EFESUS 2 - Alkitab Engrok Hik

Sinui Pai Kateh Kristus

¹ Entem, sinui rohani engkek dat kerana pek engketaat nu Jenang ru engkebeh dosa.

² Ku mase ajeh, engkesui engkejoi care sinui mai ku dunia adeh. Engkek setie engkejoi pemimpen kelog-kelog jehat de kimemerintah ku langit. Kekloh de kerakjak ku engkap sengoi-sengoi de pek naitaat nu Jenang.

³ Entem, dikdij lihik begei ha enai. Hik hisui hiperhonj heknod niknej manusia. Hibeh ma taleh heknod niknej ajeh ru hijoi peniker hik de jehat. Hik pen ya hikena bengal Jenang, sama begei ha mai kilek.

⁴ Tapi kerana Jenang ajeh nekneyayak ru Ihaknok ihad entoi,

⁵ Kek Kipersui hik besama-sama ru Kristus. Kek Kibeh begei ajeh ku mase sinui rohani hik dat kerana pek hitaat nu Ilei. Kerana ya Ibernor sengikloh engkek bipeselamat.

⁶ Kerana hibenanek ru Kristus Yesus, Jenang Kipersui sinui rohani hik besama ru Kristus supaye himemerintah besama ru Kristus ku serga.

⁷ Jenang Kibeh begei ajeh supaye dikdij mai ku jaman ku ingar doh naipanei tentang Ibernor sengik de ihad entoi ajeh. Kek ya Kiperneng Ibernor sengik ajeh nu hik de hibenanek ru Kristus Yesus.

⁸ Engkek bipeselamat ya bernor sengik Jenang kerana engkepecaya nu Kristus. Engkek bipeselamat apeka ya kengwat liengkek sendiri tapi Jenang Kipeselamat engkek pecume.

⁹ Engkek bipeselamat apeka ya bahneh liengkek sendiri supaye pek mong numom pen de buleh kibelagak.

¹⁰ Hik adeh bahneh Jenang. Melalui sinui hibenanek ru Kristus Yesus, hik bipejadi pai supaye hibeh kelaku de bor. Sebelom hik bicipte, Jenang ya Kirancang supaye hisui begei ajeh.

Benanek Kerana Kristus

¹¹ Engkek mai pek Yahudi, ingatloh begeiharok keadaan engkek entem! Engkek bicereg ‘mai pek besunat’ ya mai Yahudi de naicereg diri liknai ‘mai besunat.’ (Sunat ajeh tanda de bibeh ya manusia ku berog liknai, apeka ku sengik enai.)

¹² Ku mase ajeh, engkek pek engkekenal Kristus. Engkek mai aseg de pek bipermuj nu kateh bangse Israel de bipileh ya Jenang. Engkek pek temasok ku kateh jenanji Jenang. Engkesui ku dunia adeh walah neharap ru walah Jenang.

¹³ Engkek canukjeh nyak ju Jenang tapi hunen ya biperek nu Ilei ya danan Kristus, kerana engkebenanek ru Kristus Yesus.

¹⁴ Kristus sendiriloh de engen damei nu hik. Kek Kibeh mai Yahudi ru mai pek Yahudi naibenanek. Ya Idanan, Kek Kipetateh dinig de kicerlah ru kibeh mai Yahudi ru mai pek Yahudi naibemusoh.

¹⁵ Kek Kipehapos ernor ru hukom adat agame mai Yahudi. Kek Kibeh begei ajeh supaye nar kumpulan ajeh jadi nanek kumpulan pai de naisui naibenanek ru Ilei. Begei ajehloh Kristus Kien damei.

¹⁶ Danan Kristus ku jehuk kalag kibeh enai bedamei ru Jenang. Jehuk kalag ya kipenanek nar kumpulan ajeh ru kibeh naiberbor ru Jenang.

¹⁷ Kristus Kihol ru Kien damei nu engkek de entemjeh nyak ju Jenang ru Kek Kien damei ajeh juga nu mai Yahudi de rek ru Jenang.

¹⁸ Melalui Kek, dikdij lihik dapat hiterbuk nu ngar Menek ya tenulog Kelog Santen de nanek.

¹⁹ Kerana ajeh, engkek mai pek Yahudi pek nij mai aseg atao mai luar. Hunen ya engkejadi rakyat besama ru sengoi-sengoi Jenang. Engkek juga engkejadi ahli-ahli peringak Jenang.

²⁰ Engkek ajeh deg de bibeh ku kemil asas de bibeh ya rasul-rasul ru nabi-nabi. Kristus Yesus ajehloh Ibatu cenol.

²¹ Kekloh de Kipejadi deg ajeh bor bisusot ru Kipeentoi deg ajeh lei kijadi deg de bihas ha Tuhan.

²² Kerana engkebenanek ru Kristus, engkek mai pek Yahudi besama ru mai Yahudi bibeh engkejadi deg ginei ha Jenang. Ku pajehloh Kelog Santen Kigei.