फिलिप्पियो 3:19 - मंडयाली नंऊँआं नियम

¹⁹ तिन्हारा अंत विनास आ, तिन्हारा इस्वर तिन्हारी सरीरा री इच्छा ई, स्यों बेसर्म री गल्ला करणे पर बडयाई करहा ऐं, होर संसारा री चीजा पर मन ल्गाहें।

फिलिप्पियो 3:19 Cross References

मत्ती 16:23

यीसूए मुड़ी किन्हें पतरसा किन्हें बोल्या, “एह्ड़ा सोचणा बंद करी दे! सैतान तुध ले एह्ड़ी गल्ला बुलवाया करहा। तू मेरे पैंडे रा कांडा आ, क्यूंकि जेह्ड़ा परमेसर मेरे ले कुराणा चाहां तेहड़ा नी चाही किन्हें तू मेरे ले से कुराणा चाहां जेहड़ा लोक चाहें।”

मत्ती 25:41

“तेबे तेस परली वखा वाली किन्हें बोलणा, हे स्रापित लोको, मेरे साम्हणें ले तेस अनंत आगा मन्झ चली जाऊआ, जो परमेसरे सैतान होर तेसरे दूता रे कठे त्यार किती गईरी।

लूका 12:19

होर तेता ले बाद मां आपणे आपा किन्हें बोलणा, तेरे वाले बौह्त साला रे कठे बौह्त जायदाद रखिरी; अराम कर, खा-पी, सुख चैना किन्हें रैह।’

लूका 16:19

“एक अमीर माह्णुं था जो हमेसा कीमती होर बांके कपड़े पैहना था। होर हर रोज राजाओं साहीं बांका खाणा खांहां था।

लूका 18:4

होर बौह्त ध्याड़े तक से न्यायी आनाकानी करदा रैंहयां पर बादा मन्झ तिन्हें मना मन्झ सोची किन्हें बोल्या, ‘जेब्की हांऊँ ना ता परमेसरा ले डरहा, होर ना माह्णुं री कुछ परवाह करहा।

रोमियो 16:18

क्यूंकि एह्ड़े लोक आस्सा रे प्रभु मसीह री सेऊआ नी करदे, पर आपणी व्यक्तिगत इच्छा जो पूरी करहा ऐं, होर चिकनी चुपड़ी गल्ला किन्हें सीधे सादे लोका जो धोखा दें।

रोमियो 6:21

तुस्से बुरे काम करहे थे पर ऐबे तुस्से तिन्हा बुरे कामा ले सर्मिन्दा ऐं। एह्ड़ी पाप करणे री अजादी ले तुस्सा जो क्या फायदा हुआ? एह्ड़ी पापा री गल्ला रा अंत मौत आ।

1 कुरिन्थियो 3:3

क्यूंकि तुस्से हाल्ले भी संसारा रे लोका साहीं ऐं, इधी कठे जेबे तुस्सा मन्झ जल्नी होर झगड़ा हूँआ ता से एस गल्ला जो साबित करहा कि तुस्से हाल्ले भी संसारा रे लोका साहीं ऐं। होर तुस्से तिन्हा लोका साहीं जीहां ऐं जो प्रभु रे लोक नी ऐं?

1 कुरिन्थियो 5:2

होर तुस्सा जो ता एस गल्ला ले दुखी हुणा चहिए था, होर जिन्हें माह्णुं एह्ड़ा कितेया से कलीसिया ले काढी देणा चहिए था, एता रे बजाय तुस्से एस गल्ला मन्झ घमंड करहे।

1 कुरिन्थियो 5:6

तुस्से एस तरीके किन्हें घमंड करणा छाडी दो; तुस्से जाणांहे कि, ये पाप थोह्ड़ा जे स्जेड़ा साहीं आ जो पुरे आटे जो स्जेड़ा करी देहां।

2 कुरिन्थियो 11:12

बल्की जो हांऊँ करेया करहा, मां तेह्ड़ा ई करदे रैंह्णां; ताकि जो लोक आस्सा री बराबरी करणे रा मौका तोप्हा ऐं, मां तिन्हा जो एस गल्ला री बडयाई नी करणे देऊँ।

2 कुरिन्थियो 11:15

होर अगर सैताना रे सेऊआदार भी धार्मिकता रे सेऊआदार हूंणे रा झूठा दावा करहा ऐं, ता कुछ बड़ी गल नी ई, पर तिन्हारा अंत तिन्हारे कामा रे मताबक हूंणां।

गलातियो 6:13

क्यूंकि खतना कुराणे वाले यहूदी विस्वासी भी मूसा री सारी व्यवस्था जो नी मनदे, पर स्यों चाहें कि तुस्सा रा खतना हुई जाये, ताकि स्यों दूजे यहूदिया ले एस गल्ला पर बडयाई करी सके कि तुस्से इन्हारी वजहा ले खतना कुराईरा।

फिलिप्पियो 2:21

क्यूंकि सभ आपणे मतलबा रे कठे जीएं, होर यीसू मसीह री गल्ला री परवाह नी करदे।

कुलुस्सियो 3:2

आपणा मन धरती री चीजा पर नी पर हमेसा स्वर्गा री चीजा पर ल्गाऊआ।

2 थिस्सलुनकियो 1:9

स्यों हमेसा रे कठे प्रभु ले दूर करी दिते जाणे, होर तेसरी महिमामय सामर्था मन्झ साझी नी हूंणे, होर तेस तिन्हो अनंत विनासा री सजा देणी।

2 थिस्सलुनकियो 2:12

होर जितने लोक सच्चाई पर विस्वास नी करदे, बल्की पाप करणे री इच्छा रखे, परमेसरा तिन्हा सभी जो सजा देणी।

2 थिस्सलुनकियो 2:8

तेता ले बाद तेस दुस्ट आदमिया जाहिर हूंणां, पर बादा मन्झ जेबे प्रभु यीसू मसीह आऊंणा, ता से तेस आपणे मुंहा री फूका किन्हें मुकाई देणा, होर आपणे आऊणें रे तेजा किन्हें भस्म करी देणा।

1 तिमिथियुस 6:5

एह्ड़े माह्णुंआं हमेसा एक दूजे किन्हें लड़ने मन्झ लगी रैहया, होर तिन्हारी बुद्धि खराब हुई गईरी। होर ऐबे स्यों कधी नी समझी सकदे कि सच्चाई क्या ई। स्यों समझे कि परमेसरा री सेऊआ करणा पैसे कमाणे रा जरिया।

2 तिमिथियुस 3:4

दूजेया जो धोखा देणे वाले, ढीठ, आपु जो दूजेया ले बडे समझणे वाले होर परमेसरा किन्हें प्यार नी करणे वाले, पर सुख विलासा रे चाहणे वाले लोक हूंणे।

याकूब 4:16

पर ऐबे तुस्से आपणे आऊणें वाल़ा काला रे बारे मन्झ सोच विचार करी किन्हें बडयाई करहा ऐं; होर एह्ड़ी बडयाई करणा पापा ले बुरा हुंहाँ।

2 पतरस 2:1

होर जिहां बौह्त पैहले इस्राएल देसा मन्झ झूठे नबी हुंहाँ करहा ऐं थे, तिहां ईं ऐबे तुस्सा री कलीसिया मन्झ भी झूठे उपदेस देणे वाल़ेया आऊंणा, होर तिन्हा परमेसरा रे बारे मन्झ घातक झूठ बोलणा। एथी तक कि तिन्हा मसीह जो आस्सा रा एक ही माल्क ऐं तेसरा इनकार करणा, जिन्हें जे स्यों पापा ले अजाद किते, होर एस तरहा तिन्हा आपणे गास अचानक बिनास लेई आऊंणा।

2 पतरस 2:13

होर जो बुराई तिन्हें कितिरी तेता रे बदले तिन्हारा ई नास हूंणां। तिन्हा जो ध्याड़े-दप्हैरा सुख विलास करणा खरा लग्हा। स्यों तुस्सा रे बीचा मन्झ एक कलंक होर दाग ऐं, जेबे स्यों तुस्सा साउगी ही संगती मन्झ खाहें पिहां ऐं, तिन्हा जो तुस्सा जो धोखा देणे मन्झ बौह्त खुसी हुईं।

2 पतरस 2:3

एह्ड़े स्खाणे वाले लोक लालची हूंणे, होर मन घड़न्त कहाणीया बणाई किन्हें पैसा कमाणे रे कठे तुस्सा जो धोखा देणा। परमेसरे बौह्त पैहले ले ही इन्हों सजा देणे रा फैसला कितिरा था। होर ऐबे से करणे रे कठे त्यार आ, तेस सच्चे स्यों नास करी देणे।

यहूदा 1:10

पर ये लोक जिन्हा गल्ला जो नी समझ्दे, तेता रे बारे मन्झ बुरा-भला बोल्हा ऐं। होर जिन्हा गल्ला जो स्यों समझे होर जिन्हा गल्ला जो स्यों नासमझ जानवरा साहीं स्वभावा ले ही करहा ऐं, इन्हा पाप भरी गल्ला करणे ले ही स्यों आपणे आपा रा नास करी करहा ऐं।

यहूदा 1:16

ये लोक हमेसा परमेसरा रे खलाफ बोल्हे होर दूजेया री गलतिया काढे, होर आपणी इच्छा रे मताबक हमेसा बुरे काम करहे। स्यों आपणे बारे मन्झ बडी-बडी गल्ला बोल्हे होर दूजेया री तारीफ करणे रा ढोंग करहे, ताकि तिन्हो तेता ले कुछ फायदा मिली सके।

यहूदा 1:4

क्यूंकि यीसू मसीह पर विस्वास करणे रा ढोंग करणे वाले कुछ लोक तुस्सा री कलीसिया किन्हें जुड़ी गईरे। ये परमेसरा री इज्जत नी करदे होर गलत उपदेस दें कि आस्से लुचपन करी सके, क्यूंकि परमेसर आस्सा रे पाप माफ करी देआ। स्यों प्रभु यीसू मसीहा रा इनकार करहा ऐं जो आस्सा रा एक ऐं प्रभु होर माल्क आ। बौह्त टैम पैहले पवित्र सास्त्रा मन्झ लिखिरा था कि परमेसर आस्सो सजा देआ।

प्रकासना री गल्ला 18:7

तेसरी बडयाई होर भोग विलास ले भरी जिन्दगी री वजहा ले तेस जो तितना ही दुःख होर पीड़ा देआ। से आपणे मना मन्झ बोल्हा ई, ‘मां राणी बणी किन्हें लोका पर राज करणा, होर हांऊँ विधवा नी हाई, होर मुंजो कधी दुःखा नी हूंणा।’

प्रकासना री गल्ला 19:20

होर से पैहला राक्स होर तेस साउगी से दूजा राक्स जो झूठे भविस्यवाणी करहा, पखड़ी गया। एस झूठे भविस्यवाणी करणे वाले तेस राक्सा री जगहा चिन्ह दसे, होर स्यों सभ लोक भरमाए कि से सभ लोक तेसरी अराधना करहे, जिन्हें आपणे माथे पर तेसरी छाप लगाई री थी, होर तेसरी मूर्ति री अराधना कितिरी थी। स्यों दुहें जिन्दे जी आगा री झीला मन्झ पाई दिते, जो हमेसा गन्धका किन्हें भख्दी रही।

प्रकासना री गल्ला 21:8

पर जो मेरे पर विस्वास नी रखदे, स्यों तेस आगी री झीला मन्झ पाई देणे जो गन्धका किन्हें भख्दी रैंहयां ई, जो कि दूजी मौत ई। होर तिहां ही सभ लोक, जो दूजेया रे साम्हणें मुंजो मनणे ले डरे, होर बुरे काम होर खून करहे। जो व्यभिचारी ऐं होर जादू टोणा करहे, होर मूर्तिया री अराधना करहे; होर झूठ बोल्हे, तेस आगी री झीला मन्झ पाई देणे।”

प्रकासना री गल्ला 22:15

पर कुत्ते साहीं अपवित्र लोक, होर जादू टोणा करणे वाले, होर व्यभिचार करणे वाले, होर हत्या करणे वाले लोक, होर मूर्तिया री अराधना करणे वाले लोक, होर हरेक लोक जो झूठ बोलणा पसंद करहे, तिन्हा सभिया एस सैहरा ले बाहर रैहणां।