MARKUS 16 - Alkitab Engrok Hik

Yesus Kikos ju Idanan

¹ Ku dui Sabtu bile arik Sabat ya lalu, Maria mai Magdalena, Salome, ru Maria amek Yakobus naiet naibeli neramu naiha-lumur mayat Yesus.

² Ku ipepegelap arik Minggu, telas taleh mat arik kihuj, enai naiet nu penep Yesus.

^3-4 Ku kateh ceknip enai ajeh, naibelwal ratak liknai, “Bok de buleh betulog hik pegulek batu tenutop penep?” Naiurok begei ajeh kerana batu ajeh ihad entoi. Tapi bile ya nailei ku pajeh, naibakek batu tenutop ajeh ya tegulek nu ibeg.

⁵ Enai pen naimuj nu kateh penep ajeh. Mase naimuj, naibakek mong numom keral nyengnyam de kilog jubah biyeg kigei ku englag kentop enai. Enai ihad naikekjet ru naisengoh.

⁶ Tapi keral nyengnyam ajeh kiurok, “Agok sengoh! Ngpanei engkekek Yesus Sengoi Nazaret de ya bisaleb. Kek pek mong ku padeh. Kek ya Kikos ju Idanan! Nengloh, adehloh itempat Kek bidek.

⁷ Ru hunen etloh ru pasalloh nu Ipengikot-pengikot temasok nu Petrus juga tentang hal adeh: Kek Kiet lebeh canuk daripade enai nu lengrik Galilea. Ku pajeh enai doh naiburuk Kek begei ma de ya Kiurok nu enai.”

⁸ Kekerdor ajeh pen naijar naihol ju penep ajeh kerana naikekjet ru naisengoh. Enai pek naipasal hal ajeh nu bok-bok pen kerana naisengoh. [AYAT 9 LEI 20 KU KEROP ADEH PEK MONG KU KATEH SALINAN-SALINAN ALKITAB TEAWAL]

Yesus Kiperneng Ilei nu Maria Mai Magdalena

⁹ Telas Yesus Kikos ju Idanan ku pepegelap arik Minggu, Kek mula-mula Kiperneng Ilei nu Maria mai Magdalena. (Yesus pernah Kiperet tujoh nyanik ju kek.) Kekerdor ajeh naiet nu Petrus ru ikekawat lalu naipasal ma de biurok ya keral nyengnyam ajeh nu enai.

¹⁰ Maria mai Magdalena kiet nu pengikot-pengikot Yesus de tengah naibekabong ru naijinjap. Telas ajeh Yesus Kior Ipengikot-pengikot naiperlei Gah Bor de suci ru kekal ju timur lei barat. Gah Bor ajeh tentang hal begeiharok manusia naikep sinui de lei ditehjeh.

¹¹ Kek kipasal Yesus ya Kisui nij ru kek ya kibakek Yesus. Bile naicerngai tentang hal ajeh, enai pek naipecaya.

Yesus Kiperneng Ilei nu Nar Urag Ipengikot

¹² Telas ajeh Yesus Kiperneng Ilei nu nar mom Ipengikot tapi Irenes pek begei de baikenal. Hal ajeh belaku mase ubai ku kateh ceknip ubai nu nanek kampug.

¹³ Lalu ubai pen baijog ru baipasal hal ajeh nu pengikot-pengikot de kilek tapi pek naipecaya juga.

Yesus Kiperneng Idiri nu 11 Urag Ipengikot

¹⁴ Ipenyudah, Yesus Kiperneng Ilei nu 11 urag Ipengikot mase tengah naicakcak. Kek Kitegor enai kerana pek naibeiman ru ihad degel lei pek naipecaya nu penasal mai de ya naineng Kek telas ya Kisui nij.

¹⁵ Lalu Yesus Kiurok nu enai, “Etloh nu seluroh dunia ru perleiloh Gah Bor nu dikdij sengoi.

¹⁶ Sengoi de naipecaya ru bibaptis doh bipeselamat tapi sengoi de pek naipecaya doh bihukom.

¹⁷ Nu sengoi de pecaya doh biog tanda-tanda ajaib adeh: Ku kateh muh Eng, enai doh naiperet nyanik-nyanik. Enai doh naibelwal ku kateh bahase-bahase de pek naireti.

¹⁸ Enai doh naicap tijik ru naingut racot, tapi tijik ru racot ajeh doh pek kibeh enai nyik atao dat. Enai doh naidek teg enai ku mai nyik, ru mai nyik ajeh doh naibor.”

Yesus Biangket nu Serga

¹⁹ Telas Tuhan Yesus Kibelwal ru enai, Kek biangket nu serga lalu Kigei ku kedudukan de tehormat ku englag kentop Jenang.

²⁰ Ipengikot-pengikot pen naiet naiperlei Gah Bor nu dikdij tempat. Tuhan Kibeh tanda-tanda ajaib melalui enai untok Kipebukti Gah Bor de naiperlei ajeh benar. [KU KATEH SALINAN ALKITAB MANAH DE KILEK, AYAT 9 LEI 20 KU KEMIL ATAH BIGANTI YA AYAT 9 LEI 10 KU KEROP ADEH]