फिलिप्‍पि 1:27 - याम्फु

²⁷ चोप्‍पाङ बेॽए खा लुबॽआ चाहिँ हे़निङ्‌मि चाल चलन सुसमाचार परचार ले़ःॽमारोमा लिमा खे़ये। मोडोगे़ॽ का हे़निङ्‌बेॽ लेङ्‌ङासो मे़लेङ्‌ङासो हे़निङ चाहिँ इक्‍को होङ्‌निवाबेॽ बोलियो लिसानिङे। मोबा इक्‍कोनोॽ योम्‍बोक ले़ःॽमे निवा खिनुङ बेॽलो याॽमिजिडे़ॽ बिस्‍वास ले़टुमिरो मिॽनुङ सुसमाचारमि परचार ले़ःॽपॽआ के़ॽ खेम्‍मा मिॽइनुङे।

फिलिप्‍पि 1:27 Cross References

मत्‍ति 12:25

तर येसुडे़ॽ माहा याॽमिजिमि निवामि खा लेडोक्‍नुङ लुसुजि, “इक्‍को राज्‍यबेॽहा याॽमिजि खोजि टाङ्‌बानोॽ खिमाचुमा ले़ःॽमिहोङ मो राज्‍य नासि लिये। मोडोक्‍नोॽ सहर अथबा खिमबेॽहा याॽमिजि खोजि टाङ्‌बा काक्‍मिहोङ खोजिनोॽ नासि लिघे़म्‍मे।

एप्‍पा चोङ्‌सा 2:46

खोजि इक्‍को निवा लिनुङ सानिङ्‌नोॽ मन्‍दिरबेॽ सुम्‍नुङ सङ्‌गति ले़टामे। खोजि खिम-खिमबेॽ सोरि पेन्‍नुङ साप्‍थाङ्‌मानुङ परभु भत्‍तेर चासामे।

एप्‍पा चोङ्‌सा 24:24

मोबा इक याक नियाक ए़क्‍साङ फेलिक्‍स खोमि बनिमा दुरसिल्‍लानुङ लेस्‍सा। दुरसिल्‍ला यहुदि ले़टे़। मोसे़ॽ पावल के़ःॽनुङ खिरिस्‍ट येसुबेॽ बिस्‍वासमि टुम्‍बेॽहा खा पावलबाङ खेप्‍सु।

एप्‍पा चोङ्‌सा 4:32

परभुबेॽ बिस्‍वास ले़ःॽखुबाजि इक्‍को निवा लिनुङ खोजिनुङ टुहा चोप थोक “असे़ॽसो इगो के़ए़” लुनुङ मे़लुसुजे, तर माहाजिमि चोप थोक साझा ले़टहा।

रोमि 1:16

याॽमिजि सुसमाचार खेम्‍मेॽमा का ङेसिङानि, इन्‍ढोङ्‌होङ बिस्‍वास ले़ःॽखुबा चोप याॽमिजिबेॽ याक्‍लो यहुदिजिमि लागि, मोबा अयहुदिजिमि लागिसो इगो सुसमाचार निवाहाङ्‌मि सक्‍ति ले़ये।

रोमि 1:5

खोबाङ निवाहाङ्‌डे़ॽ अनुग्‍रहा ले़ःॽनुङ का खोमि एप्‍पा चोङ्‌सा टोङ्‌इटे़। चोप जातिहा याॽमिजिडे़ॽ बिस्‍वास ले़ःॽनुङ खोसे़ॽ लुबॽआ खा खसिमिरो लुनुङ खोमि योम्‍बोकमि टुम्‍बेॽ परचार ले़ःॽमामि लागि का पाङ्‌इटिङे।

रोमि 1:9

काङ्‌मि चोप निवाबाङ्‌नोॽ निवाहाङ्‌मि पसामि टुम्‍बेॽए सुसमाचार परचार ले़ःॽनुङ खोमि सेवा ले़नुङे। के़ॽ हे़निङ मे़मिन्‍डेॽटिॽ, तर सानिङ्‌नोॽ हे़निङ्‌मि लागि पारथना ले़ःॽमे़ॽनिङ्‌सिनुङे। इगो खामि लागि निवाहाङ्‌नोॽ काङ्‌मि साक्‍छि टुये।

रोमि 10:8

बोरु इडोॽ लुये “निवाहाङ्‌मि बचन हे़निङ्‌मि के़क्‍पेॽनोॽ टुये, हे़निङ्‌मि याबुकपेॽनोॽ टुये, हे़निङ्‌मि निवाबेॽनोॽ टुये।” कानिङे़ॽ बिस्‍वासमि बचनमि टुम्‍बेॽ लुमायोक्‍पॽआ सुसमाचार इगोनोॽ ले़ये।

रोमि 15:16

इक्‍को याडाङ्‌बाडे़ॽ निवाहाङ्‌मि पोम्‍बेॽ नेन्‍जामारोमा भेटि चेॽटिबॽआडोॽ के़ॽसो माहा अयहुदि याॽमिजि सुसमाचार खेम्‍मेॽनुङ, पबित्‍रा होङ्‌निवाबाङ चोखो टोङ्‌नुङ निवाहाङ्‌डे़ॽ नेन्‍जोन्‍डुए भेटिडोॽ खोमि पोम्‍बेॽ लाजे़टुङ्‌हाजि।

रोमि 15:29

का हे़निङ्‌बेॽ लेम्‍माबेॽ खिरिस्‍टबाङ चुप्‍पॽआ चोप आसिसनुङ लेङ्‌इङे़।

१ कोरिन्‍थि 1:10

के़हा वावानिसानुङ नानुसाजि, कानिङ्‌मि परभु येसु खिरिस्‍टमि निङ्‌बेॽ हे़निङ बिन्‍ति ले़निम्‍ने़, हे़निङ चोप इक्‍को निवानुङ्‌हाजि लिसानिङे, मोबा हे़निङ्‌मि रुम्‍बेॽ फाटो मे़लिरो, तर हे़निङ सानिङ इक्‍को निवानुङ चोबे़ॽ इक्‍कोनोॽ खाबेॽ निवा टिसानुमे।

१ कोरिन्‍थि 15:58

मोडोगे़ॽ के़हा वावानिसानुङ नानुसाजि, बिस्‍वासबेॽ पक्‍का लिसानिङे, खोबेॽ सानिङ हे़निङ्‌मि निवा टिसानुमे। सानिङ परभुमि योम्‍बोक ले़ःॽमा बोल ले़टानिङे, इन्‍ढोङ्‌होङ परभुमि योम्‍बोकपेॽ दुःख ले़ःॽपॽआ के़न्‍डिॽखे़ॽनिबा लुमे खा हे़निङे़ॽ लेन्‍डानुमे।

२ कोरिन्‍थि 13:11

के़हा वावानिसानुङ नानुसाजि हागो का बिदा लिङे, हाङ्‌हाङ्‌नुङ पेनानिङे। बिस्‍वासबेॽ पक्‍का लिमामि लागि सानिङ बोल लिसानिङे। हे़निङ बिन्‍ति ले़ःॽपॽआ खा खेप्‍सानुमे, इक्‍कोसे़ॽ लुबॽआ खा हाइकोसे़ॽ खेप्‍सानुमे, मे़ङ्‌खिरेॽ पेनानिङे। मोबा सान्‍तिनुङ नम्‍नम पिघुबा निवाहाङ हे़निङ्‌नुङ पेङ्‌इये।

२ कोरिन्‍थि 4:4

खोजिमि टुम्‍बेॽ लुमाहोङ बिस्‍वास मे़ले़ःॽखुबा याॽमिजिमि लेमे निवानोॽ मक्‍खाम्‍डेमबेॽए मङे़ॽमा चाप सैतानडे़ॽ मिक्‍सुरुम्‍बा टोङ्‌बेटे़। मोडोगे़ॽ खिरिस्‍ट लुबॽआ निवाहाङ्‌मि नरिङ ले़ये लुमे खा खोमि महिमानुङ्‌मा सुसमाचार माहाजिडे़ॽ लेहेसुजिने।

२ कोरिन्‍थि 9:13

इडोक्‍हा योम्‍बोकबाङ हे़निङ इन्‍डोक्‍हा याॽमिजि ले़न्‍डानिङे लुनुङ खाङ्‌मुये। खिरिस्‍टमि सुसमाचारमि लागि हे़निङे़ॽ भक्‍तिनुङ नुबा निवाडे़ॽ हाइखाजिमि लागि पिबॽआ खाङ्‌नुङ याॽमिजिडे़ॽ निवाहाङ ओहाङ ले़न्‍डुजे।

गलाति 1:7

चइबानोॽ खिरिस्‍टमि सुसमाचारबाङ हाइको सुसमाचार माॽआये, तर कोहि याॽमिजिडे़ॽ खिरिस्‍टमि सुसमाचार हाइकेलाम फेङ्‌घे़ॽमा योक्‍पॽआसे़ॽ इगो खा के़ॽ हे़निङ लुमे़ॽनिङ्‌सिनिम्‍ने़।

एफिसि 1:13

मोडोक्‍नोॽ हे़निङे़ॽसो मुक्‍ति पिघुबा चाइबमा सुसमाचार खेम्‍नुङ खिरिस्‍टबेॽ बिस्‍वास ले़टानुम। निवाहाङ्‌डे़ॽ हेन्‍ज्‍रुङ हे़म्‍बॽआ पबित्‍रा होङ्‌निवामि छाप टिनुङ निवाहाङ्‌डे़ॽ हे़निङ खोमि याॽमिजि टोङ्‌बॽआ परमान पिसा।

एफिसि 1:15

मोडोगे़ॽनोॽ परभु येसुबेॽ हे़निङे़ॽ ले़ःॽपॽआ बिस्‍वासनुङ खिरिस्‍टमि पबित्‍रा चोप याॽमिजिमि लागि हे़निङे़ॽ ले़ःॽपॽआ नम्‍नम खेम्‍नुङ,

एफिसि 4:1

मोडोगे़ॽ परभुमि योम्‍बोकमि लागि तिरिङ्‌गा खिमबेॽ से़क्‍सिघे़ॽपॽआ का पावलडे़ॽ हे़निङ्‌नुङ बिन्‍ति ले़निम्‍ने़, निवाहाङ्‌डे़ॽ हे़निङ इमा योम्‍बोकमि लागि के़ए़टे़ मोमि लागिनोॽ हिक्‍सानिङे।

फिलिप्‍पि 1:5

इन्‍ढोङ्‌होङ हे़निङ याक्‍लोएबाङ आयुरोसो सुसमाचार परचार ले़ःॽमे योम्‍बोकपेॽ कानुङ सोरि टुन्‍डानिङ।

फिलिप्‍पि 2:12

मोडोगे़ॽ के़ॽ नम्‍नम ले़ःॽपॽआ वावानिसानुङ नानुसाजि, का हे़निङ्‌नुङ टुमाबेॽ के़ॽ लुबॽआ खा हे़निङे़ॽ ले़टानुम, तर हागो का ओः लिमाबेॽसो हे़निङे़ॽ छना बेॽलो निवाहाङ्‌मि किस्‍सिमवे़ॽ योङ्‌मानुङ हे़निङे़ॽ चुप्‍पॽआ मुक्‍ति खेन्‍जानुये बेबहारनुङ्‌मा योम्‍बोक ले़टानुमे।

फिलिप्‍पि 2:24

मोबा कासो चान्‍डोनोॽ लेङ्‌इङे़ लुनुङ परभुबेॽ बिस्‍वास ले़ए़टुङे।

फिलिप्‍पि 3:18

के़ॽ बेॽलोखेॽ हे़निङ लुबेनिम्‍ने़, हागो फेरिसो हाःप्‍मानुङ लुनिम्‍ने़, बेॽलो याॽमिजि खिरिस्‍टमि सतुर ले़म्‍मे लुनुङ खोजिमि चालचलनडे़ॽ खाङ्‌मुटामे।

फिलिप्‍पि 3:20

तर कानिङ्‌गो थाङ्‌सिरिबेॽहा याॽमिजि ले़न्‍डिङ्‌मा। थाङ्‌सिरिबाङ लेङ्‌घुबा मुक्‍तिदाङ्‌बा, परभु येसु खिरिस्‍टमि राम हुङ्‌मे़ॽनिङ्‌सिन्‍डुङ्‌मे।

फिलिप्‍पि 4:1

मोडोगे़ॽ के़हा वावानिसानुङ नानुसाजि, हे़निङ्‌नोॽ के़ॽ बेॽलो नम्‍नम ले़ःॽपॽआजि ले़न्‍डानिङ, मोबा हे़निङ चुप्‍मा सारोनोॽ मिॽइनिम्‍ने़। हे़निङे़ॽ का साप्‍थाङ्‌मेॽटानिङ, हे़निङ काङ्‌मि योम्‍बोकमि इनाम ले़न्‍डानिङे। हे़निङ इडोक्‍नोॽ परभुबेॽ सानिङ बोलियो लिनुङ हिक्‍सानिङे।

कलस्‍सि 1:10

मोडोॽ ले़ःॽमाहोङ निवाहाङ्‌डे़ॽ नेन्‍जामारोमा योम्‍बोक ले़ःॽनुङ खो साप्‍थाङ्‌मेन्‍डुङ्‌मे। चोप नुबा योम्‍बोकपेॽ हे़निङ आसिसित लिन्‍डानिङे, मोबा हे़निङ निवाहाङ्‌मि निवाबेॽ वाबोक्‍इन्‍डानिङे।

कलस्‍सि 1:4

इन्‍ढोङ्‌होङ खिरिस्‍ट येसुबेॽ हे़निङ्‌मि बिस्‍वासनुङ चोप पबित्‍रा याॽमिजिबेॽ हे़निङे़ॽ ले़ःॽपॽआ नम्‍नममि टुम्‍बेॽ कानिङे़ॽ खेम्‍इटुङ्‌मे।

१ थेस्‍लोनिकि 3:6

तर तिमोथि हे़निङ चुप्‍नुङ इगोबेॽ हागोनोॽ लेङ्‌इटे़। हे़निङ्‌बेॽ हागोसो बेॽलो नम्‍नमनुङ बिस्‍वास टुहा लुमे नुबा खा खेम्‍मेॽटा। मोबा हे़निङे़ॽ सानिङ्‌नोॽ कानिङ नम्‍नम ले़ःॽनुङ मिॽयुङ्‌इटानिङे ले़ए़ लुमे खासो खोसे़ॽ का खेम्‍मेॽटा।

१ थेस्‍लोनिकि 4:1

हागो वावानिसानुङ नानुसाजि, हे़निङे़ॽ निवाहाङ्‌डे़ॽ नेन्‍जामारोमा हिङ्‌मवा इन्‍डोक्‍टे हिङ्‌मे लुमे खा कानिङ्‌बाङ चिङ्‌इटानुमे। चइबानोॽ कानिङ्‌बाङ चिम्‍बॽआ चाल चलन हे़निङे़ॽ ले़ःॽमे़ॽनिङ्‌सिन्‍डानुमे, मोबा अक्‍खा चाल चलन छना नुरोॽ ले़ःॽखे़ॽटानुमे लुनुङ बिन्‍ति ले़न्‍निम्‍ने़।

१ तिमोथि 1:11

इगो सिक्‍छे चाहिँ कानिङ आसिस पिघुबा निवाहाङ्‌डे़ॽ काबेॽ भोर ले़ःॽनुङ परचार ले़ःॽमामि लागि पिबॽआ महिमित सुसमाचारबेॽ टुये।

१ तिमोथि 1:19

मोडोक्‍पेॽ हे़ने़ॽ आमटाङ्‌बामि बिस्‍वास, मोबा नुबानुङ मङे़ॽमा लेमे निवा नुरोॽ हुप्‌युङ्‌मे़। मो निवाडे़ॽ लुबॽआ खा मे़ङ्‌खे़म्‍खुबाजिडे़ॽ टाङ्‌बामि बिस्‍वासनोॽ मे़चोबेसुजि।

२ तिमोथि 4:7

के़ॽ काङ्‌मि ङे नुरोॽ ले़ःॽसेटुङे। के़ए़ पिम्‍मे योम्‍बोक येॽपेटुङेनुङ काङ्‌मि बिस्‍वास हिङ्‌रिकनोॽ युङ्‌इटुङे।

तितस 2:10

माहाजि ए़ॽखुमे़ लुसाजे पुरा भरोसा ले़ःॽहेघुबा लिमा लुसाजे। माहाजिडे़ॽ ले़ःॽपॽआ चोप योम्‍बोकबाङ कानिङ मुक्‍ति पिघुबा निवाहाङ्‌डे़ॽ ओहाङ चुप्‍टुरो।

फिलेमोन 1:5

इन्‍ढोङ्‌होङ परभु येसुबेॽ हे़ने़ए़ बिस्‍वासमि टुम्‍बेॽनुङ निवाहाङ्‌बेॽ बिस्‍वास ले़ःॽखु याॽमिजि हे़ने़ॽ नम्‍नम ले़ःॽपॽआ खा खेम्‍इटुङे।

याकुब 3:18

सान्‍ति लाजे़ॽखुबा निवाडे़ॽ चोप याॽमिजिनुङ टोङ्‌जामे योम्‍बोक ले़ःॽनुङ धारमिक खामि चा चे़न्‍डुए।

२ पत्‍रुस 3:11

इघा चोप खा इडोॽ माङ्‌माङ वायिम्‍घे़ये लुमे लेनुङ हे़निङे़ॽ हिङ्‌मे हिङ्‌मवा पबित्‍रानुङ भक्‍तिनुङ्‌मा हिङ्‌मा खे़ये।

२ पत्‍रुस 3:14

मोडोगे़ॽ लङ्‌गामजि, हे़निङ इघा खा हुङ्‌घुबाजि ले़ःॽपॽआसे़ॽ, निवाहाङ्‌मि पोम्‍बेॽ हे़निङ आप्‍टिकनुङ पबित्‍रा लिनुङ, मोबा सान्‍तिबेॽ पेङ्‌घुबाजि लिमामि बोल ले़टानिङे।

यहुदा 1:3

लङ्‌गामजि, कानिङ चोबे़ॽ चुप्‍पॽआ मुक्‍तिमि टुम्‍बेॽए खा हे़निङ साप्‍हाङ्‌मा बेॽलो मिॽटुङ। तर मोमि साटो निवाहाङ्‌मि भक्‍ति ले़ःॽखुबाजि सानिङ्‌मि लागि पिबॽआ बिस्‍वास जोगा ले़ःॽयुङ्‌मा खे़ये लुनुङ साप्‍हाङ्‌मा चाहिँ छना नुबा मिॽटुङ।