फिलिप्पी 4:8 - Walangi

⁸ त में ट्यारे भाई त भेणिओं! अउं चहन्ता कि जे कुछ बि सच्चाई असी, इज्जतदार असे, सही असे, शुचा त अब्बल असे, जे जे बि खरे असे त तारीफ लेएक असे, तुस तसे बारे सोचते रिहे।

फिलिप्पी 4:8 Cross References

मत्ती 22:16

तोउं फरीसी अपु चेले राजा हेरोदेसे मेह्‍णु जोई साते तसे भेएड़ ईं बोलुण जे लंघाए, “ए गुरु! अस जाणते कि तुस सच्चे असे, त परमेश्वरे बोक बि सच्चाई जोई शिचालते। होर केसेरी परवाह न कते, किस कि तुस मेह्‍णु के मुंह हेर कइ बोक न कते।

मरकुस 6:20

किस कि हेरोदेस पता थिआ कि यूहन्ना धर्मी त शुचा मेह्‍णु भो; त से तेस बचाई रखुंण चहन्ताथ। हांलाकि से तसे बोक शुण कइ डरताथ। तोउं बि से मज्जे जोई शुणताथ।

लूका 16:15

त तेन तेन्हि जे बोलु, “तुस त मेह्‍णु के सम्हाणि अपफ जे महान त बोडे धर्मी हरालते, पर परमेश्वर तुं मन जाणता, किस कि जे जे चीज मेह्‍णु अगर तुसी बोडा त धर्मी बणान्ते, से परमेश्वरे अगर रोशुणी असी।

लूका 2:25

यरुशलेम शेहर अन्तर शमियोन नओएं यक मेह्‍णु थिआ, जे धर्मी त परमेश्वरे भक्त थिआ। शुची आत्मा तस अन्तर थी त से ई भाड़ बिशो थिआ कि परमेश्वर कपल इस्राएली मेह्‍णु सुख शान्ति देन्ता।

लूका 23:50

तठि यहूदी समिति अन्तर यूसुफ नओएं यक मेह्‍णु थिआ। से यहूदिया राज्ये अरिमतिया नओएं यक शेहर केआं थिआ। त से बधिया त धर्मी थिआ। त से बोडा पुजारा त तसे टजोटी साथी यीशु मारणे योजना त कम पुठ राजि ना थिआ। पर, से परमेश्वरे राज्य भाड़ण लगो थिआ।

यूहन्ना 7:18

जे अपु इज्जत चहन्ता, से ईं अपफ बणाई कइ बोता, पर जे अपु लंघाणे बाड़े इज्जत चहन्ता, से सच्चा असा त तस अन्तर कोई दुरबुध नेईं।

प्रतिनिधि 10:22

तेन्हि बोलु, “अस सुबेदारे कुर्नेलियुसे लंघो असे, जे धर्मी त परमेश्वर हेर डरणे बाड़ा त सोबी यहूदी मेह्‍णु के ट्यारा असा। यक शुचे स्वर्गेदूत केआं तस ई निआंग मेई कि तोउ अपु गी भिआई कइ, तोउ केआं शुणे, जे तोउ बोलुण असु।”

प्रतिनिधि 22:12

“तोउं हनन्याह नओएं यक भक्त यहूदी मेह्‍णु मोउं केईं आ। तठि बिशणे बाड़ी सोबी यहूदी मेह्‍णु के बुछ तसे सुआ इज्जत थी।

प्रतिनिधि 6:3

तोउं त, तुस अपफ अन्तरा ईं सत खरे मड़द चुणे, जे शुची आत्माई बेलि त ज्ञान बुद्धि जोई भरिए भोल, ताकि से एस कमे जिम्मा नी बटियेल।

रोमी 13:13

असी तीं जीण, जीं अस दिसाई हंटते। ना कि मौजमस्ति कर कइ, न प्याकड़ बण कइ, न नाजायज रिश्ता बणाई कइ त बेशर्मी कम कर कइ, होर न कुटीण मडीण त जड़ कइ।

रोमी 13:3

अउं ए तोउं बोता किस कि अधिकारी खरे कम करणे बाड़ी डराण जे नेईं, पर बुरे कम करणे बाड़ी डराण जे असे। तोउं त अगर तुस अधिकारी हेर नडर रेहण चहन्ते, त खरे कम करे। तोउं से तुं तारीफ कते।

रोमी 14:18

अगर तुस एसे ईं मसीहे सेवा कते, त परमेश्वर तुसी जुए खुश भुन्ता, होर मेह्‍णु तुं इज्जत कते।

रोमी 2:29

पर सच्चा यहूदी सेईंए भो, जे नियम मानता, होर सच्चा खतना सेईंए भो, जे मन अन्तर भुन्ता, ना कि केणे बाड़े जिसम पुठ भुन्ता। एन्के ईं मेह्‍णु के तारीफ मेह्‍णु के बेलिए ना, बल्कि परमेश्वरे बेलि भुन्ति।

1 कुरिन्थ 4:5

तोउं त, टेम केआं पेहलाई पंची करण न बिशे, मतलब प्रभु एण केआं पेहलाई पंची न करे। सेईंए जे अन्हारे अन्तर असे, तेन्हि टगड़ियार जे अण्हता त मने भियो खोल छता। तोउं परमेश्वर हर यक जेईं तेन्के कमे हेसाब जोई इज्जत देन्ता।

2 कुरिन्थ 13:7

अस परमेश्वर जे प्रार्थना करण लगो असे कि तुस पाप कर कइ असी प्रतिनिधि भुणे ताकत साबित करणे लिए मजबूर ना करे। बल्कि तुस सोब कुछ सुसुर करे, बेशक तसे बेलि असी अपु प्रतिनिधि भुणे ताकत हरालणे कोई मौका ना मेईंयाल।

2 कुरिन्थ 8:18

तस जुए अस यक होरा भाई बि लंघाण लगो असे। सोबी सतसंग एस भाई बारे बोते कि से खुश खबरी प्रचार करण अन्तर सुआ कष्ट कता।

2 कुरिन्थ 8:21

किस कि अस तेस कम करण जे कष्ट उठाण लगो असे जे कम ना सद प्रभु खुश कता, बल्कि मेह्‍णु बि सही लगतु।

गलाती 5:22

पर नोउएं गुण जे शुची आत्माई बेलि असी मेता तसे बेलि अस परेम त खुशी जुए उई मी कइ बिश्ते। अस बोडे लाह रख कइ दाह जुए यक होरी मदत कते। हें मन अन्तर हर बेले शान्ति भुन्ति त अस सम्हाई अब्बल अब्बल कम कते, होर यकीन लेएक भुन्ते।

इफिसुस 4:25

तोउं त, तुस सम्हाई झूठ बोलुण छड़ दी कइ अपु अपु भेयाड़ जे सच्चु बोले, किस कि अस यक होरी अंग भिन्थ।

इफिसुस 5:9

त प्रभु जी जीं औजतु, तीं जी कइ हरालिण दिए, किस कि जे टगड़ियार अन्तर बिश्ते, से हमेशा अब्बल कम कते, सुसुर बिश्ते त सच्चाई बोते।

इफिसुस 6:14

त परमेश्वरे सच्चाई मझीने ईं कश कइ, तसे भलाई कबच ईं लाई कइ,

फिलिप्पी 3:1

त में भाई त भेणिओं! खुशी मनान्ते रेह किस कि अस परमेश्वरे भिन्थ। जे जे बोक मेईं पेहले तुसी जे बोलो थी तोउं बि तस घड़ी घड़ी लिखुण जे अउं कोई परवाह ना कता, किस कि तेन्के बेलि तुं विश्वास सही सलामत रेहन्ता।

कुलोसी 4:5

अविश्वासी मेह्‍णु बुच बुद्धि त परमेश्वर हेरी डर कइ जीए, ताकि तुस हर मौके सुसुर फायदा नी बटियेल।

1 थेस्सलु 4:12

इ करणे बेलि तुस होरे मेह्‍णु सम्हाणि बधिआ जिन्‍दगी काट बटते त तुं कोई घटी ना भोल।

1 तिमुथि 2:2

परमेश्वरे सम्हाणि राजा त होरे मोटे अधिकारी जे बि प्रार्थना करे, ताकि अस सुख शान्ति जुए परमेश्वर पुठ विश्वास कर कइ त पूरी इज्जत जुए जी बटियेल।

1 तिमुथि 3:11

तिहांणि जिल्हाणु बि इज्जतदार लौती। से दोष लाणे बाड़ी ना लौती, बल्कि खरी त हर बोक पुठ यकीन करणे लेएक लौती।

1 तिमुथि 3:4

तेन अपु टब्बरे खरा ख्याल रखो लौता त अपु गभुर बि वश अन्तर रखो लौते।

1 तिमुथि 4:12

तु परमेश्वरे वचन अन्तर, तें चाल चलण अन्तर, परेम त विश्वास अन्तर होर शुचे विचार अन्तर सम्हाई विश्वासी जे नमूना बण, ताकि तें कम उमरी बझई जुए कोई तें बोक अणशुणि ना करे, पर सोब पूरा मन लाई कइ शुणे।

1 तिमुथि 5:2

मोटी जिल्हाणु अपु ईये ईं त जवान कुई अपु भेण ईं मान कइ पूरे शुचे मन जुए समझाण दे।

तीतुस 1:8

पर से सेवा पाणि करणे बाड़े, भलाई करणे बाड़े, खरे, न्यायी, समोझि कइ बिशणे बाड़े त शुचा लौते।

तीतुस 2:14

तेन अपु जिन्‍दगी हें लिए भकत दिती, ताकि अस सम्हाई पाप केआं छुड़कियेल त शुचे भोई कइ तसे यक टज बणियेल जे खरे खरे कम करण जे तेयार असे।

तीतुस 2:2

मतलब कि स्याणे मड़दी जे बोल कि से अपु चेता अन्तर, इज्जत जुए, समोझि कइ बिशे। होर अपु विश्वास, परेम त दुख सेहणे अन्तर होरी जे नमूना बणे।

तीतुस 2:7

तु अपफ बि सोबी चीज अन्तर खरे कम कर कइ तेन्के नमूना बण। तें शिक्षा अन्तर इमानदारी, इज्जत

तीतुस 3:14

हें विश्वासी मेह्‍णु बि होरी के जरूरते टेम मदत करणे खरा कम शिचो लौता। तोउं से बेकार ना भुन्ते।

इब्रानी 11:2

इहांणि विश्वास करणे बेलि ईं हें पुरखे परमेश्वर औउजो थिए।

इब्रानी 13:18

अस जाणते कि हें अन्तरात्मा साफ असी। होर अस हर यक बोक अन्तर इज्जत जोई जिन्‍दगी जीण चहन्ते। त हें लिए प्रार्थना कते रिहे।

याकूब 1:27

हें परमेश्वरे त बोउए औउजो शुचे धरमे कम ई असे कि तुस अनाथ त विधवाई के दुख तकलीफ अन्तर तेन्के ख्याल रखे, त अपु अपफ मतोके मोह माया केआं दूर बिशे।

याकूब 3:17

पर जे बुद्धि खड़ोरिया मेती पेहले त से शुची असी। से बुद्धि असी मिआणे बाड़ा, नरम मने बाड़ा, सुधी-बुद्धि बाड़ा, दाहोपरा, त खरे कम करणे बाड़ा बणान्ती। त तेस बुद्धि बेलि अस मेह्‍णु शकल हेर कइ कम ना कते, होर ना छल कपट कते।

1 पतरस 1:22

त किस कि यकी होरी जोई परेम करण जे तुसी सच्चे वचन मान कइ अपु अपु मन शुचे किओ असे, त अखिर तकर पूरे मन लाई कइ यक होरी जोई खरे परेम कते रिहे।

1 पतरस 2:12

होरे परमेश्वर ना मानणे बाड़े मेह्‍णु के बुच तुं चाल चलण ईं खरा लौता भो कि जेन्हि जेन्हि बोकी अन्तर से तुसी कुकर्मी मान कइ बदनाम कते, से तुं खरे कम हेर कइ परमेश्वरे एणे रोज तसे गुणगान करियेल।

1 पतरस 4:8

सोबी केआं खरा कम ईं असा कि यक होरी जोई तीं परेम करे, किस कि परेम सुआ पाप ढक छता।

2 पतरस 3:1

ए ट्यारेओ! अब अउं तुसी जे ई दोकी चिट्ठि लिखण लगो असा। त एन्हि अन्तर अउं तुसी याद दिआई कइ हिम्मत देन्ता कि तुस अपु मन शुचा रखे।

1 यूहन्ना 3:18

ए गभुरुओ! असी सद अपु बोके या जिभुड़ बइ ना, बल्कि कम त सच्चाई बइ बि परेम करिए लौता।

1 यूहन्ना 3:3

होर जे कोउं मसीह पुठ ई उम्मीद रखता, से अपणे आप बि तिहांणि शुचा कता जीं से असा।

1 यूहन्ना 4:1

ए ट्यारेओ! हर यक जेईं पुठ विश्वास ना करे जे ईं बोते कि शुची आत्मा हें अन्तर असी। पर तेन्हि परखिण दिए कि से परमेश्वरे कनारा असे कि नेईं, किस कि मतोक अन्तर सुआ झूठे भविष्य वक्ता बणो असे।