फिलिप्‍पि 2:16 - याम्फु

¹⁶ मोबा हे़निङे़ॽ चुप्‍पॽआ हिङ्‌मवा पिघुबा सुसमाचार निवाबेॽ हुप्‍नुङ युक्‍सानुमे। इडोॽ ले़टानुमहोङ के़ॽ खेः आङ्‌मानुङ ले़ःॽपॽआ योम्‍बोक मोडोक्‍नोॽ मे़के़न्‍डिखडा लुनुङ खिरिस्‍ट लेङ्‌इये याकपेॽ के़ॽ गरब ले़टोॽइन्‍डुङ।

फिलिप्‍पि 2:16 Cross References

मत्‍ति 10:27

के़ॽ हे़निङ सेन्‍जुगुपबेॽ लुबॽआ खा, हे़निङे़ॽ उज्‍यालोबेॽ चोपजि लुमे़, ने़ए़कपेॽ खुस्‍रिङ लुबॽआ खा खिममि धुरिबाङ परचार ले़ःॽमे़।

लुका 12:8

“के़ॽ हे़निङ लुनिम्‍ने़, आसे़ॽ का याॽमिजिमि पोम्‍बेॽ के़ए़ परभु लुहेन्‍डुए, का याॽमिमि पसे़ॽसो खो निवाहाङ्‌मि थाङ्‌सिरिदुतमि पोम्‍बेॽ के़ए़ याॽमि लुनुङ ले़नुङे।

युहन्‍ना 6:63

हिङ्‌मवा पिघुबा चाहिँ निवाहाङ्‌मि होङ्‌निवानोॽ ले़ये। इगो योम्‍बोक याॽमिमि हिङ्‌मवाबाङ इमाङ्‌सो ले़ःॽहे़निबा। के़ॽ हे़निङ लुबॽआ खा चाहिँ होङ्‌निवानुङ हिङ्‌मवा ले़ये।

युहन्‍ना 6:68

मोबा सिमोन पत्‍रुसडे़ॽ लुसु, “हे परभु, कानिङ असाबेॽ खे़ॽमे ? हे़नबेॽरेॽ ए़स्‍सिमे हिङ्‌मवा पिघु बचन टुये।

एप्‍पा चोङ्‌सा 13:26

“होउ, अब्‍राहाममि पसाजि, इस्‍राएलि वावानिसाजि, निवाहाङ्‌मि आदर ले़ःॽखुबाजि, निवाहाङ्‌डे़ॽ इगो सुसमाचार कानिङ चोपमि लागि पाङ्‌बॽआ ले़हा।

१ कोरिन्‍थि 1:8

कानिङ्‌मि परभु येसु खिरिस्‍ट लेङ्‌इये याकपेॽ हे़निङ आप्‍टिक मे़ॽनिङ युङ्‌मामि खोसे़ॽ ए़क्‍साङ्‌रो बिस्‍वासबेॽ बोलियो टोङ्‌इये।

१ कोरिन्‍थि 9:26

मोडोगे़ॽनोॽ का पिम्‍माबेॽ इनाम चुप्‍मामि पिङ्‌इङे। हिॽवाबाबेॽ हुगे़ॽ उप्‍टिडोॽ माङ माङ के़ॽ उबुङ्‌नि।

गलाति 2:2

निवाहाङ्‌डे़ॽ खडे लुनुङ का सेन्‍जिसेम्‍माङ्‌बेॽ लुबॽआसे़ॽ का मोबेॽ खडिङ। के़ॽ याक्‍लोएम्‍बाङ अयहुदिजि बेॽलोखेॽ सुसमाचार खेम्‍मेॽपेटुङ्‌हाजि मोडोॽ खेम्‍मेॽपॽआ सुसमाचार मे़ङ्‌के़न्‍डिॽखे़ॽलो लुनुङ के़ॽ मोमि टुम्‍बेॽ मोबेॽहा मन्‍डलिमि डायोङ्‌बाजिरेॽ चुप्‍नुङ इःबेॽटुङ्‌जि।

गलाति 4:11

का इडोॽ मिङ्‌इङे, के़ॽ हे़निङ्‌मि लागि ले़ःॽपॽआ दुःख माङ माङ के़न्‍डिॽखडे़ ?

फिलिप्‍पि 1:10

इडोॽ लिहोङ हे़निङे़ॽ चोपबाङ नुबा मराम हाम्‍बे चाहिँ ले़ये लुनुङ लेहेन्‍डानुमे, मोबा खिरिस्‍ट लेम्‍माबेॽ हे़निङ पबित्‍रानुङ आप्‍टिक मे़ॽनिङ्‌हा याॽमिजि लिहेन्‍डानिङे।

फिलिप्‍पि 1:6

मोबा निवाहाङ्‌डे़ॽ हे़निङ्‌बेॽ मुक्‍तिमि योम्‍बोक तरिक्‍इटुए। येसु खिरिस्‍ट फेरि लेङ्‌इये याकठोक्‍पेॽ निवाहाङ्‌डे़ॽ मो नुबा योम्‍बोक येॽएन्‍डुए लुनुङ के़ॽ चइबानोॽ बिस्‍वास ले़नुङे।

१ थेस्‍लोनिकि 2:19

कानिङ्‌मि परभु येसु लेम्‍मे याक खोमि पोम्‍बेॽ कानिङ्‌मि आसा, हाङ्‌हाङ, हे़निङ्‌नोॽ ले़न्‍डानिङे। मोबा साप्‍थाङ्‌मे गौरबमि मुकुटसो हे़निङ्‌नोॽ ले़न्‍डानिङे।

१ थेस्‍लोनिकि 3:5

के़ॽ हाइखा बेॽलो याक मे़हुङ्‌हेसुङ इन्‍ढोङ्‌होङ रेम्‍एङ्‌घुबा सैतानडे़ॽ हे़निङ्‌मि बिस्‍वास नासि ले़टुएन्‍डे मिॽनुङ का बेॽलो किस्‍सिडिङा। मोडोगे़ॽ हे़निङ्‌मि बिस्‍वास इन्‍डोॽ ले़ये लुनुङ लेडोक्‍मामि लागि के़ॽ तिमोथि हे़निङ्‌बेॽ पाक्‍सुङ।

हिब्‍रु 4:12

निवाहाङ्‌मि बचनगो हिङ्‌रिक ले़येनुङ सानिङ्‌नोॽ योम्‍बोक ले़न्‍डुए। खोमि बचन निच्‍चिलामनोॽ धारनुङ्‌मा फेयाबाङ्‌सो बेॽलो वे़ङ्‌इये। इगोसे़ॽ होङ्‌सिॽयु खे़ॽनुङ सोःक्‍मानुङ होङ्‌निवा हान्‍डुए, मोबा जोरनिनुङ से़ॽकोॽवा खोरो खोरो टोङ्‌इन्‍डुए, निवा होङ्‌सिॽयुनुङ निवे़ॽ मिॽपॽआ खा जाँच ले़ःॽहेन्‍डुए।

१ पत्‍रुस 1:23

निवाहाङ्‌मि हिङ्‌रिकनुङ सानिङ टुडुङ्‌घे़ये बचनबाङ चोङ लिनुङ हे़निङ फेरि टोॽइटानिङे। हे़निङ नासि लिघुबा पाबामि पसाजि ने़ॽनि, तर नासि लिनिबा पाबामि पसाजि लिटानिङे।

१ युहन्‍ना 1:1

याक्‍लोएबाङ्‌नोॽ टुबॽआ, कानिङे़ॽ खेम्‍बॽआ, मोबा कानिङ्‌मि मिगे़ॽ खाङ्‌बॽआ, मोबा नुरोॽ वाःप्‍पॽआनुङ कानिङ्‌मि हुगे़ॽ के़क्‍पॽआ हिङ्‌मवामि बचनमि टुम्‍बेॽ कानिङे़ॽ साप्‍मिटुङ्‌मे।

परकास 22:17

पबित्‍रा होङ्‌निवानुङ नायोङ्‌माडे़ॽ लुये, “आबे।” असे़ॽ खेम्‍इन्‍डुए मोसे़ॽ लुसुरो, “आबे” असा वाइॽमे़ॽ सिटुए, खोसे़ॽ हेरो हिङ्‌मवामि योङा उक्‍सुरो।