ಫಿಲಿಪ್ಪಿಯೆರೆಗ್ 2:5 - ಪೊಸ ಒಡಂಬಡಿಕೆ

⁵ ಕ್ರಿಸ್ತ ಯೇಸುಡು ಇತ್ತಿನಂಚಿನ ಮನಸ್ ನಿಕ್ಲೆಡ್ಲಾ ಉಪ್ಪಡ್.

ಫಿಲಿಪ್ಪಿಯೆರೆಗ್ 2:5 Cross References

ಮತ್ತಾಯೆ 11:29

ಯಾನ್ ಸಜ್ಜನೆಲಾ, ತಗ್ಗ್‌ದಿ ಮನಸ್‌ದಾಯೆಲಾ ಆದುಪ್ಪುನೆಡ್ದ್ ಎನ ನುಗೊನು ನಿಕ್ಲೆ ಮಿತ್ತ್ ದೆತ್ತೊಂದು ಎನಡ್ದ್ ಕಲ್ತೊನ್ಲೆ, ಅಪಗ ನಿಕ್ಲೆ ಆತ್ಮೊಗು ಸುಖ ತಿಕ್ಕು.

ಲೂಕೆ 22:27

ಮಲ್ಲಾಯೆ ಏರ್? ಪಂತೆಡ್ ಕುಲ್ಲುದಿನಾಯೆನಾ ಇಜ್ಜಿಂಡ ಚಾಕ್ರಿ ಮಲ್ಪುನಾಯೆನಾ? ಪಂತೆಡ್ ಕುಲ್ಲುದಿನಾಯೆ ಅತ್ತಾ. ಆಂಡ ಯಾನ್ ನಿಕ್ಲೆ ನಡುಟು ಚಾಕ್ರಿ ಮಲ್ಪುನಾಯಲೆಕ್ಕ ಉಲ್ಲೆ.

ಅಪೊ.ಕ್ರಿ 10:38

ದೇವೆರ್ ನಜರೇತ್‌ದ ಯೇಸುನು ಪರಿಶುದ್ಧಾತ್ಮೊಡ್ದುಲಾ ಬಲೊಡ್ದುಲಾ ಅಭಿಷೇಕ ಮಲ್ತೆ; ದೇವೆರ್ ಆಯ ಒಟ್ಟುಗು ಇತ್ತಿನೆಡ್ದ್ ಆಯೆ ಮಾತೆರೆಗ್ಲಾ ಎಡ್ಡೆ ಮಲ್ತೊಂದು; ಸೈತಾನನ ಬಂಧನೊಡು ಇತ್ತಿನಾಕುಲೆನ್ ಗುಣ ಮಲ್ತೊಂದು ಮಾತ ಜಾಗ್‌ಗ್ ಪೋವೊಂದಿತ್ತೆ. ಉಂದು ಮಾತ ನಿಕ್ಲೆಗ್ ಗೊತ್ತಾದುಪ್ಪು.

ಅಪೊ.ಕ್ರಿ 20:35

ಮಾತ ವಿಚಾರೊಡು ಯಾನ್ ನಿಕ್ಲೆಗ್ ಮಾದ್ರಿ ತೋಜಾದೆ. ಎಂಕುಲುಲಾ ಅಂಚೆನೇ ಬೆಂದ್‌ದ್ ಬಲಹೀನೆರೆಗ್ ಉಪಕಾರ ಮಲ್ಪೊಡು, ‘ಬೊಕ್ಕ ದೆತ್ತೊನುನೆಡ್ದ್ ಕೊರ್ಪಿನವೇ ಮಲ್ಲ ಭಾಗ್ಯ,’ ಅಂದ್‌ದ್ ಕರ್ತವೆ ಯೇಸು ತಾನೇ ಪಂಡಿ ಪಾತೆರೊಲೆನ್ ನೆನೆಪುಡು ದೀವೊಂದುಪ್ಪೊಡು,” ಪಂಡೆ.

ರೋಮಾಯೆರೆಗ್ 14:15

ಆಂಡ ಈ ತಿನ್ಪಿನ ವಸ್ತುಲೆಡ್ದ್ ನಿನ ಸಹೋದ್ರನ ಮನಸ್‌ಗ್ ಬೇನೆ ಮಲ್ಪುವಡ ಈ ಪ್ರೀತಿಗ್ ತಕ್ಕ ನಡತೊನುಜ. ಕ್ರಿಸ್ತೆ ಏರೆಗಾದ್ ಸೈತ್ ಪೋಯೆನಾ, ಆಯಗ್ ಈ ತಿನ್ಪಿನ ವಸ್ತುಲೆಡ್ದ್ ನಾಶ ಮಲ್ಪಡ.

ರೋಮಾಯೆರೆಗ್ 15:3

ದಾಯೆಗಂದ್ಂಡ, ಕ್ರಿಸ್ತೆಲಾ ತನನ್ ತಾನೇ ಮೆಚ್ಚಾವೊನುಜೆ. ಬದಲ್‌ಗ್ ಶಾಸ್ತ್ರೊಡು ಬರೆತಿಲೆಕ್ಕ “ನಿನನ್ ದೂಷಿಯುನಾಕುಲೆನ ದೂಷಣೆಲು ಮಾತ ಎನ ಮಿತ್ತ್ ಬೂರ್‌ಂಡ್.”

ರೋಮಾಯೆರೆಗ್ 15:5

ಕ್ರಿಸ್ತ ಯೇಸುನ ಮಾದ್ರಿನ್ ಅನುಕರಣೆ ಮಲ್ಪುನೆಡ್ದ್ ನಿಕ್ಲೆಗ್ಲಾ ಸಮ್ಮಂಧೊಡು ಉಪ್ಪೆರೆ ದೇವೆರ್ ಅವ್ವೇ ರೀತಿದ ತಾಳ್ಮೆನ್ಲಾ ಉಮೇದ್‌ನ್ಲಾ ಕೊರಡ್.

1 ಕೊರಿಂಥ್ಯೆರೆಗ್ 10:33

ಯಾನಾಂಡಲಾ ಎನ ಸ್ವಂತ ಪ್ರಯೋಜನೊಗು ಚಿಂತೆ ಮಲ್ಪಂದೆ ಮಾತ ನರಮಾನಿಲೆಗ್ ರಕ್ಷಣೆ ತಿಕ್ಕೊಡು ಅಂದ್‌ದ್ ಅಕ್ಲೆ ಎಡ್ಡೆಗಾದ್ರ ಚಿಂತೆ ಮಲ್ತ್‌ದ್ ಮಾತೆರೆನ್ ಮಾತ ವಿಷಯೊಲೆಡ್ ಮೆಚ್ಚಾವುನಾಯೆ ಆದುಲ್ಲೆ.

ಎಫೆಸ್ಯೆರೆಗ್ 5:2

ಕ್ರಿಸ್ತೆ ನಮನ್ ಪ್ರೀತಿ ಮಲ್ತ್‌ದ್ ನಂಕ್ ಬೋಡಾದ್ ಕಮ್ಮೆನ ಇತ್ತಿ ಕಾಣಿಕೆ ಆದ್‌ಲಾ ಬಲಿ ಆದ್‌ಲಾ ದೇವೆರೆಗ್ ಒಚ್ಚಿದ್ ಕೊರಿಯೆ ಅತ್ತಾ. ಅಂಚೆನೇ ನಿಕುಲುಲಾ ಪ್ರೀತಿಡ್ ನಡತೊನ್ಲೆ.

ಫಿಲಿಪ್ಪಿಯೆರೆಗ್ 1:1

ಕ್ರಿಸ ಯೇಸುನ ದಾಸೆರಾದುಪ್ಪು ಪೌಲುಲಾ ತಿಮೋಥಿಲಾ ಫಿಲಿಪ್ಪಿಡುಪ್ಪು ಕ್ರಿಸ್ತ ಯೇಸುಡು ದೇವಜನೊಕುಲೆಗ್ಲಾ ಸಭಾದ್ಯಕ್ಷೆರೆಗ್ಲಾ ಸಭಾಸೇವಕೆರೆಗ್ಲಾ ಬರೆಪಿನಿ ದಾನೆಂದ್ಂಡ, ನಮ ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ನಿಕ್ಲೆಗ್ ದಯಲಾ ಸಮಾಧಾನಲಾ ಆವಡ್.

1 ಪೇತ್ರೆ 2:21

ಐಕಾದ್ ದೇವೆರ್ ನಿಕ್ಲೆನ್ ಎಡ್ಡೆ ಕೆಲಸೊನು ಮಲ್ತ್‌ದ್ ಕಷ್ಟ ಸೈಸೊನಿಯೆರೆ ಲೆತ್ತ್‌ದೆ, ಅಂಚೆನೆ ಕ್ರಿಸ್ತೆಲಾ ನಿಕ್ಲೆಗ್ ಬೋಡಾದ್ ಕಷ್ಟ ತಿಂದ್‌ದ್, ನಿಕುಲು ಆಯನ ಪಿರವುಡು ನಡಪುಲೆಕ್ಕ ಮಾದ್ರಿ ತೋಜಾಯೆ.

1 ಪೇತ್ರೆ 4:1

ಕ್ರಿಸ್ತೆ ಈ ಲೋಕೊಡುಪ್ಪುನಗ ಶರೀರೊಡು ಕಷ್ಟ ತಡೆಯಿನೆಡ್ದ್ ನಿಕುಲುಲಾ ಅವ್ವೇ ರೀತಿಡ್ ನಿಕ್ಲೆ ಮನಸ್‌ನ್ ತಯಾರ್ ಮಲ್ಪುಲೆ. ದಾಯೆಗಂದ್ಂಡ ನಿಕುಲು ಶರೀರೊಡು ಕಷ್ಟ ತಡೆಯೊಂಡ ಪಾಪೊಲೆಡ್ದ್ ದೂರ ಆಪರ್.

1 ಯೋಹಾನೆ 2:6

ದೇವೆರೆಡ್ ನಿಲೆ ಆದುಲ್ಲೆ ಅಂದ್‌ದ್ ಪನ್ಪಿನಾಯೆ, ಕ್ರಿಸ್ತೆ ಎಂಚ ನಡತೊಂಡೆನಾ ಅಂಚೆನೆ ತಾನ್‌ಲಾ ನಡತೊನೊಡಾಪುಂಡು.