Jeremiya 23:3 - Siswati 1996 Bible

³ “Mine matfupha ngiyawutibutsela lensali yemhlambi wami emaveni onkhe, lapho ngiwusakatele khona, ngiwubuyisele edlelweni lawo, lapho uyawukwandza khona, ukhule wandze ngesibalo.

Jeremiya 23:3 Cross References

Tihlabelelo 106:47

Sisindzise, Simakadze, Nkulunkulu wetfu, sibutse etiveni usicocele ndzawonye, kuze sibonge libito lakho lelingcwele, sigungubale ngeludvumo lwakho.

Jeremiya 16:15

kodvwa bayakutsi: ‘Ngifunga kuphila kwaSimakadze, lowakhipha ema-Israyeli eveni lasenyakatfo, nakuwo onkhe emave lapho abebacoshele khona.’ Ngobe ngiyakubabuyisela kulelo live lengalinika boyisemkhulu.”

Jeremiya 29:14

Ngiyawutfolwa ngini nginibuyise ekutfunjweni kwenu,’ kusho Simakadze. ‘Ngiyawunibutsa kuto tonkhe tive netindzawo, lapho benginicoshele khona,’ kusho Simakadze. ‘Ngiyawunilandza nginibuyisele kuyo lendzawo lapho nganitsatsa khona naya ekudzingisweni.’

Jeremiya 30:10

“ ‘Ngako-ke ungesabi, wena Jakobe, nceku yami, ungapheli emandla, wena Israyeli,’ kusho Simakadze. ‘Ngempela ngiyawukusindzisa eveni lelikhashane, netitukulwane takho eveni lekutfunjwa kwato. Jakobe usetawubuye abe nekuthula kanye nekuvikeleka, kute namunye loyawubuye amesabise.

Jeremiya 30:3

Simakadze utsi: ‘Ayeta emalanga, lapho ngiyawulandza khona sive sami saka-Israyeli nesakaJuda ekutfunjweni ngibabuyisele eveni lengalipha boyisemkhulu kutsi libe ngelabo,’ kusho Simakadze.”

Jeremiya 31:7

Naku lokushiwo nguSimakadze, utsi: “Hlabelani ngenjabulo kuJakobe; memetelani kulesive lesikhulu kunato tonkhe. Vakalisani kumdvumisa kwenu, nitsi: ‘Awu Simakadze, sindzisa sive sakho, imisalela yaka-Israyeli!’

Jeremiya 31:8

Buka la, ngiyawubabuyisa besuka eveni lasenyakatfo, ngibagcogce emikhawulweni yonkhe yemhlaba. Emkhatsini wabo kuyawuba netimphumphutse kanye netinchute, bafati labakhulelwe kanye nalasebaphetfwe ngumhelo; kuyawubuya sicumbi lesikhulu.

Jeremiya 32:37

Ngempela ngiyakubabutsa kuwo onkhe emave, lapho ngangibasakatela khona ngekutfukutsela kwami lokukhulu nangelulaka lwami lolwesabekako. Ngiyawubabuyisela kuyo lendzawo, ngibente bahlale kuyo bavikelekile.

Jeremiya 46:27

“Ungesabi, wena Jakobe, nceku yami; ungajabhi, wena Israyeli. Ngempela, ngitakusindzisa usendzaweni lekhashane, netitukulwane takho eveni lato lekutfunjwa. Jakobe uyawuphindze abe nekuthula nekuvikeleka, futsi kute namunye loyawumetfusa.

Jeremiya 50:19

Kodvwa Israyeli ngitambuyisela emuva edlelweni lakhe, uyawuklaba eKhameli naseBhashani. Kukhanuka kudla kwakhe kuyakweneliseka etintsabeni taka-Efrayimu nakaGileyadi.

Jeremiya 8:3

Yonkhe indzawo lapho ngiyakuyicoshela khona lensali yalesive lesibi iyawucolela kufa kunekuphila, kusho Simakadze longuSomandla.’ ”

Hezekeli 11:17

“Ngako-ke tsani: ‘Naku lokushiwo yiNkhosi Simakadze, itsi: Ngitanibutsa kuto tonkhe tive nginibuyise, nisuke kuwo onkhe lawo mave lebenginisakatele kuwo, ngiyawuphindze futsi ngininike lelive laka-Israyeli.’

Hezekeli 36:11

Ngiyakwandzisa sibalo sebantfu nesetilwane kini, yebo, kuyawutalana kwandze. Ngiyawuhlalisa bantfu kini njengaloku kwakwenteka kucala, ngibuye nginente niphumelele ninjinge kakhulu kunakucala. Ngulapho-ke niyawukwati khona kutsi mine nginguSimakadze.

Hezekeli 36:24

“ ‘Ngobe ngiyawunikhipha emkhatsini wetive, ngiyawunibutsa kuwo onkhe emave, nginibuyisele eveni lelingelenu.

Hezekeli 36:37

“Naku lokushiwo yiNkhosi Simakadze, itsi: Nangaloku ngiyawulalela kukhala kwendlu yaka-Israyeli, ngibentele naku: Ngiyawukwenta sive sabo sandze sibe ngangetimvu,

Levithikusi 26:9

Ngiyawunibusisa, nginiphe bantfwana labanyenti, nandze; sivumelwane lengisenta nani ngiyawusigcina ngisifeze.

Mikha 2:12

“Kodvwa ngiyakunibutsela ndzawonye, nonkhe nine sive saka-Israyeli lenisasele. Ngiyawunibutsela nonkhe ndzawonye njengetimvu tibuyela esibayeni sato; nanjengelidlelo leligcwele timvu, live lenu lisetawubuye ligcwale bantfu labanyenti.”

Mikha 7:12

Bantfu bakini bayawubuya, baphuma yonkhe indzawo; e-Asiriya emphumalanga, eGibhithe eningizimu, etifundzeni teYufrathe, nasetilwandle letikhashane, nasetintsabeni letikhashane.