ಫಿಲಿಪ್ಪಿ 2:12 - ದೇವ್ನಿ ಖ್ಹಾಚಿ ವಚನ್

¹² ಅಮ್ ರ‍್ಹವಾಪರ್ ಮಾರ ಪ್ಯಾರ್‌ನ ದೋಸ್ತಿವೊ, ತುಮೆ ಮಾರಿ ವಾತೇನ ಕೆದೇಬಿ ಪಾಡಿಚಾ಼ಲ್ಯತೆ ತಿಮ್ ಹಮ್ಕೇಬಿ ಪಾಡಿಚಾ಼ಲೊ. ಮೆ ತುಮಾರಮ ರ‍್ಹವಾನಿವಖ್ಹ್‌ತೆಸ್ ಖಲಿಕಾಹೆತೆ, ಮೇ ನಾ ರ‍್ಹವಾಮಾಬಿ ಘಣು ಜಾ಼ಖ್ಹತ್ ದಿಲ್ಮ ಡರ್‌ಥಿ ಕಾಪವಾಳ ಹುಯಿನ್ ತುಮಾರಿ, ತುಮಾರಿ ರಕ್ಷಣೆನ ಲೀಲೆವೊ.

ಫಿಲಿಪ್ಪಿ 2:12 Cross References

ಮತ್ತಾಯ 11:12

ಬ್ಯಾಪ್ತಿಸ್ಮದ್ಯವಾಳೊ ಯೋಹಾನ್ನ ಹಗಾಮ್‌ಥು ಧರೀನ್ ಹಂಕೆತೋಡಿ ಸೊರ್ಗ ರಾಜ್ಯನಿ ಘಣು ಜು಼ಲಮ್‌ನ ಝೇಲ್‌ನು ಪಡ್ಯು, ಅಜು಼ ಜು಼ಲಮ್‌ ಕರಾವಾಳು ಅದ್ಮಿ ಇನ ಛಿನೈಲೇಣು ಕರಿ ಕರಾಸ್.

ಮತ್ತಾಯ 11:29

ಮೇ ಹಂಕಾರ್‌ಭರ‍್ಯೊ ಕಾಹೆ ಅಜು಼ ಕೌಳೊ ದಿಲ್‌ವಾಳೊ ಹುಯಿರ‍್ಹೋತೆ ಇನಖ್ಹಾಜೆ, ಮಾರು ನೊಗಾನ ತುಮಾರಪರ್ ಪಾಡಿಲೀನ್ ಮಾರೇಥಿ ಶಿಕಿಲೇವೊ. ತದೆ ತುಮಾರು ಆತ್ಮಾನ ಅರಾಮ್‌ ಮಳ್‌ಶೆ.

ಅಪೊಸ್ತಲರ್‌ನು ಕಾಮ್‌ಖ್ಹಾರು 16:29

ಖ್ಹಾರ್ಕೊಟ್‍ನೊ ಅಧಿಕಾರಿನೆ ಚಿಮ್ನಿನ ಮಂಗಾವ್ತೊಹುಯಿನ್ ಒಗ್ಗಿಸ್‌ಮ ಮಹಿ ಜೈ಼ನ್ ಡರ್‌ಥಿ ಕಾಪ್ತೊಹುಯಿನ್ ಪೌಲ ಅಜು಼ ಸೀಲನ ಗೋಡಾಪರ್ ಆಡ್‍ಪಡ್ಯೊ.

ಅಪೊಸ್ತಲರ್‌ನು ಕಾಮ್‌ಖ್ಹಾರು 9:6

ಕತೋಬಿ ತೂ ಉಠೀನ್ ಖ್ಹಯೇರ‍್ನ ಮಹಿ ಜಾ಼, ತೂ ಕರ್ನುತೆ ಅಖ್ಖು ಹಿಜ಼್ಜ ತುಮುನ ಮಾಲುಮ್‌ ಪಡ್‌ಶೆ” ಕರಿ ಬೋಲ್ಯೊ.

ಪೌಲನೆ ರೋಮಾಪುರವಾಳನ ಲೀಖ್ಯೋತೆ ಚಿಟ್ಟಿ 2:7

ಥೋಡುಜ಼ಣು ಅಛ್ಛಾ಼ನ ಕರ್ತುಹುಯಿನ್. ಮಹಿಮೆ, ಇಜ಼್ಜತ್‌, ಹಮೇಶನಜಾನ್ನ ಜಿವ್ಣನ ಢೂಂಡಸ್. ಇವ್ಣುನ ದೇವ್ ಹರ್‌ಹಮೇಶಾನಿ ಜಿ಼ಂದ್‌ಗಿ ದಿಶೆ.

1 ಕೊರಿಂಥ 15:58

ಇನಾಖ್ಹಾಜೆ ಮಾರ ಪ್ಯಾರ್‌ನ ಭೇನೆ ಭೈಯೇವೊ, ಘಟ್‍ಥಿ ಭೀರ‍್ಹೆವೊ. ಕೆಹೂಬಿ ತುಮುನ ಹಲಾವದೆ ನಕೊ. ಪ್ರಭುಮ ತುಮಾರೊ ವಾಖ್ಯೊ ಬಿಣ್‌ಫಾಯಿದೊ ಉಶೆಕೊಯ್ನಿ ಕರಿ ಖ್ಹಮ್‌ಜಿನ್‌, ಪ್ರಭುನ ಕಾಮ್ನಖ್ಹಾಜೆ ಕದೇಬಿ ತುಮಾರು ತುಮೆ ಪೂರ ಅರ್ಪಣ್‍ ಕರಿಲೆವೊ.

1 ಕೊರಿಂಥ 2:3

ಆ ನಾಹುಯಿನ್ ಮೇ ತುಮಾರಕನ ಆಯೋತೆ ತದೆ, ಲಾಚ಼ರ್‌ಥೊ; ಅಜು಼ ಡರ್‌ಥಿ ಕಾಪವಾಳೊ ಹುಯಿರೋಥೊ.

1 ಕೊರಿಂಥ 4:14

ತುಮೂನ ಖ್ಹರಮ್‍ ಕಾಡನಖ್ಹಾಜೆ ಲೀಖ್ಯೊಕೊಯ್ನಿ. ಮಾರ ಪ್ಯಾರ್‌ನ ಲಡ್ಕಾನಿಘೊಣಿ ಸೋಚಿನ್ ತುಮೂನ ಅಕ್ಕಲ್ ಬೋಲಾನ ಖ್ಹಾಜೇಸ್ ಆ ವಾತೆಖ್ಹಾರಿ ಲೀಖಿರಾಖ್ಯೊಸ್.

2 ಕೊರಿಂಥ 7:15

ತುಮೆ ದಿಲ್ಮ ಡರಿನ್ ಕಾಪವಾಳ ಹುಯಿನ್ ಇನಿ ಜೋ಼ಡ್ಮ ಮಳಿಗಾತೆ ಇನಾಮ ತುಮಾರಿ ವಿಧೇಯತೆ ದೆಖಾಯು, ಯೊ ಇನ ಖ್ಹಯಾಲ್ ಕರಿಲ್ಯಾವಾನಿ ವಖ್ಹ್‌ತೆ ತುಮಾರಪರ್ ತೀತನಿ ಪ್ಯಾರ್ ಜಾ಼ಖ್ಹತ್ ಹುಯಿರ‍್ಹೀಸ್.

ಎಫೆಸ 6:5

ಆಳ್‍ಖ್ಹಾರ, ಆ ಜಗತ್ನ ಯಜಮಾನ್ ಹುಯಿರ‍್ಹವವಾಳನ ಕ್ರಿಸ್ತನಿ ದಾಬುಕ್ಮ ಕಿಮ್ ರ‍್ಹೇಸ್ಕಿ ಇಮ್ಮಸ್ ದಿಲ್ಮ ಡರ್‌ಥಿ ಕಾಪವಾಳಹುಯಿರ‍್ಹೀನ್ ಛು಼ಟ ದಿಲ್‌ವಾಳಹುಯಿನ್ ದಾಬುಕ್ಮ ರ‍್ಹವೊ.

ಫಿಲಿಪ್ಪಿ 1:27

ಕಿಮ್‌ಬಿ ಕ್ರಿಸ್ತನಿ ಸುವಾರ್ತೆನ ಲ್ಹಾಯೇಕ್‌ಹುಯಿನ್ ಚಾ಼ಲಿಲೆವೊ. ತದೆ ಮೆ ಐನ್ ತುಮುನ ದೇಖ್ಯೊತೋಬಿ ಚಾ಼ಲಸ್, ದೂರ್ ರ‍್ಹೀನ್ ತುಮಾರಿ ಖಬರ್‌ನ ಖ್ಹಮ್‌ಜೊ ಚಾ಼ಲಸ್, ತುಮೆ ತುಮಾರ ವಿರೋದಿನ ಖಿವಿ ವಿಚಾರ್‌ಮಾಬಿ ನಾಡರ‍್ನುತೆ ಏಕ್‌ ದಿಲ್‌ಥಿ ಘಟ್‍ಥಿ ಭೀರಿನ್ ಸುವಾರ್ತೆಮ ರಾಖ್ಯತೆ ವಿಶ್ವಾಸ್ನಖ್ಹಾಜೆ ಏಕ್‌ ಮನ್‌ಥಿ ಲಡವಾಳ ಹುಯಿರ‍್ಹಾಸ್‍ಕರಿ ಮೆ ಲ್ಹಾವ್ಸ್.

ಫಿಲಿಪ್ಪಿ 1:29

ಕ್ರಿಸ್ತನವಾಳಾನ ಹಾತ್‌ ಫೈಲೈನ್ ದ್ಯವಾಳ ಹುಯಿರೇವೊ. ಕ್ರಿಸ್ತಪರ್ ವಿಶ್ವಾಸ್‌ರಾಖಾನು ಖಲಿ ಕಾಹೆ ಇನಖ್ಹಾಜೆ ವದೇಖ್ಹ್‌ಪಡಾನುಬಿ ಅಛ್ಛು಼ ವರ ಮಳಿರ‍್ಹೂಸ್‌.

ಫಿಲಿಪ್ಪಿ 1:5

ಶನಕತೊ ತುಮೆ ಪಹಿಲೆಥ ಹಮ್ಕೆಲಗುಬಿ ಸುವಾರ್ತೆನು ಬೋಧನೆಮ ಭಾಗ್‌ರ‍್ಹವಾಳ ಹುಯಿರ‍್ಹಾಸ್.

ಫಿಲಿಪ್ಪಿ 1:6

ಆ ಅಛ಼್ಛುಕಾಮ್ನ ತುಮಾರಮ ಶುರುಕರ‍್ಯೊತೆ ದೇವ್ನೆ ಇನ ಚ಼ಲಾವ್ತೊಹುಯಿನ್ ಯೇಸು ಕ್ರಿಸ್ತ ಆವಾನಮಹಿ ಪೂರ ಕರ್ಶೆಕರಿ ಮನ ಭರೋಖ್ಹೊ ಛಾ಼.

ಫಿಲಿಪ್ಪಿ 2:19

ಕತೋಬಿ ಪ್ರಭು ಯೇಸುನಿ ಮರ್ಜಿ ಹುಯೂತೊ ಮೆ ತಿಮೊಥೆನ ಜ಼ಲ್ದೀಥಿ ತುಮಾರಕನ ಮೋಕಲ್ನುಕರಿ ಭರೋಖ್ಹೊ ಛಾ಼. ಇನೇಥಿ ತುಮಾರಿ ಬಾರೇನಿ ಸಮಾಚಾರ‍್ನ ಖ್ಹಮ್‌ಜಿನ್‌ ಮೆ ಭಾಲ್‌ ಹುಯಿಶ್.

ಫಿಲಿಪ್ಪಿ 4:1

ಅಮ್‌ರ‍್ಹವಾಪರ್, ಮಾರ ಪ್ಯಾರ್‌ನ ಭೇನೆ ಭೈಯೇವೊ ಅಜು಼ ಸಾಥಿವೊ, ಮನ ಶಂತೋಖ್ಹ್‌ಬಿ ಕಿರೀಟ್‌ಬಿ ಹುಯಿರ‍್ಹವವಾಳವೊ, ಮೇ ಬೋಲಾನಿತರ ಪ್ರಭುಮ ಘಟ್‍ಥಿ ಭೀರ‍್ಹೆವೊ.

ಫಿಲಿಪ್ಪಿ 4:15

ಅಜು಼ ಫಿಲಿಪ್ಪಿವಾಳೊ, ಮೇ ಶುರುವಾತ್ನ ತುಮಾರಮ ಸುವಾರ್ತೆನ ಪ್ರಚಾರ್ ಕರೀನ್, ಮೆಕೆದೋನ್ಯನ ಗಯೋತೆ ತದೆ ದ್ಯವಾನು, ಲ್ಯಾವಾನಿ ಬಾರೇಮ ತುಮುನ ಮ್ಹೇಲ್ಯೂತೊ ಬಿಜು಼ ಖಿವು ಸಬೇಬಿ ಮನ ಮದತ್ ಕೊದಿದೂನಿಕರಿ ತುಮುನಾಬಿ ಮಾಲುಮ್ ಛಾ಼.

1 ಥೆಸ 1:3

ಅಜು಼ ವಿಶ್ವಾಸ್‍ಥಿ ತುಮೆ ಕರ‍್ಯಾತೆ ಕಠಣ್ ಕಾಮ್ನಾಬಿ, ಪ್ಯಾರ್‌ಥಿ ತುಮೆ ಕರ‍್ಯಾತೆ ಮ್ಹಿನತ್‌ನಾಬಿ, ಅಪ್ಣೊ ಪ್ರಭು ಯೇಸು ಕ್ರಿಸ್ತಪರ್‌ನಿ ತುಮಾರಿ ಭರೋಖ್ಹಾನಖ್ಹಾಜೆ ಅಪ್ಣೊ ಬಾ ಹುಯಿರ‍್ಹೋತೆ ದೇವ್ನ ಖ್ಹಾಮ್ಣೆ ಹಮೆ ಹಮೇಶ ಯಾದ್ ಕರಿಯೇಸ್.

2 ತಿಮೊ 2:10

ಅನಖ್ಹಾಜೆಸ್ ದೇವ್ನೆ ಚೂ಼ಣಿರಾಖ್ಯೊತೆ ಅದ್ಮಿನಾಬಿ ಮಾರ ಜೋ಼ಡೆ ಇವ್ಣಖ್ಹಾಜೇಸ್ ಮೇ ಖ್ಹಾರುಸ್ ಖ್ಹಮಾಳಿಲೆವ್‌ಕರೂಸ್. ಕ್ರಿಸ್ತ ಯೇಸುಮ ಛಾ಼ತೆ ರಕ್ಷಣೆನ, ಇನಿ ಹಮೇಶಾನಿ ಮಹಿಮೆನ ಜೋ಼ಡೆ ಲೀಲೆಣು.

ಇಬ್ರಿ 12:1

ಆ ಕಾರಣ್‍ಥಿ ಅತ್ರು ಸಾಕ್ಷಿಯೆವ್ನು ಮೋಟು ಝೂ಼ಂಡ್‌ ವಾದ್‌ಳಾನಿ ಘೋಣಿ ಅಪ್ಣ ಅಶ್‌ಪಿಶ್ ಕೋಂಡಿರಾಖಪರ್ ಅಪ್ಣುನ ಅಟ್‌ಖಟ್ ಕರಾಸ್ತೆ ಅಖ್ಖಾಸ್ ಭೋಜ಼್‌ನಾಬಿ, ಶುಲ್ಬಾಥಿ ವಿಲ್‌ಟೈಜಾ಼ವಾನು ಪಾಪ್ ಜಿನು ಕಾಡಿನಾಖಿ, ವಿಶ್ವಾಸ್ ಪೈದಕರಾವಳೊಬಿ, ಇನ ಪೂರ ಕರಾವಳೊಬಿ ಹುಯಿರ‍್ಹೋತೆ ಯೇಸುಪರ್ ನಜ಼ರ್ ರಾಖಿನ್ ಅಪ್ಣುನ ನೇಮಕ್ ಹುಯಿರ‍್ಹುತೆ ದವಡ್ನ ಖ್ಹಮಾಳಿ ಮಿಲೈಯೇ಼.

ಇಬ್ರಿ 4:1

ಅಮ್‌ರ‍್ಹವಾಪರ್, ದೇವ್ನಿ ಆರಾಮ್ಮ ಮಳೆಜಾ಼ಯ್ ಕರಿ ಛಾ಼ತೆ ವಾಗ್ದಾನ್ ಬಿಜೂ಼ಬಿ ಇನಖ್ಹಾಜೆ ತುಮಾರಮ ಕೋಣ್‌ಬಿ ಇನಾಮ ಛು಼ಕಿನಾಜಾ಼ವ್ಣುತೆ ಅಪ್ಣೆ ಡರ್‌ ಭಕ್ತಿಥಿ ರ‍್ಹಿಯೆ.

ಇಬ್ರಿ 4:11

ಇನಖ್ಹಾಜೆ ಅಪ್ಣೆ ಆ ಅರಾಮ್ ಲ್ಯವಾನಟೇಕೆ ಅಪ್ಣೆ ಕೋಶಿಶ್ ಕರಿಯೆ. ಅಪ್ಣಾಮ ಏಕ್‍ಜ಼ಣತೋಬಿ ಇವ್ಣಿನಿಘೋಣಿ ಅವಿಧೇಯ ಹುಯಿನ್ ಮಟಿನಾಜಾ಼ವ್ಣುತೆ ಇಮ್‌ ರ‍್ಹಿಯೆ.

ಇಬ್ರಿ 5:9

ಆ ನಾಹುಯಿನ್ ಇನೆ ಭರ್‌ಪೂರ್‌ ಕರೀನ್, ಇನ ವಿಧೇಯಹುವಾಳ ಅಖ್ಖನಾಬಿ ಹಮೇಶ ರಕ್ಷಣೆನಖ್ಹಾಜೆ ಬಣ್ಯೊ.

1 ಪೇತ್ರ 2:11

ಪ್ಯಾರ್‌ನ ದೋಸ್ತಿವೊ ಆ ಜಗತ್ಮ ಪರದೇಖ್ಹ್‌ವಾಳಬಿ ತಮಾಖ್ಹೊ ದೆಖಾವಾಳುಬಿ ಹುಯಿರಾತೆ ತುಮೆ ತುಮಾರ ಆತ್ಮಾನ ವಿರೋದ್ ಹುಯಿನ್ ಜಂಗ್ ಭೀಡಾತೆ ಶರೀರ್‌ನು ನಿಕಳ್ಯ ಜಾನ್‌ಥಿ ದೂರ್ ರ‍್ಹೇವ್ಣುಕರಿ ಮೇ ತುಮುನ ಗಿಂಗೈಲೆವುಸ್.

2 ಪೇತ್ರ 3:18

ಅಪ್ಣೊ ಪ್ರಭುಬಿ ರಕ್ಷಕಬಿ ಹುಯಿರ‍್ಹೋತೆ ಯೇಸು ಕ್ರಿಸ್ತನಿ ಬಾರೇಮಾನು ವಾರ್‌ಖ್ಹಾಮಾಬಿ ಗ್ಯಾನ್‌ಮಾಬಿ ತುಮೆ ಭಡ್ತಾಜಾ಼ವೊ, ಇನ ಹಮ್ಕೇಬಿ ಜ಼ಗ್‌ಜ಼ಮಾನಲಗೂಬಿ ಮಹಿಮೆ ಹುವಾದೆ! ಆಮೆನ್.