Jeremiya 13:16 - Siswati 1996 Bible

¹⁶ Mnikeni ludvumo Simakadze Nkulunkulu wenu, asengakabuletsi bumnyama, tinyawo tenu tisengakakhubateli emagcumeni lahwalalisako. Netsembele ekukhanyeni, kodvwa utakugucula, akwente kube bumnyama lobuphatsekako, yebo, akwente kube lusizi lolujulile.

Jeremiya 13:16 Cross References

Jobe 3:5

Shangatsi bumnyama nelitfunti lekufa kungatfumba lelo langa, shangatsi lingambonywa lifu, shangatsi bumnyama bungasibekela kukhanya kwalo.

Tihlabelelo 107:10

Labanye babehleti ebumnyameni nasetfuntini lekufa, baboshwe tinsizi netinketane,

Tihlabelelo 107:14

Wabakhipha kulobo bumnyama nakulelo tfunti lekufa, wajuba tibopho letatibabophile.

Tihlabelelo 29:2

Libito laSimakadze linikeni bukhosi lobulifanele. Khontani Simakadze ngetembatfo tebungcwele.

Tihlabelelo 44:19

noko usipitjitele ehlane letimpungutja, wasembesa ngelitfunti lekufa.

Eksodusi 10:21

Simakadze wakhuluma kuMosi, watsi: “Phakamisela sandla sakho etulu esibhakabhakeni, khona kutewuba nebumnyama lobutsintsekako eveni lonkhe laseGibhithe.”

Taga 4:19

Indlela yalababi ifanana nebumnyama, lababi abati nalapho bakhubeka bawe khona.

Umshumayeli 11:8

Nangabe umuntfu aphiwe iminyaka leminyenti yekuphila emhlabeni, akatijabulise ngayo yonkhe, kodvwa noko akakhumbule kutsi ayeta emalanga lamanyenti ebumnyama. Konkhe lokutako kuyawuba lite lelite.

Isaya 5:30

Ngalelo langa bayawubhodla etikwa-Israyeli njengekubhodla kwelwandle. Umuntfu uyawutsi nakabuka live, abone bumnyama lobesabekako; ngisho nekukhanya imbala emafu ayawukwenta kube bumnyama.

Isaya 59:10

Njengemphumphutse, siphutsata indlela ngetandla sigudla lubondza, siphutsate indlela njengebantfu labate emehlo. Emini siyakhubatela kube shangatsi sekuhlwile, emkhatsini walabanemandla sinjengalabafile.

Isaya 59:9

Ngako kwehlulela ngebucotfo kukhashane natsi, nekulunga akufinyeleli kitsi. Sifuna kukhanya, kodvwa konkhe kumnyama, sifune bucwebecwebe, kodvwa sihambe kulamnyama ematfunti.

Isaya 60:2

Buka la, bumnyama buyawusibekela umhlaba, nebumnyama lobumatima busetikwetive, kodvwa Simakadze uyaphuma etikwakho, nenkhatimulo yakhe ibonakala etikwakho.

Isaya 8:22

Bayawube sebabuka phansi emhlabatsini babone inhlupheko yodvwa nebumnyama nelitfunti lelesabekako, nabo bayawulahlelwa ebumnyameni lobesabekako.

Jeremiya 14:19

Sewumlahle kokuphela yini Juda? Umbukela phansi yini Siyoni? Usishayelani sive singete sakhona kuphiliswa nje? Sasetsemba kutsi kutawuba nekuthula nenhlalakahle, kodvwa kute nakunye lokuhle lokusehlele. Setsemba sikhatsi sekuphiliswa, kodvwa kwaba nekutfutfumela kuphela.

Jeremiya 2:6

Abazange babute, batsi: ‘Uphi Simakadze lowasikhipha eGibhithe, wasihola sadzabula lihlane lelingenalutfo, sadzabula live lelinetingagadvu nemigedze, live lesomiso nebumnyama, live lelingahanjwa ngumuntfu nalelingahlalwa ngumunfu?’

Jeremiya 23:12

“Ngako-ke indlela yabo itawushelela, bayawutfunjelwa ebumnyameni, lapho bayawuwela khona. Ngiyakwehlisela inhlekelele etikwabo ngemnyaka labayawujeziswa ngawo,” kusho Simakadze.

Jeremiya 4:23

Ngabuka umhlaba, wawungenasimo, ungenalutfo; ngabuka nasemazulwini, kukhanya kwawo kwase kunyamalele.

Jeremiya 50:6

“Bantfu bami babetimvu letilahlekile, belusi bato batedukisile, batenta tasabalala etulu etintsabeni. Babezulazula etikwetintsaba nemagcuma, baze bayikhohlwa nendzawo yabo, lapho baphumula khona.

Jeremiya 6:21

Ngako-ke naku lokushiwo nguSimakadze, utsi: “Ngiyawubeka emavimbandlela embikwalesive. Boyise kanye nemadvodzana bayawukhutjwa kuwo, bomakhelwane kanye nebangani bayawubhubha.”

Jeremiya 8:15

Besetsembe kuthula, kodvwa kute lokuhle lokufikile, besetsembe sikhatsi sekuphiliswa, kwefika lokwesabisako kodvwa nje.

Sililo 4:17

Ngetulu kwaloko, emehlo etfu adzimate akhatsala solomane agolotele lusito lungaveli, sabukisisa emibhoshongweni yetfu, silindzele sive lesasingeke sisisindzise.

Hezekeli 21:15

Kuze tinhlitiyo titewujabha, nalabawile babe banyenti, inkemba sengiyimisele kugwaza kuwo onkhe emasango abo. Awu! Yentelwe kumanyatela njengembane, ibanjelwe kugwaza.

Hezekeli 34:12

Njengemelusi nakeluse umhlambi wetimvu takhe losakatekile, nakanato, kanjalo nami ngiyawutelusela timvu tami. Ngiyawutephula kuto tonkhe tindzawo lapho tisakatelwe khona ngalelo langa lemafu nelebumnyama.

Hezekeli 36:15

Angisayikwenta uphindze uve kuchukulutwa tive, futsi awusayikubuva buhlungu bekuhlekwa betive nome uwise sive sakho, kusho iNkhosi Simakadze.’ ”

Joweli 2:2

Lelo lilanga lebumnyama nesigayegaye, lilanga lemafu nebumnyama lobukhulu. Njengekusa nakwendlaleka etintsabeni kunjalo nekuta kwemphi lenkhulu nalenemandla, lengazange seyibe khona nasendvulo, futsi ingeke iphindze ibe khona nome ngunini.

Amose 4:13

Ngako-ke lalelani! Yena lowo lobumba tintsaba, adale umoya, embule imicabango yakhe kumuntfu, yena lowo logucula intsatsakusa, ayente bumnyama, anyatsele tindzawo letiphakeme temhlaba, nguSimakadze Nkulunkulu longuSomandla libito lakhe.

Amose 5:18

Nako kini nine lenifisa lilanga laSimakadze! Nilifiselani lilanga laSimakadze? Lelo langa liyawuba bumnyama, lingabi kukhanya.

Malakhi 2:2

Naningalaleli, futsi naningatimiseli ngenhlitiyo yenu kutsi nihloniphe Libito lami, ngitanitfumelela sicalekiso, netibusiso tenu ngiticalekise. Yebo, vele sengiticalekisile, ngobe anikatimiseli enhlitiyweni yenu kutsi ningihloniphe,” kusho Simakadze longuSomandla.

Johane 12:35

Jesu wabaphendvula watsi: “Kukhanya kusetawuba nani kwesikhashana nje. Ngako hambani kusenekukhanya, kuze ningetikwehlelwa bumnyama, ngobe lohamba ebumnyameni akaboni lapho aya khona.

Joshuwa 7:19

Joshuwa wakhuluma ku-Akhani, watsi: “Ndvodzana yami, nika Simakadze ludvumo, ukhulume liciniso kuNkulunkulu wema-Israyeli, uvume kuye. Ngitjele kutsi wenteni, ungafihli lutfo kimi.”

1 yaPhetro 2:8

Kulenye indzawo utsi: “Leli litje leliyawukhuba bantfu, lidvwala lekubawisa.” Nembala bayakhutjwa labo labangalilaleli livi; vele bamiselwe kona loko.

1 Samuweli 6:5

Bumbani imifanekiso yematfumba enu neyemagundvwane lekungatsi abhubhise lelive, nimnike ludvumo Nkulunkulu wema-Israyeli. Mhlawumbe uyakusiphakamisa sandla sakhe lesimatima etikwenu, nasetikwabonkulunkulu benu, nasetikwelive lenu.