Филиппи 1 - Къэбарышӏур (Инджыл)

АПЭРЭШЪХЬ ШӀуфэс

¹ Сэ сы Паул. Сэррэ Тимофейрэ Христос Исус тыфэлажьэ. Тимофей сигъусэу шъо, Тхьэм ицӀыф лъапӀэхэу Филиппи къалэм дэсхэу, Исус Христос зыгу илъхэм, шъуичылыс иӀэшъхьэтетхэмрэ иӀэпыӀэгъухэмрэ шъуигъусэхэу, мы тхылъыр къышъуфэсэтхы.

² Тхьэу тя Тэ лъапӀэрэ Зиусхьан Исус Христосрэ анэшӀу къышъущарэфи, гупсэф къышъуарэт.

Паул шӀошъхъуныгъэ зиӀэхэу Филиппи дэсхэм Тхьэм зэрафелъэӀурэр

³ Сыгу шъукъэкӀ къэси, си Тхьэ щытхъу фэсэшӀы.

⁴ Сыдигъуи шъо пстэуми пае Тхьэм сызелъэӀукӀэ, гушӀуагъокӀэ селъэӀу,

⁵ сыда пӀомэ, апэрэ мафэм къыщегъэжьагъэу джырэ нэсыфэ, къэбарышӀум сэ фэсшӀэгъэ Ӏофым шъуиӀахь хэлъыгъэшъ ары.

⁶ Шъугухэм ащиублэгъэ Ӏофыр Исус Христос дунаим къызыкӀожьыщт мафэм нэс Тхьэм зэрэригъэкъущтым сыщэгугъы.

⁷ Шъо пстэуми аущтэу сызэрышъоплъырэр тэрэз, сыда пӀомэ, Ӏэхъу-лъэхъу къыстыралъхьагъэми, къэбарышӀум пэуцухэрэм пэгъокӀ ястыми, къэбарышӀум ишъыпкъагъэ къэзгъэлъагъоми сыгу шъуилъ зэпыт, шъо пстэури сигъусэхэу Тхьэм ынэшӀу къызщифэхэрэр.

⁸ Исус Христос ишӀулъэгъу сыгу илъэу шӀу шъузэрэслъэгъурэмкӀэ Тхьэр сишыхьат.

⁹ Тхьэм сызэрелъэӀурэр шӀэныгъэмрэ зэхэшӀыкӀ пстэумрэ ягъусэу, шӀулъэгъу нахьыбэ шъуиӀэ зэпытыныр ары.

¹⁰ ЕтӀанэ нахьышӀур зыфэдэр зэхэшъушӀыкӀын шъулъэкӀыщт, шъугухэри къабзэхэу, зыми шъузэригъэмысэн зи щымыӀэу, Христос дунаим къызыкӀожьыщт мафэм нэс шъупсэущт.

¹¹ Аущтэу шӀугъэу шъыпкъэм къыхэкӀырэр Исус Христос шъугухэм инэу къарилъхьащт, цӀыфмэ Тхьэм щытхъушхо фашӀыным, ежь агъэлъэпӀэным пае.

Христос уфэлэжьэныр ары щыӀэныгъэ шъыпкъэр

¹² ШъушӀэнэу сыфай, сшыхэр, къэбарышӀу гъэӀуным иӀоф сэ къысэхъулӀэгъэ Ӏофхэм яшӀуагъэ зэрэрагъэкӀыгъэр.

¹³ Аущтэу Кайсарым иунэшхо преторие икъэрэгъулхэмрэ адрэ цӀыф пстэумрэ нафэ афэхъугъ, Христос сызэрэфэлажьэрэр ары Ӏэхъу-лъэхъур къызкӀыстыралъхьагъэр.

¹⁴ Ащ нэмыкӀэу, цӀыфхэм Ӏэхъу-лъэхъу къызэрэстыралъхьагъэм пае, сшыхэу Зиусхьаныр зыгу илъхэм янахьыбэхэм агухэм зыкъаӀэтызэ, мыщынэхэу Тхьэм игущыӀэхэр нахь гушхокӀэ агъэӀухэу аублагъ.

¹⁵ Шъыпкъэ, шъугъонымрэ зэщыхьанымрэ агухэм арылъхэу, Христос икъэбар зыгъэӀухэрэри щыӀэх, ау нэмыкӀ цӀыфхэм агухэм шӀугъэ зэрарылъым пае, Христос икъэбар агъэӀу.

¹⁶ Апэрэхэм агухэм зэщыхьаныр арылъэу, гумыкъэбзагъэкӀэ Христос икъэбар агъэӀу. СиӀэхъу-лъэхъу джыри нахь щэчыгъуае ашӀын агу хэлъ.

¹⁷ Адрэхэм щӀулъэгъу агухэм зэрарылъым пае, Христос икъэбар агъэӀу. Христос икъэбарышӀу пэуцухэрэм пэгъокӀ ястыжьынэу Тхьэм сызэригъэнэфагъэр ашӀэ.

¹⁸ Ар Ӏофэп. Аущтэуми нэмыкӀыми, гухэлъ бзаджэкӀи гухэлъышӀукӀи Христос икъэбар агъэӀу хъумэ, сэгушӀо. ЫкӀи сыгушӀо зэпытыщт,

¹⁹ сыда пӀомэ, Тхьэм шъузэрелъэӀурэм паий, Исус Христос ы Псэ ЛъапӀэ ӀэпыӀэгъу къызэрэсфэхъурэм паий, мы къиным сыкъызэрэхэкӀыжьыщтыр сэшӀэшъ ары.

²⁰ ЗыкӀи сызтеукӀытыхьан Ӏоф горэ щымыӀэу, джыри сыдигъуи, сыпсауми, сылӀэми, спкъыкӀэ Христос гушхокӀэ зэрэзгъэлъэпӀэ зэпытыщтым сыкӀэхъопсы ыкӀи сыщэгугъы.

²¹ Сыда пӀомэ, сэ щыӀэныгъэ шъыпкъэу зыфасӀорэр Христос сыфэлэжьэныр ары, сылӀэми ишӀуагъэ къысэкӀыщт.

²² Ау мы пкъым сыщыпсэун фаемэ, шӀугъэ къызхэкӀырэ Ӏоф сшӀэн слъэкӀыщт. Ау а ӀофитӀум язэу къыхэсхыщтыр сшӀэрэп.

²³ А ӀофитӀумэ сырагъэзы. Мы дунаим сехыжьынышъ, Христос сыригъусэ сшӀоигъу. Ар бэкӀэ нахьышӀу.

²⁴ Ау мы пкъым сыкъыхэнэныр нахь шъуищыкӀэгъэшху.

²⁵ Ащ сыщыгугъэу, мыщ дэжьым сыкъызэрэнэжьыщтри, гушӀуагъо игъусэу шъуишӀошъхъуныгъэ нахь пытэ хъу зэпытыным пае, шъуадэжь сызэрэщыӀэщтри сэшӀэ.

²⁶ Ащыгъум шъуадэжь сыкъызыкӀожькӀэ, Христос Исус къысфишӀэгъэ Ӏофым лъэшэу шъущыгушӀукӀын шъулъэкӀыщт.

²⁷ ЗэкӀэми анахьэу Христос ехьылӀэгъэ къэбарышӀум фэшъуашэу шъузекӀу. Ащыгъум сыкъакӀоу шъуслъэгъумэ е сыщымыӀэу шъуикъэбар зэхэсхымэ, зыгу-зыпсэу гъогу занкӀэм шъыпкъэу шъурыкӀоу, шъузэгурыӀоу, къэбарышӀоу шъушӀошъ хъурэм пае инэу шъузэдэлажьэу,

²⁸ къышъупэуцухэрэм зыкӀи шъузэращымыщынэрэри сшӀэщт. Ахэр зэрэкӀодыжьыщтхэри, шъо шъумыкӀодэу шъукъызэрэнэжьыщтри шъуизекӀуакӀэ нафэу аригъэлъэгъущт. ШъумыкӀодэу шъукъэзгъэнэжьыщтыр Тхьэр ары.

²⁹ Сыда пӀомэ, ХристоскӀэ шӀошъхъуныгъэ шъуиӀэным имызакъоу, Христос паий къин шъущэчынэу Тхьэм ынэшӀу щыфэныгъэкӀэ фит шъуишӀыгъ.

³⁰ Сэ бэнэным сыхэтэу зэрэшъулъэгъугъэм фэдэу, шъори джы шъухэт, джыри а бэнэным сызэрэхэтыр зэхэшъухыгъ.