फिलिप्पियो 1:27 - मंडयाली नंऊँआं नियम

²⁷ बस इतना करा कि तुस्सा री जिन्दगी मसीह रे खुसी री खबरा रे लायक हुई सके। चाहे हांऊँ आई किन्हें तुस्सा जो देखूं, चाहे नी भी आऊँ, तुस्सा रे बारे मन्झ ये सुणूं कि, तुस्से एक ई इरादे ले, होर एक मन हुई किन्हें खुसी री खबरा रे विस्वासा रे कठे बड़ी मैहनत करहा ऐं।

फिलिप्पियो 1:27 Cross References

मत्ती 12:25

यीसूए तिन्हारे मना री गल्ला जाणी किन्हें तिन्हा किन्हें बोल्या, “जेस केसी राजा मन्झ फूट पई जाहीं, से उजड़ी जाहाँ, होर जेस केसी गांऊँआं या घराने मन्झ फूट पई जाहीं, तेस नी टिकणा।

चुणिरे चेले रे काम 2:46

होर स्यों हर रोज एक मन हुई किन्हें मन्दरा मन्झ कठे हुंहा ऐं थे, होर एक दूजे रे घरा मन्झ साउगी रोटी तोड़दे होर खुसी म्नांदे होर एक मन हुई किन्हें खाणे रे कठे कठा हुएं थे।

चुणिरे चेले रे काम 24:24

होर कुछ ध्याड़े ले बाद फेलिक्स हाकमे आपणी लाड़ी द्रुसिल्ला साउगी लेई किन्हें कैसरिया सैहरा मन्झ आया; होर तेसरी लाड़ी एक यहूदी ज्नाने थी। फेलिक्से पौलुसा जो सादी किन्हें तेस विस्वासा रे बारे मन्झ जो यीसू मसीह पर आ, तेस ले सुणेया।

चुणिरे चेले रे काम 4:32

होर विस्वास करणे वाल़ेया री मण्डली एक चित होर एक मना रे थे एथी तक कि कोई भी आपणी जायदाद आपणी नी बोल्दा था, पर सभ चीजा तिन्हा वाले बांडा री थी।

रोमियो 1:16

क्यूंकि हांऊँ खुसी री खबर सुनाणे ले नी सरमान्दा। इधी कठे कि खुसी री खबर परमेसरा री सामर्थ ई जो सब विस्वास करणे वाले रा उद्धार करहा ई, सभी ले पैहले ता यहूदी लोका रा, फेरी गैर-यहूदी लोका रा।

रोमियो 1:5

मसीह रे ज्रीए परमेसरे आस्सा जो चुणिरे चेले हूंणे रा सौभाग्य होर हक दितिरा कि आस्से मसीह रे कठे सारे जातिया रे लोका जो ये दसी सके कि परमेसरे तिन्हारे कठे क्या कितिरा। जेसरे ज्रीए स्यों मसीह पर विस्वास करी किन्हें तेसरे हुक्मा जो मने।

रोमियो 1:9

परमेसर मेरा गुआह आ कि, कियां हांऊँ तुस्सा सभी जो आपणी प्रार्थना मन्झ लगातार याद करदा रैंहयां। से परमेसर, जेसरे मह्ठे री खुसी री खबरा जो हांऊँ पुरे मना किन्हें प्रचार करहा।

रोमियो 10:8

पर एह्ड़ा लिखिरा कि, “परमेसरा रा वचन तेरे वाले आ, होर तेजो तुस्से आपणे मुंहा ले बोली सके होर आपणे दिला मन्झ मन्हां ईं सके।” ये सेई विस्वासा रा बचन आ, जो आस्से प्रचार करहा ऐं।

रोमियो 15:16

कि हांऊँ अन्यजाति रे लोका रे कठे मसीह यीसू रा सेऊआदार हुई किन्हें एक याजका साहीं परमेसरा रे वखा ले खुसी री खबरा रा प्रचार करहा। जेस ले अन्यजाति लोका जो जिन्हा जो पवित्र आत्मे पवित्र कितिरा, तिन्हा जो हांऊँ परमेसरा जो चढावे मन्झ चढ़ाई सकूं, जेस ले परमेसरा खुस हूंणा।

रोमियो 15:29

होर हांऊँ जाणहां कि, जेबे मां तुस्सा वाले आऊंणा, ता तुस्सा मेरे साउगी मसीह रे दितिरी महान आसीसा मन्झ साझीदार बणना।

1 कुरिन्थियो 1:10

हे भाईयो होर बैहणो, आस्सा रे प्रभु यीसू मसीह रे हका ले हांऊँ आपणे दिला ले अर्ज करहा कि तुस्से सभ एक दूजे किन्हें राजी हुई किन्हें एक ई गल बोला; होर तुस्से झगड़ा करी किन्हें लग नी हो। पर एता रे बजाय हांऊँ तुस्सा किन्हें विनती करहा कि एक दूजे किन्हें मिली जुली कर एक ही प्रकारा रा सोच-विचार होर एक ऐं मकसद रखो।

1 कुरिन्थियो 15:58

इधी कठे हे मेरे प्यारे भाईयो होर बैहणो, आपणे विस्वासा मन्झ मजबूत रैहया, कोई तुस्सा जो नी भड़काए, होर प्रभु रे कामा मन्झ हमेसा बढ़दे जाऊआ, क्यूंकि तुस्से जाणहां ऐं कि, तुस्से प्रभु रे कठे मैहनत करहे, से बेकार नी ई।

2 कुरिन्थियो 13:11

हे भाईयो होर बैहणो, ऐबे आखरी मन्झ हांऊँ बोलणा चांहा कि, खुस रैहया, सिद्ध बणदे जाऊआ, होर एक दूजे जो उत्साहित करो, एक ही मन रखा, मिली जुली किन्हें सांति किन्हें रैंहयां, तुस्सा किन्हें प्यार करणे वाल़ा होर सांति देणे वाल़ा परमेसरा तुस्सा साउगी रेहणा।

2 कुरिन्थियो 4:4

होर तिन्हा अविस्वासी लोका रे कठे, जिन्हारी बुद्धि ऐस संसारा रे इस्वर सैताने काणी करी दितीरी, ताकि स्यों मसीह री खुसी री खबरा जो होर तेसरी महिमा जो नी समझी सके। होर मसीह ही परमेसरा रा स्वरूप आ।

2 कुरिन्थियो 9:13

क्यूंकि तुस्सा री मदद करणे रे कठे ढब्बे देणे री सेऊआ जो सबूत मनी किन्हें कई लोका परमेसरा री बड़ाई करणी, क्यूंकि तुस्से मसीह री खुसी री खबरा जो ग्रहण करी किन्हें मनी लितिरा, तिन्हा गरीब विस्वासी लोका री होर दूजे विस्वासी लोका री मदद करणे मन्झ उदारता जाहिर करदे रैंहयां ऐं।

गलातियो 1:7

पर कोई दूजा उपदेस ता हाया नी, पर सिर्फ मसीह री सच्ची खुसी री खबर ई। पर कुछ लोक एह्ड़े ऐं, जो मसीह री खुसी री खबरा रे मतलबा जो बदलना चाहें, होर तिन्हें तुस्सा जो धोखा दितिरा।

इफिसियो 1:13

होर तुस्सा साउगी भी एह्ड़ा हुईरा। तुस्से सच्ची खबर सुणी जो एस गल्ला री खुसी री खबर ई कि परमेसर किहाँ तुस्सा रा उद्धार करहा। होर जेबे तुस्से यीसू मसीह पर विस्वास कितेया ता परमेसरे तुस्सा जो से पवित्र आत्मा दिती, जेता रा देणे रा वादा तिन्हें आपणे लोका किन्हें कितिरा था। होर ये पवित्र आत्मा एस गल्ला री छाप ई कि तुस्से परमेसरा रे।

इफिसियो 1:15

परमेसरे जो कुछ कितिरा तेता री वजहा ले, जेबे मैं ये सुणेया कि तुस्से मसीह यीसू पर विस्वासा करहे, होर तुस्से सभ परमेसरा रे पवित्र लोका किन्हें प्यार करहे,

इफिसियो 4:1

इधी कठे हांऊँ, जो प्रभु यीसू री सेऊआ करणे री वजहा ले जेल्हा मन्झ कैद आ, तुस्सा ले अर्ज करहा कि, जेस बुलाहटा ले परमेसरे तुस्से आपणे लोक हूंणे रे कठे सादीरे, तेता रे मताबक आपणी जिन्दगी जीया।

फिलिप्पियो 1:5

इधी कठे कि, तुस्से पैहले ध्याड़े ले जेबे तुस्से खुसी री खबर पर विस्वास कितेया था ता आजा तक खुसी री खबर फैलाणे मन्झ मेरे साथी रहे।

फिलिप्पियो 2:12

हे लाडले भाईयो होर बैहणो, जेबे हांऊँ तुस्सा साउगी था ता तुस्से हमेसा ले मेरी बिधिया मनी री। होर ऐबे जेबे हांऊँ तुस्सा ले दूर आ ता तिन्हा बिधिया जो मनणा तुस्सा रे कठे होर भी ज्यादा जरूरी आ। डर किन्हें होर बड़ी इज्जत साउगी परमेसरा रे हुकमा जो मना। होर आपणे उद्धारा रे कामा जो पूरा करणे रे कठे कड़ी मेहनत करा।

फिलिप्पियो 2:24

होर मुंजो प्रभु मन्झ भरोसा आ कि, मां आपु भी तुस्सा वाले जल्दी आई जाणा।

फिलिप्पियो 3:18

क्यूंकि बौह्त लोक एह्ड़ी जिन्दगी जिए, जिन्हारे बारे मन्झ मैं तुस्सा जो बार-बार बोलिरा, होर ऐबे भी रोई-रोई किन्हें बोल्हा कि स्यों आपणी जिन्दगी जीणे रे ढंगा ले मसीह रे क्रूसा री मौता जो बेकार बनाई देआ ऐं।

फिलिप्पियो 3:20

पर आस्सा रा आपणा देस स्वर्गा मन्झ आ होर सच्चे आस्सा रा घर एस संसारा मन्झ नी आ। होर तेथी ले आस्से आपणे उद्धार करणे वाले प्रभु यीसू मसीह रे आऊणें रा इंतजार करेया करहा ऐं।

फिलिप्पियो 4:1

इधी कठे हे लाडले भाईयो होर बैहणो, हांऊँ तुस्सा किन्हें प्यार रखा होर मुंजो तुस्सा लोका किन्हें मिलणे री बढ़ी इच्छा ई। तुस्से लोक मेरे खुसी होर मेरे ताज ऐं, होर तुस्से प्रभु पर आपणे विस्वासा मन्झ मजबूत बणी रहा।

कुलुस्सियो 1:10

ताकि तुस्से परमेसरा री इच्छा रे मताबक आपणी जिन्दगी जी सको। तेबे तुस्सा हर गल्ला मन्झ प्रभु खुस करणा। जेस ले तुस्सा हमेसा हर किस्मा रे भले काम करी सको, होर तुस्से हमेसा परमेसरा जो जाणने मन्झ बढ़दे जाओ।

कुलुस्सियो 1:4

क्यूंकि आस्से सुणिरा कि, तुस्से मसीह यीसू पर विस्वासा करहे, होर तुस्से सभ परमेसरा रे पवित्र लोका किन्हें प्यार करहे।

1 थिस्सलुनकियो 3:6

पर ऐबे तिमिथियुस तुस्सा रे विस्वास होर प्यारा री खरी खबर लई किन्हें आस्सा वाले वापस आई गईरा। तिन्हें ये भी सुणाया कि तुस्से आस्सा जो बड़े प्यार किन्हें याद करहा ऐं, होर जिहां आस्से तुस्सा जो देखणे रे कठे तरस्या करहा ऐं, तिहां ईं तुस्से भी आस्सा जो देखणे रे कठे तरस्या करहा ऐं।

1 थिस्सलुनकियो 4:1

हे भाईयो होर बैहणो ऐबे आखरी, आस्से तुस्सा ले अर्ज करहा ऐं, होर तुस्सा जो प्रभु यीसू मन्झ सम्झाहें कि, जिहां तुस्से आस्सा ले ठीक व्यवहार रखणा, होर परमेसरा जो खुस करणा सिख्या, होर तुस्से ठीक व्यवहार रख्हा ऐ भी, तिहां ईं इन्हा गल्ला मन्झ होर बी ज्यादा बढ़दे जाऊआ।

1 तिमिथियुस 1:11

ये सच्चा उपदेस आस्सा रे परमप्रधान परमेसरा री महिमा री खुसी री खबरा रे मताबक ई, जिन्हें मुंजो एता री प्रचार करणे री जिम्मेदारी दितिरी।

1 तिमिथियुस 1:19

तुस्सा रा मसीह पर विस्वास बणेया रहे, होर साफ अंतरात्मा हो। कुछ लोके आपणी एस साफ अंतरात्मा जो नकारी दितिरी, जेसरी वजहा ले तिन्हारा विस्वास रूपी जहाज डूबी गया।

2 तिमिथियुस 4:7

एक खरे स्पाही साहीं जो लड़ाई रे टैम कधी हिम्मत नी हारदा, मैं मसीह रे कामा जो पूरा करणे रे कठे बौह्त मेहनत कितिरी, होर मसीह पर मेरा विस्वास कधी नी बदली रा।

तितुस 2:10

चोरी, चलाकी नी करहे; पर एस गल्ला जो साबित करहे कि स्यों हमेसा ईमानदार ऐं, ताकि जो कुछ स्यों करहे लोक तिन्हारे खरे स्वभावा जो देखी किन्हें आस्सा रे उद्धारकर्ता परमेसरा रे उपदेसा रे बारे मन्झ सुणने री इच्छा करहे।

फिलेमोन 1:5

लोके मुंजो दसेया कि तुस्से हमेसा प्रभु यीसू मसीह पर विस्वास रखे होर सभ परमेसरा रे पवित्र लोका किन्हें प्यार करहे।

याकूब 3:18

जेबे सांति फैलाणे वाले सांति रा बेजा बायें तेबे तिन्हा धार्मिकता रा फसल काटणी।

2 पतरस 3:11

जेबे कि परमेसरा एस तरीके किन्हें इन्हा सभी चीजा रा नास करणा; ता तुस्सा जो पवित्र होर सच्ची भक्ति री जिन्दगी जीणी चहिए।

2 पतरस 3:14

इधी कठे, हे लाडले भाईयो होर बैहणो, जेबे तुस्से तेस ध्याड़े रा इंतजार करहे जेबे परमेसरा संसारा रा न्याय करणा, ता पूरी कोसिस करा कि आपणे आपा जो बेदाग होर बेकसूर होर तेसरे साउगी सांति मन्झ रखी पाओ।

यहूदा 1:3

हे लाडले भाईयो होर बैहणो, हालांकि हांऊँ मना ले चाहां था कि परमेसरा ले आस्सा जो मिलणे वाले उद्धारा रे बारे मन्झ तुस्सा जो लिखूं जेसरे आस्से सभ साझी ऐं, पर ऐबे मैं ये जरूरत मैहसूस किती कि हांऊँ तुस्सा जो इधी कठे लिखूं कि तुस्से हिम्मत पाई किन्हें सच्चे उपदेसा रा बचाव करी सको, परमेसरे आस्सा जो ये सच्चाई आपणे पवित्र लोका रे कठे एक बारी ही देई दितिरी जेस्सा कधी नी बदलना।