Filipifɔ 3:8 - Bulu Ntam Pɔpwɛ mʋ́a Israel Ɩlʋ

⁸ Mʋ́á ɩdʋn mʋ́ kʋraa gyi, nɩ nɔpʋkɩ alɩá nɔpʋbɩ mɩ Wie Kristo Yesu a, nawun ánɩ́ ɩbʋ labi dʋn togyitɔ. Nawun ánɩ́ nahʋlɩ ntobi anfɩ ntɛkɩá ɩbʋ mɩ labi anfɩ fɛ́ɛ́, alɩá Kristo ɔbɛ́da mɩ ɩbɩ sʋ.

Filipifɔ 3:8 Cross References

Israelfɔ Ɩlʋ 126:6

Ɔha ánɩ́ ɔlɔpʋ isu yodu atɔ a, ɔbɔ́pʋ ansigyi-ɩlʋ sʋra mʋ atɔ ba woyitɔ kokooko.

Israelfɔ Ɩlʋ 73:25

Mma ɔhaa ɔsʋsʋ ɩnʋ dʋn fʋ. Mmehian tɔtɔ ɔsʋlʋ anfɩsʋ tsɩa fʋtɔ.

Luka 1:43

Iye! Mɩ Wie mʋ yin onuto laba mɩ wa a? Ntogyi sʋ Bulu lawa mɩ numnyam anfɩ odu?

Luka 11:20

Tamɛ ɩnɩá Bulu tumi ndɛpʋgya ɔŋɛ lalahɛ sʋ a, mlɩbɩá Bulu iwiegyi amʋ laba mlɩ wa dodo.

Yohane 14:20

Nɩ ɛkɛ amʋ ɩfʋn a, mlɛ́bɩá mbʋ mɩ Sɩ amʋtɔ. Mlɩ ɛ mlɩbʋ mɩtɔ, fɛ alɩ amʋʋ mɩ ɛ mbʋ mlɩtɔ amʋ.

Yohane 14:7

Nɩ mlɩyin mɩ lɛlɛ a, tɛkɩ mlɩlabɩ mɩ Sɩ amʋ ɛ. Tamɛ sei mʋ́ mlɩlawun mʋ, mlɩlabɩ mʋ ɛ.”

Yohane 16:3

Bɔ́pʋ ɩnɩ gyi mlɩ, tsufɛ bʋmɔkʋbɩ mɩ ntɛ mɩ Sɩ amʋ.

Yohane 17:3

Nkpa ánɩ́ ɩtamata amʋ gyi, bʋbɩ fʋ Bulu Ɔnɔkwalɩpʋ ɔkʋkʋnʋ ɔkʋlɛ pɛ anfɩ, abʋbɩ mɩ Yesu Kristo anfɩ fɔpʋsɩsɩ ɔyɩtɔ anfɩ.

Yohane 17:8

Tsufɛ nabla amʋ́ asʋn ánɩ́ fɔpʋha mɩ fɛ́ɛ́, banu. Babɩá lɛlɛ fʋ wa notsu, bahogyi ánɩ́ fʋlɔwa mɩ.

Yohane 20:13

Bɛfɩtɛ mʋ bɛɛ, “Amʋ́ yin, nkalɩ igyi sʋ fʋdesu?” Ɔlɛlɛ mʋ́ ɔnɔ ɔbɛɛ, “Balɛ mɩ Wie natɩ. Mmeyin ɔtɩnɛá bapʋ mʋ yɔtswɩ!”

Yohane 20:28

Toma lɛlɛ mʋ́ ɔnɔ ɔbɛɛ, “Mɩ Wie pʋ́ mɩ Bulu!”

Gyumagyihɛ 20:24

Tamɛ mmotsu mʋ́ asʋnbogya. Mboun alɩá nɔ́mɔ agyʋma amʋʋ anɩ Wie Yesu lɛha mɩ amʋ ɔnɔ. Agyʋma amʋ gyi, nɛ́bla aha Bulu awɩtɔlɛ asʋn wanklaan amʋ.

Romafɔ 8:18

Nɩ nɛkɩ numnyam ánɩ́ ɩda gyo anɩ, Bulu ɔbɛ́lɛ suna anɩ a, ipian anfɩ anɩdewun brɛ anfɩtɔ mɔfʋn mʋ́ ɔtɩnɛtɩnɛ.

Romafɔ 8:39

Togyitɔá ɩbʋ ɔsʋ mʋ́a asɩ ntɛ ɔsʋlʋ ayasɩ kʋkʋʋkʋ mɛ́ɛtalɩ ka ɔdwɛ amʋʋ Bulu ladwɛ anɩ tsʋn anɩ Wie Kristo Yesusʋ amʋtɔ ɛkɛkɛɛkɛ.

1 Korintofɔ 2:2

Tsufɛ brɛá mbʋ mlɩ wa a, nɔbwɛ agywɩɩn ánɩ́ nɔ́tɔɩ tsu Yesu Kristo pʋ́ mʋ oyikpalihɛsʋ lowu nkʋlɛ ɩwɩ.

1 Korintofɔ 9:10

Megyi anɩ sʋ ɔdɛ asʋn anfɩ blɩ? Anɩ sʋ ɔdɛ mʋ́ blɩ a. Bɔwanlɩn wa Bulu asʋn amʋtɔ bɛɛ, “Ɩflɛ ɔwɔpʋ mʋa atɔ ɔkpɔtɩpʋ fɛ́ɛ́ bʋgyo tɔá bénya tsu agyʋma amʋʋ bayɔ amʋtɔ.”

2 Korintofɔ 4:4

Ɔbʋnsam gyi ɔyɩ lalahɛ anfɩsʋ ogyipʋ. Mʋlapʋ atɔ tin aha anfɩ bʋtamahɔ Bulu gyi anfɩ ansibi. Mʋ́ sʋ bʋmɛdɛ asʋn wanklaan amʋʋ igyi wankɩ amʋ asɩ nu nɩ. Wankɩ amʋ gyi Kristo. Mʋlɛhɩɛ lɩan Bulu numnyam nɩ.

2 Korintofɔ 4:6

Tsufɛ Bulu amʋʋ ɔlɛblɩ ɔbɛɛ, “Wankɩ ɩdalɩ tsu okluntɔ!” amʋ kɛn laha mʋ wankɩ amʋ ɩdɛwankɩ anɩ klʋntɔ. Ɩlaha anɩlabɩ ánɩ́ mʋ numnyam amʋ ɩdɛwankɩ Yesu Kristo ansɩtɔ.

Galatiafɔ 1:16

Ɔlɛlɛ mʋ Bi amʋ suna mɩ, mɛnɩ nɛ́da mʋ ɩwɩ asʋn wanklaan ɔkan aha ánɩ́ bʋmegyi Yudafɔtɔ. Mmɔyɔ ɔhaa wa mbɛɛ, osuna mɩ asʋn alɩ brɛ amʋtɔ.

Efesofɔ 4:13

mɛnɩ anɩ fɛ́ɛ́ abɔ́bwɛ kʋlɛ hogyitɔ, bɩ Bulu mʋ Bi amʋ. Fówun abɛ́dan, fʋn ɔkpagyiɔkpasʋ fɛ Kristo.

Filipifɔ 1:1

Mɩ Paulo pʋ́ anɩ pio Timoteoá anɩgyi Kristo Yesu asumpʋ dɛ ɔwʋlʋ anfɩ wanlɩn sɩsɩ mlɩ Bulu aha ánɩ́ mlɩbʋ Filipi wulutɔ, mlɩa Yesu Kristo mlɩlabwɛ kʋlɛ. Mlɩa mlɩ ɔpasua ahandɛ pʋ́ amʋ́ abʋapʋ fɛ́ɛ́ anɩdɛ mʋ́ wanlɩn sɩsɩ.

Filipifɔ 3:10

Mɩ agywɩɩn gyi, ndekleá nɛ́bɩ Kristo pʋ́ tumi amʋʋ Bulu lɔpʋkʋsʋa mʋ tsu afulitɔ amʋ tsɩa. Ndekleá nówun ipian fɛ alɩá Kristo lowun ipian wu,

Filipifɔ 3:12

Mmɛdɛblɩ mbɛɛ, mɩ ɩbɩ lada ntobi anfɩ fɛ́ɛ́ ntɛ Bulu labwɛ mɩ nafʋn. Ntra ndɛ nsi wa alɩá ɩbɔ́bwɛ mɩ ɩbɩ bɛ́da tɔ amʋ sʋ amʋʋ Kristo Yesu ɩbɩ lada mɩ amʋ.

Filipifɔ 3:7

Tamɛ ntobi anfɩ brɛ amʋ ntɛkɩá ɩbʋ mɩ labi anfɩ fɛ́ɛ́ a, Kristo sʋ ndɛ ɩtra megyi mɩ tɔtɔ.

2 Timoteo 4:6

Mɩ mʋ́ a, brɛ lafʋn ánɩ́ bɔ́pʋ mɩ obugya wʋlɩ asɩ fɛ nta ha Bulu fɛ afɔdɩɛ-abɔtɔ. Mɩ lowu lafʋn.

Hebrifɔ 3:14

Tsufɛ nɩ akɩta anɩ hogyitɔ kinkiinkin, fɛ brɛ amʋʋ anɩlɔtsɔ hogyi amʋ yɔfʋn mʋ́ ɔnɔmɔ a, anɩa Kristonyɔ abɛ́kan, bwɛ toku kʋlɛ.

1 Petro 2:7

Ibwi anfɩ hɩɛ ɩbʋ labi ha mlɩ aha ánɩ́ mlɔ́hɔ Kristo gyi. Tamɛ ha aha ánɩ́ bʋmɔ́ɔhɔ mʋ gyi mʋ́ a, Bulu asʋn amʋ ɩlɛblɩ ɔbɛɛ, “Ibwi anfɩ obu ayipʋ bekina nɩ. Tamɛ mʋ́lebemli ibwiá ɩhɩɛ bʋ labi dʋn mʋ́ fɛ́ɛ́ nɩ.”

2 Petro 1:2

Bulu ɔhɩɛ gyi mlɩ bʋalɛ, ɔha mlɩ iwilwii, tsufɛ mlɩlabɩ mʋa anɩ Wie Yesu Kristo tsɩa.

2 Petro 1:3

Ɩnɩá anɩlabɩ Yesu wanklaan sʋ a, Bulu laha anɩ togyitɔá abɔ́pʋtsia nkpa ánɩ́ itegyi mʋ ansɩ. Ɔlɛtɩ anɩ mʋ onuto tumitɔ ɔbɛɛ, abénya mʋ numnyam pʋ́ mʋ yilebwɛ.

2 Petro 1:8

Nɩ ɩnɩ aná dɛdan mlɩtɔ a, ibósuna ánɩ́ mlɩlabɩ anɩ Wie Yesu Kristo. Mʋ bɩ amʋ desuna ánɩ́ mlɩlawa labi, swie abi nɩ.

2 Petro 3:18

Mboun mlɩyɔ mʋ́sʋ, mɛnɩ anɩ Wie pʋ́ anɩ Ɔlɛpʋ Yesu Kristo awɩtɔlɛ pʋ́ mʋ bɩ bómoni mlɩtɔ. Numnyam ɩbwɛ mʋ klɛ tsu sei pʋya brɛ fɛ́ɛ́tɔ! Amen.

1 Yohane 1:3

Asʋn ánɩ́ anɩlonu pʋ́ tɔá anɩlowun anɩdɛ mlɩ bla, mɛnɩ anɩa mlɩnyɔ abɔ́bwɛ kʋlɛ. Tsufɛ anɩa Ɔsɩ amʋ pʋ́ mʋ Bi Yesu Kristonyɔ gyi kʋlɛ.

1 Yohane 2:19

Kristo alupʋ anfɩ betsia anɩtɔ asa bɛdalɩ. Nɩ lɛlɛ anɩ klɛ bʋgyi a, tɛkɩ besi tsia anɩtɔ. Amʋ́ anɩtɔdalɩ losuna ánɩ́ bʋmegyi anɩ apio Kristotɔ. Mʋ́ sʋ bɛdalɩ anɩtɔ nɩ.

1 Yohane 5:20

Anɩyin ánɩ́ Bulu mʋ Bi amʋ laba. Alaha anɩlanu asʋn asɩ, mɛnɩ abɛ́bɩ Bulu Ɔnɔkwalɩpʋ amʋ. Anɩa mʋnyɔ anɩlabwɛ kʋlɛ, anɩa mʋ Bi Yesu Kristo ɛ anɩlabwɛ kʋlɛ. Lɛlɛ a, mʋ nkʋlɛ pɛ gyi Bulu Ɔnɔkwalɩpʋ pʋ́ nkpa ánɩ́ ɩtamata amʋ nɩ.