Sililo 2:4 - Siswati 1996 Bible

⁴ Ujijimete umcibisholo wakhe njengesitsa, sandla sakhe sangesekudla silungele kulwa. Njengesitsa ujube bonkhe labebajabulisa emehlweni; watfulula lulaka lwakhe njengemlilo etikwelithende leNdvodzakati yaseSiyoni.

Sililo 2:4 Cross References

2 Tikhronike 34:21

“Hambani niyekungibutela kuSimakadze, nibutele mine kanye nensali yaka-Israyeli neyakaJuda ngaloku lokubhalwe kulencwadzi leseyitfolakele. Yinkhulu kabi intfukutselo yaSimakadze layitfululele etikwetfu ngenca yekutsi bobabe abazange baligcine livi laSimakadze; abazange bakwente konkhe loku lokubhalwe kulencwadzi.”

2 Tikhronike 34:25

Njengobe bangishiyile mine, batfuncisa imphepho kulabanye bonkulunkulu, bangitfukutselisa ngato tonkhe letithico labatibumbe ngetandla tabo, intfukutselo yami itawutfululelwa kulendzawo, futsi ingeke icisheke.’

Jobe 19:11

Lulaka lwakhe luyangivutsela, ungibala kanye netitsa takhe.

Jobe 6:4

Imicibisholo yaSomandla ingekhatsi, ingihlabile, umoya wami sewunatse shevu wayo. Tesabiso taNkulunkulu ticondzane nami ngco.

Tihlabelelo 37:14

Lababi bahosha inkemba, bantsale imicibisholo ebutjokini, bafuna kucedza labamphofu nalabeswele babulale labo labahamba ngebucotfo.

Tihlabelelo 7:13

ulungisa tikhali takhe letinebutsi, ente imicibisholo yakhe ivutse umlilo.

Isaya 42:25

Ngako watfululela etikwabo intfukutselo yakhe levutsako, nebudlwangudlwangu bemphi. Yabasibekela ngemalangabi, noko abazange bacondze; yabadla, kodvwa abakufakanga enhlitiyweni.

Isaya 63:10

Noko, bamhlubuka, badzabukisa Moya wakhe Longcwele. Ngako-ke wagucuka waba sitsa sabo, yena cobo lwakhe walwa nabo.

Isaya 63:6

Ngagcobagcoba tive ngentfukutselo yami; ngelulaka lwami ngatenta tadzakwa, ngatfululela ingati yato emhlabatsini.”

Jeremiya 10:20

Lithende lami libhidlitiwe; tonkhe tindophi talo tidzabukile. Emadvodzana ami esukile kimi, akasekho; kute namunye losasele nyalo, kute longangimisela lelithende lami, nome-ke angimisele lelidlangala lami.

Jeremiya 21:12

awu, wenandlu yakaDavide, naku lokushiwo nguSimakadze, utsi: “ ‘Sebentisani umtsetfocotfo njalo nje ekuseni; nimephule esandleni semcindzeteli lowo lodlelelwe; ngaphandle kwaloko intfukutselo yami itawuvuka ivutse njengemlilo ngenca yebubi lenibentile, yebo, ivutse kubete nalongayicima.

Jeremiya 21:5

Mine matfupha ngiyakulwa nani ngesandla leselulekile, nangengalo lenemandla, nangentfukutselo, nangesikhahlo, nangelulaka lolukhulu.

Jeremiya 30:14

Bonkhe bangani bakho sebakukhohliwe, abasanaki lutfo lwakho. Ngikushaye njengesitsa, ngakujezisa njengalonelulaka, ngobe licala lakho lilikhulu kakhulu, netono takho titinyenti.

Jeremiya 36:7

Mhlawumbe bayawutincengela embikwaSimakadze, ngulowo nalowo aphendvuke endleleni yakhe lembi, ngobe lulaka nentfukutselo lasayibekile Simakadze kumelana nalabantfu yinkhulu kakhulu.”

Jeremiya 4:4

Tisokeni nine kuSimakadze, sokani tinhlitiyo tenu, nitinikele kuye ngalokuphelele, nine madvodza akaJuda nesive saseJerusalema. Ngaphandle kwaloko lulaka lwami lutawucitseka luvutse njengemlilo ngenca yebubi lenibentile, luvutse, kubete nalongalucisha.”

Jeremiya 42:18

“Naku lokushiwo nguSimakadze longuSomandla, Nkulunkulu wema-Israyeli, utsi: ‘Njengobe intfukutselo yami nelulaka lwami sekutfululelwe kulabo labebahlala eJerusalema, kanjalo lulaka lwami lutawutfululelwa etikwenu, naniya eGibhithe. Niyawuba yintfo yekucalekisa neyekwesabisa, nibe yintfo yekwetfuka nelihlazo; ningeke niphindze niyibone lendzawo.’

Jeremiya 7:20

“Ngako-ke naku lokushiwo yiNkhosi Simakadze, itsi: Intfukutselo yami kanye nelulaka lwami kutawutfululelwa etikwalendzawo, etikwebantfu netinkhomo, etikwetihlahla tesiganga kanye nasetikwetitselo temhlaba, lutawuvutsa lungaphindzi lucimeke.

Sililo 1:13

“Watfumela umlilo asetulu, wawehlisela phansi ematsanjeni ami. Webekela tinyawo tami linetha, wangincandzekisa. Wangenta ngaba ngulolahliwe, ngacaleka lilanga lonkhe.

Sililo 2:5

Simakadze unjengesitsa; umgwinyile Israyeli. Ugwinye tonkhe tigodlo takhe, wabhubhisa tinqaba takhe. Wandzise kulila nekukhala kabuhlungu kuyo iNdvodzakati yakaJuda.

Sililo 3:3

Ngempela, sandla sakhe usiguculele ngakimi, simelana nami njalo nje, onkhe emalanga.

Sililo 4:1

Yeka legolide leseyilahlekelwe bucwebecwebe bayo, igolide lebeyicolisakele seyigucuke yafiphala. Ematje laligugu endlu lengcwele asasakateleke emaphetselweni ato tonkhe titaladi.

Sililo 4:11

Simakadze ulufeze ngalokuphelele lulaka lwakhe, uyitfululile intfukutselo yakhe levutsako. ESiyoni uphembe umlilo lowadla tisekelo tayo.

Hezekeli 13:13

“ ‘Ngako-ke naku lokushiwo yiNkhosi Simakadze, itsi: Ngiyawudedela sivunguvungu lesinemandla ngenca yelulaka lwami, ngentfukutselo lenkhulu ngitfulule sangcotfo, nemvula lenkhulu iyakwehla ngentfukutselo yami lenkhulu yembhubhiso.

Hezekeli 20:34

Ngiyawunibuyisa kuleto tive, nginibutse emaveni ngemave, konkhe lapho niyawube nisakatelwe khona, nginibuyise ngesandla lesinemandla nangemkhono locinile, nangekutfululwa kwelulaka.

Hezekeli 22:22

Njengesiliva incibilikiswa yimbutfuma yemlilo, kanjalo nani ngiyakunincibilikisela ekhatsi kulo, niyawube seniyati-ke kutsi mine Simakadze ngitfululele lulaka lwami etikwenu.’ ”

Hezekeli 24:25

“Wena-ke, ndvodzana yemuntfu, ngalelilanga lengiyawutsatsa ngalo inqaba yabo, kujabula kwabo neludvumo lwabo, injabulo yemehlo abo, nesifiso senhlitiyo yabo, kanye nemadvodzana nemadvodzakati abo,

Hezekeli 36:18

Ngako ngatfululela lulaka lwami etikwabo, ngobe bese bacitse ingati kulelo live, nangobe bese balingcolise ngaletithico tabo.

Hezekeli 5:13

“Intfukutselo yami-ke iyakube seyiyaphela, nelulaka lwami kubo lubohle, ngikhipheleke sibhongo. Ngiyawutsi nase ngilukhiphele kubo lulaka lwami, bayawukwati kutsi mine Simakadze sengikhulumile ngenshisekelo yami.

Hezekeli 6:12

Lowo lokhashane kakhulu uyawubulawa sifo lesibulalanako, lowo losedvutane abulawe ngenkemba, kutsi lowo lophunyulile wasala, abulawe yindlala. Ngiyakulufeza kanjalo-ke lulaka lwami etikwabo.

Hezekeli 7:14

Nome bakhalisa licilongo, batilungiselele ngako konkhe, kute namunye loyakuya emphini, ngobe lulaka lwami lusetikwalesicumbi sonkhe.”

Levithikusi 26:17

Buso bami buyawumelana nani, bese nehlulwa titsa tenu, tona leto letinitondzako tiyawunibusa, nani nibaleke, ngisho nome seningasacoshwa ngumuntfu.

Nahume 1:2

Simakadze nguNkulunkulu lonesikhwele nalophindziselako. Simakadze uyabuyisela, futsi ugcwele intfukutselo. Simakadze uyatiphindziselela etitseni takhe, ehlisele njalo lulaka lwakhe kulabo labemelene naye.

Nahume 1:6

Ngubani nje longamelana nentfukutselo yakhe? Ngubani longabhekana nelulaka lwakhe lolwesabeka kangaka? Nakacitsa intfukutselo yakhe lenjengemlilo, emadvwala agayeka phansi abe tincetu embikwakhe.

Dutheronomi 32:22

Ngobe umlilo uphembeke ngentfukutselo yami, umlilo lovutsa ufike phansi ekujuleni endzaweni yalabafile. Uyawudla umhlaba kanye netivuno tawo, ulumeke umlilo etisekelweni tetintsaba.

1 Samuweli 28:16

Samuweli wakhuluma kuye, watsi: “Kepha ungifunelani mine, njengobe Simakadze sewukufulatsele, waba sitsa sakho?