फिलिप्‍पी 3:1 - नेवाः बाइबल

¹ यःपिं दाजुकिजापिं, मू खँ छु धाःसा – छिपिं प्रभुलिसे लय्‌ताया च्‍वँ। न्‍हापा च्‍वये धुनागु हे खँ हानं लिसा कयाः च्‍वयेत जिं थाकु मचाया। थुकिं छिमित हे भिं याइ।

फिलिप्‍पी 3:1 Cross References

१ इतिहास 15:28

थथे सकल इस्राएलीतय्‌सं जयजय धकाः हा हां फैया नेकू व तुरही पुपुं अले भुस्‍याः, सारंगी व वीणा थाथां परमप्रभुया बाचाया सनू ज्‍वनाः वल।

१ इतिहास 16:10

वय्‌कःया पवित्र नांयात तःधंकि, परमप्रभुयात मालिपिनिगु नुगः लय्‌तायेमा।

१ इतिहास 29:22

उखुन्‍हु इमिसं परमप्रभुया न्‍ह्यःने लय्‌लय्‌तातां नयेत्‍वने यात। अले इमिसं दाऊदया काय् सोलोमनयात निक्‍वः खुसी जुजु दय्‌काः वयात परमप्रभुया न्‍ह्यःने शासक जुइत व सादोकयात पुजाहारी जुइत अभिषेक यात।

नहेम्‍याह 8:10

नहेम्‍याहं इमित धाल, “आः छेँ वनाः भिंगु नसा व साःगु दाखमद्यनापं भ्‍वय् न हुँ। थःगु निंतिं भ्‍वय् ज्‍वरय् याये मफुपिन्‍त नं ब्‍व छ्वयाब्‍यु। थौंया दिं झी प्रभुया निंतिं पवित्र जू। नुगः मछिंके मते, परमप्रभुयागु लसता हे छिमिगु बल खः।”

अय्‍यूब 22:26

अले छितः दक्‍व शक्ति दुम्‍ह परमेश्‍वरपाखें सुख दइ। छिं थःगु मिखा परमेश्‍वरपाखे ल्‍ह्वनी।

भजनसंग्रहया सफू 149:2

इस्राएल थःत सृष्‍टि यानादीम्‍हय्‌सिया कारणं लय्‌तायेमा, सियोनयापिं मनूत थः जुजुया कारणं लय्‌तायेमा!

भजनसंग्रहया सफू 32:11

उकिं परमप्रभुयात विश्‍वास याइपिं फुक्‍कं परमप्रभुलिसे लय्‌ताया च्‍वँ! नुगः यचुपिं फुक्‍कं लसतां चंचंधा!

भजनसंग्रहया सफू 33:1

परमप्रभुयात विश्‍वास याइपिं फुक्‍कं परमप्रभुलिसे लय्‌ताया च्‍वँ। नुगः यचुपिन्‍सं वय्‌कःया प्रशंसा याये ल्‍वः।

भजनसंग्रहया सफू 37:4

परमप्रभुनापं लय्‌ताया च्‍वँ! परमप्रभुं छं मनंतुंगु पूवंकादी।

भजनसंग्रहया सफू 42:4

न्‍हापाया खँ लुमंकीबलय् जिगु नुगः तज्‍यानावइ। उबलय् जि मनूतय्‌गु पुचःलिसे जुइगु खः। मनूतय् न्‍ह्यलुवाः जुयाः प्रशंसाया म्‍ये हा हां, लय्‌तातां परमेश्‍वरया देगलय् वनेगु।

भजनसंग्रहया सफू 5:11

छिगु शरणय् वःपिं धाःसा लय्‌तायाच्‍वनेमा। अले न्‍ह्याबलें लसतां म्‍ये हालाच्‍वनेमा। छिं हे इमिगु रक्षा यानादिसँ। अले छिगु नांयात माया याइपिं लसतां जायाच्‍वनेमा,

भजनसंग्रहया सफू 97:1

परमप्रभु जुजु खः। पृथ्‍वी लय्‌तायेमा, समुद्रया टापुत लय्‌तायेमा।

यशैया 41:16

छं इमित हायाछ्वइ अले फसं इमित च्‍वय् थत यंकी, अले ग्‍वःफसं इमित पुइकेयंकी। छं धाःसा परमप्रभुनापं हे लय्‌तायाच्‍वनी। अले छं इस्राएलया पवित्र परमेश्‍वरया महिमा याइ।

यशैया 61:10

जि परमप्रभुया कारणं तसकं लय्‌ताये। जिगु प्राणं जिमि परमेश्‍वरयाके लय्‌ताइ। छाय्‌धाःसा वय्‌कलं जितः उद्धारया वसः पुंकादीगु दु, अले वय्‌कलं जितः धार्मिकताया वसतं त्‍वपुयादीगु दु। गथे ब्‍याहा याइम्‍ह मिजंनं थःगु छेनय् पुजाहारीं थें समाः याइ अले भम्‍चां थःत तसकं मू मू वंगु तिसां समाः याइ।

यशैया 65:14

जिमि दासतय्‌सं नुगलंनिसें लय्‌लय्‌तायाः म्‍ये हाली, छिपिं धाःसा मनय् पीर दुगुलिं ख्‍वइ, छिमिगु नुगः ख्‍वःगुलिं ततःसलं हालाः ख्‍वइ।

योएल 2:23

हे सियोनयापिं मनूत, लय्‌ता, परमप्रभु थः परमेश्‍वरयाके लय् लय्‌ताता न्‍ह्यइपुइकाच्‍वँ! छाय्‌धाःसा वय्‌कलं दकलय् न्‍हापां वइगु वा छिमित बियादीगु दु, छाय्‌धाःसा वय्‌कः विश्‍वास याये बहःम्‍ह खः। अले छिमिगु निंतिं माक्‍व वा वय्‌कादी न्‍हापागु वा व लिपायागु वा न्‍हापा थें हे वय्‌कादी।

सपन्‍याह 3:14

हे जिमि म्‍ह्याय् सियोन, म्‍ये हा! हे इस्राएल, तस्‍सलं हा! हे जिमि म्‍ह्याय् यरूशलेम, थःगु पूरा मनं छ लय्‌ता अले न्‍ह्यइपुकि!

सपन्‍याह 3:17

परमप्रभु छिमि परमेश्‍वर छनापं दु। वय्‌कः वचय् याये फुम्‍ह खः। वय्‌कः छनापं तस्‍सकं लय्‌ता। वय्‌कलं थःगु प्रेमय् छन्‍त शान्‍त याइ। अले छंगु कारणं ततःसलं म्‍ये हालाः वय्‌कः तसक्‍कं लय्‌ताइ।”

जकरिया 10:7

एफ्राइमयापिं मनूत वीर सिपाइँत थें जुइ, दाखमद्य त्‍वनाः लय्‌ताःगु थें इमिगु मन जुइ। इमि मस्‍त थ्‍व खनाः लय्‌ताइ। परमप्रभुयाके इमिगु नुगः लय्‌ताइ।

मत्ती 5:12

छिपिं स्‍वयाः न्‍हापायापिं अगमवक्तातय्‌त नं थथे हे दुःखकष्‍ट ब्‍यूगु खः। उकिं लय्‌ताया जु, छाय्‌धाःसा स्‍वर्गय् छिमित बीत तःधंगु सिरपाः तयातःगु दु।

लूका 1:47

मुक्ति बीम्‍ह परमेश्‍वर खनाः जिगु मन तसकं लय्‌ताः,

रोमी 5:11

थुलि जक मखु, झीत परमेश्‍वर नाप मिलय् यानादीम्‍ह झी प्रभु येशू ख्रीष्‍टं यानाः वय्‌कः नाप झीपिं लय्‌ताय् खन।

२ कोरिन्‍थी 13:11

यःपिं दाजुकिजापिं, लय्‌ताया च्‍वँ। मभिंगु लँपु त्‍वःताः भिंगु लँपु ज्‍वनाच्‍वँ। जिं धयागु खँ नुगलय् तयाति। छिपिं सकलें मिलय् जुयाच्‍वँ। अले माया यानादीम्‍ह व शान्‍ति बियादीम्‍ह परमेश्‍वर छिपिंनाप च्‍वनादी।

एफिसी 6:10

पौ क्‍वचाय्‌के न्‍ह्यः जिं छिमित धाये – प्रभुयात विश्‍वास यानाः छिपिं वय्‌कःयागु शक्तिं बल्‍लाना च्‍वँ।

व्‍यवस्‍था 12:18

बरु छिपिं, छिमि काय्‌म्‍ह्याय्‌पिं, छिमि च्‍यःभ्‍वातिंत अले छिमिगु शहरय् च्‍वनाच्‍वंपिं लेवीया सन्‍तानत नापं वय्‌कलं ल्‍ययादीगु थासय् नयेगु या। परमप्रभु छिमि परमेश्‍वरया न्‍ह्यःने छिमिसं याइगु थःपिनिगु फुक्‍क ज्‍याय् लसता हँ।

व्‍यवस्‍था 16:11

परमप्रभु छिमि परमेश्‍वरं थःगु नांया लागिं च्‍वनेगु ल्‍ययादीगु थासय् छिपिं, छिमि काय्‌म्‍ह्याय्‌पिं, दास दासी, शहरय् च्‍वंपिं लेवीया सन्‍तानत, परदेशीत, मांबौ मदुपिं मस्‍त व भाःत सी धुंकूपिं मिस्‍त, फुक्‍कसिनं थः परमेश्‍वरया न्‍ह्यःने लसता हँ।

फिलिप्‍पी 3:3

धात्‍थेंगु चिं तइपिं ला झीपिं खः, छाय्‌धाःसा झीसं परमेश्‍वरयात पवित्र आत्‍मां सेवा यानाच्‍वना। येशू ख्रीष्‍टयाके भरोसा तयाच्‍वना, अले शरीरयागु ज्‍याखँय् झीसं भरोसा मतया।

फिलिप्‍पी 4:4

प्रभुयाके न्‍ह्याबलें लय्‌ताया च्‍वँ। जिं हानं धाये – “लय्‌ताया च्‍वँ।”

फिलिप्‍पी 4:8

यःपिं दाजुकिजापिं, दकलय् लिपा जिं धाये – छिमिसं सत्‍यगु, हनेबहःगु, भिंगु, शुद्धगु, बांलाःगु, ततःधंगु व प्रशंसा याये बहःगु खँय् जक मन बिया च्‍वँ।

१ थेसलोनिकी 4:1

दाजुकिजापिं, परमेश्‍वरयात यय्‌क गथे यानाच्‍वनेमाः धयागु खँ ला छिमिसं जिमिगुपाखें स्‍यना काये धुंकूगु हे दु। छिपिं उकथं हे जुयाच्‍वंगु नं दु। छिपिं थुकथं हे अज्‍जं न्‍ह्यज्‍यानावने फयेमा धकाः जिमिसं छिमित प्रभुया नामं बिन्‍ति यानाच्‍वनागु दु।

१ थेसलोनिकी 5:16

न्‍ह्याबलें लय्‌ताया च्‍वँ।

याकूब 1:2

दाजुकिजापिं, छिमित न्‍ह्यागु कथंया दुःखकष्‍ट जू वसां लय्‌ताया च्‍वँ।

१ पत्रुस 3:8

मू खँ छु धाःसा, छिपिं सकलें छगू मनयापिं, क्‍वमिलु, दाजुकिजापिं थें थःथवय् माया याइपिं व सकसितं दया माया याइपिं जुयाच्‍वँ।

१ पत्रुस 4:13

येशू ख्रीष्‍टं थें थथे दुःख फये दयाः छिपिं लय्‌ताया च्‍वँ। वय्‌कः झाइबलय् छिपिं तसकं लय्‌ताये दइ।

२ पत्रुस 3:1

यःपिं दाजुकिजापिं, थ्‍वनापं जिं छिमित पौ च्‍वयाहयागु निकः जुल। निगुली नं जिं छिमिगु यचुगु मनयात लुमंका बियाः न्‍ह्यलं चाय्‌केत थ्‍व खँ च्‍वयाहयागु खः।

१ शमूएल 2:1

हन्‍नाहं थथे धकाः प्रार्थना यात, “परमप्रभुं जिगु मन तसकं लय्‌ताय्‌कादीगु दु, वय्‌कलं यानादीगु ज्‍या खनाः जि तसकं खुसी जुयागु दु। जि जिमि शत्रुतय् न्‍ह्यःने न्‍हिले, अले परमप्रभुं जितः ग्‍वाहालि यानादीगुलिं जि तसकं लय्‌तायागु दु।