फिलिप्पियो 4:17 - मंडयाली नंऊँआं नियम

¹⁷ हांऊँ ये गल्ला इधी कठे नी लिख्दा लगिरा कि हांऊँ मददा रे कठे पैसे चाहां। पर हांऊँ चाहां कि तुस्सा रा ये भला काम जो तुस्से कितिरा, से तुस्सा रे होर भले कामा मन्झ जुड़ी जाए होर परमेसर इन्हा कामा रे कठे तुस्सा जो इनाम दे।

फिलिप्पियो 4:17 Cross References

यहून्ना 15:16

तुस्से हांऊँ नी चुणेया पर मैं तुस्से चुणिरे होर नियुक्त कितिरे ताकि तुस्से जाई किन्हें फल ल्याए; होर तुस्सा रा फल टिकी सके। क्यूंकि तुस्से मेरे चेले होर इधी कठे जो कुछ तुस्से बापू ले मान्घगे, तेस तुस्सा जो देणा।

यहून्ना 15:8

मेरे बापू री महिमा एता ले हुंहाँ ईं कि, तुस्से बौह्त जे फल ल्याऊआ, तेबे ई तुस्से मेरे चेले हूंणे।”

रोमियो 15:28

इधी कठे मां पैहले यरुस्लेम सैहरा जो जाई किन्हें तिन्हो ये कठ्ठा कितिरे ढब्बे देई किन्हें तिन्हारी मदद करणी। तेता ले बाद रोम सैहरा मन्झ आई किन्हें तुस्सा किन्हें मिलणा, होर तेबे इस्पानिया देसा जो चली जाणा।

2 कुरिन्थियो 11:16

हांऊँ दबारा याद कुराई करहा, कोई मुंजो नर्क्कला नी समझे; पर अगर तुस्से हांऊँ नर्क्कला ही समझीरा ता एह्ड़ा समझी किन्हें मुंजो अपनाई लऊआ, ताकि मुंजो भी थोहड़ा बडयाई करणे रा मौका मिली जाये।

2 कुरिन्थियो 9:5

इधी कठे मैं विस्वासी भाईया साउगी अर्ज करणा ठीक समझ्या ताकि स्यों आस्सा ले पैहले तुस्सा वाले जाए, होर जो ढब्बे देणे रा वादा तुस्से कितिरा था तेस जो त्यार रखे, जो तुस्से कंजूसी री भावना ले नी, पर बड़ी उदारता री भावना ले दितिरा।

फिलिप्पियो 1:11

होर परमेसर री महिमा होर बड़ाई रे कठे तेस धार्मिकता रे भले कामा ले भरी जाऊआ, जो सिर्फ यीसू मसीह रे ज्रीए ही फला ऐं।

फिलिप्पियो 4:11

हांऊँ ये गल्ला इधी कठे नी बोल्दा लगिरा कि मुंजो केसी चीज़ा री कमी घटी; क्यूंकि मैं हर हालता मन्झ संतुस्ट रैहणा सीखी लितिरा।

1 थिस्सलुनकियो 2:5

तुस्से जाणहां ऐं कि, आस्से ना कधी चापलूसी री गल्ला करहा ऐं थे, होर ना ही लालचा री वजहा ले कोई काम कितिरा। होर परमेसर गुआही देआ कि आस्से एह्ड़ा काम नी कितिरा।

1 तिमिथियुस 3:3

से दारुबाज या मारपीट करणे वाल़ा नी हो; बल्की दूजेया पर दया करणे वाल़ा हो। होर ना झगड़ा करणे वाल़ा हो होर ना पैसे रा लालच करणे वाल़ा हो।

1 तिमिथियुस 6:10

क्यूंकि धन रा मोह सभ किस्मा री बुराईया री जड़ ई, जेस धना जो पाणे री कोसिस करदे-करदे कुछ लोक मजे-मजे मसीह रे उपदेसा पर विस्वासा करणा छाडी दे। एता री वजहा ले स्यों लोक कई किस्मा रे दुःख सहन करहे, तेस माह्णुं साहीं जिन्हें हथियारा किन्हें आपणे आपा जो छलनी करी दितिरा हो।

तितुस 1:7

होर एक कलीसिया रा अगुवा परमेसरा रा भंडारी हूंणे री वजहा ले बेकसूर हूंणां चहिए; ना हठी, ना गुस्सा करणे वाल़ा, ना दारुबाज, ना मारपीट करणे वाल़ा हो, होर ना दूजेया जो धोखा देई किन्हें पैसे कमाणे री इच्छा रखदा हो।

तितुस 3:14

इतना ही नी पर विस्वासी लोका जो ये भी स्खान्दे रैहया कि स्यों दूजेया री ज्रूरता जो पूरा करणे रे कठे खरे कामा मन्झ हमेसा लगे रैंहे। एह्ड़ा करणे ले तिन्हारी जिन्दगी बेकार नी हूणीं।

इब्रानियो 6:10

तुस्से परमेसरा रे खातर तेसरे पवित्र लोका री सेऊआ बड़े प्यारा किन्हें करहे थे होर करदे भी लगिरे, परमेसर एस कामा जो नी भूल्दा। क्यूंकि परमेसर अन्याय करणे वाल़ा नी आ।

1 पतरस 5:2

कि विस्वासी लोका रे झुंडा री देखभाल करा; जो परमेसरा री, होर जो तुस्सा जो दितिरी की तुस्से तिन्हारी देखभाल करी सको। होर तिन्हारी देखभाल खुसी किन्हें करहा, कोई जोर जबरदस्ती किन्हें नी, क्यूंकि ये ही परमेसरा री इच्छा ई। एह्ड़ा तुस्से नीच कमाई रे कठे नी, पर सच्चे तिन्हारी मदद करणे रे कठे करा।

2 पतरस 2:15

होर स्यों ठीक काम नी करदे, होर जिहां बौह्त पैहले बओरा रे मह्ठे बिलामे जो बुरे काम कितिरे थे, तिन्हें भी एह्ड़ा करणा सुर्हू करी दितिरा। तेस जो पैसा कमाणे रे कठे लोका ले पाप कुराणा बांका लगहा था।

2 पतरस 2:3

एह्ड़े स्खाणे वाले लोक लालची हूंणे, होर मन घड़न्त कहाणीया बणाई किन्हें पैसा कमाणे रे कठे तुस्सा जो धोखा देणा। परमेसरे बौह्त पैहले ले ही इन्हों सजा देणे रा फैसला कितिरा था। होर ऐबे से करणे रे कठे त्यार आ, तेस सच्चे स्यों नास करी देणे।

यहूदा 1:11

तिन्हा जो बौह्त सजा मिलणी! तिन्हें आदमा रे मह्ठे कैना साहीं बुरे काम किते, जिन्हें आपणे भाई रा खून कितेया। जिहां बिलामे पैसा कमाणे रे कठे लोका ले पाप कुराया था, तिहां ही जल्दबाजी मन्झ झूठे उपदेस देणे वाले भी ये गलती किती। होर जिहां मूसा रे विरोध करणे री वजहा ले परमेसरे कोरहा जो नास करी दितिरा था, तिहां ही ये लोक भी नास किते जाणे, क्यूंकि ये लोक प्रभु रा बिरोध करी करहा ऐं।