ପିଲିପିୟ 3:2 - New Testament in Pengo Parja Language

² କରାପ୍ ନିକୁଡ଼୍‌ଲେକେ ବୁଲ୍ ହିକ୍ଷା ହିଦ୍‌ନି ମାଷ୍ଟେରାର୍‌ତାଙ୍ଗ୍ ସାବ୍‌ଦାନ୍ ଆଜି ମାନାଟ୍, ଇନେସ୍‌କି ହେୱାର୍ କରାପ୍ କାମାୟ୍ କିନାର୍। ହେୱାର୍ ସୁନତ ବିଦି ମାନି କିୟାଟ୍ ଇଞ୍ଜି ୱେଚ୍‌ଚାନାର୍।

ସତ୍‌ ବଚନ୍‌ ପୁନି ନିୟମ୍‌

² ଇମ୍‌ଣାକାର୍‌ ବାନ୍ୟା କାମାୟ୍‌ତ ମୁଞ୍ଜ୍‌ଚାର୍ଣ୍ଣା, ଇମ୍‌ଣାକାର୍‌ ଗାଗାଡ଼୍‌ତିଂ ସୁନ୍ନତ୍‌ ଆତାକାର୍‌ କାଜିଂ ଜିଦ୍ ଆହ୍‌ନାର୍‌, ହେ ନିକୁଡ଼ିଂ ଲାଗେତାଂ ଜାଗ୍ରତ୍‌ ।

ପିଲିପିୟ 3:2 Cross References

ମାତିଉ 24:10

ହେପାଦ୍ନା ବେସିହେନି ମାନାୟ୍ ପାର୍ତି ଆରାଇ କିନାର୍, ଆରେ, ଜାର୍ ଜାର୍‌ବିତ୍ରେ ଗାଣ୍‌ଜୁକିବାଆଜି ଜାର୍ ଜାର୍‌ତିଙ୍ଗ୍ ଆକାର୍ କିନାର୍,

ମାତିଉ 7:15

ମିଚ୍‌ୱା ଭବିଷ୍ଯତବକ୍ତାତାଙ୍ଗ୍ ସାବ୍‌ଦାନ୍ ଆଜି ମାନାଟ୍, ଇନେର୍‌କି ଦରମ୍ ମେଣ୍ଢାଲେକେ ଦରମ୍‌ଆଜି ୱାନାର୍। ମାତର୍ ହେୱାର୍ ହାତ୍‌ପା ହୁଣ୍ଡେର୍ ଲେକେ ନଷ୍ଟ କିଦ୍‌ନାର୍।

ମାତିଉ 7:6

ମାପୃକାତାତିଙ୍ଗ୍ ଇନେର୍ ୱେଞ୍ଜେଙ୍ଗ୍ ଇଚାକିଉର୍ ହେୱାନିଙ୍ଗ୍ ୱେଚ୍‌ମାଟ୍। ଯଦି ଏପେଙ୍ଗ୍ ୱେଚ୍‌ନାଦେର୍, ପବିତ୍ର ଜିନିଷ୍ ନିକୁଡ଼ିଙ୍ଗ୍ ଆଗେ ତୁସିହିତି ଲେକେ, ଆରେ ପାଞ୍ଜିଙ୍ଗ୍ ମୁମ୍‌ଦ ମୁକ୍ତା ତୁସିହିତି ଲେକେ ଆନାତ୍। ଇନେସ୍‌କି ହେଦାଙ୍ଗ୍‌ତିଙ୍ଗ୍ ହେୱେକ୍ ତଗାୱିହା କିନିକ୍ ଆରେ ମିଙ୍ଗେଙ୍ଗ୍ କାପ୍‌ତେଦେଙ୍ଗ୍ ୱାନିକ୍।

ରୋମିୟ 2:28

ଏପେଙ୍ଗ୍ ଯିହୁଦି ଜାତିନି କୁଟୁମ୍‌ତ ଜନମ୍ ଆତିସ୍ କି ସୁନତ ବିଦି ଅନୁସାରେ ସୁନତ ଆଜି ମାଚିସ୍ ପା ଏପେଙ୍ଗ୍ ସତ୍ ଯିହୁଦି ଆକାୟ୍,

୨ କରନ୍ତିୟ 11:13

ଇଲେଗ୍‌ଦି ମାନାୟାର୍ ହାତ୍‌ପା ବାଚିକିତି ଚେଲା ହିଲୁର୍। ହେୱାର୍ ଜାର୍‌ତିଙ୍ଗ୍ ଖ୍ରୀଷ୍ଟର୍ ବାଚିକିତି ଚେଲାଇଞ୍ଜି ୱେଚ୍‌ନାରା, ଆରେ ହେୱାର୍ ମାନାୟାରିଙ୍ଗ୍ ଟକାୟ୍ କିନାରା।

ଗାଲାତିୟ 5:13

ଇନେସ୍‌କି ଏ ଟଣ୍ଡାର୍‌କାଦେର୍, ଈଶ୍ୱର ମିଙ୍ଗେଙ୍ଗ୍ ସ୍ୱାଦିନ୍ ଆଜି ମାନି କାଜିଙ୍ଗ୍ କୁକ୍ତାତାନ୍‌ନା। ଲାଗିଙ୍ଗ୍ ମି ଗାଗାଡ଼୍‌ନି ଇଚାତାଙ୍ଗ୍ ପୁରା କିଦେଙ୍ଗ୍ ମି ସ୍ୱାଦିନ୍‌ତିଙ୍ଗ୍ ବ୍ୟବହାର୍ କିମାଟ୍, ମାତର୍ ଲାଡ୍‌ତାଙ୍ଗ୍ ଜାର୍-ଜାର୍‌ତିଙ୍ଗ୍ ହେବା କିନି କାଜିଙ୍ଗ୍ ବ୍ଯବହାର୍ କିୟାଟ୍।

ଗାଲାତିୟ 5:15

ମାତର୍ ଏପେଙ୍ଗ୍ ଲାଡ୍ କିବାଆୱାଦାଙ୍ଗ୍, ଏପେଙ୍ଗ୍ ଯଦି ପଶୁ ଲେକେ ଚାବାକାତ୍ରା ଆଜି ଗାଉଦାଉ ଆନାଦେର୍, ଲାଗିଙ୍ଗ୍ ଜାଗ୍ରତ୍ ଆଡ ଯେ ଏପେଙ୍ଗ୍ ଜାର୍-ଜାର୍‌ତିଙ୍ଗ୍ ନଷ୍ଟ କିମାଟ୍।

ଗାଲାତିୟ 5:6

ସୁନତ ବିଦି ମାନିକିତିସ୍ କି କିୱିତିସ୍ ଇନା ମୁଲ୍ୟ ଆକାୟ୍, ଏଚେପାଦ୍ନା ଆପେଙ୍ଗ୍ ଯୀଶୁ ଖ୍ରୀଷ୍ଟତାକେ ପାର୍ତି କିନାପା। ଲାଗିଙ୍ଗ୍ ମୁଡ଼୍ ବିଷୟ ଆନାତା ଖ୍ରୀଷ୍ଟଙ୍ଗ୍ ପାର୍ତି କିନାସ୍, ହେଦାଙ୍ଗ୍ ଜେକନିକାରିଙ୍ଗ୍ ଲାଡ୍‌କିନି କାଜିଙ୍ଗ୍ ମାଙ୍ଗେଙ୍ଗ୍ ସାଇଜ କିଦ୍‌ନାତା।

ପିଲିପିୟ 3:19

ଈଶ୍ୱର ହେୱାରିଙ୍ଗ୍ ନଷ୍ଟ କିନାନ୍। ଇନେସ୍‌କି ହେୱାର୍ ତା ଗାଗାଡ଼୍‌ନି ଇଚାତାଙ୍ଗ୍ ଈଶ୍ୱର ଇଞ୍ଜି ମାନିକିନାର୍। ଆରେ ହେୱାର୍ ଅପ୍‌ମାନ୍ ବିଷୟତିଙ୍ଗ୍ ହାର୍ଦି ବିଷୟ ଇଞ୍ଜି ବାବିକିନାର୍। ଆରେ ହେୱାର୍ ପୁର୍ତିନି ବିଷୟ ନେ ବାବିକିନାର୍।

ପିଲିପିୟ 3:3

ଇନେସ୍‌କି ଆପେଙ୍ଗ୍ ଟିକ୍ ସୁନତ ବିଦି ପାୟାଆତାସ୍‌ନା। ଆପେଙ୍ଗ୍ ଈଶ୍ୱର ଆତ୍ମାତାଙ୍ଗ୍ ଈଶ୍ୱରତିଙ୍ଗ୍ ପୁଜା କିନାପା। ମାନାୟ୍ କିତି ଉପାଇତିଙ୍ଗ୍ ଆପେଙ୍ଗ୍ ଆହା କିୱାଦାଙ୍ଗ୍ ଯୀଶୁ ଖ୍ରୀଷ୍ଟତାକେ ଆହା କିନାପା।

୧ ତିମତି 1:19

ଏନେଙ୍ଗ୍ ଖ୍ରୀଷ୍ଟତାକେ ପାର୍ତି କିଜି ମାନା, ଆରେ ଇନାକା ଟିକ୍ ହେଦାଙ୍ଗ୍ କିୟା। ଇନେସ୍‌କି କେତେକ୍ ମାନାୟାର୍ ଟିକ୍ କାମାୟ୍ ପୁନ୍‌ଞ୍ଜି କିୱି କାଜିଙ୍ଗ୍ ଜାଜ୍ ଇନେସ୍ ଡିଙ୍ଗ୍‌ତାତ୍‌ନା ହେଲେକେ ହେୱାର୍ ମାନ୍ ପା ଖ୍ରୀଷ୍ଟତାକେ ପାର୍ତି କିନାକା ବାଙ୍ଗା ଆତାତ୍‌ନା।

ତୀତସ 1:16

ଇ ବୁଲ୍ ହିକ୍ଷାହିନି ମାଷ୍ଟେରାର୍ ଈଶ୍ୱରତିଙ୍ଗ୍ ପୁନାପ୍ ଇଞ୍ଜି ୱେଚ୍‌ନାର୍, ମାତର୍ ହେୱାର୍ କାମାୟ୍ ଚଚ୍‌ନାତ୍‌ ଯେ ହେୱାର୍ ହେୱାନିଙ୍ଗ୍ ପୁନୁର୍। ହେୱାର୍ ବେସି କରାପ୍ ଆରେ ଈଶ୍ୱରତିଙ୍ଗ୍ ମାନିକିଉର୍। ହେୱାର୍ ଅଲପ୍‌ପା ହାର୍ଦି କାମାୟ୍ କିଦେଙ୍ଗ୍ ଆଡୁର୍।

୨ ପିତର 2:22

ଇ ରିଣ୍ଡାଙ୍ଗ୍ ଜ୍ଞାନ୍‌ନି କାତାଲେକେ: “ର ନିକୁଡ଼୍ କାକ୍‌ନାତ୍, ଆରେ କାକ୍‌ତି ଜିନିଷ୍‌ତିଙ୍ଗ୍ ନେ ତିନାତ୍ ଆରେ ରକାନ୍ ର ପାଞ୍ଜିତିଙ୍ଗ୍ ଏଜୁଙ୍ଗ୍ ଇତ୍‌ପିତି ପାଚେ, ଆରେରଗ ହେ ପାଞ୍ଜି ହାଲ୍‌ଜି କାଦତାକେ ହୁଞ୍ଜ୍‌ନାତ୍।” ଇ ବୁଲ୍ ହିକ୍ଷାହିନି ମାଷ୍ଟେରାର୍ ଇଲେକେ।

ଜିହୁଦା 1:4

ଈଶ୍ୱରତିଙ୍ଗ୍ ମାନିକିୱି ବୁଲ୍ ହିକ୍ଷାହିନି ମାଷ୍ଟେରାର୍ ଆସେଙ୍ଗ୍ ପୁନ୍‌ୱାଦାଙ୍ଗ୍ କେତେକ୍ ମା ବିତ୍ରେ ହଟାର୍‌ନା। ଇ ମାନାୟାର୍ ବିଷୟରେ ଈଶ୍ୱର ବେସି ବାହ୍‌ରୁ ଆଗେ ସାସ୍ତର୍‌ତାକେ ୱେଚ୍‌ଚାନ୍‌ନା ଯେ ଈଶ୍ୱର ହେୱାରିଙ୍ଗ୍ ଦଣ୍ଡ୍ ହିନାନ୍। ହେୱାର୍ କରାପ୍ କାମାୟ୍ କିଜି ଜାର୍‌ତିଙ୍ଗ୍ ରକ୍ଷା କିନି କାଜିଙ୍ଗ୍, ହେୱାର୍ ମା ଈଶ୍ୱର ଦୟାନି କାତାତିଙ୍ଗ୍ ବିଗ୍‌ଡ଼ାୟ୍ କିତାର୍‌ନା। ମା ରକାନ୍ ଇଞ୍ଜି ମାଷ୍ଟେର୍ ଆରେ ମାପୃ ଯୀଶୁ ଖ୍ରୀଷ୍ଟଙ୍ଗ୍ ଆହୁର୍।

ହତ୍‌ତି 2:9

“ଆନେଙ୍ଗ୍ ପୁଚାଙ୍ଗ୍‌ନା ଯେ, ମାନାୟାର୍ ମିଙ୍ଗେଙ୍ଗ୍ ଦୁଃକ୍ କଷ୍ଟ ହିଦ୍‌ନାରା ଆରେ ଏପେଙ୍ଗ୍ ଗରିବ୍। ମାତର୍ ଏପେଙ୍ଗ୍ ଗରବ୍‌ତାକେ ହାଉକାର୍। ଆନେଙ୍ଗ୍ ପୁଚାଙ୍ଗ୍‌ନା ଯେ, ଇମ୍‌ଣି ଯିହୁଦି ଜାତିନି ମାନାୟାର୍ ଜାର୍‌ତିଙ୍ଗ୍ ଈଶ୍ୱର ବାଚି କିତ୍‌ତି ମାନାୟ୍ ଇଞ୍ଜି ଚଞ୍ଜିଆ ଆନାରା, ମାତର୍ ହେୱାର୍ ଆକାୟ୍। ହେୱାର୍ ମି ବିରଦ୍‌ତାକେ କରାପ୍ କାତା ଇନାରା, ଇନେସ୍‌କି ହେୱାର୍ ଶୟତାନ ଦଳ୍‌ନି ମାନାୟାର୍।

ହତ୍‌ତି 21:8

ମାତର୍ ଇମ୍‌ଣାକାର୍ ନାଙ୍ଗେଙ୍ଗ୍ ପାର୍ତି କିଦ୍‌ନାକା ବନ୍ଦ୍ କିତାର୍‌ନା, ମାନାୟାରିଙ୍ଗ୍ ଟକାୟ୍ କିନାରା। ଈଶ୍ୱରତିଙ୍ଗ୍ ପୁନ୍‌ୱିତି ମାନାୟାର୍, କରାପ୍ କାମାୟ୍ କିନାର୍, ମାନାୟାରିଙ୍ଗ୍ ମାର୍ନେ ଅହ୍‌ନାର୍। ଦାରି କାମାୟ୍ କିନାର୍, ଯାଦୁ ମନ୍ତର୍ କିନାରା, ମୁର୍ତି ପୁଜା କିନାରା ଆରେ ମିଚ୍ ୱେଚ୍‌ନାରା। ହେୱାରିଙ୍ଗ୍ ଆନେଙ୍ଗ୍ ଗନ୍ଦକ ନାଣି ଆହ୍‌ନି କୁଣ୍ଡ୍‌ତାକେ ତୁସି ହିନାଙ୍ଗ୍ ଇଦାଙ୍ଗ୍ ନେ ଦୁଇ ନମ୍ବର୍ ମାରାଣ୍।”

ହତ୍‌ତି 22:15

ମାତର୍ ନିକୁଡ଼୍‌ଲେକେ ଇମ୍‌ଣି ମାନାୟାର୍ କରାପ୍ କାମାୟ୍ କିନାର୍, ଯାଦୁ ମନ୍ତର୍ କିନାର୍, ଦାରି କାମାୟ୍ କିନାର୍, ମାନାୟାରିଙ୍ଗ୍ ଅହ୍‌ନାର୍, ମୁର୍ତି ପୁଜାକିଜି ମାନାର୍ ଆରେ ମିଚ୍ ୱେଚ୍‌ନି ମାନାୟାର୍ ସହର୍ ବାର୍ତ ମାନାର୍।

ହତ୍‌ତି 3:9

ଲାଗିଙ୍ଗ୍ ହୁଡ଼ାଟ୍, ଇମ୍‌ଣି ମାନାୟାର୍ ଶୟତାନ ଦଳ୍‌ନି ମାନାୟାର୍ ହେୱାର୍ ଈଶ୍ୱର ବାଚି କିତ୍‌ତି ସତ୍ ଯିହୁଦି ମାନାୟାର୍ ଇଞ୍ଜି ଚଞ୍ଜିଆ ଆନାରା, ମାତର୍ ହେୱାର୍ ସତ୍ ଯିହୁଦି ମାନାୟାର୍ ଆକାୟ୍। ହେୱାର୍ ୱାଜି ମି କାଲ୍‌ପାନାତାକେ ମୁଣ୍ଡିଆ ଇଡ଼୍‌ଦାନାର୍ ଆରେ ଆନେଙ୍ଗ୍ ମିଙ୍ଗେଙ୍ଗ୍ ଲାଡ୍ କିନାଙ୍ଗା ଇଞ୍ଜି ହେୱାର୍ ପୁଞ୍ଜ୍‌ନାର୍।”