फिलिप्पियों 2:17 - काँगड़ी

¹⁷ तुहां दा मसीह च बसुआस कने तुहां दी सेवा परमात्मे तांई चढ़ाईया बल़िया साइआं ऐ। जे सैह़ मिन्जो मारी भी दैन, तमी मैं खुस ऐ, कने तुहां सबना सौगी खुसी मनांदा ऐ।

फिलिप्पियों 2:17 Cross References

प्रेरितां दे कम्म 20:24

अपर मैं अपणेयां प्राणा जो कुच्छ नीं समझदा कि तिन्हां जो प्यारा जाणे, अपर एह़ कि मैं अपणिया दौड़ा जो कने सेवा जो पूरिया करैं, जेह्ड़ी मैं परमात्मे दे अनुग्रह दे सुसमाचार पर गवाही दैणे तांई प्रभु यीशु मसीह ते पाई ऐ।

प्रेरितां दे कम्म 21:13

अपर पौलुसैं जवाब दित्ता, “तुहां क्या करदे हन, कि रौई-रौई करी मेरे मने तोड़दे हन? मैं तां प्रभु यीशुये दे नांऐ तांई यरूशलेम सैहरे च सिर्फ ना बन्धे जाणे तांई अपर मरने तांई भी त्यार ऐ।”

रोमियो 12:1

इसतांई हे प्यारे साथी बसुआसियो, मैं तुहां नैं परमात्मे दी दया याद दिलाई नैं विणती करदा ऐ, कि अपणे आप्पे जो जिन्दा, कने पवित्र, कने परमात्मे जो खरा लगणे आल़ा बलिदान चढ़ा। परमात्मे दी भक्ति करणे दा ऐई सच्चा तरीका ऐ ।

रोमियो 15:16

कि मैं होरनी जातिआं दे लोकां तांई यीशु मसीह दा सेवक बणी नैं इक्क याजकें साइआं परमात्मे दे सुसमाचारे दी सेवा करैं। तां होरनी जातिआं दे लोकां जो पवित्र आत्मा दे जरिये पवित्र कित्ते जाणे ते बाद, परमात्मे सौगी मिल्लांदा ऐ, जिसते सैह़ खुस हुंदा ऐ।

2 कुरिन्थियों 12:15

मैं तुहां लोकां तांई बड़ी खुसिया नैं सब कुच्छ खर्च करी दिंगा, कने अपणे आप्पे जो भी देई दिंगा। जे मैं तुहां नैं इतणा प्यार करदा ऐ, तां क्या तुहां मिन्जो नैं घट प्यार करगे?

2 कुरिन्थियों 4:12

इसतांई इसदा मतलब एह़ ऐ कि अहां लगातार मौत्ती दा सामणा तां करदे हन, अपर तुहां तांई इसदा नतीजा एह़ ऐ कि तुहां सदा दी ज़िन्दगी पाणी ऐ।

2 कुरिन्थियों 6:10

अहां दा तां दुखां दा बग्त था, अपर हमेसा खुस रैंह्दे हन। अहां अप्पु तां कंगाल हन, अपर मतेआं जो आत्मिक रूप ते अमीर बणाई दिंदे हन। अहां ऐदेय हन जिंआं अहां अल्ल कुच्छ नीं भिरी सब कुच्छ रखदे हन।

2 कुरिन्थियों 7:4

मैं तुहां नैं पूरे भरोसे नैं ग्लांदा ऐ, मिन्जो तुहां पर बड़ा घमंड ऐ; कने मिन्जो हौंसला मिलदा ऐ। जिसते कि मैं अपणिया सारी मुसीबता च भी खुसिया नैं भरोई रैंह्दा ऐ।

फिलिप्पियों 1:20

मैं तां बड़ी इच्छा कने आसा रखदा ऐ, कि मैं कुसा भी गल्ला च बेइज्जत ना होयैं, अपर जिंआं मैं पूरिया हिम्मता दिया बज़ाह ते मसीह दी बड़ेयाई मेरे सरीरे दे जरिये सदा हुंदी रेई ऐ, तिंआं ई हुण भी होयैं, चां मैं जिन्दा रैंह् या मरी जां।

फिलिप्पियों 2:18

तिंआं ई तुहां भी खुस होआ, कने मिन्जो सौगी खुसी मना।

फिलिप्पियों 2:30

क्जोकि सैह़ मसीह दे कम्मे तांई अपणे प्राणा जो खतरे च पाई नैं मौत्ती नेड़े आई गेआ था तांजे जेह्ड़ी कमी तुहां दे पास्से ते मेरी सेवा च होई तिसायो पूरी करैं।

फिलिप्पियों 4:18

मिन्जो अल्ल सब कुच्छ ऐ, अपर मता सारा ऐ; जेह्ड़ियां चीज्जां तुहां इपफ्रुदीतुस दे हत्थे ते घल्लियां थियां तिन्हां जो लेई नैं मैं रज्जी गेआ, सैह़ तां सुख आल़ी सुगंधा साइआं, कने अपनाणे जोग्गा बलिदान ऐ, जिन्हां जो याजक परमात्मे जो चढ़ांदे हन, जिसियो परमात्मा अपनांदा कने खुस हुंदा ऐ।

कुलुस्सियों 1:24

हुण मैं तिन्हां दुखा दिया बज़ाह ते जेह्ड़े तुहां तांई झेला दा ऐ, खुसी मनांदा ऐ। कने मैं तिसदे सरीरे, मतलब कलीसिया तांई अपणे सरीरे च कने मसीह दे दुखां च बाक्कि रेई गेई कमियां जो पूरा करदे-करदे अपणी जिम्मेवारी निभा दा ऐ।

1 थिस्सलुनीकियों 2:8

कने तिंआं ई अहां तुहां दी लालसा करदे होये, ना सिर्फ परमात्मे दा सुसमाचार पर अपणे-अपणे प्राण भी तुहां जो दैणे जो त्यार थे, इसतांई कि तुहां अहां दे बड़े भरी प्यारे होई गियो थे।

2 तीमुथियुस 4:6

मैं तुहां जो एह़ हुक्म इसतांई दिंदा ऐ, कि मेरी ज़िन्दगी कने मेरा परमात्मे तांई कम्म खत्म होणे आल़ा ऐ क्जोकि मैं जाणदा कि मैं तौल़ी ई मरी जांगा।

1 पतरस 2:5

तुहां भी जिन्दे पत्थरां साइआं हन, जिन्हां दा आत्मिक घर बणाणे तांई इस्तेमाल होआ दा ऐ। तुहां पवित्र याजकां दा समाज भी हन, कने प्रभु यीशु मसीह दिया मदता नैं ऐदेय बलिदान चढ़ांगे, जेह्ड़े परमात्मे जो खुस करदे हन।

1 यूहन्ना 3:16

अहां प्यार इसते जाणेया, कि यीशु मसीयैं अहां तांई अपणे प्राण देई दित्ते; इसतांई अहां जो भी भाऊआं तांई अपणे प्राण दैणा चाइदे।