Buk me Aŋwen pa Moses ma Gilwoŋo Wel 23 - Acoli Baibul

¹ Balaam owaco bot Balak ni, “Ber icanna keno tyer abiro kany, ci ikella twoni abiro ki romi bene abiro.”

² Balak otiyo kit ma Balaam ociko-ni; ci Balak ki Balaam gubedo ka tyero twon acel ki nyok romo acel i wi keno tyer acel acel.

³ Ci Balaam owaco bot Balak ni, “Cuŋ kany i ŋet gitum awanani-ni, ci an abicito kunnu. Gwok nyo Rwot bibino ka rwatte kweda, ci gin ducu ma en binyutta abititti.” Ci ocito malo i wi got ka ma yadi pe iye.

⁴ Ci Lubaŋa orwatte ki Balaam. Balaam owaco bote ni, “Doŋ atyeko yubo keno tyer abiro, dok atyero twon acel ki nyok romo acel i wi keno tyer acel acel.”

⁵ Ci Rwot oketo lokke i dog Balaam kun waco bote ni, “Dok cen bot Balak ci iwac kit man.”

⁶ Odok cen ci onoŋo Balak pud ocuŋ ka ŋet gitum awaŋane kacel ki ludito pa jo Moab ducu.

⁷ Balaam ocako lokke kun loko macalo lanebi. Owacci, “Balak okela ki i Aram, kabaka me Moab ooma ki i wi godi ma tye yo tuŋ wokceŋ: ‘Bin wek icenna jo pa Yakobo. Bin ikec i kom jo Icrael!’

⁸ Abiceno niŋniŋ ka Lubaŋa pe oceno? Akeco i kome niŋniŋ ka Rwot pe okeco i kome?

⁹ Anenogi ki i wi pata got mabor, abedo ka nenogi ki i wi cere. Nen, gin lwak ma gibedo ka kengi, pe guribbe kacel ki rok mu kene ducu.

¹⁰ Aŋa ma kwano jo pa Yakobo ma gipol macalo apwa-ni? Aŋa ma kwano jo Icrael ma gipol mada kuman? Wek an ato kit to pa jo-ni ma kitgi atir-ri! Agikki kwona obed macalo megi!”

¹¹ Ci Balak owaco ki Balaam ni, “Gin aŋo ma doŋ itimo tuŋ bota? Akeli kany ka ceno lumerokka, ci nen, in ilamo gum komgi keken.”

¹² Odok iye ni, “Myero agwokke ka loko gin ma Rwot oketo i doga.”

Lok me aryo ma Balaam owaco

¹³ Balak dok owaco bote ni, “Bin doŋ kweda i kabedo mukene ka ma iromo nenogi iye. Ibineno jo ma gitye cok keken, pe ibinenogi ducu; ci icengi pira ki kunnu.”

¹⁴ Ci otere i poto pa Jopim wa i lacol got Piciga. Ocano keno tyer abiro kunnu, ci otyero twon acel ki nyok romo acel i wi keno tyer acel acel.

¹⁵ Ci Balaam owaco bot Balak ni, “cuŋ kany ka ŋet gitum awaŋani, kun an arwatte ki Rwot kuca.”

¹⁶ Ci Rwot orwatte ki Balaam, oketo lok i doge kun waco ni, “Dok cen bot Balak, ci iwac kit man.”

¹⁷ Odok bote ci onoŋo Balak pud ocuŋ ka ŋet gitum awaŋane ki ludito pa jo Moab kacel kwede. Balak openye ni, “Rwot doŋ oloko niŋo?”

¹⁸ Balaam ocako lokke kun loko macalo lanebi. Owacci, “A malo, Balak, ci iwiny; winy an ya, in wod pa Jipor.

¹⁹ Lubaŋa pe dano, ma twero loko goba; en I pe wod pa dano, ma myero onen ki tamme. Ka doŋ owaco lok mo, ci pe bitiyone? Ka onoŋo oloko, ci pe cobo kakare?

²⁰ Nen ya, alimo cik me miyo gum; ka Lubaŋa omiyo gum, pe atwero dwokone cen,

²¹ Pe aneno can mo ma bipoto i kom Yakobo; pe aneno aroma mo ma bibedo bol jo Icrael. Rwot Lubaŋagi tye kwedgi, awinyo ka gidaŋŋe gijolo kabakagi.

²² Lubaŋa okwanyogi ki i Ejipt, kerone calo kero pa jubi,

²³ Lugaga mo pe ma loko can i kom Yakobo, gi-tyet mo pe ma mako kom Icrael Koni doŋ gibiwaco lok i kom Yakobo ki Icrael ni, ‘Lubaŋa otimo gin madit kuman!’

²⁴ Nen lwak meno! Gia malo macalo min labwor, gitiŋŋe macalo labwor ma pe buto piny nio ka emwodo lee ma omako, ci mato remo pa dano ma onekogi.”

²⁵ Ci Balak owaco bot Balaam ni, “Ka pe iye cenogi, myero pe dok ilam gum komgi aye.”

²⁶ Ento Balaam odok iye ki Balak ni, “Yam pe awaco boti ni, ‘Gin ducu ma Rwot ocika kwede, meno aye myero ati’?”.

²⁷ Ci Balak owaco bot Balaam ni, “Koni doŋ ibin, abiteri i kabedo mukene; gwok Lubaŋa biye ni icengi ki kunnu.”

²⁸ Balak dok otero Balaam i wi lacol got Peor ma neno piny tuŋ tim aroo.

²⁹ Ci Balaam owaco bot Balak ni, “Canna bene keno tyer abiro kany, ikella twoni abiro ki nyogi romi abiro.”

³⁰ Balak otiyo kit ma Balaam owaco-ni, ci otyero twon acel ki nyok romo acel i wi keno tyer acel acel.