Эстер 2 - Тхьэм и ГущыӀ

ЯтӀонэрэ шъхьэр Пачъыхьэр шъузыкӀэ лъэхъу

¹ Уахътэ тешӀагъэу пачъыхьэу Ахъашурэщ игубж зэӀэсэжьым, ар Уаштии, ащ ышӀагъэми, ащ фэгъэхьыгъэу ежь унашъоу ышӀыгъэми ягупшысагъ.

² Джащыгъум пачъыхьэм ежь ышъхьэкӀэ фэлэжьэрэ упчӀэжьэгъумэ аӀуагъ: «Пачъыхьэм пае пшъэшъэ ныбжьыкӀэ дахэмэ алъэрэхъух.

³ Пачъыхьэм ипачъыхьагъу ит хэку пстэуми лӀыкӀохэр ащерэгъэнафэх: пшъэшъэ ныбжьыкӀэхэр зэкӀэ, ятеплъэкӀэ дахэхэу, пачъыхьэ пытапӀэу Шушан къалэм дэтым хэт бзылъфыгъэ унэм къыщаугъоинхэу. Бзылъфыгъэмэ алъыплъэрэ евнухэу Хэгъае ахэмэ ынаӀэ атерэт, загъэдэхэным пае мэӀэшӀу зыпихырэ щыфэнхэри арерэтых.

⁴ Пшъашъэу пачъыхьэм ыгу рихьырэр Уашти ычӀыпӀэкӀэ пачъыхьэ гуащэ орэхъу». А гущыӀэхэр пачъыхьэм игъоу ылъэгъугъ, джаущтэуи ащ ышӀыгъ.

⁵ Джурт горэ щыӀагъ Мардохъай ыцӀэу, ар пытапӀэу Шушан дэтым дэсыгъ, бинямин лъэпкъым щыщыгъ. Ащ ятэ Яир, ятэжъ ЩымӀый, ятэжъ ятэ Къыщ ацӀагъ.

⁶ Бабилэн пачъыхьэу Нэбухаднэцар джурт пачъыхьэу Ехъоный гъэрмэ акӀыгъоу Ерусэлэм къызырещым, Мардохъай къызтекӀыгъэхэр а гъэрхэм ахэтыгъэх.

⁷ Мардохъай ятэшым ыпхъоу Эстэр – джуртыбзэкӀэ Хьадас – ыпӀужьыгъагъ, сыда пӀомэ ащ яни яти иӀэжьыгъэп. А пшъашъэр ыпкъыкӀэ дахэу, ынэгукӀэ гохьыгъ. Янэрэ ятэрэ щымыӀэжьхэ зэхъум, Мардохъай ар ыпхъу фэдэу ядэжь къыщэжьыгъагъ.

⁸ Пачъыхьэм унашъоу къыдигъэкӀыгъэр агъэӀуи, пшъэшъабэ Хэгъай алъыплъэнэу пачъыхьэ пытапӀэу Шушан дэтым щаугъоигъ. Джащыгъум Эстэри, бзылъфыгъэ унэм лъыплъэрэ Хэгъай ынаӀэ тетынэу, пачъыхьэ унэм ащэгъагъ.

⁹ А пшъашъэр ащ ыгу рихьыгъ, нэшӀукӀи еплъыгъ, псынкӀэу мэӀэшӀу зыпихырэ щыфэнхэри шхын шъхьафэу фыхахыгъэхэри ратыгъэх. ЕтӀанэ Хэгъай пачъыхьэм иунэшхо щылажьэрэмэ пшъэшъибл къахихи, Эстэр иӀофтэбгэнхэу фигъэнафэхи, Эстэри ащ фигъэзэгъэ пшъашъэхэри бзылъфыгъэ унэм ианахь псэупӀэ дэгъум аригъэщагъэх.

¹⁰ Эстэр цӀыф лъэпкъэу зыщыщыри, къызхэкӀыгъэ лӀакъори ариӀуагъэп, сыда пӀомэ Мардохъай унашъо къыфишӀыгъагъ аримыӀонэу.

¹¹ Мафэ къэс Мардохъай бзылъфыгъэ унэм ищагу дэжь къыщикӀухьэщтыгъэ Эстэр ипсауныгъи иӀоф зытетри зэригъэшӀэнэу.

¹² Пшъашъэхэм, бзылъфыгъэмэ афагъэуцугъэ хабзэм тетэу, мэзэ пшӀыкӀутӀум къыкӀоцӀ загъэдэхэн фэягъ: апэрэ мэзихым миррэ зыфаӀорэ мэӀэшӀу зыпихырэ дагъэр, адрэ мэзихым мэӀэшӀу зыпихырэ нэмыкӀ уцхэр ащафэн фэягъ.

¹³ Бзылъфыгъэ унэм икӀыгъэу пшъашъэр пачъыхьэм дэжь чӀахьэ зыхъукӀэ, ищыкӀэгъэнэу сыд къыкӀэлъэӀугъэми, ратыщтыгъ.

¹⁴ Унэм пчыхьэм ар ихьэти, пчэдыжьым ятӀонэрэ бзылъфыгъэ унэу, пачъыхьэм иевнухэу ЩаӀашгъэз ыӀэ илъым кӀожьыщтыгъэ. Ащ нахьэу пачъыхьэм дэжь чӀэхьажьыщтыгъэп, пачъыхьэр къыфаеу, ыцӀэ къыраӀоу къемыджэхэмэ.

Эстэр пачъыхьэ гуащэ зэрэхъугъэр

¹⁵ Аущтэу Эстэр – ыпхъу фэдэу зыштэгъэ Мардохъай ятэшэу Абихъаил ыпхъу – пачъыхьэм ыдэжь кӀонэу ичэзыу къэсыгъ. Пачъыхьэм иевнухэу бзылъфыгъэмэ алъыплъэрэ Хэгъай зыфиӀуагъэм нэмыкӀ ар кӀэлъэӀугъэп. Эстэр зэкӀэ зылъэгъугъэмэ агу зырыригъэхьыгъ.

¹⁶ Пачъыхьэу Ахъашурэщ итетыгъом ияблэнэрэ илъэс ияпшӀэнэрэ маз ары – Тэбэт мазэр – ащ иунэшхо Эстэр зыращагъэр.

¹⁷ Пачъыхьэм зэкӀэ ишъузмэ анахьэу Эстэр шӀу ылъэгъугъ, зэкӀэ пшъашъэмэ анахьэу ыгукӀэ фэшӀоу, нэшӀукӀэ еплъэуи хъугъэ. Пачъыхьэ паӀор ащ Эстэр шъхьащилъхьи, Уашти ычӀыпӀэкӀэ пачъыхьэ гуащэ ышӀыгъ.

¹⁸ Пачъыхьэм зэкӀэ ӀэнатӀэкӀэ ахэӀэтыкӀыгъэхэм, къулыкъушӀэхэм ешхэ ешъошхо афишӀыгъ. Зэрэпачъыхьэгъоу цӀыфхэм щагъэмэфэкӀынэу игъоу афилъэгъугъ, пачъыхьэм епэсыгъэ шӀухьафтынхэри афишӀыгъэх.

Мардохъай пачъыхьэм ыпсэ къызэригъэнэжьыгъэр

¹⁹ ЯтӀонэрэуи пшъашъэхэр заугъойхэм, Мардохъай Ӏоф гъэнэфагъэ фэгъэзагъэу пачъыхьэ къэлапчъэм дэжь щысыгъ.

²⁰ Эстэр, Мардохъай унашъоу фишӀыгъагъэм тетэу, лӀакъоу къызхэкӀыгъэри, цӀыф лъэпкъэу зыщыщри ариӀогъагъэп. Мардохъай ыӀуагъэр Эстэр джыри ыгъэцакӀэщтыгъ, ипӀурэу ащ иунэ зесым зэришӀыщтыгъэм фэдэкъабзэу.

²¹ Мардохъай пачъыхьэ къэлапчъэм зыщыӀусыщтыгъэ мафэхэм пачъыхьэм иевнуххэу Быхътанрэ Тэрэщрэ гухьэ гужъ фыряӀэу Ахъашурэщ аукӀынэу рахъухьэщтыгъэ.

²² Ар зешӀэм, Мардохъай пачъыхьэ гуащэу Эстэр риӀуагъ, ежь Эстэр Мардохъай ыцӀэкӀэ пачъыхьэм къэбарыр риӀожьыгъ.

²³ Ӏофыр зэхафи, шъыпкъэу къызычӀэкӀым, нэбгыритӀур пылъапӀэм палъагъ. А лъэхъаным ихъугъэ шӀагъэхэр зыдатхэрэ тхылъым пачъыхьэм иунашъокӀэ Мардохъай ишӀушӀэ Ӏоф датхагъ.