MARKUS 8 - Alkitab Engrok Hik

Yesus Kiog Caknak nu Empat Ribu Urag

¹ Pek liu ju kenjeh mong nij mai jengoi de naihol naibekumpol. Kerana enai pek mong ma-ma de naiha-cak, Yesus pen Kicereg Ipengikot-pengikot ru Kiurok,

² “Eng Ngyayak nu mai jengoi adeh. Ya nik arik naibesama ru Eng, ru pek mong ma-ma de naiha-cak.

³ Amen Ngor naijog ru cengwag, enai doh naidendat ku semakdek nong kerana mong ju engkap enai adeh de naihol ju kennyak.”

⁴ Tapi pengikot-pengikot Yesus naiurok nu Kek, “Ku belok hiha-berkep caknak de cukop ha dikdij sengoi adeh? Tempat adeh nyak.”

⁵ Tapi Yesus Kitanya nu enai, “Merip ijengoi ruti de mong ku engkek hunen?” “Tujoh kebek,” naiberlag.

⁶ Yesus Kior mai jengoi naigei ku kemil tik. Kek Kikot tujoh kebek ruti ajeh, Kiucap syukor nu Jenang, Kiceh, ru Kiog nu Ipengikot-pengikot supaye naibahagi nu mai jengoi. Ipengikot-pengikot pen naibeh begei ajeh.

⁷ Enai juga mong memerip ikor kak macot. Telas Yesus Kiucap syukor nu Jenang, Kek Kior Ipengikot-pengikot naibahagi kak ajeh nu mai jengoi juga.

^8-9 Mong kira-kira empat ribu urag mai ku pajeh. Dikdij sengoi ajeh naicakcak lei naibakhek. Telas ajeh pengikot-pengikot Yesus naikumpol lembeh caknak ajeh ijengoi lei tujoh bakol. Lalu Yesus Kior mai jengoi ajeh naijog.

¹⁰ Telas taleh ju kenjeh, Kek Kihuj perahu besama ru Ipengikot-pengikot lalu naiet nu kawasan Dalmanuta.

Mai Farisi Naisemanj Yesus Kibeh Tanda Ajaib

¹¹ Mai Farisi naiterbuk nu Yesus ru enai mula naibejawab ru Kek. Enai naiha-uji Kek, jadi naisemanj Yesus Kibeh tanda ajaib untok Kaha-pebukti Kek Kihol ju Jenang.

¹² Bile Yesus Kicerngai ajeh, Kek Kimengeloh lalu Kiurok, “Yama mai jaman adeh naisemanj Ngbeh tanda ajaib? Cerngailoh abor, pek mong ma-ma tanda de doh biog nu enai!”

¹³ Yesus Kidek ju enai lalu Kihuj nij nu perahu ru Kiet nu englag tasek.

Ragi Mai Farisi ru Ragi Herodes

^14-15 Ku kateh ceknip enai ajeh Yesus Kiurok, “Bejaga-jagaloh nu ragi mai Farisi ru ragi Raja Herodes Antipas.” Ku mase ajeh, pengikot-pengikot Yesus naisip engen ruti. Had mong nukebek ruti taleh ku perahu.

¹⁶ Jadi, naibelwal ratak liknai, “Kek Kiurok begei ajeh kerana hik pek hien ruti.”

¹⁷ Yesus Kipanei ma de naibelwal ratak liknai. Jadi, Kiurok, “Engkebelwal tentang hal pek engkeen ruti. Hal ajeh kiternyol engkek mimang pek engkepaham ru pek engkereti. Sengik engkek mimang lekat tetutop.

¹⁸ Engkek mong mat tapi pek engkebakek. Engkek mong entag tapi pek engkecerngai. Engkek ya engkesipka?

¹⁹ Eng Ngbercak lima ribu urag ya lima kebek ruti. Merip bakol ilembeh caknak de engkekumpol?” “Due belas,” naiberlag.

²⁰ Yesus Kitanya nij, “Eng juga Ngbercak empat ribu urag ya tujoh kebek ruti. Merip bakol ilembeh caknak de engkekumpol?” “Tujoh,” naiberlag.

²¹ Lalu Yesus Kiurok nu enai, “Engkek lekat pek engkereti. Engkek pek perlu engkerisau tentang hal pek cukop caknak!”

Yesus Kiperbor Sengoi Buta ku Betsaida

²² Yesus ru Ipengikot-pengikot nailei nu pekan Betsaida. Ku pajeh, memerip urag naien numom sengoi buta nu Yesus. Naimerayu supaye Yesus Kidek Iteg ku sengoi buta ajeh ru Kiperbor kek.

²³ Yesus pen Kicap teg sengoi buta ajeh lalu Kien kek hol ju pekan. Telas ajeh Yesus Kitoh nu mat sengoi ajeh ru Kidek Iteg ku mat sengoi ajeh. Yesus Kitanya, “Habakek ma-maka?”

²⁴ Sengoi ajeh cuba kaha-neng nu ikelileg ru kiurok, “Hooh, ngbakek sengoi tapi enai ajeh ngneng begei jehuk de ceknip.”

²⁵ Yesus Kidek Iteg nukali nij ku mat sengoi ajeh. Mat sengoi ajeh tebuka ru ya bor. Kek dapat kinengneng ru ihad terang.

²⁶ Lalu Yesus Kiurok, “Jogloh nu madeg. Agok muj nij nu pekan ajeh.”

Neaku Petrus tentang Yesus

²⁷ Telas ajeh Yesus ru Ipengikot-pengikot naiet nu kampug-kampug beg kote Kaisarea Filipi. Ku kateh ceknip enai ajeh Yesus Kitanya nu enai, “Amen hijoi engrok mai, Eng adeh bok?”

²⁸ Naiberlag, “Mong mai de naiurok Enjen Yohanes Pembaptis. Mong mai kilek de naiurok Enjen adeh Nabi Elia, ru mong juga mai naiurok Enjen numom ju nabi.”

²⁹ Yesus Kitanya nij nu enai, “Tapi ku engkek, Eng adeh bok?” Petrus kiberlag, “Enjen adeh Peselamat de bijanji ya Jenang!”

³⁰ Lalu Yesus Kiget naipasal nu bok-bok pen Ilei ajeh bok.

Yesus Kipasal tentang Iseniksa ru Idanan

³¹ Telas ajeh Yesus mula Kiajar Ipengikot-pengikot tentang Diri Ilei Sendiri. Kek Kiurok, “Eng Kenon Manusia mesti Ngkena jeoi seniksa ru bitentang ya raknak-raknak mai Yahudi, raknak-raknak imam agame Yahudi, ru guru-guru Hukom Taurat. Eng doh biperdat tapi telas nik arik Eng doh Ngkos nij ju danan.”

³² Yesus Kibeteros-terang Kipasal tentang hal ajeh nu enai. Kerana ajeh, Petrus kitarek Yesus nu ibeg ru kitegor Kek.

³³ Yesus Kiceleg ru Kineng nu Ipengikot-pengikot lalu Kitegor Petrus, “Et ju kendeh, Ibles! Peniker hek peniker manusia, pek peniker Jenang!”

³⁴ Telas ajeh Yesus Kicereg Ipengikot-pengikot ru mai jengoi ku pajeh. Kek Kiurok nu enai, “Bok taleh de kaha-joi Eng, kek hodloh kiwes icare sinui de kipenteng ha diri ilei sendiri ru kek hodloh kitanggong senusah hamapen hod kidat.

³⁵ Bok imai de kihok inyawe, inyawe ajeh doh nyep. Tapi bok imai de nyep inyawe ha Eng ru ha Gah Bor, kek doh kikep sinui de lei ditehjeh.

³⁶ Pek mong iguna amen numom kikep dikdij kenaya dunia adeh tapi nyep inyawe

³⁷ kerana pek mong ma-ma pen ku dunia adeh de dapat kiganti ha nyawe.

³⁸ Mai jaman adeh ya gujehat ru pek naipecaya nu Jenang. Bok imai ju enai ajeh de naiselsel naiha-aku Eng ru naiha-aku neajar Eng, Eng Kenon Manusia juga doh Ngselsel Ngha-aku enai bile Eng Nghol nij ku kateh kemuliean Menek Eng besama malikat-malikat de suci.”