Филиппи 4 - Къэбарышӏур (Инджыл)

ЯПЛӀЭНЭРЭШЪХЬ

¹ Арышъ, шъо, сшыхэу шӀу слъэгъухэу, нэкӀэ слъэгъунхэу сызфалӀэхэрэм, сигушӀуагъори ситанджыри шъоры. ШӀу слъэгъухэрэр, Зиусхьаныр шъугухэм зэрарылъым пае, гъогу занкӀэм пытэу шъутетын фае.

Аужырэ Ӏофхэу Паул агуригъаӀохэрэр

² Зиусхьаныр агухэм зэрарылъым пае, бзылъфыгъэхэу Еводиерэ Синтихиерэ зы гупшысакӀэ яӀэ хъунхэу сялъэӀу.

³ О, къыздэлажьэрэ ныбджэгъу шъыпкъ, ахэмэ уадэӀэпыӀэнэу сыолъэӀу. Ахэри къэбарышӀур цӀыфхэм язгъэӀунымкӀэ къыздэлэжьагъэх, Климентрэ адрэ къыздэлажьэхэрэмрэ ягъусэхэу. Ахэмэ ацӀэхэр мыкӀодыжьын щыӀэныгъэ зыгъотыщт цӀыфхэм ацӀэхэр зэрыт тхылъым итых.

⁴ Шъо, Зиусхьаныр зыгу илъхэр, шъугушӀо зэпыт. Джыри зэ шъосэӀожьы: шъугушӀу.

⁵ Шъуигушъэбагъэ цӀыф пстэуми нафэ афэрэхъу. Зиусхьаныр дунаим къызыкӀожьыщт мафэр къэблэгъагъ.

⁶ Сыд щыщми зешъумыгъэгъап, ау сыд щыщырэ ӀофкӀи Тхьэм шъуелъэӀузэ, щытхъу фэшъушӀызэ, шъуиӀэпыӀэгъу хъунэуи шъуелъэӀузэ, шъуищыкӀагъэхэр ежъугъашӀэх.

⁷ ЕтӀанэ Тхьэм дэжь къикӀырэ гупсэфэу цӀыфхэм къагурыӀошъущтым нахьи, бэкӀэ нахь иным шъугухэри шъуигупшысэхэри Христос Исус шъугухэм зэрарылъым пае къыухъумэщтых.

⁸ Аужыпкъэм, сшыхэр, сыд Ӏоф шъыпкъэми, сыд Ӏоф лъытэныгъэ ифэшъуашэми, сыд Ӏоф зафэми, сыд Ӏоф къабзэми, сыд Ӏофэу шъугу зэӀурэми, сыд Ӏоф гуапэми, сыд Ӏофи хэбзэшӀу хэлъми, сыд Ӏоф щытхъу ифэшъуашэми, ащ фэдэ Ӏофхэм шъуягупшыс.

⁹ Ӏофхэу сэ шъозгъэшӀагъэхэри, къышъуфэзгъэнагъэхэри, сэ къасӀохэу зэхэшъухыгъэхэри, сэ сшӀэхэу шъулъэгъугъэхэри жъугъэцакӀэх. Ащыгъум гупсэф къытэзытырэ Тхьэр шъуигъусэ зэпытыщт.

ШӀошъхъуныгъэ зиӀэхэу Филиппи дэсхэм ятын

¹⁰ Джыри зэ сэ шъукъызэрэсэгугъужьыгъэм пае, Зиусхьаныр сыгу илъэу, лъэшэу гопэшхо сиӀэ хъугъэ. ЫпэкӀи шъукъысфэгумэкӀыщтыгъ, ау шъукъыздэӀэпыӀэнэу игъо шъуифагъэп.

¹¹ ЩыкӀагъэ горэ зэрэсиӀэр арэп аущтэу зыкӀасӀорэр, сыда пӀомэ, сэ сыд къысэхъулӀэми сырырэзэнэу зызгъэсагъ.

¹² ТхьамыкӀагъом сыхэтынри, баиныгъэм сыхэтынри зыфэдэр сэшӀэ. СышхэкӀыгъэми мэлакӀэ сэлӀэми, сыбаими сытхьамыкӀэми, – сыдигъуи, сыд къысэхъулӀэми, сырырэзэнэу зызгъэсагъ.

¹³ Исус Христосэу сэзгъэлъэкӀырэм ыкӀуачӀэкӀэ зэкӀэ сшӀэн слъэкӀыщт.

¹⁴ Ау щытми, гузэжъогъоу сызхэтымкӀэ гъусэ шъукъызэрэсфэхъугъэр дэгъоу шъушӀагъэ.

¹⁵ Шъо, Филиппи къалэм дэсхэм, зэрэшъушӀэрэмкӀэ, къэбарышӀур згъэӀунэу сыублагъэу Македоние хэкум сыкъызекӀым, ӀэпыӀэгъу хъунымрэ ӀэпыӀэгъум ипэгъокӀ гъотыжьынымрэ яӀофкӀэ шъощ нэмыкӀэу чылыс зэӀукӀэмэ ащыщэу зи гъусэ къысфэхъугъэп.

¹⁶ Фессалоникэ къалэм сызыщэӀэм, сищыкӀагъэхэр заулэрэ шъуилӀыкӀохэм къысфяжъугъэхьыгъэх.

¹⁷ Ар зыкӀасӀорэр шъуитын сехъуапсэкӀэ арэп, ау шъуитын ипэгъокӀ фэдэу шӀу жъугъотыныр ары.

¹⁸ Шъуитын пстэури къысӀэкӀэхьагъ, сфикъуным нахьыби сиӀэ хъугъэ. Епафродит къысфежъугъэхьыгъэ тынхэр къысӀэкӀэхьагъэхэшъ, щыкӀагъэ зи сиӀэп. Ахэр Тхьэм ыдэрэ къурмэныпхъэу, ыгу зэӀоу, мэӀэшӀу къызпихырэм фэдэх.

¹⁹ Си Тхьэ ибаиныгъэшхоу щытхъушхо зиӀэм фэшъуашэу шъуищыкӀагъэхэр зэкӀэ Христос иӀэмыркӀэ къышъуитыщт.

²⁰ Тхьэу тя Тэ лъапӀэ мыкӀодыжьын щытхъушхор ий. Амин.

Аужырэ шӀуфэс гущыӀэхэр

²¹ Тхьэм ицӀыф лъапӀэхэу, Христос Исус зыгу илъхэм аӀапэ сфэшъуубытыжь. Сигъусэ сшыхэм шӀуфэс къышъуахыжьы.

²² Тхьэм ицӀыф лъапӀэхэм зэкӀэмэ шӀуфэс къышъуахыжьы, анахьэу Кайсарым иунэшхо щыщхэр ары.

²³ Зиусхьан Исус Христос игукӀэгъурэ ишӀугъэрэ шъугухэм арылъ орэхъу. Амин.