फिलिप्‍पी 2:3 - नेवाः बाइबल

³ थःगु जक भिं स्‍वयाः तःधंछुना जुइ मते। बरु थःथवय् क्‍वमिलु जुयाः मेपिं स्‍वयाः चिधं जुया जु।

फिलिप्‍पी 2:3 Cross References

हितोपदेश 13:10

घमण्‍डं ल्‍वापु हइ, तर सल्‍लासाहुति काइपिं बुद्धिमान खः।

लूका 18:14

वय्‌कलं धयादिल – “जिं छिकपिन्‍त धाये – व फरिसी स्‍वयाः थ्‍व मनू हे परमेश्‍वरया न्‍ह्यःने धर्मी ठहरय् जुयाः लिहां वन। सुनां थःत थःम्‍हं तःधंकी व चिधनी। अले सुनां थःत थःम्‍हं चिधं ताय्‌की व तःधनी।”

रोमी 12:10

छिपिं विश्‍वासी दाजुकिजापिं थःथवय् दुनुगलंनिसें माया याना च्‍वँ। थःथवय् हनाबना तया च्‍वँ।

रोमी 13:13

थुकथं झीगु चालचलन जलय् च्‍वंपिनिगु थें याये माल, उकिं झीसं मोजमज्‍जा यायेगु, अय्‌लाः त्‍वना जुइगु, व्‍यभिचार यायेगु, लाः लाः थे सना जुइगु, ल्‍वापु यायेगु, नुगः मुइकेगु त्‍वःताछ्वये माल।

रोमी 2:8

ल्‍वापु यानाजुइपिं, सत्‍य खँ मानय् मयाइपिं, दुष्‍ट ज्‍याखँ यानाजुइपिं मनूतय्‌त परमेश्‍वरया क्रोध व तःधंगु तं लाइ।

१ कोरिन्‍थी 15:9

उकिं जि ला प्रेरितत मध्‍ये दकलय् चिधंम्‍ह खः। परमेश्‍वरयात विश्‍वास याना जूपिन्‍त सास्‍ती बियाजुइ धुनागुलिं जितः प्रेरित धकाः धाये मल्‍वः।

१ कोरिन्‍थी 3:3

छाय्‌धाःसा आः तक नं छिपिं थ्‍व संसारयापिं मनूत थें च्‍वनाच्‍वंगु दु, कर्पिनि ज्‍यूगु छिमिसं स्‍वये हे मफु, हानं छिपिं थःथवय् ल्‍वानाच्‍वंगु दु धाःसा छिपिं थ्‍व संसारयापिं मनूत थें च्‍वनाच्‍वंगु दु धकाः अथें हे सीदत नि।

२ कोरिन्‍थी 12:20

आम्‍कन वयेबलय् जिं मतिइ तया थें छिपिं मजूगु, व छिमिसं मतिइ तः थें जि मजुइ फु धकाः जि ग्‍यानाच्‍वना। छिमि दथुइ थःथवय् ल्‍वापु जुइगु, नुगः मुइकेगु, थःथवय् तंम्‍वया जुइगु, थःगु जक भिं स्‍वयेगु, मभिंकाः खँ ल्‍हायेगु, कर्पिनिगु निन्‍दा यायेगु, घमण्‍ड यानाजुइगु, गतिपति मदय्‌क सना जुइगु, थज्‍याःगु मभिंगु खँ दये फु।

गलाती 5:15

अय्‌नं गुँपशुत थें थथः हे ल्‍वाना जूसा छिपिं फुक्‍कं स्‍यनावनी धयागु खँय् छिमिसं होश‍ यानाच्‍वँ।

गलाती 5:26

झीसं थःथवय् घमण्‍ड यानाजुइगु, तंम्‍वया जुइगु व नुगः मुइका जुइगु याये मज्‍यू।

एफिसी 4:2

न्‍ह्याबलें क्‍वमिलु, स्‍वजा व सह याइपिं जुयाः थःथवय् माया यानाः

एफिसी 5:21

ख्रीष्‍टयात मानय् यानाच्‍वंपिं जुयाः छिमिसं छम्‍हं मेम्‍हय्‌सिगु खँ न्‍यनेगु या।

फिलिप्‍पी 2:14

न्‍ह्यागुं ज्‍या उसि मचासे व जवाःसवाः मयासें यायेमाः।

कलस्‍सी 3:12

छिपिं परमेश्‍वरं ल्‍ययातःपिं पवित्रपिं व वय्‌कःया यःपिं मनूत खः। उकिं छिमिसं दया माया यायेगु, क्‍वमिलु जुइगु, स्‍वजा जुइगु, सह यानाच्‍वनेगु यायेमाः।

कलस्‍सी 3:8

आवंनिसें छिमिसं तं व ल्‍वापुख्‍यापु त्‍वःताछ्व – कर्पिन्‍त स्‍यंका जुइगु, कर्पिन्‍त मभिंकाः खँ ल्‍हायेगु, अस्‍यः खँ ल्‍हायेगु – थज्‍याःगु ज्‍याखँ नं त्‍वःताछ्व।

१ तिमोथी 6:4

वं छुं हे मसीकं तःधंछुया जुइ। अले म्‍वाःमदुगु खँ पिकयाः जवाःसवाः यानाः ल्‍वापुथया जुइ। थुकिं मनूतय्‌त ल्‍वाकेगु, नुगः मुइकेगु, मेपिन्‍त मभिंका जुइगु व म्‍वाःमदुगु संका जक याकी।

१ पत्रुस 3:8

मू खँ छु धाःसा, छिपिं सकलें छगू मनयापिं, क्‍वमिलु, दाजुकिजापिं थें थःथवय् माया याइपिं व सकसितं दया माया याइपिं जुयाच्‍वँ।

१ पत्रुस 5:5

क्‍वकालिपिं मनूतय्‌सं थकालिपिं मनूतय्‌त मानय् यायेमाः। थथःम्‍हं तुं तःधं जुया जुइगु बांमलाः। अय्‌जूगुलिं ग्‍वाहालि याये माःपिन्‍त छिमिसं ग्‍वाहालि या। थ्‍व हे खँ धर्मशास्‍त्रय् नं थथे च्‍वयातःगु दु – “परमेश्‍वरं तःधंछुना जुइपिनिगु विरोध यानादी, क्‍वमिलुपिन्‍त धाःसा दया यानादी।”