Filiipʋkɔmʋ 1:20 - Nyaboa (Nyabwa)

²⁰ A -gblee, lɛ ꞌɩn -nɩꞌa wɔnfuonamʋ ꞌle ꞌɩn deꞌa -pɔlʋ ꞌꞌyi, ꞌɩnnɛ ꞌmo-o, lɛ -ke dɩn ꞌka ꞌɩnmʋ ꞌlbha ꞌbho Kliisɩꞌa -jolʋ -ke ꞌꞌyi ꞌɩn -nɩꞌa a, ɛ -see -nɩ yi. ꞌƖn-ɩ ꞌye-e ꞌꞌyrili-cɛ -mʋ ꞌle ꞌɩn ꞌke ꞌɔ dɩ ꞌmʋ-za ꞌbho nyʋꞌa ꞌꞌyigbeyi, ꞌle, -bho ꞌɩn -nɩ ti o, -bho ꞌɩn se ti-nɩ o, ꞌan kpli ꞌɩn -nɩꞌa ti ꞌbho -jolʋ ꞌmnɛ ꞌꞌyi, ɩ ꞌke ꞌɔ ꞌnynɩ ꞌꞌyiꞌbhɛɛ ꞌꞌkɔmʋ.

Filiipʋkɔmʋ 1:20 Cross References

ꞌZaan 21:19

Ɔ -zaꞌa wlu ꞌmnɛ ꞌmʋ a, ꞌle, -ka ꞌPiɛlɩ ꞌka ꞌkle ꞌye-ɔ ꞌle ɔ ꞌka ꞌmɛ ɛ, ɔ ꞌye ɔ ꞌtmʋʋ. Ɛ-bɛ ngazemɛmɛɛ ꞌmnɛ, ꞌɩnnɛ ꞌye -Lagɔꞌɔ ꞌnynɩ ꞌꞌyiꞌbhɛɛ mʋ. Ɔ ꞌlɛꞌɛ -kaa a, ꞌle ɔ na: ꞌꞌSrii ꞌɩnmʋ, ꞌɩn -ke -ɩn ꞌke -na!

Nʋnʋkpli 20:24

ꞌƖnmɔ ꞌPɔlʋ -mnɔɔ, ꞌꞌdɩ ꞌmnɩꞌa ꞌlbha ꞌɩnmʋ -sɩanyɩ ꞌꞌyi. -Bho ʋn ꞌlbha ꞌɩnmʋ o, -bho ʋn -see ꞌɩnmʋ ꞌlbha o, ꞌmna -see ꞌya dɩ zi. Lɛ ꞌmna-a ꞌbɔꞌɔ ti, ꞌɩnnɛ ꞌmo-o, lbhʋ ꞌan -Kɔyi Zezii sieꞌa ꞌɩnmʋ li, ꞌɩn ꞌke ɛ nʋ ꞌle ꞌɩn ꞌke ɛ ꞌꞌyigwɛ. Lbhʋ ꞌmnɛ ꞌmo-o, ꞌɩn ꞌke -Lagɔꞌɔ ꞌꞌdɩzɩgɩ nyunyu ꞌꞌyitiwa, -ka ꞌɔ ꞌlimʋ -nmɔꞌɔ wɔn ʋ -bodɩ.

Nʋnʋkpli 21:13

Ɔ na: Lee -ke ꞌꞌvivia maꞌa? Leedɩ a-a cnaꞌa ꞌan -pɔlʋꞌa? A -gblee, -bho nyɔ san ꞌɩnmʋ ꞌle Zelizalɛɛmʋ, ɛ se dɩ ꞌbhle. -Bho ꞌɩn ꞌꞌdu -aꞌba -Kɔyi Zeziiꞌa dɩ ꞌle ꞌɩn ꞌke ꞌle ꞌmɛ -nɩ, ɛ se dɩ ꞌbhle.

Nʋnʋkpli 4:31

-Gblee, ʋn gwɛꞌɛ *-Lagɔꞌɔ wɔngbopoɛ ꞌꞌyi a, -da ʋn ꞌgbʋʋꞌa ꞌꞌlru -gligligli! ꞌbhoꞌa ꞌbhlʋkpa -trɛꞌo. -Lagɔꞌɔ Lisaazuzuꞌa -jijri ꞌyi -ʋ ꞌꞌkpi ꞌwee, ꞌle ʋn ꞌye ꞌꞌyrili-cɛ ꞌle ʋn ꞌye ꞌbho ꞌkpa, ꞌle ʋn-ʋ zaꞌa -Lagɔꞌɔ wlu ꞌmʋ.

ꞌWlɔmʋkɔmʋ 12:1

ꞌLotʋꞌa ꞌꞌnynuu-a, ꞌbho ꞌɛ lemʋ a, -Lagɔ -tɔꞌɔ-ɔ -amʋ ꞌɔ ꞌlimʋꞌa wɔnnmɔɛꞌɛ dɩ a, lɛ ꞌɩn-ɩ ꞌbɔꞌɔ amʋ ꞌmʋ ti a, ꞌɩnnɛ ꞌmo-o, a -gwɛ ti, a ꞌꞌnyɩ aꞌba ꞌꞌbhi -Lagɔ -jeyi -ka ꞌsragalɛ yaꞌa a ꞌle a ꞌke ꞌbho ꞌɔ kamʋ ti-de a ꞌke ɔ ꞌtʋ nʋ! -Ɛ ꞌma-a -Lagɔꞌɔ bʋbɔsʋzɛgɛ, ꞌɩnnɛ ꞌka-a!

ꞌWlɔmʋkɔmʋ 5:5

ꞌKa-a ɛ -nɩꞌe ꞌmʋꞌa dɩ a, ɛ-bɛ -aꞌba -Lagɔꞌɔ -pɔlʋyideɛ ꞌmnɛ se ꞌbhɛɛ ɛ ꞌke -amʋ ꞌkpɩ ꞌꞌyiti-wa; -ɛkedɩmaa, *ꞌɔ Lisaazuzu ɔ ꞌꞌnyɩꞌa -amʋ a, ɔ -zi -nɩ ꞌnɔ-ɔ ꞌmʋ ꞌle ɔ ꞌye ꞌɔ nyʋꞌa dɩkmɛɛ ꞌle -aꞌba -pɔlʋ ꞌꞌkpi ꞌpɩple!

ꞌWlɔmʋkɔmʋ 6:13

Aꞌba ꞌꞌtayi aꞌba ꞌꞌbhi ꞌꞌyiti aꞌba -de ꞌle ꞌꞌnyinynidɩꞌa lbhʋ ꞌli ti -le! A ꞌꞌnyɩ aꞌba tinɩɛꞌɛ klɛ -Lagɔ -jeyi, ꞌle, nyʋ-ʋ -sɔꞌɔ glu ꞌle ꞌmɛmʋꞌa ꞌꞌklumʋ ʋn ꞌyeꞌa ti-nɩ -lrɛɛ ɛ, -ka ʋn -nɩꞌa a, a ꞌke -kaa -nɩ! A ꞌꞌnyɩ aꞌba ꞌꞌbhi -Lagɔ -jeyi ꞌle a ꞌke ꞌꞌyisrɛɛlɩꞌa nʋnʋaꞌa ꞌkpʋ -de, ꞌle a ꞌke ɩ nʋ!

ꞌWlɔmʋkɔmʋ 6:19

A -gblee, -ɛ -ke dɩ ꞌɩn-ɩ kpʋkpaꞌa aꞌba dɩ ꞌgeyiɛꞌɛ dɩ li, ꞌɩnnɛ ꞌmo-o, lɛ ꞌɩn-ɩ zaꞌa ꞌmʋ a, ꞌɩn ꞌybha-oꞌo a ꞌke ɛ ꞌmʋtiꞌwɔn -ka -zɛgɛka. -Bho ꞌɩn -zɩ ɩ -kaa ꞌmʋ a, ꞌɩnnɛ ꞌmo-o, -bɛnyɩ, ꞌꞌnyinynidɩ, -ɩ seꞌa ꞌꞌyrili-nmɔ ɔ, ꞌɩnnɩ kpʋnꞌo aꞌba tinɩɛ ꞌle ꞌgeyiɛ ꞌmʋ, ꞌle -Lagɔ -see amʋ ꞌꞌkpiꞌwɔɔn. ꞌTraamʋ ꞌtɔ ɔ, a ꞌꞌluo aꞌba tinɩɛ ꞌmʋ ꞌle a ꞌke ꞌꞌyisrɛɛlɩ nʋ ꞌle a ꞌke -Lagɔ ꞌtʋ nʋ ꞌle ɔ ꞌke amʋ ꞌꞌkpiꞌwɔɔn!

ꞌWlɔmʋkɔmʋ 8:19

ꞌLe, zɔ -ke ti -Lagɔ ꞌka ꞌɔ nyʋ ꞌjina ꞌꞌkpi po, ꞌle ɔ ꞌka ꞌwa ꞌnynɩ ꞌꞌpiemʋ po a, ɛ-bɛ -nɔɔ ꞌmnɛ, ꞌɩnnɛ ꞌkmʋ-ʋ fuoꞌo wɔn ꞌle ɛ ꞌke -fɩfɛ tiꞌwla.

ꞌWlɔmʋkɔmʋ 9:33

Ɔbɔ ꞌmnɔ, ꞌɔ dɩ *Ezayii -zaꞌa ꞌmʋ see ꞌle -Lagɔꞌɔ ꞌꞌbɔgʋ ꞌli, ɔ ꞌyeꞌa -Lagɔ na: A ꞌye li-ɔ, ꞌle *Siɔn (ꞌma-a Zelizalɛɛmʋ), ꞌle-e ꞌɩn-ɩ poꞌo sʋkpʋklagba glu ꞌle nyʋ ꞌke ɛ dide ʋn ꞌke ɛ ꞌꞌyritiꞌga. Nyɔ -yɔ de ꞌɔ ꞌꞌgwli, ꞌkpɩ -see ɔ ꞌꞌyiti-wa yi -lrɛɛ.

1 Kɔlɛɛtɩkɔmʋ 15:31

A ꞌye li-ɔ, ꞌlotʋꞌa ꞌꞌnynuu-a, zɔꞌꞌo zɔ ꞌɩn-ɩ ꞌꞌtaflɛ-ɛ ꞌmɛmɛɛ. -Ziadɩ moꞌo. -Ka ꞌɩn-ɩ waꞌa ꞌbɛtɛ aꞌba dɩ, -ka abʋ-e -abʋ waꞌa ꞌbɛtɛ ꞌle ꞌɩn -ke a bheteꞌa gbo ꞌle -a -ke -aꞌba -Kɔyi Zezii Kliisɩ ꞌꞌsisriꞌa ꞌꞌyi a, -ka ɛ ꞌꞌduꞌa -ziadɩ, ꞌka-a ɛbɛ ꞌmnɛ ꞌꞌduꞌo -ziadɩ -lrɛɛ.

1 Kɔlɛɛtɩkɔmʋ 6:20

-Ka nyɔ-ɔ deꞌa ꞌꞌyikmupɛlʋꞌa ꞌbhlebhlelɛ, ꞌka-a ꞌɔ ꞌꞌyu Zeziiꞌa ꞌmɛmɛɛ zetieꞌe amʋ ꞌle aꞌba ꞌꞌnyinynidɩ ꞌmʋ, ꞌle, -Lagɔ -bodɩ, ɛ-bɛ ꞌꞌyikmupɛlʋꞌa ꞌbhlebhlelɛꞌɛ -ka a -nɩꞌo. ꞌƐ dɩ ꞌtɔ ɔ, a ꞌꞌnyɩ ɔ aꞌba ꞌꞌbhi -jeyi ꞌle aꞌba nʋnʋdɩ ꞌke ꞌɔ ꞌnynɩ ꞌꞌyiꞌbhɛɛ, a -kaa ꞌꞌbhɩlɛɛɛ ꞌꞌbhlɛcɛ wɔnꞌkpa.

1 Kɔlɛɛtɩkɔmʋ 7:34

ꞌƐ dɩ ꞌɔ -pɔlʋ ꞌgble-ɛꞌɛ ꞌmʋ! -Ka -lue ꞌmnɔ ꞌka-a, ꞌnynaakpʋ-ʋ ꞌꞌtiꞌa nyna -ke -yʋ seꞌa nyɔ ꞌꞌyi -tbhɛꞌɛ nʋnʋdɩ se lɛ -lue ꞌmʋ-nɩ. -Yʋ seꞌa nyimiɛ ꞌbhle a, -aꞌba -Kɔyiꞌa ꞌtʋnʋdɩ ꞌwa -pɔlʋ ꞌwlaꞌa ꞌꞌyiti, ꞌle ʋn ꞌke ꞌɔ nyʋ ꞌꞌdu ꞌꞌfɩa ꞌwee. ꞌLe -yʋ ꞌꞌtiꞌa nyna a, ꞌnɔɔ ꞌkmʋ ꞌmʋꞌa lɩ, ꞌɩnnɩ ꞌwa -pɔlʋ ꞌwlaꞌa ꞌꞌyiti. ꞌLe ꞌya ꞌmʋ ʋn-ʋ ꞌbɔ nɩꞌe ꞌwa nyimiɛꞌɛ ꞌtʋnʋdɩ ti.

2 Kɔlɛɛtɩkɔmʋ 10:8

-Ɛkedɩmaa, ɔ ꞌꞌnyɩ-e ꞌɩnmʋ wɔnkuɛ. Ɔ ꞌꞌnyɩ -ɛ ꞌɩnmʋ ꞌbho amʋ ꞌꞌkpi, ꞌɩn ꞌke amʋ ꞌkpɩ ꞌꞌyi po, ꞌle ꞌkpɩ -kaa amʋ ꞌꞌyiti-wa. -Bho ꞌɩn ꞌꞌdu ꞌkɩ ꞌɛ dɩ, -bho ꞌɩn -ka ꞌkɩ-ɩ ꞌꞌplin tenyɩ -dɩ, ꞌɩn yiboꞌo-o na, dɩn -see ꞌɩnmʋ ꞌlbha yi.

2 Kɔlɛɛtɩkɔmʋ 3:12

Dɩ -a zaꞌa ꞌmʋ, -ka ɩ ꞌꞌduꞌa -ziadɩ, -a ꞌde -ɩ ꞌꞌgwliꞌa dɩ, -aꞌba sieꞌe -aꞌba wlu flʋ ꞌꞌyi.

2 Kɔlɛɛtɩkɔmʋ 4:10

-Ka ʋn -yaꞌa Zezii Kliisɩ ꞌkleyeɛɛ ꞌꞌkpi kplokplokplo ꞌle ʋn ꞌye ꞌɔ ꞌlbha, ɔ ꞌyeꞌa ꞌmɛ, ꞌka-a ʋn-ʋ yaꞌa -amʋ ꞌkleyeɛɛ ꞌꞌkpi ꞌgagwloka, ꞌle, -ka ɔ -sɔꞌɔ glu ꞌle ꞌmɛmʋꞌa ꞌꞌklumʋ, ɔ ꞌyeꞌa ti-nɩ -lrɛɛ, -a ꞌke -kaa ꞌle ꞌɔ tinɩɛlre ꞌli ti-de.

2 Kɔlɛɛtɩkɔmʋ 5:15

Ɔ ꞌmɛ -nɩꞌe ꞌbho-o nyunyu ꞌweeꞌa ꞌbɩ ꞌmʋ, ꞌle, -yʋ -nɩꞌa ti, ʋn -kaa ꞌtɔ ꞌwa ꞌꞌbhiꞌa ꞌgwlʋdɩ tiꞌbɔ, ꞌle, kpli-i ꞌkɔ ɔ ꞌtʋ nʋ, ʋn ꞌke ɩ tiꞌbɔ ꞌle ʋn ꞌke ɩ nʋ. -Ɛkedɩmaa, ꞌwa dɩ ɔ ꞌmɛꞌo ꞌle -Lagɔ ꞌye ɔ glu -za ꞌle ꞌmɛmʋꞌa ꞌꞌklumʋ, ꞌle ɔ ꞌye ti-nɩ -lrɛɛ.

2 Kɔlɛɛtɩkɔmʋ 7:14

ꞌƖn ꞌkɔ ɔ ꞌle amʋ gbo lbho, ꞌɩn ꞌꞌplin-oꞌo ꞌɩn ꞌye amʋ ꞌmʋ po, ꞌle a -see ꞌɩnmʋ dɩn ꞌꞌyi ꞌlbhaa. Dɩ -a zaꞌa amʋ -bodɩ ꞌmʋ, -ka ɩ ꞌꞌduꞌa -ziadɩ, aꞌba ꞌꞌkpidɩ ꞌɩn -zaꞌa Tiitɩ -bodɩ ꞌmʋ, ꞌka-a ɩ -yiꞌe -ziadɩ ꞌmʋ -lrɛɛ.

2 Kɔlɛɛtɩkɔmʋ 7:4

ꞌƖn deꞌe ꞌtɔ-ɔ amʋ ꞌꞌgwli tenyɩ, ꞌle aꞌba kplizɩgɩ ꞌmnɩꞌa ꞌꞌlru ꞌꞌyi, ꞌɩn-ɩ waꞌa ꞌbɛtɛ aꞌba dɩ. -A ꞌye-e ꞌkle. Ɛ -nɩꞌa -kaa ꞌmʋ a, ꞌkpɩꞌa -wa ꞌɩnmʋ ꞌꞌyiti aꞌba dɩ ꞌle ꞌbʋbʋa-a ꞌlbhaꞌa ꞌɩnmʋ tenyɩ.

Filiipʋkɔmʋ 1:14

ꞌBho ꞌɛ lemʋ, ꞌlotʋꞌa ꞌꞌnynuuꞌa -dadudu -ke -a -nɩꞌa -aꞌba -Kɔyi Zezii ꞌmʋ, ꞌan -jiepadɩ -see ʋ ꞌkpɩ ꞌꞌyiti-wa, ʋn -cɛꞌɛ-ɛ ꞌꞌyrili, -sɩanyɩꞌa ꞌlbhʋ ʋ ꞌtɔ ꞌle ʋn-ʋ kpaꞌa -Lagɔꞌɔ ꞌꞌdɩzɩgɩ -pɔlʋꞌa klɛ ti.

Filiipʋkɔmʋ 2:17

A -gblee, -ka a deꞌa Zezii Kliisɩ ꞌꞌgwli, ꞌle a-a ꞌꞌduꞌa ꞌbho -Lagɔꞌɔ wlu ꞌle ɛ-ɛ bhlaꞌa aꞌba sɩasɩaa ꞌꞌkpi a, ɛ kɔɔꞌɔ-ɔ -ka nyɔ-ɔ zaꞌa *ꞌsraga ɔ -bodɩ. -Ka nyɔ-ɔ ꞌwlaꞌa nmɔ ꞌbho ꞌsragamʋzanmiꞌa ꞌꞌkpi ti -tanyɩke-ɔ ꞌle ɔ-ɔ zɛ ꞌɛ ꞌsraga ꞌmʋ ꞌle ɔ-ɔ nynia ꞌnɛ -kaa ꞌꞌyi, ꞌle a ꞌke Zezii ꞌꞌgwlideꞌa dɩ ꞌɩn sɩaꞌo tenyɩ, -bho ꞌɩn ꞌmɛ ꞌtɔ ꞌɛ -kaabolbhʋtuꞌa dɩ, ꞌka-a ɛ ꞌke ꞌkɩ ꞌmʋ-nɩ. ꞌƐ dɩ, -bho ɛ -nɩ -kaa a, ꞌbʋbʋa ꞌke ꞌɩnmʋ ꞌlbha ꞌle aꞌba ꞌweeꞌa dɩ ꞌɩn ꞌke amʋ ꞌꞌkpiꞌkpa ꞌle ꞌɩn -ke a ꞌke ꞌbʋbʋa -dalue -li -nɩ.

Kolɔsʋkɔmʋ 1:24

ꞌTraamʋ ꞌtɔ ɔ, ꞌan ꞌlotʋꞌa ꞌꞌnynuu-a, ɛ-bɛ lbhʋ ꞌɩn-ɩ nʋꞌa aꞌba -zɛgɛꞌɛ dɩ, ꞌɛ kamʋ nyʋ-ʋ yaꞌa ꞌɩnmʋ ꞌkleyeɛɛ ꞌꞌkpi, ꞌle, ɛ-bɛ ꞌan ꞌkleyeɛɛ ꞌmnɛ, ɛ-ɛ ꞌlbhaaꞌa ꞌɩnmʋ ꞌbʋbʋa ꞌꞌyi. -Ɛkedɩmaa, -ka nyɔꞌɔ ꞌꞌlru ꞌbhleꞌa ꞌɔ ꞌgblʋ kwa, *Zezii *Kliisɩ ꞌma-a -kaa ꞌɔ -glɩgbaꞌa ꞌꞌlrugayʋɛ, ɔ ꞌye-e ꞌkle -bɛnyɩ, ꞌle -a ꞌye ꞌpʋn ꞌbho -Lagɔꞌɔ ꞌꞌyigbeyi. -Ka -lue ꞌmnɔ ɔ, ꞌka-a ꞌmna-aꞌa ku-u ꞌnɩnɛꞌo -lrɛɛ ꞌle ꞌɔ lbhʋ ꞌke ꞌꞌyrigbɔ mu. Ɛ-bɛ ꞌan ꞌkleyeɛɛ ꞌmnɛ, ꞌɩnnɛ -nyniaꞌa ꞌɔ nɛ ꞌꞌyi.

1 Tesalonikɩkɔmʋ 5:23

-Lagɔ -ke ꞌꞌbhuo-o ꞌꞌnyɩꞌa nyʋ -pɔlʋꞌa lipɩpɛɛ ɛ, ɔ nʋ ɛ ꞌle ɔ ꞌke amʋ ꞌꞌyisrɛɛmʋ po ꞌbho ꞌɔ ꞌꞌyigbeyi ꞌle ɔ ꞌke aꞌba nyɔꞌꞌo nyɔ -kɔ ꞌꞌfɩa ꞌwee ꞌle aꞌba tɩnɩɛꞌɛ ꞌwee ꞌli, ꞌle a ꞌke pepepe -nɩ, ꞌle, -bho -aꞌba -Kɔyi Zezii Kliisɩꞌa leyinɔɔ ꞌke nyni a, a -kaa ꞌꞌnyinynidɩ liꞌbhle!

1 ꞌPiɛlɩ 4:16

ꞌLe, -bho ɛ ꞌꞌdu, -bho ɔ -ka ꞌkle-e ꞌye *Zezii *Kliisɩꞌa nyɔꞌɔ kamʋ, ꞌɛ dɩnꞌa ꞌlbhɔ ɔ -le! Ɔ ꞌbhɛɛ -Lagɔꞌɔ ꞌnynɩ ꞌꞌyi, -ɛkedɩmaa, ꞌɔ nyɔ ɔ ꞌꞌduꞌo.

1 ꞌZaan 2:28

ꞌAn dɩkmayreetɩ-a, ꞌɩn-ɩ ꞌmu-o ꞌbho le -lrɛɛ, a -ke Zezii ꞌꞌsisri ꞌꞌyi, ꞌle, -bho ɔ yi le a, ꞌɔ -sɩanyɩ -ke ꞌɔ dɩn -kaa amʋ ꞌlbha!