खेत मँ उगत ह।

¹⁹ तू आपन खइया बरे कठोर मेहनत करब्या। तू तब तलक मेहनत करब्या जब तलक माथा प पसिना न आवइ। तू तब तलक कठोर मेहनत करब्या जब तलक तोहार मउत न आइ जाइ। उ टेमँ तू दूसरी दाईं माटी बन जाब्या। जब मइँ तोहका बनाए रह्यों, तबहि तोहका माटी स बनाए रह्यों अउर जब तू मरिब्या तब तू उहइ माटी मँ फुन मिलि जाब्या।”

²⁰ आदम आपन मेहरारु क नाउँ हव्वा राखेस, काहेकि सब मनइयन क उ आदि महतारी रही।

²¹ यहोवा परमेस्सर मनई अउ ओकरे मेहरारु बरे जनावर क चाम स पोसाक बनाएस। तब यहोवा इ सबइ पोसाक ओनका दिहस।

²² यहोवा परमेस्सर कहेस, “लखा, मनई हमरे जइसा होइ गवा अहइ। मनई अच्छाई अउ बुराई जानत ह अउर अब मनई जिन्नगी क बृच्छ स भी फल लइ सकत ह। अगर मनई उ फले क खाई तउ सदा ही जिअत रही।”

²³ तब यहोवा परमेस्सर मनई क अदन क बगिया तजइ बरे बेबस किहस। जउने माटी स आदम बना रहा उ भुइँया प आदम क कठोर मेहनत करइ क पड़ी।

²⁴ परमेस्सर आदम क बाग स बाहेर खदेर दिहस। तब परमेस्सर करूब सरगदूतन क बगिया क फाटक क रखवारी बरे राखेस। उ एक आगी क तरवार भी राखेस। इ तरवार जिन्नगी क बृच्छ क राह क रखवारी करत भइ चारिहुँ कइँती चमकत रही।