เอิญ รีด ฮุ เปิล ฮุ ก็ ไอ มี ปานัก ซัง เอิญ ไอ มี นเจิก เปิล เตาะ แต ครอ ระ เอิญ แองกาน อน เยซู ระ แลว แอ็ม ก็ จู ครอ ระ เอิญ เล็ง โตะ ตัก เซ็นไซ ก็ จู เยซู งกีจ็อง มอบ คาว เลาะ คาว แลม อน ตัก เอิญ แลว เป็น คาว เลาะ เลือง เอาซาง แอง เลาะ ซิห แอ นัน ครอ ระ เอิญ แองกาน อน ตัก เยซู คริด ระ แลว แอ็ม ก็ จู” เปาโล ไล ปึง อัหแกะ ตี ซับรวง คริซจัก คือนะ 2 ทิโมที 4:7
ฟีลิบปี 2:17 - Prai Bible17 ทาเน ญอน แป เจือ เยซู นัน แป ก็ ทวาย นัง ออ ฮับไจ เยซู แลว แป ก็ เลาะใจ ทาเน กัน อัห มเบิล เอิญ เอิญ ก็ มอก ปุจ องุน ตี อัห ทุก ซิห ตัก ตี ทวาย ซะ เลิม เคิบ เคือง ทวาย คอง แป วัล กัน กิว เป็น จังนัน เอิญ ก็ เลาะใจ เอิญ เลาะใจ เลิม เคิบ แป ดาย See the chapter |
ฟีลิบปี 2:17
21 Cross References
เปาโล ก็ ซวัล อิห ฮุนเน “แป แอง ซีวะ จังเน แป เญ็ม ฮุนเน ก็ แป แอง ระ เอิญ ตุกใจ นาย แอ็ม ใจ วัล แอ็ห เอิญ ไอ มี เปียน ใจ เตาะ เอิญ ต็อง เริล เมือง เยรูซาเล็ม ติก ดาย อัห แอง จังนัก ซิห เอิญ ตัก นัน ก็ ตาม แต เตาะ เอิญ พอม ระ อัห ท็อก เอิญ เอิญ พอม ระ อัห มเบิล แอ็ม เอิญ ดาย อัห เติล ลุก เอิญ ก็ ตาม แต เตาะ เอิญ พอม อด เอิด กุญ ก็ เพือ เยซู คริด งกีจ็อง นัน” เปาโล อัง
นะ ดาย ควน นไจ เฮย แอ เม็จ เอาซาง รัก แอ ตึ อัง แอ ดก มอก นัน แลว นอ เอิญ ก็ ลด ครอ เคิบ แป ดาย ครอ ระ แป กิว มอบ นัง ออ ทวาย อน ตัก เอาซาง เป็น คอง นำ ฮัก ทวาย นัง ออ มอก อัห ทวาย แกะ ตัก อิง นัน แต เป็น เคือง ทวาย ตี ควะ รีด อุ เป็น เคือง ทวาย เลาะ แลม ตี เอาซาง ปอใจ อัง แอ ทวาย นัง ออ จังเน ก็ แคระ ซีเละ ดาย
ซำรับ เอิญ เน เอิญ กุญ ซะ ตัก แป ครบ มด จู มบลึ แลว เอิญ ต็องกาน ซีวะ เอิญ ก็ มี มด เอิญ มี เลือ ป็อง เลือ ไจ วัล ก็ ญอน แป ฟาก อน ตัก เอปาโฟดีทัด ซับ อน ตัก เอิญ นัน ซะ ตี แป ฟาก อน ตัก เอิญ นัน ก็ มอก ยา ซียุม ตี แป ทวาย อน ตัก เอาซาง นัน เอาซาง ก็ ปอใจ ฮับ เอิด ดาย นำ เลาะใจ เคิบ แป เลือง เน ซีเละ
มานะ เน เอิญ ก็ อด โซะ อุ เน นอ แต เอิญ ก็ เลาะใจ ตี เอิญ กุญ อด ตุก อด ญาก เพือ ปะโยด แป นัน กัน เยซู คริด ไล เอิญ ต็อง อด โซะ มอก นเดย เอิญ ก็ ญอม อด โซะ มอก นัน เอิญ ญอม อด โซะ มด จู มบลึ เอิญ ญอม อด โซะ มด ตึง นัง ตึง ใจ คอง เอิญ ฮัก เอิญ ญอม อด โซะ เพือ นัง คอง เยซู นัง เยซู นัน ก็ ซีแล็ม เค็ย ปึง คริซจัก นัน เอิญ ต็อง ญอม อด โซะ เพือ คริซจัก ดาย
แป ก็ เมือนนอย แป ก็ รีด อุ จำ นเดย จำ กวา แป ก็ มอก เกียง ตี เอาซาง เอิด แอง เป็น วิฮาน นัน เอาซาง ระ แป เป็น ตี อุ คอง ซีมาล นำ ฮัก แป ก็ มอก มอ เอาซาง ตัก แองกาน อน เอาซาง ตัก วิฮาน นัน ซะ ตี แป ทวาย ญอน ซีมาล เอาซาง ซับรวง นัน เอาซาง ก็ ปอใจ อัง ซีเละ นำ ปอใจ ก็ ญอน เยซู คริด นัน ฮัก
ทาเน กัน แอ กิว รัก นอย แอ ต็อง แอง จังนัก นังเลาะ เลือง รัก นอย เน แอ ก็ ต็อง ดอม เอิด ตัก เยซู ซัง แอ เม็จ ดาย เยซู เน นำ รัก แอ ซีเละ นำ ญอม ซะละ ซีวิด ออ เพือ ครำ แอ เน เจ็นนัน กัน แอ เม็จ เยซู รัก แอ ดก มอก นัน แลว แอ ก็ ซมควน รัก นอย มอก นัน แอ ซมควน ญอม ซะละ เพือ นอย มอก เยซู นัน ก็ เลาะ
Advertisements