Joshuwa 9:9 - Siswati 1996 Bible

⁹ EmaHivi aphendvula atsi: “Tinceku takho tiphuma eveni lelikhashane kakhulu, ngobe sivile ngeludvumo lwaSimakadze Nkulunkulu wenu. Sivile imibiko ngaye nangako konkhe lakwenta eveni laseGibhithe,

Joshuwa 9:9 Cross References

1 Emakhosi 8:41

“Macondzana newetive longasiye lomunye wesive sakho ema-Israyeli, kodvwa lochamuka eveni lelikhashane ngenca yeLibito lakho,

Nehemiya 9:5

LamaLevi lekwakuboJeshuwa, naKhadmiyeli, naBani, naHashabneya, naSherebiya, naHodiya, naShebaniya kanye naPhethahiya bakhuluma batsi: “Sukumani nidvumise Simakadze Nkulunkulu wenu kusukela phakadze kuze kube nguphakadze. Alidvunyiswe Libito lakhe lelikhatimulako, Libito lelaphakanyiswa laba ngetulu kwato tonkhe tindvumiso netibongo.”

Tihlabelelo 148:13

Bonkhe abadvumise libito laSimakadze, ngobe lakhe kuphela libito leliphakeme; inkhatimulo yakhe ingetulu kwemhlaba nelizulu.

Tihlabelelo 72:19

Alibongwe libito lakhe lenkhatimulo, libongwe kuze kube phakadze, shangatsi umhlaba wonkhe ungagcwala inkhatimulo yakhe. Amen! Yebo, Amen!

Tihlabelelo 78:12

Wenta timangaliso embikwabokhokho babo, endzaweni yaseSowani eveni laseGibhithe.

Tihlabelelo 83:18

Shangatsi bangati kutsi nguwe wedvwa lolibito lakhe linguSimakadze, nguwe Losetikwako Konkhe, lophakeme abuse umhlaba wonkhe.

Eksodusi 15:14

Tive nativa loko, tiyawutfutfumela ngekwesaba, emaFilisti ayawufikelwa luvalo.

Eksodusi 9:16

Kodvwa noko kuze kube manje ngisakuphephisile, khona ngitekukhombisa emandla ami, nekutsi libito lami litewudvunyiswa emhlabeni wonkhe.

Isaya 55:5

Impela, nawe uyawubita tive longatati, netive letingakwati tiyawusheshisa tite kuwe, ngenca yaSimakadze Nkulunkulu wakho, Longcwele waka-Israyeli, ngobe yena ukuphe bukhosi.”

Isaya 66:19

“Ngiyawubeka sibonakaliso emkhatsini wabo, bese ngitfumela labanye balabo labaphephile etiveni: eThashishi, nakumaLibhiya, nemaLudi, labadvume ngekuba banembi ngebutjoki, naseThubhali, naseGrisi, nasetichingini letikhashane letingazange setive ngeludvumo lwami nome tibone bukhosi bami. Bayawumemetela bukhosi bami kubetive.

Numeri 14:15

Nawusibulala ngasikhatsi sinye lesive sonkhe, tonkhe letive letiwuvile lombiko ngawe tiyawutsi:

Numeri 20:14

Mosi watfumela tigijimi kusuka eKhadeshi, taya enkhosini yaka-Edomu, tafike tatsi: “Umnakenu Israyeli utsi wena uyabati bonkhe bulukhuni lobusehlele.

Imisebenti yebaPhostoli 8:7

Bomoya lababi babephuma kubantfu bakhala kakhulu; bonkhe lababefe tinhlangotsi nalababechuta nabo baphiliswa.

Dutheronomi 20:11

Nangabe bavumile, bavula emasango abo, bonkhe bantfu labakulelo dolobha niyawubenta tigcili, nibagcilate.

Dutheronomi 20:15

Niyakuwaphatsa kanjalo-ke onkhe emadolobha lakhashane nani langesiwo aletive letisedvutane nani.

Joshuwa 9:10

nako konkhe lakwenta kulamakhosi lamabili ema-Amori ngasemphumalanga kweJordane, boSihoni, inkhosi yaseHeshboni, na-Ogi, inkhosi yaseBhashani, labebusa e-Ashtarothe.

Joshuwa 9:16

Kwaphela emalanga lamatsatfu basentile lesivumelwane nemaGibeyoni, baka-Israyeli beva kutsi abomakhelwane babo, ahlala edvute nawo.

Joshuwa 9:17

Ngako ema-Israyeli ashuca aya khona, kwatsi ngelilanga lesitsatfu atseleka emadolobheni awo iGibeyoni, neKhefira, neBherothi, neKhiriyathi Jeyarimu.

Joshuwa 9:24

Aphendvula Joshuwa atsi: “Tinceku takho tatjelwa kahle kamhlophe kutsi Simakadze Nkulunkulu wenu wamyala kanjani Mosi, inceku yakhe, kutsi aninike lonkhe lelive nekutsi acitse tonkhe tive letikulo embikwenu. Ngako sesabela timphilo tetfu ngenca yenu, ngiko nje sente lesento.