फिलिप्पियो 2:1 - मंडयाली नंऊँआं नियम

¹ क्यूंकि मसीह साउगी जुड़े हूणे री वजहा ले तुस्सा जो हिम्मत हूँआ ई, होर तुस्से मसीह रे प्यारा ले जो से तुस्सा किन्हें करहा सांति मिलाई, तुस्सा री पवित्र आत्मा साउगी संगती ई, होर मसीहे तुस्सा पर करुणा होर अनुग्रहा कितिरा।

फिलिप्पियो 2:1 Cross References

लूका 2:25

होर तेस टैमा यरुस्लेम सैहरा मन्झ समौन नांऊँआं रा एक माह्णुं था, होर से माह्णुं धर्मी होर भक्त था; होर से मसीहा रा इंतजार करेया करहा था कि से आई किन्हें इस्राएल देसा मन्झ सुख चैन दे, होर पवित्र आत्मा तेस पर था।

यहून्ना 14:18

मां तुस्से अनाथ नी छाडणे, मां तुस्सा वाले वापस आऊंणा।

यहून्ना 14:27

“हांऊँ तुस्सा जो सांति देहां, हांऊँ आपणी सांति तुस्सा जो देहां। ये से सांति नी जेह्ड़ी संसार देहां, तेह्ड़ा हांऊँ नी देंदा: तुस्सा रा मन ना दुआस होर ना डरे।

यहून्ना 17:13

“पर ऐबे मैं तेरे वाले आहूँआं, होर ये गल्ला संसारा मन्झ रही किन्हें बोल्हा कि, स्यों मेरी भरपूर खुसी आपणे आपा मन्झ पाए।

चुणिरे चेले रे काम 2:46

होर स्यों हर रोज एक मन हुई किन्हें मन्दरा मन्झ कठे हुंहा ऐं थे, होर एक दूजे रे घरा मन्झ साउगी रोटी तोड़दे होर खुसी म्नांदे होर एक मन हुई किन्हें खाणे रे कठे कठा हुएं थे।

चुणिरे चेले रे काम 4:32

होर विस्वास करणे वाल़ेया री मण्डली एक चित होर एक मना रे थे एथी तक कि कोई भी आपणी जायदाद आपणी नी बोल्दा था, पर सभ चीजा तिन्हा वाले बांडा री थी।

रोमियो 5:5

होर ये आस आस्सा जो दुआस नी करदी क्यूंकि परमेसरे आस्सा जो पवित्र आत्मा दितिरी, होर से पवित्र आत्मा आस्सा रे दिला जो परमेसरा रे प्यारा किन्हें भरा।

रोमियो 8:26

होर इंहां ईं पवित्र आत्मा भी आस्सा री कमजोरी मन्झ मदद करहा, क्यूंकि आस्से नी जाणदे कि प्रार्थना किहाँ करणी चहिए। आस्से बयान नी करी सकदे कि किहाँ पवित्र आत्मा आपु ई करलादें हुए आस्सा रे कठे अर्ज करहा।

1 कुरिन्थियो 12:13

एस तरीके ले आस्से सभीए जो या ता यहूदी लोक ऐं, या गैर-यहूदी ऐं, या गुलाम ऐं, या अजाद ऐं, एक ई पवित्र आत्मा रे ज्रीए एक सरीर हूंणे रे कठे बपतिस्मा लितेया। आस्सा सभी जो एक ई आत्मा मिली, जिहां आस्से सभिये एक ऐं डोंगें ले पितिरा हो।

1 कुरिन्थियो 15:31

हे भाईयो होर बैहणो, जिहां ये गल पक्की कि तुस्सा रे मसीह यीसू किन्हें जुड़ने री वजहा ले हांऊँ बडयाई करहा, ता ये गल भी पक्की हांऊँ हर रोज मरणे रे खतरे मन्झ आ।

1 कुरिन्थियो 3:16

तुस्से सच्चे जाणांहे कि तुस्से सभ परमेसरा रे मन्दरा साहीं ऐं, होर परमेसरा रा दितिरा पवित्र आत्मा तुस्सा रे बीचा मन्झ वास करहा।

2 कुरिन्थियो 13:14

हांऊँ प्रार्थना करहा कि प्रभु यीसू मसीह रा अनुग्रह होर परमेसरा रा प्यार होर पवित्र आत्मा री साझेदारी तुस्सा सभी रे साउगी हुन्दी रहे।

2 कुरिन्थियो 2:14

परमेसरा रा धन्यावाद हो, जेह्ड़ा आस्सा जो मसीह मन्झ वास करणे री वजहा ले हमेसा आपणे साउगी लेई चला होर आस्सा जो जीताई देआ, होर आस्सा रे ज्रीए मसीह जो जाणने री मीठी खुसबू हर जगहा फैलाहां।

गलातियो 4:6

जेब्की आस्से जो परमेसरा रे बच्चे ऐं, इधी कठे परमेसरे आपणे मह्ठे री आत्मा जो आस्सा रे दिला मन्झ भेजिरा, से ही आत्मा जो परमेसरा जो “हे बापू, हे बापू” बोली किन्हें पुकारी।

गलातियो 5:22

पर परमेसर रा आत्मा आस्सो जो गुण देहां से यूयाँ ऐं, प्यार, खुसी, सांति, सबर,

इफिसियो 4:4

आस्से सभ विस्वासी लोक एक ई सरीरा रे अंग ऐं, होर आस्सा सभी मन्झ एक ई पवित्र आत्मा वास करहा। ठीक तिहां ई जिहां तुस्सा जो से ही आस दितिरी थी, जेबे तुस्से परमेसरा रे लोक हूंणे रे कठे सादीरे थे।

फिलिप्पियो 1:8

क्यूंकि परमेसर मेरा गुआह आ; कि हांऊँ मसीह यीसू रे प्यारा साहीं तुस्सा सभी जो देखणे कितना चाहां।

फिलिप्पियो 3:3

क्यूंकि हकिकता मन्झ परमेसरा रे लोक आस्से ई ऐं, जो पवित्र आत्मा रे ज्रीए अराधना करहा ऐं, होर मसीह यीसू साउगी गहरी संगती रखणे मन्झ बडयाई करहा ऐं, होर आस्से आपणे कितिरे भले कामा पर भरोसा नी रख्दे।

कुलुस्सियो 2:2

हांऊँ इधी कठे मेहनत करहा ताकि तुस्सा सभी जो आत्मिक रूपा ले होंसला मिले, होर तुस्से सभ प्यारा मन्झ किन्हें मिली जुली किन्हें रहो। हांऊँ चाहां कि तिन्हो पूरा भरोसा हो क्यूंकि तिन्हो बापू परमेसर रे गुप्त विचारा री पूरी समझ ई। होर ये गुप्त विचार मसीह आपु आ।

कुलुस्सियो 3:12

क्यूंकि परमेसरा तुस्सा किन्हें प्यार करहा, होर तिन्हें तुस्से चुणिरे लितिरे कि, तुस्से तेसरे पवित्र जण बणो, इधी कठे तुस्सा मन्झ करुणा, दया, दीनता, नम्रता होर सबरा स्वभाव हो।

इब्रानियो 6:18

ता एथी फेरी दो गल्ला ई एक तेसरी वाचा होर दूजी तेसरी कसम जो कधी नी बधली सक्दी होर जिन्हारे बारे मन्झ परमेसर कधी झूठ नी बोली सकदा। इधी कठे आस्से परमेसरे वाले बचणे रे कठे आईरे होर जो आस तिन्हें आस्सो दितिरी, से पकड़ीरी, होर बौह्त ज्यादा उत्साही ई।

1 पतरस 1:2

होर परमेसर बापूए बौह्त पैहले ले ही तुस्सा जो आपणे लोक हूंणे रे कठे, होर पवित्र आत्मा रे कामा रे ज्रीए पवित्र हूंणे रे कठे चुणी लईरा था। एह्ड़ा तिन्हें इधी कठे कितेया की तुस्से यीसू मसीह रा हुक्म मान्नो, होर तेसरे खूना रे छिड़कणे ले साफ हुई जाओ। हांऊँ प्रार्थना करहा कि परमेसर तुस्सा जो बौह्त अनुग्रह होर सांति देंदा रहे।

1 यहून्ना 3:24

होर जो परमेसरा रे हुक्मा जो मन्हां, स्यों परमेसरा मन्झ वास करहा; होर परमेसर तिन्हा मन्झ वास करहा, होर इंहां ईं, तेस पवित्र आत्मा ले जो तिन्हें आस्सा जो दितिरा, एता ले आस्से जाणहां ऐं कि, परमेसर आस्सा मन्झ वास करहा।

1 यहून्ना 4:12

परमेसरा जो कधी केसिए नी देख्या; अगर आस्से एक दूजे किन्हें प्यार रखे, ता परमेसर आस्सा मन्झ वास करहा ऐं, होर तेसरा प्यार आस्सा मन्झ सिद्ध हुंहाँ।

1 यहून्ना 4:16

होर आस्से जाणी गये होर आस्सा जो विस्वास आ की परमेसर आस्सा किन्हें प्यार रख्हा। परमेसर प्यार आ, जो प्यारा मन्झ वास करहा ऐं, से परमेसरा मन्झ वास करहा ऐं; होर परमेसर तेस मन्झ वास करहा ऐं।