Sililo 2:8 - Siswati 1996 Bible

⁸ Simakadze watimisela kudzilitela phansi lubondza lolutungelete iNdvodzakati yaseSiyoni. Welula intsambo yekukala, wangete wasincandza sandla sakhe ekubhubhiseni. Wenta tibondza tekuvikela, netindvonga kwakhala, konkhe kwaguga kanyekanye.

Sililo 2:8 Cross References

2 Samuweli 8:2

Davide wachubeka wahlasela nemaMowabi, wawehlula. Abebalalisa phansi emhlabatsini, bese ubulala babili njalo kulabatsatfu baletitfunjwa. Ngako emaMowabi ase aba ngaphansi kwakhe, aletsa imitselo yawo kuDavide.

2 Emakhosi 21:13

IJerusalema ngiyayijezisa njengeSamariya nanjengobe ngajezisa Ahabi, inkhosi yaka-Israyeli. Ngitabashanyela bonkhe bantfu baseJerusalema, sincane sendishi lekususwe kuyo konkhe bekungekhatsi, yase ibhekiswa phansi.

Jobe 13:21

Susa sandla sakho kimi, uyekele kungetfusa ngetesabiso takho.

Isaya 22:5

INkhosi Simakadze lenguSomandla ibeke lilanga lesiyaluyalu, lekugcotjwagcotjwa nelekudzidzeka eSigodzini Sembono, lilanga lekuhhihlitwa kwetibondza, lilanga lekutikhalela etintsabeni.

Isaya 28:17

Ngitakwenta kwehlulela ngekwemtsetfocotfo kube ngumugca wekulinganisa, nekulunga kube ngumugca wekucondzisa, sangcotfo siyawuhlwitsa lesiphephelo senu lesingemanga, nesikhukhula semanti siyakwemukisa lendzawo yenu yekubhaca.

Isaya 3:26

Emasango aseSiyoni ayawukhala alile, lidolobha selisiganga, yebo, bantfu balo batawuhlala phantsi emhlabatsini.

Isaya 34:11

Sahhukulu sasehlane nesahhukulu lesikhalako kuyawuyitsatsa lendzawo ibe yako. Sahhukulu lesikhulu nelihhwabayi kuyawukwakhela tidleke tako khona lapho. Nkulunkulu uyakuselula etikwelive laka-Edomu silinganiso sesiphitsiphitsi, yebo, nekwekulinganisa lokuyincitsakalo.

Isaya 5:5

Manje-ke senginitjela kutsi ngitakwentani kulesivini sami: Ngitawususa lolutsango lwaso, lesivini sibhujiswe, ngitawuhhihlita nalolubondza lwaso, sinyatselwe phansi.

Jeremiya 14:2

“Juda uyalila, emadolobha akhe ayajanqula akhalela live, yebo, kukhala kuqubuka eJerusalema.

Jeremiya 5:10

“Dzabula tivini taso utone, kodvwa ungatibhubhisi tiphele titsi nya. Waphundle emagala ato, ngobe labantfu abasibo baSimakadze.

Jeremiya 52:13

Walumeka umlilo ethempelini laSimakadze nasesigodlweni senkhosi, nakuto tonkhe tindlu taseJerusalema; tonkhe letatibalulekile watishisa.

Sililo 2:17

Simakadze wente loko labesakumisile; ulifezile livi lakhe lalimemetela kadzeni. Sewubhidlitile, wangete waba nesihawu, wente sitsa sakucoloshela, uluphakamisile luphondvo lwetitsa takho.

Sililo 2:18

Tinhlitiyo tebantfu tikhala kuSimakadze. Awu, wena lubondza lweNdvodzakati yaseSiyoni, tinyembeti takho atigobhote njengemfula busuku nemini, ungatiniki kuphumula, emehlo akho angaphumuli.

Sililo 2:2

Simakadze ushwabudzele onkhe emakhaya akaJakobe, ngaphandle kwekuwahawukela. Ngelulaka lwakhe udladlabule tinqaba teNdvodzakati yakaJuda. Uwehlisele phansi emhlabatsini ngelihlazo umbuso wayo kanye netikhulu tayo.

Sililo 2:5

Simakadze unjengesitsa; umgwinyile Israyeli. Ugwinye tonkhe tigodlo takhe, wabhubhisa tinqaba takhe. Wandzise kulila nekukhala kabuhlungu kuyo iNdvodzakati yakaJuda.

Hezekeli 20:22

Kodvwa ngasibamba sandla sami, nangenca yeLibito lami ngenta loko lokwakungaligcina lingakonakali emehlweni etive leto, lengangibakhiphe embikwato.