MARKUS 7 - Alkitab Engrok Hik

Adat Jenang Rak

¹ Ku nanek arik, mong memerip urag mai Farisi ru guru-guru Hukom Taurat ju kote Yerusalem naihol nu Yesus.

² Enai naineng memerip urag pengikot Yesus pek naijoi adat agame Yahudi mase naicakcak. Ipengikot-pengikot ajeh pek naibeh upecare siknuj teg sebelom naicakcak.

³ (Dikdij mai Yahudi temasok mai Farisi pek naicakcak amen pek naisuj teg joi adat jenang rak enai.

⁴ Bile naijog ju tempat kengnem, enai hod naisuj berog enai canuk sebelom naicakcak. Enai juga naijoi jeoi nij peratoran kilek begei ha care siknuj cawan, mangkok, ru periok tembage.)

⁵ Kerana ajeh, dikdij mai Farisi ru guru Hukom Taurat ku pajeh naitanya nu Yesus, “Yama pengikot-pengikot Hek naicak ru teg de pek besiknuj? Yama pek naijoi adat jenang rak hik?”

⁶ Yesus Kiberlag, “Engkek mai de nekbepure-pure! Mimang betol ma de biurok ya Nabi Yesaya mase kibenubuat tentang engkek! Ku kateh ikitab kicot, ‘Begei adehloh engrok Jenang: Sengoi-sengoi adeh naihormat Eng had ya nyinyui enai taleh tapi sengik enai nyak ju Eng.

⁷ Sie-sie taleh naisembah Eng kerana naiajar nu mai kilek neajar de beasal ju peraturan manusia apeka neajar ju Eng!’

⁸ Begei ajehloh engkek juga. Ma de Jenang Kior pek engkebeh tapi engkek joi ernor manusia.”

⁹ Lalu Yesus Kiurok nij, “Engkek ihad panei engketulak ernor Jenang untok engkepetahan ha neajar liengkek sendiri.

¹⁰ Nabi Musa ya kiog ernor Jenang, ‘Hormatloh keneng-menek hek,’ ru ‘Mai de kihina ha ikeneng-menek mesti bihukom dat.’

^11-12 Tapi engkeajar nu mai begei adeh: Numom buleh kiurok nu ikeneng-menek, ‘Ma de patot ngog nu jerkek ya ngog nu Jenang.’ Jadi, engkeajar mai pek payah naitulog keneng-menek enai nij.

¹³ Begei ajehloh engkek petiktok engrok Jenang kerana engkeha-joi adat jenang rak liengkek de engkepeturun nu mai. Jeoi nij pekare de begei ajeh ya engkebeh.”

Hal-hal de Kipekutor Sengoi

¹⁴ Telas ajeh Yesus Kicereg nij mai jengoi ajeh ru Kiurok nu enai, “Cerngailoh ru retiloh!

¹⁵ Ma de kimuj nu kateh numom pek kipekutor sengoi ajeh. Tapi ma de kihol ju numom ajehloh de kipekutor kek. [

¹⁶ Amen engkek beentag, cerngailoh!]”

¹⁷ Bile Yesus Kidek mai jengoi ajeh lalu Kimuj nu kateh deg, Ipengikot-pengikot naitanya nu Kek ma maksod neajar de Kiajar ajeh nek.

¹⁸ Yesus Kiurok nu enai, “Pek engkepaham jugaka? Ma de kimuj nu kateh numom ju luar pek kipekutor mai

¹⁹ kerana caknak pek kimuj nu kateh sengik tapi kimuj nu kateh ej lalu bicoh.” (Ya Ibengwal ajeh Yesus Kiurok dikdij caknak buleh bicak.)

²⁰ Lalu Yesus Kiurok nij, “Ma de hol ju numom ajehloh de kibeh sengoi ajeh kutor

^21-22 kerana ju sengikloh hol peniker jehat begei ha heknod seks de niknej, siksij, perdat mai kilek, zinah, tenamak, bahneh hal de jehat, lenglod, bahneh pekare de cengor ru behej, cemburu, pitnah ha mai kilek, sumbong ru galeh.

²³ Dikdij hal jehat ajeh kihol ju kateh sengik ru hal ajehloh de kipekutor sengoi.”

Iman Numom Kerdor Pek Yahudi

²⁴ Telas ajeh Yesus Kiet ju tempat ajeh lalu Kituju nu kawasan kote Tirus. Kek Kimuj nu kateh nanek deg ru Kinyek mai jengoi naipanei Kek mong ku pajeh tapi pek buleh Kiberencep.

²⁵ Ku pajeh mong numom kerdor de ikenon kerdor bisangrog ya nyanik. Bile kicerngai tentang Yesus, kek teros kiet nu Yesus lalu kisujod ku Ingar.

²⁶ Kerdor ajeh mai Yunani ju kawasan Fenisia ku lengrik Syria. Kek kimerayu supaye Yesus Kiperet nyanik de besangrog ikenon.

²⁷ Tapi Yesus Kiberlag, “Pek patot jikot caknak kekenon lijik lalu jipej nu cok. Patot jibercak kekenon lijik canuk lei naibakhek.”

²⁸ Kerdor ajeh kiberlag, “Betol, Jen. Tapi cok ku kerop mije pen kicak sesak caknak de biperjer ya sanget!”

²⁹ Yesus Kiurok nu kek, “Berenglag hek ajeh bor! Jogloh madeg. Nyanik ya kihol ju kenon kerdor hek.”

³⁰ Bile kerdor ajeh kilei nu imadeg, kek kineng ikenon kidakdak ku katel ru nyanik ajeh ya kihol ju sanget ajeh.

Yesus Kiperbor Numom Sengoi de Pekak ru Bisu

³¹ Telas ajeh Yesus Kiet ju kawasan kote Tirus, Kilalu kote Sidon ru kawasan Dekapolis ru Kilei nu Tasek Galilea.

³² Ku pajeh mong memerip urag de naien nu Kek numom sengoi de pekak ru bisu. Naimerayu supaye Yesus Kidek Iteg ku sengoi ajeh ru Kiperbor kek.

³³ Yesus Kien kek nyak ju mai jengoi lalu Kipermuj Ijaras teg nu kateh rimnar entag sengoi ajeh. Telas ajeh Yesus Kitoh ku teg Ilei Sendiri lalu Kipep lentag sengoi ajeh.

³⁴ Sambel Kiceog nu langit ru Kitarek Ilehem, Yesus Kiurok nu sengoi ajeh, “Effata!” de imaksod, “Tebukaloh!”

³⁵ Sarik jijeh entag sengoi ajeh kitebuka, ilentag pen bor, lalu kek pen mula kibelwal bor.

³⁶ Yesus Kiget naipasal hal ajeh nu mai kilek. Tapi maken Kiget, maken naicerite.

³⁷ Dikdij sengoi de ceringai ha pekare ajeh cengang empag enai. Naiurok, “Ihad bor ma de Kibeh! Kek dapat Kiperbor mai pekak lei dapat kiceringai ru mai bisu dapat kibelwal!”