فیلیپیان 4:6 - کتاب مقدس به زبان مازندرانی - گویش غربی

⁶ هیچی ای سِه دِلواپَس نَووئین، بَلگی هر چی ای دِلِه دِعا و خواهش تمنا و شِکر هاکِردنی هَمرا، شی خواسِّه هارِه خِدارِه بُئین.

گیله ماز

⁶ هیچی یه وَسین دِلواپَس نَبین، بلکه هر چی یه دِلِه دُعا وخواهش و تمنا و شکر هَکُردَنِ هَمرَه، شیمی خواسِّه ها رِه خُدا رِه باگویید.

کتاب مقدس به زبان مازندرانی - گویش شرقی

⁶ هیچیِ وِسه دلواپس نَبوئین، بلکه هر چیِ دِله، دِعا و خواهش تَمِنّا و شِکر هاکاردِنِ هِمراه، شه خواسه ها ره خِدا ره بارین.

فیلیپیان 4:6 Cross References

اِنجیلِ مَتّی 10:19

وختی شِمارِ هماسِنِنِه، نِگَرون نَووئین گه چی و چِتی بُئین. چون هون موقِه اونچی وِنِه بُئین شِمارِ هادا وونِه.

اِنجیلِ مَتّی 13:22

تیمی گه لَم تَلی ای دِلِه دَکاشت بَوِه، کَسیِه گه کَلامِ اِشنُنِه، ولی چون وی دِل دِنیارِه دَوَسِّه و وی چِش مال و مَنالی دِمال دَرِه، هَینِن کَلامِ خَفِه کِنِنِه و بار نیارنِه.

اِنجیلِ مَتّی 6:34

پَس فَردایی نِگَرون نَووئین؛ چون فَردا شی نِگَرونی رِه دارنِه. اَمرِزی مِشکِلات اَمرِزی سِه وَسِّه.

اِنجیلِ مَتّی 6:8

پَس وِشونی تَرا نَووئین، چون شِمِه آسِمونی پیر شِمِه اِحتیاجِ پِش از اونگِه ویجا بَخواین دِنِّه.

لوقا 10:41

ولی عیسای خِداوند جِواب هادا: «مارتا! مارتا، تو خِیلی چیایی سِه شِرِه پَریشون و نِگَرون کِنّی.

لوقا 12:22

اَزما عیسی شی شاگِردِنِ بُتِه: «شِمارِ گِمِه، شی زندگی ای سِه نِگَرون نَووئین گه چی بَخارین، و نا شی تَنی سِه گه چی دَکِنین،

لوقا 12:29

پس هَینی دِمال دَنیوئین گه چی بَخارین و یا چی دَکِنین، هَینِنی نِگَرون نَووئین،

لوقا 18:1

عیسی شی شاگِردِنی سِه مَثَلی بیاردِه تا وِشونِه هَم هادِه وِنِه هَمِش دِعا هاکِنِن و هیچ وَخت دِلسَرد نَوون.

لوقا 18:7

اِسا، مَگِه خِدا شی انتخاب بَوه ایشونی داد گه شُو و روز وی پیشگاه اِلتِماس کِنِنِه، نَرِسِنِه؟ هَین کارِ هَمینجور عقب دیم دِنِه؟

اوّلین نامِه قُرنتیانی سِه 7:21

هون موقِه گه بَخونِس بَوِئی، نوکر وِه ای؟ نَتِرس. ولی اگه بَتِنّی شی آزادی رِه بِدَس بیاری، فرصتِ از دَس نَدِه.

اوّلین نامِه قُرنتیانی سِه 7:32

می خواسِّه هَینِه گه هر دِلواپسی ای جا دور ووئین. اَذَبِ مَردی خِداوندی کارایی دِلواپسِ، هَینی دِلواپسِ گه چِتی خِداوندِ خِشال هاکِنِه؛

دوّمین نامه قرنتیانِ وَسین 1:11

شِما هَم وِنِه شی دِعایی هَمرا اَمارِه کِمک هاکِنین، تا خِیلیا اَمِه خاطری شِکر هاکِنِن، هون برکتی خاطری گه خِیلی آدَمنی دِعایی جِوابی دِلِه اَمارِه هادا بَوِه.

اِفِسُسیان 5:20

هَمِش خِدای پیرِ، اَمِه خِداوند عیسی مَسیحی اِسمی هَمرا هَمه چی ای سِه شِکر هاکِنین.

اِفِسُسیان 6:18

و هَمِش، هر جور دِعا و خواهشی هَمرا، خِدایی روحی دِلِه دِعا هاکِنین، هَینِسه ویشار و هوشیار ووئین، و همِش پایداری ای هَمرا دِشتِه مِقَدّسینی سِه دِعا هاکِنین.

کولُسیان 3:15

مسیحی صِلح و سلامتی شِمِه دِلی دِلِه حاکم ووئِه، چونگه راساسی یَتِه تَنی دِلِه بَخونِس بَوِنی. و شِکرگزار ووئین.

کولُسیان 3:17

و هر کاری گه کِنِنی، چی بُتنی دِلِه و چی رفتاری دِلِه، هَمه رِه خِداوند عیسایی اسمی هَمرا هاکِنین، و وی طریق خِدای پیرِ شِکر هاکِنین.

کولُسیان 4:2

همِش دِعایی دِلِه استوار ووئین، و دِعایی دِلِه شِکر هاکردنی هَمرا شِمِه حواس جم وو.

اول تیموتائوس 2:1

پس، پِش از هر چی، خوایمِه گه خواستها، دِعاها، شفاعتها و شِکر هاکردنا دِشتِه مَردِنی سِه بِجا بیارد بَوو،

اول تیموتائوس 5:5

اونیگه راساسی بیوِه و بی‌کسِ، خِدارِه اِمید دارنِه و شُو و روز دِعایی دِلِه و خِدایی کِمَک بَیتنی جا مشغولِ.

اول پِطرُس 4:7

هَمه چی ای آخر نَزیکِ؛ پَس شی دِعاهایی خاطری هوشیار ووئین و شی دَمِ بَئیرین.

اول پِطرُس 5:7

دِشتِه شی دِلواپسی هارِه وِرِه بِسپارین چون وی شِمِه فِکر دَرِه.