Mukaanda kuri bari Filipo 4:3 - Musamu Wamubwete 2013

³ Heehe, me nyiloombo kuri ye se, mbaasi yaami ya kisalu ya ngwanwa ti, bakisa bakyeetu babo, bo banweeni kintwaari na me, mu ntoono Musamu Wamubwete, kintwaari se na Kelema na bambaasi ba me bakaka ba kisalu, bari mankuumbu mari mu mukaanda wa mwooyo.

Mukaanda kuri bari Filipo 4:3 Cross References

Musamu wamubwete watina Luka 10:20

Hango, yaa lumono kiminu, mu kuri ti mampeeve mamabi malutumumina; ngo kasi monee kiminu mbuti mankuumbu meenu matinima mu mayulu.»

Mukaanda kuri bari Loma 12:1

Hango me nyisyaamisa beenu bampaangi, mu kyaari kya Nzaambi, mu kuyekele manyutu meenu bunu kikabu kyamwooyo, kyangisi na kyabweeye kuri Nzaambi. Yiyo ngo nsambukulu yangwanwa kuri beenu.

Mukaanda kuri bari Loma 16:12

Heenee mboto kuri Tirifayina na Tirifosa, bo basala kwalaka mu Mfumu. Heenee mboto kuri Peresi, nduku ya mutima, nde wasala kwalaka mu Mfumu.

Mukaanda kuri bari Loma 16:9

Heenee mboto kuri Urbano, mbaasi yeetu ya kisalu mu Kiristo, na kuri Estaki, nduku yaami ya mutima.

Mukaanda kuri bari Filipo 1:12

Bampaangi, me ntiiri ti beenu luyaaba ti: mimyo mitariri me, myadziburi nzila kuri ti Musamu Wamubwete keende ku mankula.

Mukaanda kuri bari Filipo 1:16

Babamosi mu ntiilu, bu bayaari kuri ti, mu ntoono ya kukalila Musamu Wamubwete me nyiri mu boroko,

Mukaanda kuri bari Filipo 1:27

Beenu ngo bari dyaatileenu mu kiteesu kyayelemene na Musamu Wamubwete wa Kiristo, mpisi heki, ti hayuku me nyiisiri kulumono, bunu pe nyahele kuba na beenu, me nyuka ti beenu luri na keketee mu mpeeve yomosi, na luri mu kwenwaana mu kitsimi kyokimosi, mu ntoono kanyi mu Musamu Wamubwete,

Mukaanda kuri bari Filipo 1:5

mu ntoono kintwaari, ki luri mu kusoongaa beenu kuri me mu Musamu Wamubwete, kuholosono kiluumbu kyatete natee mu lumalu.

Mukaanda kuri bari Filipo 1:7

Buri bwa yelemene ti, me nyetsima ma bubwo mu beenu-banso, bukuri me nyalusuusa mu mutima waami. Ti hayuku me nyiri mu boroko, nyiri mu kukalala nyutu, na nyiri mu kusyaamisa Musamu Wamubwete, lo beenu-banso luri kintwaari mu bweese bwa me.

Mukaanda kuri bari Filipo 4:2

Me nyisyaamisa Evodya na Sintike mu kuba na nyukusunu mu Mfumu.

Mukaanda kuri bari Kolosayi 1:7

Epafara, nduku yeetu ya kisalu ya Mutima, bunubwo se kari kaluyikisa, nde wuri kuri beenu kisari kyakwiikama kya Kiristo.

Nyabusulu ya Yowane 13:8

Bobanso badzakala ha butoto, sa basaambila kibulu kikyo; bobanso bari mankuumbu mahele kutina, mu mukaanda wa mwooyo wa Mwaana kimeeme, wubakekiri, kuholosono kunu mbandukulu nsi.

Nyabusulu ya Yowane 17:8

Kibulu ki wamwiini ye kyaba, ngo kyasaala ko, sa kitoomboko mu lubila, na sa kyeende ku mfukusulu; baatu badzakala ha butoto, babo bari mankuumbu mahele kutina mu mukaanda wa mwooyo, kuholosono nyirikulu nsi, sa bakimuka ha bamono kibulu, Bukuri kyo kyaba na kyasaala ko, kasi sa kyabweese kumonokono.»

Nyabusulu ya Yowane 20:12

Me nyamono se bafwa, bakuutu na bilesi, bateleme ha busu bwa mboloko. Nyamono se badzibula mikaanda, na badzibula mukaanda mukimi, wuri mukaanda wamwooyo. Bafwa, babatsuundisa bunu bwaba myatinu mu mikaanda, bunu bwaba biyiriki bya bo.

Nyabusulu ya Yowane 20:15

Mbuti muutu wahele na nkuumbu yatinu mu mukaanda wamwooyo, lo bamutubiri ku dyaanga dya mbaawu.

Nyabusulu ya Yowane 21:27

Mu dyo, kuri nkotulu kitotolo kyasumuka, muyiriki mya myamibi, bunu pe ngaa-mpya ko, ngo bakoto mu dyo, bani babo batinima mankuumbu mu mukaanda wa mwooyo, wa Mwaana kimeeme.

Nyabusulu ya Yowane 3:5

«Wuluuluka se sa kaba mu bilwaatu byahembeke, na nyiyaala nkuumbu yaandi mu mukaanda wa mwooyo ko, na sa nyamuteelile kimbaangi ha busu bwa Taata, na ha busu bwa bambasi baandi.»