दूसर इतिहास 4 - पवित्तर बाइबिल

मंन्दिर क सज्जा

¹ सुलैमान वेदी बनावइ बरे काँसा क उपयोग किहस। उ काँसा क वेदी बीस हाथ लम्बी, बिस हाथ चउड़ी अउर दस हाथ ऊँच रही।

² तब सुलैमान टेधरे काँसे क उपयोग एक बिसाल हौज बनावइ क बरे किहस। बिसाल हौज गोल रहा अउर एक सिरे स दूसर सिरे तलक एकर माप दस हाथ रही अउर इ पाँच हाथ ऊँच अउर तीस हाथ घेरे वाला रहा।

³ बिसाल हौज़ क खाले मँ बर्धन क आकृतियन क दुई कतारन मँ जउन हौज़ क चारिहुँ कइँती दस हाथ ढाँपि लिहेन, बनान गएन। उ सबइ तब ढाले गएन जब हौज़ बनावा ग रहा।

⁴ उ बिसाल काँसा क हौज़ बारह बर्धन क बिसाल प्रतिमा पइ स्थित रहा। तीन बर्धन उत्तर कइँती लखत रहेन। तीन बर्धन पच्छिम कइँती लखत रहेन। तीन बर्धन दक्खिन कइँती लखत रहेन। तीन बर्धन पूरब कइँती लखत रहेन। बिसाल काँसा क हौज़ एन बर्धन क ऊपर रहा। सबहिं बर्धन अपने पिछवड़े केन्द्र कइँती रखके खड़ा रहा।

⁵ बिसाल काँसा क तलाव चार अंगुल मोटा रहा। बिसाल तलाव क सिरा एक पियाले क सिरे क नाई रहा। सिरा खिली भइ लिली क तरह रहा। एहमाँ छाछठ किलो लीटर आइ सकत रहा।

⁶ सुलैमान दस चिलमचियन बनाएस। उ बिसाल काँसे क हौज़ क दाई कइँती पाँच चिलमचियन रखेस अउर सुलैमान काँसा क बिसाल हौज़ क बाईं कइँती पाँच चिलमचियन रखेस। एन चिलमचियन क उपयोग होमबलि बरे चढ़ाई जाइवाली चिजियन क धोवइ बरे होब रहा, किन्तु बिसाल हौज़ क उपयोग बलि चढ़ावइ क पहिले याजकन क नहाइ बरे होब रहा।

⁷ सुलैमान क निर्देस क अनुसार सोना क दस डीबट बनाएस अउर ओनका मन्दिर मँ रख दिहस: पाँच दाहिन कइँती अउर पाँच बाईं कइँती।

⁸ सुलैमान दस मेजन बनाएस अउर ओनका मन्दिर मँ धरेस। मन्दिर मँ पाँच ठु मेजन दाई रहिन अउर पाँच मेजन बाईं। सुलैमान सौ चोलमचियन बनावइ क बरे सोना क उपयोग किहस।

⁹ सुलैमान याजकन बरे आँगन बनाएन, बड़ा आँगन अउर दरवाजन ओकरे बरे बनाएस। उ आँगन मँ खुलइवाले दरवाजन क मढ़इ बरे काँसे क उपयोग किहस।

¹⁰ तब उ बिसाल काँसे क तलाव क मन्दिर क दक्खिन पूरब कइँती दाइँ कइँती रखेस।

¹¹ हूराम बर्तन, बोल्चन अउर खोरन क बनाएस। तब हूराम परमेस्सर क मन्दिर मँ सुलैमान बरे अपने काम खतम किहेस।

^12-16 हूराम दुइनउँ खम्भन अउर दुइनउँ खम्भन क सीर्सभाग क दुइनउँ बिसाल खोरन क बनाए रहा। हूराम दुइनउँ खम्भन क सीर्सभाग कि दुइनउँ बिसाल खोरन क ढकइ बरे सजावटी जाल क दुइ सेट भी बनाए रहा। हूराम चार सौ अनार दुई सेट सजावटी जाल बरे बनाएस। (हर एक जाल क बरे अनारन क दुइ पंक्तियन रहिन। दुइनउँ खम्भन क सीर्सभाग पइ बिसाल खोरन जाल स ढके रहेन।) हूराम आधार दण्ड अउ ओनके ऊपर क पियालन क भी बनाएस। हूराम एक बिसाल काँसे क तलाव अउ तलाव क खाले बारह बर्धन बनाएस। हूराम बर्तन, बेल्चन, काँटन अउर सबहिं चिजियन राजा यहोवा क मन्दिर बरे राजा सुलैमान क अनुरोध क अनुसार बनाएस। इ सबइ चिजियन कलई चढ़े काँसे क बनी रहिन।

¹⁷ राजा सुलैमान पहिले एन चिजियन क माटी क साँचे मँ डारेस। इ सबइ साँचन सुक्कोत अउर सरेदा नगरन क बीच यरदन घाटी मँ बने रहेन।

¹⁸ सुलैमान इ सबइ ऍतनी जियादा तादाद मँ बनाएस कि कउनो मनई उपयोग मँ लाए गए काँसा क तउलइ क जतन नाहीं किहस।

¹⁹ सुलैमान परमेस्सर क मन्दिर बरे भी चिचियन बनाएस। सुलैमान सुनहरी वेदी बनाएस। उ उ सबइ मेजन बनाएस जेन पइ उपस्थिति क रोटियन रखी जात रहिन।

²⁰ सुलैमान डीबट अउ ओनकर दिया निखालिस सोना क बनाएस। बनी भइ जोजना क मुताबिक डीबटन क पवित्तर जगह क समन्वा भीतर बारब रहा।

²¹ सुलैमान फूलन, दीयन अउ चिमटन क बनावइ बरे निखालिस सोना क उपयोग किहस।

²² सुलैमान झालरन, पियालन, कड़ाहियन अउ धूपदान बनावइ बरे निखालिस सोना क उपयोग किहस। सुलैमान मन्दिर क दरवाजन, सब स जियादा पवित्तर जगह अउर मुख्य बिसाल कच्छ क भीतरी दरवाजन क बनावइ बरे निखालिस सोने क उपयोग किहस।