दूसर इतिहास 27 - पवित्तर बाइबिल

यहूदा क राजा योताम

¹ योताम पचीस बरिस क रहा जब उ राजा भवा। उ सोलह बरिस तलक यरूसलेम मँ हुकूमत किहस। ओकरी महतारी क नाउँ यरुसा रहा। यरूसा सादोक क बिटिया रही।

² योताम उ काम किहस जेका यहोवा नीक समुझत ह। उ परमेस्सर क आग्या क पालन वइसे ही किहस जइसे ओकर बाप उज्जिय्याह किहे रहा। मुला योताम यहोवा क मन्दिर मँ सुगन्धि बारइ क बरे उहइ तरह नाहीं घुसा जइसे ओकर बाप घुसा रहा। मुला लोग बुरा काम करब जारी रखेन।

³ योताम यहोवा क मन्दिर क ऊपरी दुआर क दुबारा बनाएस। उ ओपेल नाउँ क जगह पइ बहोत स निर्माण कार्य सुरू किहस।

⁴ योताम यहूदा क पहाड़ी पहँटा मँ नगर बनाएस। योताम मीनार अउर किलन जंगलन मँ बनाएस।

⁵ योताम अम्मोनी लोगन क राजा अउर ओकरी फउज क खिलाफ लड़ा अउ ओनका हराएस। एह बरे हर साल तीन बरिस तलक अम्मोनी लोग योताम क पौने चार टन चाँदी, बासठ हजार बुसल गोहूँ अउर बासठ बुसल जौ देत रहेन।

⁶ योताम सक्तीसाली होइ गवा काहेकि उ बिस्सास पूर्वक यहोवा, अपने परमेस्सर क आग्या क पालन किहस।

⁷ योताम दूसर जउन कछू भी किहस अउ ओकर सबहिं जुद्ध यहूदा अउ इस्राएल क राजा लोगन क इतिहास क पुस्तक मँ लिखे भए अहइँ।

⁸ योताम जब राजा भवा, पच्चीस बरिस क रहा। उ यरूसलेम मँ सोलह बरिस हुकूमत किहस।

⁹ तब योताम मरा अउर अपने पुरखन क संग दफनावा गवा। लोग ओका दाऊद क नगर मँ दफनाएन। योताम क जगह पइ आहाज राजा भवा। आहाज योताम क पूत रहा।