Nipadrelane 7:11 - Ngudradreadrekadhane Ka Sisiu 魯凱語聖經

¹¹ Ku sasiakawlu belenge makanaelre acegecege ngithalringulu ki taetalane, ki laciwru, si supate ka panianianiake ka waudriwdripi. Kwi lalasu yacucubungu ki taetalane pidruru, si sukusukubu ki Twaumase,

Nipadrelane 7:11 Cross References

Lasenai 45:11

Ku thariranesu lri mubaisi muswane ku talialalai; amani ku tawkisu, lri pasalaladhasu iniane.

Lasenai 97:7

Ku wasukusukubu ki samiamiange ku umawmase lri kitusinalreme makanaelre; ku walrigulrigu ki ngialisiane ka twaumase lri kiarubwane makanaelre; sanaka twaumase lri ikai cucubungu ki Tamatama guruthungane makanaelre.

Matai 4:10

Ku Yesu la tubalre iya kai, “Satange, katwasa! Kai Sisiu amia kai, ‘Sukuba ki Tamatama ka Twaumasesu, kathane ku apasikaiyane usakene iniane.’ ”

Yuhani 5:23

Ngwalai ku ausakenane ki laumawmase ki Lalake, mia lu usakene ki Tama. Kudra kai mwasakene ki Lalake, amani ku kai mwasakene ki siakawlu iniane ka Tama.

Hiburu 1:6

Ku Twaumase salri sikawlu ki takataakanga ki Lalakeini mwa kai kawmasane, la iyana kai: Ku sasiakawlu belenge ki Twaumase makanaelre lri tara sukubu iniane.

Nipadrelane 11:16

Kudra yakai cucubungu ki Twaumase, nene ikai ki taetaleini ka ta 24 ka ciwru makitwa gurapangane icakena makanaelre, si sukubu ki Twaumase,

Nipadrelane 15:4

Tamatama, aneane ku lri lreme kai musakene si mukuludru muswane? Aneane ku lri kai drengedrengere ki naganesu? Kathaanesu ku amani ku sanianiangenga. Sanaka kuni lri kela makanaelre, si ikai cucubungu muswane sukubu, asi lwiyane ku takaungane ki dringelresanesu athingalanenga utaluvaivai.

Nipadrelane 22:9

Ai kwi lasu amia kai nakwane, “Madha piapia kikai! Kunaku si kusu, si laretesanesu, kamani kudra layuginsia si palululudu kudra taiyane kai ki hungu, maramaraamau ka sasiakawlu. Sukuba kamani ki Twaumase!”

Nipadrelane 4:10

Sakamani kwidra, kwi ta 24 ka laciwru, la icucubungu ki wanene ikai ki taetalane si amani kwidra panianiake palralrawthu guruthungane sukusukubu, kwi lalasu la malra kwi pagamucu lini sarare pikai cucubungu ki taetalane, si iya kai:

Nipadrelane 4:4

Ku ngiathalringulu ku lataetale ki taetalane 24, la ibelenge nene ku ta 24 ku laciwru, si silaimai ku lrawlrapungu, la sitalrupunu ku kingi ka pagamucu.

Nipadrelane 4:6

Ikai cucubungu ki taetalane yakai ku mia ki walikalikathe ka lrenege ku bulane ka garase ka laveke. Ku maececebe thili ki taetalane, yakai ku supate ku panianianiake ka waudriwdripi, ku lrilrikudru ku cucubungu swaete ku maca.

Nipadrelane 4:8

Kwini supate ka panianianiake ka waudriwdripi, eneme ku sapakepake lini makanaelre, ku taiadringane ku taibelengane swaete ku maca. Kwi lalasu la pivai pimaungu senasenai kai idrengedrengere iya kai: Sanianiangenga! Sanianiangenga! Sanianiangenga! Tamatama ka sapupukuanenga ka Twaumase, yakai sakanadruma, la ikai kaiasasane, lubibilrili lai lrika palralrawthu ikai!