Даниел 2 - Тхьэм и ГущыӀ

ЯтӀонэрэ шъхьэр Нэбухэднэцар иапэрэ пкӀыхьапӀ

¹ Нэбухэднэцар тетыгъор зиӀыгъыр илъэситӀум хэхьагъэу пкӀыхьапӀэхэр ылъэгъугъэхэти, ыгурэ-ыпсэрэкӀэ гумэкӀыгъом зэлъиубытыгъ, чъыер къемыкӀужьы хъугъэ.

² Арыти пачъыхьэм унашъо ышӀи тхьагурымагъохэр, ушхъухьакӀохэр, удыхэр, усэрэжъхэр пкӀыхьапӀэу ылъэгъугъэхэм къарыкӀырэр къыфаӀотэнэу къаригъэщагъэх. Адрэхэр къакӀохи, пачъыхьэм ыпашъхьэ къиуцуагъэх.

³ Пачъыхьэм ахэмэ ариӀуагъ: «ПкӀыхьапӀэ слъэгъугъэшъ, сыгурэ-спсэрэкӀэ сэгумэкӀы; ащ къикӀырэр къызгурыжъугъаӀу».

⁴ Арыти усэрэжъмэ арамэибзэкӀэ пачъыхьэм раӀуагъ: «О пачъыхь! ЕгъашӀэм опсэу! УипкӀыхьапӀэ уипщылӀхэм къытфэӀуати, тэ ащ къикӀырэр къыпфызэхэтфыщт».

⁵ Пачъыхьэм усэрэжъмэ джэуап аритыжьыгъ: «Ӏуагъэу сшӀыгъэр мары: пкӀыхьапӀэу слъэгъугъэр къэшъуӀуатэу, ащ къикӀырэр къызысэшъумыӀокӀэ, лы цӀыкӀу-лы цӀыкӀоу шъузэхязгъэупкӀэтэщт, шъуиунэхэри чӀышъхьашъом щизэу зэхязгъэкъутэщтых.

⁶ Ау, сипкӀыхьапӀи ащ къикӀырэри сэжъугъашӀэмэ, тынхэри, ӀахьышӀухэри, лъытэныгъэшхуи къышъуфэзгъэшъошэщт. Арышъ, сипкӀыхьапӀэ зыфэдэри ащ къикӀырэри къысашъуӀу».

⁷ Ахэмэ ятӀонэрэу къыраӀуагъ: «Пачъыхьэм ипкӀыхьапӀэ ипщылӀмэ къаферэӀуати, ащ къикӀырэр тэ къыфызэхэтфыщт».

⁸ Пачъыхьэм ариӀожьыгъ: «Дэгъоу сэшӀэ, уахътэр шъокъудыи сиӀуагъэ зыфэдэр шъошӀэшъ.

⁹ ПкӀыхьапӀэу слъэгъугъэм къикӀырэр къысашъуӀорэп, гухэлъэу шъуиӀэр зы: пцӀы къысфэшъуусынэу зышъогъэхьазыры, шъузэгурыӀуагъ; уахътэ тешӀэмэ зыгорэ зэблэхъугъэ хъунышъ, сыжъугъэделэнэу шъогугъэ. Арышъ пкӀыхьапӀэу слъэгъугъэр къысфэшъуӀуати, ащ къикӀырэр къысфызэхэшъуфын шъулъэкӀыщтмэ сэ къэсшӀэщт».

¹⁰ Усэрэжъмэ джэуап къатыжьи, пачъыхьэм къыраӀуагъ: «Пачъыхьэм ышӀэмэ шӀоигъор къыфызэӀузыхын зылъэкӀын цӀыф чӀыгум тетэп. Джащ пае зы пачъыхьэ гори, сыд фэдизэу цӀэрыӀоми е лъэкӀышхо иӀэми, ащ фэдэкӀэ ядэуагъэп зы тхьагурымагъуи, ушхъухьакӀуи, усэрэжъи.

¹¹ Пачъыхьэм Ӏофэу къыфызэхэтфынэу зыфаер къин дэд, тхьэхэм анэмыкӀ ар къышӀэн ылъэкӀыщтэп, ау тхьэхэр цӀыфхэм ягъусэхэу псэухэрэп».

¹² А гущыӀэхэм пачъыхьэр лъэш дэдэу агъэгубжи, ышъэ икӀыгъэу Бабилэн ис акъылышӀохэр зэкӀэ агъэкӀодынэу унашъо ышӀыгъ.

¹³ АкъылышӀохэр аукӀынхэу а унашъор къызыдэкӀым ыуж, Даниели ишъэогъухэми апсэ хахынэу алъыхъущтыгъэх.

ПкӀыхьапӀэм къикӀырэр Тхьэм Даниел къызэрэфызэӀуихыгъэр

¹⁴ Пачъыхьэм иухъумакӀохэм япащэу Арыох, Бабилэн ис акъылышӀохэр зыукӀынхэу ежьагъэм, Даниел губзыгъэу, Ӏушэу зыфигъэзагъ.

¹⁵ Даниел Арыохы еупчӀыгъ: «Сыда ащ фэдэ унэшъо пхъашэ пачъыхьэм зыкӀишӀыгъэр?» Арыти Арыох Ӏофыр зытет шъыпкъэр Даниел къыфиӀотагъ.

¹⁶ Ащ лъыпытэу Даниел кӀуи, пачъыхьэм дэжь чӀахьи, пкӀыхьапӀэм къикӀырэр зэхифынэу, уахътэ къыритынэу елъэӀугъ.

¹⁷ Даниел иунэ кӀожьи, ишъэогъухэм: Хъэнаныйи, Мыщаели, Азарыйи – къэбарэу щыӀэр афиӀотагъ.

¹⁸ Уашъомэ я Тхьэ елъэӀунхэу ахэм ариӀуагъ: гукӀэгъу къафишӀынэу, а шъэфыр къафызэӀуихынэу, ежьыри ишъэогъухэри нэмыкӀ акъылышӀохэу Бабилэн исхэм адамыукӀынхэм пае.

¹⁹ Джащыгъум Тхьэм Даниел чэщым нэфапӀэ къыригъэлъэгъуи, а шъэфыр нафэ къыфишӀыгъ. Даниели Уашъомэ я Тхьэ щытхъу фишӀыгъ.

²⁰ Даниел къыӀуагъ: «Тхьэм ыцӀэ егъашӀэми щытхъу фарэшӀ! АкъылышӀуагъэри лъэкӀыныгъэшхори Ащ иӀэхэба!

²¹ ЗэрехъокӀых Ащ уахътэхэри лъэхъанэхэри; Зы пачъыхьэм къыреты тетыгъор, адрэм Ӏехыжьы; ЦӀыф акъылышӀом – акъылышӀуагъэр, ШӀэныгъэ зиӀэм – зэхэшӀыкӀыныгъэр Арыба язытрэр!

²² Куоу чӀэухъумагъэри шъэфри Ащ къызэӀуехы, ШӀункӀым щыгъэбылъыгъэри ешӀэ; Нэфынэри Ежь зыдэщыӀэм щыӀ.

²³ Щытхъу пфэсэшӀы, усэгъэлъапӀэ, О, сятэжъмэ я Тхь! АкъылышӀуагъэрэ кӀуачӀэрэ О къысэптыгъэхэшъ, ТыкъызэрэолъэӀугъэр О нафэ къытфэпшӀыгъэшъ, Пачъыхьэр зыгъэгумэкӀыщтыгъэр О тэбгъэшӀагъэшъ!»

Даниел пачъыхьэм ипкӀыхьапӀэ зэрэфызэхифыгъэр

²⁴ Бабилэн щыпсэурэ акъылышӀохэр ыгъэкӀодынхэу пачъыхьэм унашъо зыфишӀыгъэ Арыох дэжьы Даниел чӀахьи, ахэм афэгъэхьыгъэу риӀуагъ: «Бабилэн ис акъылышӀохэр умыукӀых; пачъыхьэм ыпашъхьэ сищи, ащ ипкӀыхьапӀэ къикӀырэр сэ къыфызэӀусхыщт».

²⁵ Ащ лъыпытэу Арыох пачъыхьэм дэжь Даниел чӀищи, риӀуагъ: «Ехъуд хэкум къыращыгъэ гъэрмэ цӀыф къахэзгъотагъ пачъыхьэм ылъэгъугъэ пкӀыхьапӀэм къикӀырэр къыӀотэн ылъэкӀынэу».

²⁶ Пачъыхьэр Бэлтэшэцар зыфаусыгъэ Даниел къеупчӀыгъ: «Шъыпкъэ дэдэмкӀэ пкӀыхьапӀэу слъэгъугъэр о къысфэпӀотэни ащ къикӀырэр къысэпӀон плъэкӀыщта?»

²⁷ Даниел пачъыхьэм риӀожьыгъ: «Зы акъылышӀуи, ушхъухьакӀуи, тхьагурымагъуи, жъогъуаплъи къызэхифын ылъэкӀыщтэп пачъыхьэр къызкӀэупчӀэрэ шъэфыр.

²⁸ Ау Уашъомэ я Тхьэ шъэфхэр къызэӀуехых; аужырэ мафэхэм къэхъущтыр пачъыхьэу Нэбухэднэцар Ащ къыригъэлъэгъугъ. ПкӀыхьапӀэу, пшъхьэ фэгъэхьыгъэ нэфапӀэу, уипӀэгу уилъэу Тхьэм къыуигъэлъэгъугъэр мары:

²⁹ О, пачъыхьэу зиусхьаныр, уипӀэгу уилъэу мыщ ыуж къэхъущтым уегупшысэщтыгъэ, арыти Тхьэу шъэфхэр КъызэӀузыхырэм къэхъущтыр къыуигъэлъэгъугъ.

³⁰ Сэ псаоу щыӀэ пстэуми санахь акъылышӀокӀэ арэп а шъэфыр нафэ къызкӀысфишӀыгъэр, о, пачъыхьэм, пкӀыхьапӀэу плъэгъугъэм къикӀырэр къыбгурыӀонэу, угу илъ гупшысэхэр зэхэпшӀыкӀынхэу ары нахь.

³¹ О, пачъыхьэу зиусхьаныр, мары плъэгъугъэр: саугъэт шъэджашъэ горэ уапашъхьэ ит; ин дэдэу, узэримыгъэплъэу зэпэшӀэтыжьэу, итеплъи щынэгъо-гуихэу.

³² А саугъэтым ышъхьэ дышъэ къабзэм, ыбгъэрэ ыӀэхэмрэ – тыжьыным, ыныбэрэ ыкохэмрэ – джэрзым ахэшӀыкӀыгъагъэх.

³³ Ылъакъохэр гъучӀыгъэх, ылъашъхьэхэм азыныкъо – гъучӀэу, азыныкъо – етӀэ гъэжъагъэу щытыгъ.

³⁴ Уеплъы пэтзэ Ӏэ горэм, мыцӀыфыӀэу, мыжъо къыдзи саугъэт шъэджашъэм ылъашъхьэхэу гъучӀ-етӀэ зэхэлъым къяутэкӀи, зэхигъэшъхъэшъхъагъэх.

³⁵ Джащыгъум шъхъын-шъхъынэу зэхикъутагъэх: гъучӀыри, ятӀэри, джэрзыри, тыжьынри, дышъэри гъэмафэм хьамэхэм ателъ пыдзафэмэ афэдэу, жьыбгъэм рихьыжьэхи лъэуж къэмынэу зэрихьажьыгъэх. Саугъэт шъэджашъэр зыкъутэгъэ мыжъор къушъхьэ ин хъуи чӀыгур зэрэпсаоу зэлъиубытыгъ.

³⁶ Джары пкӀыхьапӀэр зыфэдэр! Ащ къикӀырэри джы пачъыхьэм етӀон.

³⁷ О, пачъыхьэу зиусхьаныр, пачъыхьэмэ уряпачъыхьэжь. Уашъомэ я Тхьэ пачъыхьэгъуи, тетыгъошхуи, кӀуачӀи, щытхъуи къыуитыгъэх.

³⁸ Тыдэ щыпсэурэ цӀыфхэри, чӀышъхьашъом тет хьэкӀэ-къуакӀэхэри, ошъогум щыхьарзэрэ бзыухэри – зэкӀэри Ащ о пӀэ къырилъхьагъэх, пӀэмычӀэ илъхэу, ашъхьагъ уригъэуцуагъ. Дышъэм хэшӀыкӀыгъэ шъхьэр – оры.

³⁹ О уауж зыкъыӀэтыщт нэмыкӀ пачъыхьэгъум, о уием нахьи ащ изэшӀокӀ нахь мэкӀэщт; етӀанэ джэрзым зэрэчӀыгоу тетыгъор щызыӀыгъыщт ящэнэрэ пачъыхьэгъуи къыкӀэлъыкӀощт.

⁴⁰ ЯплӀэнэрэ пачъыхьэгъуми зыкъыӀэтыщт гъучӀым фэдэу пытэщт; гъучӀым зэкӀэри зэрикъутэу, зэригъэтакъоу, ащ адрэхэр зэкӀэ зэхикъутэщтых.

⁴¹ Лъашъхьэхэмрэ лъэхъуамбэхэмрэ азыныкъо къошын зыхашӀыкӀырэ ятӀэм, азыныкъо гъучӀым ахэшӀыкӀыгъэхэу зэрэплъэгъугъэхэм къикӀырэр пачъыхьэгъур гощыгъэ зэрэхъущтыр ары. Ау гъучӀым къошын ятӀэр хэгъэкӀухьагъэу зэрэплъэгъугъэм фэдэу гъучӀым хэлъ пытагъэ Ӏахьэ гори ащ къыхэнэжьыщт.

⁴² Лъэхъуамбэхэр гъучӀымрэ ятӀэмрэ зэфэдизэу ахэшӀыкӀыгъэхэу зэрэплъэгъугъэм фэдэу пачъыхьэгъур зы лъэныкъомкӀэ кӀочӀэшхоу, зы лъэныкъомкӀэ кӀочӀаджэу щытыщт.

⁴³ ГъучӀымрэ къошын зыхашӀыкӀырэ ятӀэмрэ зэхэгъэкӀухьагъэу зэрэплъэгъугъэм къикӀырэр – къэзэрэщэн ӀофкӀэ пачъыхьэгъухэр зэрэзэхагъэкӀухьащтыр ары. Ау гъучӀымрэ ятӀэмрэ зэхэкӀухьэу зэщыщ зэрэмыхъухэрэм фэдэу ахэм зыкӀыныгъэ ахэлъыщтэп.

⁴⁴ А пачъыхьэгъумэ ямафэхэм Уашъомэ я Тхьэ гъэшӀэным мыкӀодыжьын пачъыхьэгъу ыгъэуцущт; ащ итетыгъо нэмыкӀ цӀыф лъэпкъ ӀэкӀигъэхьащтэп. А пачъыхьэгъум адрэхэр зэкӀэ зэхикъутэщтых, гъунэм нигъэсыщтых, ау ежь егъашӀэми щытыщт.

⁴⁵ О плъэгъугъэба, Ӏэ горэм, мыцӀыфыӀэу, мыжъор зыгорэм къыдзи, гъучӀыри, джэрзыри, ятӀэри, тыжьыныри, дышъэри зэрэзэхигъэшъхъэшъхъагъэр. Джаущтэу Тхьэшхом пачъыхьэм къэхъущтыр къыригъэлъэгъугъ. А пкӀыхьапӀэр шъыпкъэ, къикӀырэри нафэ!»

Пачъыхьэм ӀэнэтӀэшӀу Даниел зэрэфигъэшъошагъэр

⁴⁶ Джащыгъум пачъыхьэу Нэбухэднэцар Даниел ыпашъхьэ бгъэгукӀэ зыщыридзыхи шъхьащэ фишӀыгъ; тын лъапӀэхэр къыфахьынэу, мэ ӀэшӀу зыпихрэ уцхэри фагъэстынхэу унашъо ышӀыгъ.

⁴⁷ Пачъыхьэми Даниел риӀуагъ: «Шъыпкъэ дэдэу, шъо шъуи Тхьэ тхьэмэ я Тхьэжьыр ары – пачъыхьэхэм я Пщытатэу, шъэфхэр нафэ къэзышӀырэр ары, о а шъэфыр моущтэу къызэхэпфын плъэкӀыгъэмэ!»

⁴⁸ Ащ ыуж пачъыхьэм Даниел лъытэныгъэшхо фишӀыгъ, осэшхо зиӀэ тынхэр бэу фигъэшъошагъэх. Бабилэн хэкур зэрэпсаоу ыӀэ рилъхьи, ащ ис акъылышӀо пстэуми тхьэматэ афишӀыгъ.

⁴⁹ Ау Даниел илъэӀукӀэ Шадрахи, Мэщэхи, Абэднэгуи Бабилэн хэкум иӀофхэр зэрагъэзекӀонхэу пачъыхьэм ыгъэнэфагъэх, ежь Даниел пачъыхьэм иунэ-хапӀэ къинагъ.