Filiipʋkɔmʋ 4:1 - Nyaboa (Nyabwa)

¹ ꞌƖnnɛ ꞌbhleꞌe ꞌnynɩꞌa dɩ a, ꞌan dɩkmalotʋꞌa ꞌꞌnynuu-a, a-bʋ -ke ꞌtʋ-ʋ ꞌlbhaꞌa ꞌɩnmʋ tenyɩ ꞌle ꞌan -pɔlʋ-ʋ ꞌwlaꞌa ꞌꞌyiti ꞌɩn ꞌke ꞌye a, -ziadɩ moꞌo, aꞌba dɩ-ɩ ꞌlbhaaꞌa ꞌɩnmʋ ꞌbʋbʋa ꞌꞌyi. A-beeꞌa dɩ ꞌɩn ꞌke ꞌnynɩ ꞌwlʋ -lrɛɛ. ꞌƐ dɩ a, ꞌan dɩkmalotʋꞌa ꞌꞌnynuu-a, a kuku ꞌmʋti ꞌle a -ke -aꞌba -Kɔyi *Zezii ꞌke ꞌꞌyiꞌꞌsisri -ka -zɛgɛka ꞌꞌkɔmʋ!

Filiipʋkɔmʋ 4:1 Cross References

Matiee 10:22

A-bʋ -yʋʋ, ꞌan ꞌnynɩ a ꞌbhleꞌe ꞌꞌkpiꞌa dɩ, nyʋ ꞌwee-e ꞌye-e amʋ ꞌmʋꞌnyɛ -mʋ. ꞌKa-a ɩ-ɩ ꞌye ꞌmʋ-nɩ mʋ. Nyɔ -yɔ ꞌyeꞌa ꞌkpa ꞌꞌyi -ku mʋ, -ɔ ꞌyeꞌa ꞌɩnmʋ ꞌꞌsrii mʋ ꞌꞌkɔmʋkɔmʋ, ꞌɩnnɔ ꞌye ꞌpʋn mʋ ꞌbho -Lagɔꞌɔ ꞌꞌyigbeyi.

ꞌZaan 8:31

Ɩ ziꞌa -kaa, ʋ-bʋ *ꞌZuifʋ deꞌa ɔ-bɔ *Zeziiꞌa wlu ꞌꞌgwli, ꞌle ɔ na ʋ -bodɩ: Lɩ ꞌɩn-ɩ tɔꞌɔ amʋ, -bho a ꞌꞌdu ɩ ꞌbho -ka -zɛgɛka, ꞌꞌlemnɩɩ *ꞌan -namʋ a ꞌꞌduꞌo -ziaka.

Nʋnʋkpli 11:23

Ɔ nyniꞌa ꞌle a, -Lagɔꞌɔ ꞌꞌnitiwʋnnasʋ -nɩꞌa nyʋ ꞌmnʋ ꞌꞌkpi, ɔ ꞌye -ɛ li, ꞌbʋbʋa-a ꞌlbhɔ ɔꞌo ꞌle ɔ ꞌye ʋ ꞌkpa ꞌꞌyi po ꞌle ꞌwa Zeziiꞌa ꞌꞌgwlideɛ ꞌke ꞌmʋku.

Nʋnʋkpli 14:22

Ɩ-bɩ -gwlɛ -ke ꞌmʋ ʋn -zi -nɩꞌa a, -ka -lue ʋn-ʋ nʋꞌo: Ʋn-ʋ ꞌde-e *Zeziiꞌa -namʋ -pɔlʋ ꞌli ti, ʋn-ʋ po ꞌʋ ꞌkpɩ ꞌꞌyi, ʋn-ʋ ꞌꞌdu ꞌʋ ꞌꞌdɩ ꞌmʋ ꞌle ʋn ꞌke -pɔlʋ ti-ku ʋn ꞌke Zezii ꞌꞌgwlide. Ʋn na: Nyɔ-ɔ Zezii -kɔꞌɔ, ꞌle ꞌɔ tinɩɛ ꞌmʋ, ꞌkleyeɛɛ -nɩ ꞌnɔ-ɔ ꞌꞌkpi, ꞌle ɔ ꞌke ꞌbʋbʋa li ꞌle *-lebhɔɔnɔɔ ꞌli.

Nʋnʋkpli 2:42

Ʋn-ʋ ꞌwɔn-ɔ *Zeziiꞌa -dalbhomʋꞌa -tɔtɔlɩ ꞌmʋti ꞌle ʋn-ʋ kpʋn ꞌɩ ꞌꞌyi ꞌle ʋn-ʋ ꞌꞌduduꞌo, ꞌle ʋn-ʋ bheteꞌe gbo, ʋn-ʋ li nɩꞌe ꞌwa liliɛ -daluea ƆFa 2 42 Zeziiꞌa -antanyɩgwlidemʋ ꞌmnʋ, -bho ʋn gwɛ -dalueliɛ ꞌꞌyi ꞌle ʋn-ʋ liꞌe ꞌwa kpɔcɛliliɛ -lrɛɛ ꞌle Zeziiꞌa ꞌnynɩ ꞌmʋ. ꞌKa-a ʋn-ʋ nʋꞌo.

ꞌWlɔmʋkɔmʋ 2:7

A ꞌye li-ɔ, nyʋ-ʋ kuꞌa ꞌkpa ꞌꞌyi -ʋ nʋꞌa -zɛgɛ ɛ, -ʋ ꞌbɔꞌɔ ti ʋn ꞌke ꞌnynɩ ꞌwlʋ ꞌle ʋn ꞌke -deyideyi ꞌmʋ ti-de ꞌbho -Lagɔꞌɔ ꞌꞌyigbeyi ꞌle -ʋ ꞌbɔꞌɔ ti ʋn ꞌke ꞌꞌkɔgwlɛtinɩɛ ꞌye a, ꞌwa nyʋtu -Lagɔ-ɔ ꞌꞌnyɩ ɛꞌo.

1 Kɔlɛɛtɩkɔmʋ 15:58

ꞌKa-a ɩ -nɩꞌe ꞌmʋ ꞌweeꞌa dɩ a, dɩkmalotʋꞌa ꞌꞌnynuu-a, a -de ꞌle aꞌba -Lagɔꞌɔ ꞌꞌgwlideɛ ꞌli ti! ꞌƐ -sɔ -denɩ ꞌmʋ -le! A po ꞌle ꞌkpɩ tenyɩ, -aꞌba -Kɔyi Zeziiꞌa lbhʋ a-a nʋꞌa a, ꞌle a ꞌke ɛ ꞌꞌlru-mu -nɩ ꞌꞌkɔmʋ, -ɛkedɩmaa, aꞌba ꞌꞌbhi yiboꞌo-o, a -ke ɔ ꞌꞌsisriꞌe-e ꞌꞌyiꞌa dɩ, lbhʋ a-a nʋꞌa -laa, ɛ -see ꞌꞌnukɔ ꞌwla yi.

1 Kɔlɛɛtɩkɔmʋ 16:13

ꞌLotʋꞌa ꞌꞌnynuu-a, ꞌɩn-ɩ ꞌtmʋʋꞌo amʋ-ɛ, a yaa ꞌmʋti, ꞌle a ꞌke ꞌle aꞌba -Lagɔꞌɔ ꞌꞌgwlideɛ ꞌli ti-de! A kuku ꞌmʋti ꞌle a ꞌke ꞌkpɩ ꞌꞌyiꞌbhle.

Galasiikɔmʋ 5:1

A -gblee, -a ꞌke ꞌꞌyiflɔmʋ ꞌꞌdu moꞌo. ꞌƖnnɛ ꞌbhleꞌe ꞌnynɩꞌa dɩ *Zezii *Kliisɩ zetieꞌe -amʋ ꞌle -aꞌba ꞌꞌbhiꞌa ꞌmʋtikukuɛꞌɛ ꞌmʋpɛɛɛ ꞌmʋ ꞌle -a ꞌke ꞌꞌyisrɛɛmʋ ꞌꞌdu ꞌbho -Lagɔꞌɔ ꞌꞌyigbeyi. -A po ꞌle ꞌkpɩ ꞌle -a ꞌke ꞌle ꞌꞌyiflɔɛ ꞌmnɛ ꞌli ti-de. Aꞌba ꞌwɔn nyɔꞌɔ -kɔ amʋ ꞌꞌlru ꞌmʋ -le -lrɛɛ ꞌle lɛꞌꞌo lɛ ꞌmʋ.

Filiipʋkɔmʋ 1:27

A -gblee, lɛ ꞌɩn ꞌka amʋ -bodɩ ꞌmʋ-za, ꞌɩnnɛ ꞌmo-o, *Kliisɩꞌa ꞌꞌdɩzɩgɩ a ꞌwɔnꞌɔ ꞌbɔ ɔ, -ka ɛ ꞌlɛꞌɛ, a -na -kaa! -Mnɩɩ, -bho ꞌɩn yi ꞌle amʋ gbo ꞌle ꞌɩn -ke a ꞌke ꞌyɩye o, -bho ꞌɩn se ꞌle aꞌba ꞌꞌklumʋ -nɩ ꞌle ꞌɩn ꞌke aꞌba ꞌꞌdɩzɩgɩ ꞌbʋꞌwɔn o, -ka a kpʋkpʋnꞌa ti, ꞌle, -pɔlʋ -lue ꞌtɩn ꞌmʋ, a-a kpaꞌa ꞌɔ ꞌꞌdɩzɩgɩ ꞌle nyʋ-ʋ ꞌwɔɔnꞌɔ ɩ-bɩ -tɔtɔlɩ ꞌmnɩ, ꞌɩn ꞌke ɩ yibo.

Filiipʋkɔmʋ 1:8

-Ka ꞌan -pɔlʋꞌa klɛ ti ꞌɩn -kmaꞌa aꞌba dɩ tenyɩ ꞌꞌfɩa ꞌwee, ꞌle, -ka ɛ-bɛ dɩkmɛɛ ꞌmnɛ ꞌwlʋꞌa Zezii Kliisɩ ꞌmʋ, -Lagɔ yiboꞌo -ziadɩ moꞌo.

Filiipʋkɔmʋ 2:16

ꞌle ʋn ꞌke ꞌꞌkɔgwlɛtinɩɛ ꞌye -lrɛɛ. -Bho a nʋ -kaa a, ꞌbho Kliisɩꞌa leyinɔɔ ꞌꞌyi, ꞌɩn-ɩ ꞌye-e ꞌbɛtɛ -wa -mʋ ꞌɩn ꞌke ꞌbʋbʋa li aꞌba dɩ, ɛbɛ ꞌmnɛꞌɛ kamʋ: -ka ꞌɩn -seeꞌa bhebhelbhʋ nʋ, ꞌbho-o ꞌɛ ꞌꞌyriꞌa ꞌbɩ-ɩ ꞌye ꞌwlʋ -nɩ mʋ.

Filiipʋkɔmʋ 2:26

A -gblee, -nɔɔ -lrɛɛ gbɛ ꞌli a ꞌwɔn-ɔ ꞌbɔ na ꞌɔ ꞌꞌlru ꞌbhatiꞌo tenyɩ. -Ka ꞌɔ ꞌꞌlrubhatiwlu nyniꞌa ꞌle amʋ gbo, ɔbɔ-ɔꞌɔ ꞌꞌbhuo yiboꞌo-o ꞌnaꞌa dɩ, ɔ -kaaa ꞌtraamʋ ꞌꞌlrubhatibhlʋkpa ꞌꞌyi-i ꞌwlʋ a, ꞌɔ -pɔlʋ -see bhlu ke. Ɔ-ɔ ꞌbɔ-ɔ ti ɔ ꞌke ꞌle a gbo le yi ɔ ꞌke amʋ -pɔlʋ ꞌꞌkpi zɩza.

Kolɔsʋkɔmʋ 4:12

Aꞌba ꞌꞌbhliyi Epaflasɩ na, ɔ-bɔ ꞌyeꞌe amʋ! Ɔ-ɔ ꞌmo-o *Zezii *Kliisɩꞌa lbhʋnʋyi. Ɔ-ɔ ꞌpo-o *-Lagɔ wɔn gbo -wlɛɛwlɛɛ aꞌba dɩ, ꞌɔ -pɔlʋꞌa klɛ ti. Ɔ-ɔ ꞌpo -ɔ wɔn gbo, ꞌle aꞌba ꞌꞌgwlideɛ -kaa -denɩ ꞌmʋ -sɔ, a ꞌke ꞌꞌyritiku ꞌbho aꞌba -Lagɔjeyinanamʋ, ꞌle a ꞌke ꞌɔ ꞌgwlʋdɩ yibo -ka -zɛgɛka ꞌle a ꞌke ɛ nʋ.

1 Tesalonikɩkɔmʋ 3:13

-Ka -lue ꞌmnɔ, ꞌka-a ꞌkpa ꞌke amʋ ꞌꞌyi -nɩ, ꞌle, -nɔɔ -ke ti -aꞌba -Kɔyi Zezii -ke ꞌɔ ꞌꞌyiglɛnyʋ-ʋ ꞌyeꞌa le -yi mʋ, a ꞌke ꞌꞌyisrɛɛmʋ ꞌꞌdu ꞌbho -aꞌba -tɩta -Lagɔꞌɔ ꞌꞌyigbeyi, ꞌle ɔ ꞌke aꞌba nyɔꞌꞌo nyɔ -kɔ ꞌꞌfɩa ꞌwee.

2 Tesalonikɩkɔmʋ 2:15

ꞌLotʋꞌa ꞌꞌnynuu-a, ꞌka-a ɛ -nɩꞌe ꞌmʋꞌa dɩ a, aꞌba ꞌbhɔ aꞌba Zeziiꞌa ꞌꞌgwlideɛꞌɛ dɩ -le, ꞌle, lɩ -a tɔꞌɔ amʋ, -yɩ -a -ke a dedeꞌa ꞌꞌyigbeyi ti o, ꞌle -yɩ ꞌma-a -jeyipowlu -a ꞌꞌduꞌa ꞌle ꞌꞌbɔgʋ ꞌli o, aꞌba ꞌbhɔ ꞌya ꞌlitideɛꞌɛ dɩ -le!

2 Timotee 2:1

-Ɩn ꞌye li-ɔ, Timotee, -ɩnmɔ ꞌma-a ꞌan -Lagɔjeyiꞌa ꞌꞌyu, ꞌꞌsrii *Zezii *Kliisɩ ꞌle ꞌɔ ꞌꞌbhuo ꞌke -ɩnmʋ ꞌmʋtikukuɛ ꞌꞌnyɩ ꞌle ꞌɔ ꞌlimʋꞌa wɔnnmɔɛ ꞌmʋ -ɩn ꞌke ꞌle ꞌɛ ꞌli ti-de.

Eblee 10:23

Lɛꞌꞌo lɛ ɔ ꞌꞌduꞌa -amʋ wɔn ꞌmʋti, -a ꞌde-e ꞌꞌgwli na, ɔ-ɔ ꞌye -ɛ -amʋ ꞌꞌnyɩ -mʋ. ꞌKa-a ɛ -nɩꞌe ꞌmʋꞌa dɩ, -aꞌba -pɔlʋꞌa ꞌkɔlʋ -le ꞌbho ɔ ꞌꞌkpi! -Bho -a -ka nyʋ-ʋ ꞌtmʋʋ na ꞌɩnnɔ ꞌmo-o -aꞌba -pɔlʋꞌa ꞌꞌyideyi a, ꞌkpɩꞌa -wa -amʋ ꞌꞌyiti -le!

Eblee 3:14

A -gblee, -da -a ꞌkpa -nɩꞌa ꞌbho -Lagɔjeyi -lreeka, -ka -a deꞌa *Zezii *Kliisɩ ꞌꞌgwli -aꞌba -pɔlʋꞌa klɛ ti, -bho -a de ɔ -kaa ꞌꞌgwli ꞌꞌkɔmʋ, ꞌꞌlemnɩɩ ꞌɔ nyʋ -a ꞌꞌduꞌo -ziaka.

Eblee 4:14

ꞌAn ꞌlotʋꞌa ꞌꞌnynuu-a, ꞌɩn ꞌtmʋʋꞌo amʋ-ɛ see na, -Lagɔꞌɔ ꞌꞌyu *Zeziiꞌa nymɔ ꞌwla-a ti ꞌle ɔ ꞌye ꞌmɛ -a-bʋ nyunyuꞌa ꞌꞌnyinynidɩꞌa dɩ. Ɛ-bɛ *ꞌsraga ɔ -zaꞌa -kaa ꞌbho -Lagɔꞌɔ ꞌꞌyigbeyi, ꞌɩnnɛ zetieꞌe -amʋ ꞌle ɩ-bɩ ꞌꞌnyinynidɩ ꞌmnɩ ꞌmʋ ꞌle -a -ke ɔ ꞌye -ybhɛ. Ɔ-bɔ Zezii ꞌmnɔ, ɔ -nɩꞌe-e ꞌbho ꞌɔ ꞌꞌtroli ꞌle yaku ꞌli. ꞌƐ dɩ, -a de ɔ ꞌꞌgwli ꞌle -a -ke ɔ ꞌke -na ꞌꞌkɔmʋ ꞌle nyʋ ꞌke ɩ yibo.

2 ꞌPiɛlɩ 3:17

ꞌAn dɩkmalotʋꞌa ꞌꞌnynuu-a, ꞌbho a-bee -mnʋʋꞌa damʋ, -ka ꞌya lɩtu ꞌyeꞌa -nʋ-ɛ mʋ, -a ꞌtmʋʋ ꞌnɩ amʋ-ɛ see. ꞌƐ dɩ, a ꞌꞌdu aꞌba ꞌꞌbhi ꞌꞌyrili, ꞌle, ʋ-bʋ nyʋ-ʋꞌa ꞌꞌduꞌa ꞌbho -Lagɔ, ʋn -kaa amʋ ꞌle ꞌwa -tɔtɔlɩ -ke ꞌwa ꞌꞌnyinynidɩ ꞌmʋ jri ꞌle aꞌba ꞌꞌgwlideɛ -kaa -denɩ ꞌmʋ -sɔ, ꞌle a -kʋʋ ʋ kli ꞌkpa.