MATIUS 2 - Alkitab Engrok Hik

Mai Bekaji Perloi Naikek Yesus

¹ Yesus Kiyos ku pekan Betlehem ku lengrik Yudea, ku mase Raja Herodes Agong kimemerintah. Telas Yesus Kiyos, mong mai de bekaji perloi ju Timur naihol nu kote Yerusalem

² ru naitanya, “Ku belok Ilei Sanget de Kiyos sebegei Raja mai Yahudi? Jibakek Iperloi ya kiterbet ku Timur, jadi jihol nu madeh jiha-sembah ha Kek.”

³ Bile Raja Herodes Agong kicerngai tentang hal ajeh, kek kijadi ihad susah isengik. Dikdij mai ku kote Yerusalem pen naijadi susah sengik.

⁴ Raja Herodes Agong kicereg dikdij raknak imam agame Yahudi ru guru Hukom Taurat lalu kitanya, “Ku belok Peselamat de bijanji ya Jenang ajeh Kiyos?”

⁵ Naiberlag, “Ku pekan Betlehem ku lengrik Yudea kerana mong nabi ya kicot tentang hal ajeh begei adeh:

⁶ Jenang Kiurok, ‘Betlehem ku lengrik Yudea, hek pek ilei de paleng macot ku engkap pekan-pekan de entoi ku Yudea kerana ju hek doh hol numom Pemimpen de doh Kipimpen ha sengoi-sengoi Eng, Israel.’ ”

⁷ Telas ajeh Raja Herodes Agong kibeh perjumpaan serakngek ru mai de bekaji perloi. Ju enai ajeh, kek kipanei ku arik ma perloi ajeh mula-mula biburuk.

⁸ Lalu Raja Herodes Agong kior mai bekaji perloi ajeh naiet nu pekan Betlehem supaye naikek cermat ha Sanget ajeh. Kek kior juga, bile ya naiburuk Sanget ajeh, gah ajeh hod naipasal nu kek supaye kek juga buleh kiet kisembah Sanget ajeh.

^9-10 Jadi, enai pen naiet telas naicerngai bengwal raja ajeh. Ku kateh ceknip enai ajeh, naiburuk nij perloi de pernah naibakekjeh lalu enai ihad naikerakmik. Perloi ajeh kicip canuk lei kibehenti ku kemil tempat Sanget ajeh mong.

¹¹ Enai pen naimuj nu kateh deg ajeh ru naiburuk Sanget ajeh ru Iamek Maria. Enai naisujod ru naisembah ha Sanget ajeh, lalu naiperhol mas, kijai, ru mur, ru naiog dikdij hadiah ajeh nu Kek.

¹² Telas ajeh ku kateh empok, Jenang Kibesat nu enai supaye pek nailos nij nu Raja Herodes Agong. Kerana ajehloh, enai naijog nu lengrik liknai naijoi nong kilek.

Peringak Yusuf Naijar nu Lengrik Mesir

¹³ Ya telas mai bekaji perloi ajeh naiet, malikat TUHAN kiperneng ilei ku kateh empok Yusuf ru kiurok, “Kosloh ru en jar Sanget ajeh ru Iamek nu lengrik Mesir. Geiloh ku pajeh lei ngog panei nu hek doh nij kerana Raja Herodes Agong doh kiog perintah kaha-kek Sanget ajeh ru kaha-perdat Kek.”

¹⁴ Lalu Yusuf pen kikos ku kelem ajeh juga ru kien jar Sanget ajeh ru Iamek nu lengrik Mesir.

¹⁵ Naigei ku lengrik Mesir lei Raja Herodes Agong kidat. Hal ajeh kitejadi begei de biurok ya TUHAN melalui Inabi, “Eng Ngpangel Kenon Eng hol ju lengrik Mesir.”

Sesanget ku Pekan Betlehem Biperdat

¹⁶ Bile Raja Herodes Agong kipanei mai de bekaji perloi nailenglod kek, kek pen ihad kibelal. Lalu kiog perintah supaye dikdij sesanget keral ku pekan Betlehem ru ku dikdij tempat de rek beng Betlehem, de umur enai nar tahut ru kerop ju nar tahut biperdat. Kerana, hal ajeh kena ru penasal mai de bekaji perloi ha mase perloi ajeh biburuk entemjeh.

¹⁷ Hal sesanget biperdat ajeh tejadi begei de biurok ya Nabi Yeremia,

¹⁸ “Ku pekan Rama hicerngai engrok jengnam serayog de ihad sedeh. Rahel kijap ha ikekenon ru kinyek behenti ijengnam kerana ikekenon dij ya tiktok.”

Peringak Yusuf Naijog ju Lengrik Mesir

¹⁹ Telas Raja Herodes Agong kidat, malikat TUHAN kiperneng ilei ku kateh empok Yusuf. Ku mase ajeh, Yusuf lekat mong ku lengrik Mesir.

²⁰ Malikat ajeh kiurok, “Kosloh ru enloh Sanget ajeh ru Iamek jog nu lengrik Israel kerana mai de naiha-perdat Sanget ajeh ya naidat.”

²¹ Yusuf pen kikos lalu kien Sanget ajeh ru Iamek jog nu lengrik Israel.

²² Tapi bile Yusuf kicerngai gah tentang Arkelaus kenon Raja Herodes Agong ya kiganti iapak kijadi raja lengrik Yudea, kek kisengoh kaha-jog nu majeh. Yusuf kiterima nij ernor ku kateh iempok lalu kiet nu lengrik Galilea.

²³ Kek kigei ku pekan imuh Nazaret. Begei ajehloh kitejadi ma de biurok ya nabi-nabi tentang Sanget ajeh, “Kek doh bisebot Sengoi Nazaret.”