فِلِبِّي 4 - الكتاب المقدس بالعربي الدارجي هنا تشاد

¹ يَا أَخْوَانِي النِّحِبُّكُو، أَنَا مُشْتَاقْ لَيْكُو كَتِيرْ وَ نَفْرَحْ بَيْكُو وَ فِي شَانْكُو إِنْتُو، نَرْفَعْ رَاسِي فَوْق. يَا الْمَحْبُوبِينْ، أَقْعُدُوا ثَابْتِينْ فِي رَبِّنَا عِيسَى.

² يَا أَخُتْنَا أَفُودِيَّةْ، يَا أَخُتْنَا سِنْتِخَةْ، نَطْلُبْ مِنْكَنْ أَشَانْ تِسْتَفِقَنْ أَمْبَيْنَاتْكَنْ وَ تِتَابِعَنْ رَبِّنَا بِفِكِرْ وَاحِدْ.

³ وَ إِنْتَ، يَا رَفِيقِي الْأَمِينْ، نَطْلُبْ مِنَّكْ إِنْتَ تِسَاعِدْ الْعَوِينْ دَيْل. سَاعِدْهِنْ بِسَبَبْ هِنَّ خَدَمَنْ مَعَايِ فِي شَانْ بِشَارَةْ الْمَسِيحْ. هِنَّ جَاهَدَنْ سَوَا مَعَ أَخُونَا كِلَيْمَانْ وَ الْآخَرِينْ الْيَخْدُمُوا مَعَايِ. النَّاسْ دَوْل، أَسَامَيْهُمْ مَكْتُوبِينْ فِي كِتَابْ الْحَيَاةْ.

الفِكِر الواجِب

⁴ أَفْرَحَوْا بِرَبِّنَا عِيسَى دَايْماً وَ بَتَّانْ نُقُولْ لَيْكُو، أَفْرَحَوْا!

⁵ خَلِّي رُوحْكُو تَبْقَى طَوِيلَةْ قِدَّامْ أَيِّ نَادُمْ. رَبِّنَا عِيسَى قَرِيبْ.

⁶ مَا تِهِمُّوا لِأَيِّ شَيّءْ لَاكِنْ فِي كُلِّ حَالْ، أَشْكُرُوا اللّٰهْ وَ قَدُّمُوا لَيَّهْ طَلَبْكُو بِصَلَاةْ وَ دُعَا.

⁷ وَ اللّٰهْ يَنْطِيكُو سَلَامَهْ الْفَايِتْ فِكِرْ النَّاسْ. وَ خَلِّي سَلَامْ اللّٰهْ يَحْفَضْ قُلُوبْكُو وَ أَفْكَارْكُو وَ تَقْعُدُوا ثَابْتِينْ فِي الْمَسِيحْ عِيسَى.

⁸ يَا أَخْوَانِي، دِي هِي آخِرْ وَصِيَّةْ النَّنْطِيهَا لَيْكُو. فَكُّرُوا فِي أَيِّ شَيّءْ الصَّحِيحْ وَ الشَّرِيفْ وَ الْعَادِلْ وَ الطَّاهِرْ وَ الْمَحْبُوبْ وَ الْكَرِيمْ وَ الْأَفْضَلْ وَ الْوَاجِبْ لَيَّهْ الشُّكُرْ. وَ كُلَّ شَيّءْ الْمِثِلْ دَا، خُطُّوا أَفْكَارْكُو فَوْقَهْ ثَابْتِينْ.

⁹ وَ طَبُّقُوا دَايْماً كُلَّ شَيّءْ الْعَلَّمْتُوهْ مِنِّي وَ لِقِيتُوهْ مِنِّي، كَنْ مِنْ كَلَامِي السِّمِعْتُوهْ وَلَّا مِنْ حَالِي الشِّفْتُوهَا. وَ اللّٰهْ رَبّ السَّلَامْ يُكُونْ مَعَاكُو.

الرسول شكر ناس فِلِبِّي

¹⁰ أَنَا فَرْحَانْ بِلْحَيْن وَ قَاعِدْ نَشْكُرْ رَبِّنَا كَدَرْ فِي الأَخِيرْ، إِنْتُو شِلْتُوا نِيَّةْ أَشَانْ تِسَاعُدُونِي بَتَّانْ. بِالصَّحِيحْ، أَوَّلْ كُلَ عِنْدُكُو نِيَّةْ لَاكِنْ مَا عِنْدُكُو فُرْصَةْ.

¹¹ وَ أَنَا مَا قَاعِدْ نَشْكِي لَيْكُو مِنْ الْمَسْكَنَةْ. أَشَانْ أَنَا عَلَّمْت كِكَّيْف نِعِيشْ فِي أَيِّ حَالْ.

¹² نَعَرِفْ كِكَّيْف نِعِيشْ فِي الْمَسْكَنَةْ أَوْ فِي الْغُنَى. أَنَا عَلَّمْت كِكَّيْف نَبْقَى رَضْيَانْ فِي أَيِّ بَكَانْ وَ فِي كُلِّ حَالْ، كَنْ أَنَا شَبْعَانْ وَلَّا جِيعَانْ وَ كَنْ عِنْدِي كَتِيرْ وَلَّا شِيَّةْ.

¹³ نَقْدَرْ نِلْحَمَّلْ أَيِّ شَيّءْ بِالْمَسِيحْ وَ هُو يَنْطِينِي قُدْرَةْ.

¹⁴ لَاكِنْ الشَّيّءْ السَّوَّيْتُوهْ لَيِّ سَمَحْ بِلْحَيْن. إِنْتُو شَارَكْتُوا مَعَايِ فِي تَعَبِي.

¹⁵ يَا أَخْوَانِي نَاسْ فِلِبِّي، إِنْتُو تَعَرْفُوا كَدَرْ أَوَّلْ مَرَّةْ جِيتْ بَلَّغْت بِشَارَةْ الْمَسِيحْ لَيْكُو وَ فُتّْ قِدَّامْ مِنْ بَلَدْ مَقِدُونِيَةْ، إِنْتُو وِحَيْدكُو شَارَكْتُوا مَعَايِ. مَا فِي جَمَاعَةْ مُؤمِنِينْ آخَرَةْ الْأَوَّلْ أَنْطَيْتهُمْ كَلَامْ اللّٰهْ وَ بَعَدَيْن هُمَّنْ أَنْطَوْنِي مُسَاعَدَةْ.

¹⁶ وَكِتْ أَنَا لِسَّاعْ مَا خَلَّيْت مَقِدُونِيَةْ وَ قَاعِدْ فِي حِلَّةْ تَسَلُونِيكِي، إِنْتُو رَسَّلْتُوا لَيِّ مُسَاعَدَةْ أَكْتَرْ مِنْ مَرَّةْ.

¹⁷ قُلْت الْكَلَامْ دَا، مَا أَشَانْ نِدَوْر مِنْكُو مُسَاعَدَةْ بَتَّانْ لَاكِنْ أَشَانْ أَيِّ شَيّءْ التَّنْطُوهْ فِي شَانْ رَبِّنَا، هُو يَقْبَلَهْ وَ يُخُطَّهْ فِي مَخَزَنْ الْحَسَنَاتْ.

¹⁸ وَ كُلَّ شَيّءْ الْأَنَا نِدَوْرَهْ، لِقِيتَهْ خَلَاصْ زِيَادَةْ مِنْ النِّدَوْرَهْ. أَخُوكُو أَبْفَرِيدْ جَابْ الْمُسَاعَدَةْ الرَّسَّلْتُوهَا لَيِّ وَ خَلَاصْ، أَنَا مَبْسُوطْ. وَ الْمُسَاعَدَةْ دِي هِي مِثِلْ هَدِيَّةْ لِلّٰهْ الرِّيحِتْهَا هُو يَرْضَى بَيْهَا وَ يَقْبَلْهَا.

¹⁹ وَ أَنَا نَعَرِفْ كَدَرْ اللّٰهْ يَنْطِيكُو بِكَتَرَةْ كُلَّ شَيّءْ التِّحْتَاجَوْا لَيَّهْ. أَيْوَى، يَنْطِيكُو مِنْ غُنَايَهْ الْمَجِيدْ بِالْمَسِيحْ عِيسَى.

²⁰ وَ اللّٰهْ أَبُونَا، وَاجِبْ لَيَّهْ الْمَجْد دَايْماً وَ إِلَى الْأَبَدْ. آمِينْ.

نِهاية الجواب

²¹ سَلُّمُوا كُلَّ النَّاسْ الْبِقَوْا صَالِحِينْ بِالْمَسِيحْ عِيسَى. وَ الْأَخْوَانْ الْقَاعِدِينْ مَعَايِ يِسَلُّمُوكُو.

²² كُلَّ الصَّالِحِينْ الْقَاعِدِينْ هِنِي يِسَلُّمُوكُو وَ خَاصَّةً النَّاسْ الْمِنْ بَيْت السُّلْطَانْ.

²³ عَلَيْكُمْ رَحْمَةْ الرَّبّ عِيسَى الْمَسِيحْ.