Jeremiya 26:5 - Siswati 1996 Bible

⁵ futsi naningawalaleli emavi etinceku tami, baphrofethi, lengititfumele kini emaphindzephindze, nine solomane ningalaleli,

Jeremiya 26:5 Cross References

2 Emakhosi 17:13

Simakadze abebayalile baka-Israyeli nebakaJuda ngabo bonkhe baphrofethi nebaboniswa bakhe, watsi: “Phendvukani etindleleni tenu letimbi. Nakekelani imiyalo yami netimiso tami, mayelana nawo wonkhe umtsetfo lengayala ngawo boyihlomkhulu kutsi bawulalele, nalengawetfula kini ngetinceku tami baphrofethi.”

2 Emakhosi 17:23

waze wabesusa Simakadze ebukhoneni bakhe, njengobe abevele abecwayisile ngato tonkhe tinceku takhe baphrofethi. Ngako-ke bantfu baka-Israyeli batsatfwa emitini yabo naseveni labo, bayiswa ekutfunjweni e-Asiriya; basesekhona lapho nalamhlanje.

2 Emakhosi 24:2

Simakadze wamtfumelela emaBhabhulona, nemaSiriya, nemaMowabi, nema-Amoni kutsi atemhlasela. Wabatfumela kutsi batewubhubhisa Juda, ngekulandzela livi laSimakadze lalikhuluma ngetinceku takhe baphrofethi.

2 Emakhosi 9:7

Ufanele ubhubhise indlu yaka-Ahabi, inkhosi yakho; ngitawukhipha sibhongo sengati yetinceku tami, baphrofethi, nengati yato tonkhe tinceku taSimakadze leyacitfwa nguJezebeli.

Ezra 9:11

lowasinika yona ngetinceku takho baphrofethi ngesikhatsi utsi: ‘Lelive lenitawungena kulo kutsi libe lenu, live lese lingcoliswe kungcola kwetive talo. Letintfo letinengekako lenitentako setiligcwalise ngekungcola nebubi lelive kusuka ngala kwalo kuye ngale kwalo.

Jeremiya 11:7

Kusukela ngesikhatsi lengakhipha ngaso bokhokho benu eGibhithe kuze kube ngulamuhla, ngangibayala njalo nje, ngitsi: Ngilaleleni.

Jeremiya 29:19

Simakadze utsi: ‘Ngobe abakawalaleli emavi ami, emavi lengangibatfumelela wona njalonjalo ngetinceku tami baphrofethi; nani nine batfunjwa, nani anikangilaleli,’ kusho Simakadze.

Jeremiya 32:33

Bangifulatsela bangete bangibuka, lite nome ngangibafundzisa njalonjalo, abazange balalele, futsi abazange bakunake nekukunaka kujezisa kwami.

Jeremiya 35:15

Ngatfumela kini tonkhe tinceku tami baphrofethi emaphindzephindze. Babetsi: “Ngulowo nalowo kini kufanele atiyekele tindlela takhe letimbi, nijikise imihambo yenu. Ningacali nilandzele labanye bonkulunkulu kutsi nibakhonte. Nanenta njalo-ke, niyawuhlala kulelive lengalipha nine naboyihlo.” Kodvwa anikanginaki, futsi anikangilaleli.

Jeremiya 35:17

“Ngako-ke, naku lokushiwo nguSimakadze Nkulunkulu longuSomandla, Nkulunkulu wema-Israyeli, utsi: ‘Lalelani! Ngitakwehlisela etikwaJuda nasetikwabo bonkhe labahlala eJerusalema yonkhe inhlekelele lengitsite itawubehlela. Ngakhuluma kubo, kodvwa abazange bangilalele; ngababita, kodvwa abazange basabele.’ ”

Jeremiya 44:4

Nganitfumelela tinceku tami baphrofethi emaphindzephindze letatitsi: ‘Ningayenti lentfo lesinengiso kimi.’

Jeremiya 7:13

Ngesikhatsi nenta tonkhe letintfo, bengikhuluma kini njalonjalo ngaletintfo, kodvwa anikangilaleli; nginibitile, kodvwa anikasabeli, kusho Simakadze.

Jeremiya 7:25

Kusukela ngesikhatsi lekwaphuma ngaso boyihlomkhulu eveni laseGibhithe, kuze kube ngunyalo, benginitfumelela tinceku tami baphrofethi lilanga ngelilanga njalo nje.

Hezekeli 38:17

“ ‘Naku lokushiwo yiNkhosi Simakadze, itsi: Akusiwe yini lona lengakhuluma ngaye ngemalanga akadzeni ngetinceku tami baphrofethi baka-Israyeli? Ngaleso sikhatsi baphrofetha iminyakanyaka kutsi ngitawutfumela wena uyewumelana nabo.’ ”

Amose 3:7

Ngempela iNkhosi Simakadze kute lekwentako ingakayembuli inhloso yayo etincekwini tayo, baphrofethi.

Zakhariya 1:6

Kodvwa lamavi ami netimiso tami, lengabayala ngako ngemlomo webaphrofethi, tinceku tami, akuzange kufike yini etindlebeni taboyihlomkhulu? Base bayaphendvuka batsi: ‘Simakadze longuSomandla wente kitsi loko lobekusifanele ngekwetindlela tetfu nangalesikwentako, njengobe abesatimisele kukwenta.’ ”

Sembulo 10:7

Kodvwa kutawutsi ngesikhatsi selivi lengilosi yesikhombisa, nase itawushaya licilongo layo, kufezeke imfihlakalo yaNkulunkulu, njengobe abetsembisile etisebentini takhe, baphrofethi.”

Sembulo 11:18

Tive tatfukutsela, kepha kwefika lulaka lwakho kanye nesikhatsi sekwehlulelwa kwalabafile. Kwefika nekuniketwa imivuzo etisebentini takho, nakubaphrofethi kanye nakulabangcwele, nakulabo labesaba libito lakho, kulabakhulu nakulabancane. Kwefika nekubhujiswa kwebabhubhisi bemhlaba.”