Sembulo 14:6 - Siswati 1996 Bible

⁶ Ngase ngibona lenye ingilosi indiza emkhatsini esibhakabhakeni, iphetse liVangeli lelingunaphakadze lekushunyayelwa kulabo labahlala emhlabeni, etiveni tonkhe, nasemindenini yonkhe, nasetilimini tonkhe, nakubantfu bonkhe.

Sembulo 14:6 Cross References

Genesisi 1:6

Nkulunkulu watsi: “Akube khona umkhatsi emkhatsini wemanti, wehlukanise emanti nemanti.”

2 Samuweli 23:5

“Indlu yami ayikalungi yini kuNkulunkulu? Akenti nami yini sivumelwane saphakadze naphakadze, lesihlelwe kahle savikeleka macala onkhana? Akayikuphumelelisa yini kusindziswa kwami, anginike konkhe lengikufisako?

Tihlabelelo 119:142

Kulunga kwakho kukulunga kwaphakadze, nemtsetfo wakho uliciniso.

Tihlabelelo 139:24

ubone kutsi kute yini lokubi ekuhambeni kwami, bese ungiholela endleleni yaphakadze.

Tihlabelelo 145:13

Umbuso wakho ungumbuso lome kuze kube phakadze, lombuso uyawuhlala ukhona, titukulwane ngetitukulwane. Simakadze wetsembekile kuto tonkhe tetsembiso takhe. Unemusa kuyo yonkhe imisebenti yakhe.

Isaya 40:8

Tjani buyabuna, netimbali tiyahhohloka, kodvwa livi laNkulunkulu wetfu limile kuze kube nguphakadze.”

Isaya 45:17

Kodvwa Israyeli uyawusindziswa nguSimakadze ngensindziso yaphakadze; ningeke nidliwe ngemahloni nome nihlazeke phakadze naphakadze.

Isaya 51:6

Phakamiselani emehlo enu emazulwini, niwubuke nemhlaba phansi; emazulu ayawunyamalala njengentfutfu, nemhlaba uguge njengengubo, nalabahlala kuwo bafe njengetimphungane. Kodvwa insindziso yami iyawukhonsa phakadze naphakadze, kulunga kwami ngeke kuphele.

Isaya 51:8

Ngobe umvunya uyawubadla njengengubo, imphetfu iyawubamita njengensontfo. Kodvwa kulunga kwami kuyawukhonsa phakadze naphakadze, nensindziso yami iyakuma titukulwane ngetitukulwane.”

Isaya 6:2

Ngetulu kwakhe kwakunemaserafi amkhonta, ngulelo nalelo lalinetimphiko letisitfupha: ngetimphiko letimbili atimbonya buso bawo, ngaletimbili atimbonya tinyawo tawo, bese kutsi ngaleti letimbili abe andiza.

Hezekeli 1:14

Letidalwa tatigijima tiye emuva nasembili, njengekubaneka kwembane.

Danyela 4:1

Inkhosi Nebukhadnezari yatfumela nankhu umlayeto kubantfu, netive, nebantfu bato tonkhe tilwimi emhlabeni wonkhe, jikelele, watsi: “Philani nonkhe bekunene!

Danyela 9:21

ngatsi ngisesemthandazweni, kwefika Gabriyeli, leyo ndvodza lengangiyibone embonweni wakucala, wefika kimi njengembane, ngesikhatsi semnikelo wakusihlwa.

Matewu 10:27

Loku lenginitjela kona lapha ekusitsekeni kukhulumeni ebaleni, naloku lenikuva etindlebeni kumemeteleni yonkhe indzawo.

Makho 16:15

Watsi kubo: “Hambani niye emhlabeni wonkhe, nishumayele liVangeli kubo bonkhe bantfu.

KubaseRoma 16:25

Asimdvumise Nkulunkulu! Nguye lonemandla ekunicinisa ngeliVangeli lami nangetinshumayelo ngaJesu Khristu, ngekwesembulo semfihlakalo yeliciniso lelalifihlakele kusukela phakadze,

KubaseKholose 1:23

Loko kungenteka kuphela nangabe nine nihlala ekukholweni, futsi nisekelekile, nisimile, ninganyikanyiswa lutfo ekwetsembeni kwenu liVangeli lenalitfola, naliva lishunyayelwa emhlabeni wonkhe jikelele. Mine Pawula ngentiwa ngaba sikhonti salo lelo Vangeli.

2 kubaseThesalonika 2:16

Shangatsi Jesu Khristu iNkhosi yetfu matfupha, naNkulunkulu, longuBabe lowasitsandza, kwatsi ngemusa wakhe wasikhutsata ngendvudvuto yaphakadze, wasipha nelitsemba lelihle,

KumaHebheru 13:20

Shangatsi Nkulunkulu wekuthula lowavusa iNkhosi yetfu Jesu kulabafile, wamenta uMelusi Lomkhulu wetimvu ngengati yakhe yesivumelwane saphakadze,

1 yaPhetro 1:25

Kodvwa livi leNkhosi limile, kuyawudzimate kube phakadze.” Lelivi ngilo lelo lelashunyayelwa kini.

Sembulo 10:11

Ngatjelwa kwatsiwa: “Kufanele uphrofethe ngebantfu labanyenti, nangetive, nangetilimi, nangemakhosi.”

Sembulo 10:7

Kodvwa kutawutsi ngesikhatsi selivi lengilosi yesikhombisa, nase itawushaya licilongo layo, kufezeke imfihlakalo yaNkulunkulu, njengobe abetsembisile etisebentini takhe, baphrofethi.”

Sembulo 13:7

Savunyelwa nekutsi silwe nalabangcwele sibehlule, sanikwa nemandla etikwayo yonkhe imindeni, nebantfu, netilimi, netive.

Sembulo 3:10

Njengobe uligcinile livi lami lekucinisela ngekubeketela, ngitakugcina ngesikhatsi sekulingwa lesitawufika emhlabeni wonkhe, sitewulinga bonkhe labo labahlala emhlabeni.

Sembulo 5:9

Kwahlatjelwa ingoma lensha, letsi: “Ufanele wena kuyitsatsa lencwadzi legocotiwe, ufanele futsi kuticatulula netimphawu tayo, yebo, ngobe wena wahlatjwa, ngengati yakho wahlawulela bantfu kuNkulunkulu. Labantfu bachamuka emindenini yonkhe, nasetilimini tonkhe, nasetiveni tonkhe, nasemaveni onkhe.

Sembulo 8:13

Kwatsi kusenjalo ngabona lusweti lundiza emkhatsini welizulu. Ngaluva lumemeta ngelivi lelikhulu lutsi: “Maye! Maye! Maye kulabakhile emhlabeni, nasekukhala emacilongo lasetawushaywa tingilosi letintsatfu!”