Filiipʋkɔmʋ 3:13 - Nyaboa (Nyabwa)

^13-14 ꞌLotʋꞌa ꞌꞌnynuu-a, ꞌɩn na, -bho ɛ ꞌꞌdu ꞌmna-aꞌa ꞌꞌbhuo, -ka ꞌɩn ꞌyeꞌa ka ɩ-bɩ -zɩgɩ ꞌmnɩ ꞌꞌfɩa ꞌwee, ꞌɩn -see -kaa ꞌlɛ. Lɛ ꞌɩn yiboꞌa, ꞌɩnnɛ ꞌmo-o, -ka pleyi -ke ꞌɔ -boplemʋ-ʋ mumuꞌa li-i nʋꞌa ꞌle ɔ-ɔ poꞌa ꞌle ꞌkpɩ ɔ ꞌke nyni -tanyɩ ꞌle ɔ ꞌke ꞌnynɩ ꞌwlʋ a, ꞌka-a ꞌɩn-ɩ nʋꞌo. ꞌƐ ꞌzɔ ꞌmo-o, -da ꞌan -pɔlʋ-ʋ ꞌwlaꞌa ti, ꞌbho-o ꞌɩn-ɩ muꞌo -kpayɩ. -Bho ꞌɩn -ka mu a, ꞌan -gbʋ le. -Bho ꞌɩn -ka -kaa-a nʋ a, lɛ -Lagɔ -zi -nɩꞌa Zezii Kliisɩ ꞌmʋ, ɔ deꞌa ꞌbho ti ꞌan dɩ, ꞌɩn-ɩ poꞌo ꞌtɔ ꞌle-e ꞌkpɩ ꞌle ꞌɩn ꞌke ɛ ꞌye ꞌle yaku ꞌli, ꞌbho ꞌɔ ꞌꞌtroli.

Filiipʋkɔmʋ 3:13 Cross References

Luukɩ 10:42

Lɛ -lue ꞌtɩnꞌa ꞌꞌsɛꞌɛ dɩ, nymɔ ꞌke nyɔ ꞌgwlʋ ꞌꞌsi. Ɛ-bɛ lɛ ꞌmnɛ ɛ, Malii ꞌye -ɛꞌo, ꞌle nyɔ -see ɛ ʋ kwa ꞌmʋ -za yi.

Luukɩ 9:62

ꞌLe ɔ na ɔbɔ ꞌmnɔ -bodɩ: Nyɔ -yɔ ꞌkpaꞌa lbhʋ -nʋnamʋ, -bho ɔ -see ꞌbho -gwle, ꞌle ɔ ꞌke ɛ ꞌꞌkpi-tbhɛ, ꞌbho -Lagɔꞌɔ nyʋꞌa -kɔkɔɔnɔɔ ti ꞌɔ nyɔtu se ꞌbhɛɛ ɔ ꞌke -Lagɔꞌɔ lbhʋ nʋ.

2 Kɔlɛɛtɩkɔmʋ 5:16

ꞌKa-a ɛ -nɩꞌe ꞌmʋꞌa dɩ, -bho -a ꞌke ꞌtraamʋ nyɔ ya-gbʋ, -aꞌba -gbʋꞌo ꞌɔ kpliꞌa ꞌꞌsɛ ya. Kɩn, -ziadɩ moꞌo. -Bɛnyɩ a, ꞌka-a -a nʋꞌo ꞌbho Zezii Kliisɩꞌa damʋ. ꞌTraamʋ ꞌtɔ ɔ, -aꞌba nʋ -kaa.

Filiipʋkɔmʋ 2:12

ꞌKa-a ɛ -nɩꞌe ꞌmʋꞌa dɩ a, ꞌan dɩkmalotʋꞌa ꞌꞌnynuu-a, -Lagɔꞌɔ wluꞌa ꞌmʋzayi ꞌɩn ꞌꞌduꞌa dɩ a ꞌꞌdu ꞌbho ꞌɩnmʋ! -Da ꞌɩn -nɩꞌa ꞌle aꞌba ꞌꞌklumʋ a -nɩꞌe-e ꞌɛ kpli ti ꞌle a-a ꞌꞌduꞌo ꞌbho ꞌɩnmʋ. ꞌꞌYri -ke ꞌꞌyi ꞌɩn seꞌa ꞌbho -nɩ a, a nʋ -kaa ꞌꞌkɔmʋ! ꞌƖn na, a ꞌpʋn-oꞌo ꞌbho -Lagɔꞌɔ ꞌꞌyigbeyi. ꞌƐ dɩ a kuku ꞌmʋti, ꞌle, kplizɩgɩ nyɔ-ɔ ꞌpʋnꞌa ꞌka nʋ a, a ꞌke ɩ nʋ! -Bho a -kɩ ɩ-ɩ nʋ a, a ꞌꞌdu ꞌbho -Lagɔ ꞌle a ꞌke ꞌɔ -sɩanyɩ ku ꞌmʋti ꞌbhle, a ꞌke aꞌba ꞌꞌbhi ꞌꞌyriliꞌꞌdu ꞌle a -kaa ꞌɔ lbhʋ ꞌmnɛ nɛsrɛ -nɩ.

Filiipʋkɔmʋ 3:12

-Bho ꞌɩn ꞌlɛ -kaa, ɩ-bɩ dɩ ꞌɩn ꞌybhaꞌa ꞌɩn ꞌke ꞌliti-de, -ka ꞌɩn ꞌye ꞌɩ ka see ꞌꞌfɩa ꞌwee, ɛ -se -kaa -ko. ꞌLe, lɛ -Lagɔ ꞌybhaꞌa -a ꞌke ꞌꞌdu, ꞌɩn -see ɛ -bhla ꞌꞌdu ke -ka -zɛgɛka. ꞌLe, -ka *Zezii *Kliisɩ ꞌꞌluoꞌa ꞌɩnmʋ ꞌmʋ ꞌle ɔ ꞌyeꞌa ꞌɩnmʋ ꞌɔ nyɔ ꞌmʋ nʋ a, ꞌɛ dɩ ꞌɩn-ɩ poꞌo ꞌle ꞌkpɩ, ꞌle, -zɩgɩ ꞌwee ɔ ꞌybhaꞌa ɔ ꞌke ꞌɩnmʋ -bodɩ nʋ a, ꞌɩn ꞌke ɩ ꞌye.

Filiipʋkɔmʋ 3:8

ꞌKla-a moꞌo -ziaka. Ɩ-bɩ tinɩɛꞌɛ lɩ ꞌwee -ke dɩ nyɔ-ɔ ꞌbhleꞌa ꞌnynɩ, -bho ꞌɩn -gbʋ nɩ ꞌtɔ ya, bhubhulɩ ɩ ꞌꞌduꞌo. -Ka ꞌɩn yiboꞌa Zezii Kliisɩ ꞌle ɔ ꞌyeꞌa ꞌan -kɔyi ꞌꞌdu, ꞌɩnnɛ ꞌbhleꞌe ꞌnynɩ tenyɩ, ɛ ꞌye ɩ-bɩ lɩ ꞌwee -zi. ꞌYa ꞌwee, ꞌbho ꞌan damʋ, ɩ se ꞌtɔ ꞌnynɩ ꞌbhle. -Bho ꞌɩn -gbʋ nɩ ya, ɩ kɔkɔɔꞌɔ-ɔ -yrukodu. ꞌƐ dɩ ꞌɩn -zi ꞌɩ kwa gbo ꞌle ꞌɩn ꞌke ɔ-bɔ Zezii Kliisɩ yibo -ka -zɛgɛka ꞌle ꞌɩn ꞌke ɔ ꞌꞌsrii ꞌꞌkɔmʋ.

Eblee 6:1

ꞌKa-a ɛ -nɩꞌe ꞌmʋꞌa dɩ, ꞌlotʋꞌa ꞌꞌnynuu-a, *Zezii *Kliisɩꞌa ꞌꞌkpidɩ -kmuꞌa ꞌꞌyi tenyɩ, -a ꞌcɩɩn ɩ ꞌle nyʋ-ʋ kuꞌa ꞌꞌyriti ꞌbho -Lagɔjeyi, lɩ ʋn yiboꞌa, -abʋ ꞌke ɩ yibo -lrɛɛ! -Da -a yiꞌa ꞌbho -Lagɔꞌɔ -jolʋ ꞌmnɛ ꞌꞌyi -lreeka, lɩ -a ꞌcɩanꞌa ꞌbho Zezii Kliisɩ ꞌꞌkpi, -a zi ꞌtɔ -mnɩɩ li, -a yibo nɩ-oꞌo see. A -gblee, -bho nyɔ po -buduꞌa ꞌkpʋ glu, ɔ-ɔ ꞌꞌdu-o ꞌbho ꞌɛ -da ꞌle ɛ-ɛ gwɛꞌɛ ꞌꞌyi -susueyi, ꞌɔ ꞌnɛ ꞌbho ꞌɛ ponamʋ ti. ꞌKa-a ɛ -nɩꞌe ꞌmʋꞌa dɩ, ꞌꞌnyinynidɩ -ke dɩ nyɔ-ɔ ꞌmɛꞌɛ ꞌbho -Lagɔꞌɔ ꞌꞌyigbeyi, -ka nyɔ-ɔ yibo ꞌnɩ ꞌꞌyi-e ꞌle ɔ-ɔ ꞌꞌbhitiꞌa ꞌle ɔ gbo-e ꞌle ɔ ꞌke ɔ ꞌꞌgwlide-e, ɩ-bɩ wlu ꞌmnɩ, ꞌɩn se ꞌtɔ ꞌbhɛɛ ꞌɩn ꞌke ꞌbho ꞌya da le mu.

2 ꞌPiɛlɩ 3:8

ꞌAn dɩkmalotʋꞌa ꞌꞌnynuu-a, lɛ-ɛ kuꞌa wɔn tenyɩ, a -seeꞌa ꞌmate yi, ꞌɩnnɛ ꞌmo-o, ꞌbho -aꞌba -Kɔyi -Lagɔꞌɔ ꞌꞌyigbeyi, ꞌwɩ -lue -ke zʋɩnꞌa ꞌꞌdui ꞌsɔn -gwlɩ bue ꞌbhɛɛꞌɛ ꞌmʋ-ɛ.