फिलिप्पियो 1:20 - मंडयाली नंऊँआं नियम

²⁰ मेरे दिला री आस होर सभी ले बड़ी इच्छा ता येई कि, केसी गल्ला मन्झ हांऊँ सर्मिन्दा नी होऊं। पर हमेसा निधड़क हुई किन्हें मसीह रे बारे मन्झ प्रचार करु जिहां हांऊँ पैहले करहा था। चाहे हांऊँ जिउंदा रहूं या मरी जाऊं मेरी जिन्दगी रे ज्रीए मसीह री बढ़ाई हमेसा करदा रैहणा।

फिलिप्पियो 1:20 Cross References

यहून्ना 21:19

यीसूए इन्हा गल्ला ले पतरसा जो ये दसी दितेया कि तेस कियां मरणा होर तेसरे मरणे ले परमेसरा री महिमा हूणीं। होर तिन्हें ये बोली किन्हें तेस किन्हें बोल्या, “आ मेरा चेला बण।”

चुणिरे चेले रे काम 20:24

पर मेरे कठे, मेरे जाना री कोई कीमत नी ई; मैं ता बस तेस दौड़ा जो होर सेऊआ जो पूरी करणा चाहां; जो मैं परमेसरा री अनुग्रह रे खुसी री खबरा पर गुआही देणे रे कठे प्रभु यीसू ले पाईरी थी।”

चुणिरे चेले रे काम 21:13

एता पर पौलुसे जवाब दितेया कि, “तुस्से क्या करेया करहा ऐं कि, रोई-रोई किन्हें मेरा दिल तोड़हा ऐं, हांऊँ ता प्रभु यीसू रे नांऊँआं रे कठे यरुस्लेम सैहरा मन्झ सिर्फ बान्हेया जाणे रे कठे नी, पर मरणे रे कठे भी त्यार आ।”

चुणिरे चेले रे काम 4:31

जेबे स्यों प्रार्थना करी बैठे, ता से जगहा जेथी स्यों कठे हुईरे थे हिल्ली गया, होर स्यों सभ पवित्र आत्मा किन्हें भर्ही गऐ, होर परमेसरा रा बचन न्डरे सुणान्दे रैहे।

रोमियो 12:1

इधी कठे हे भाईयो होर बैहणो, हांऊँ तुस्सा किन्हें परमेसरा री दया याद दिलाई किन्हें बिनती करहा कि आपणे आपा जो ही जिउंदे होर पवित्र, होर परमेसरा जो खुस करणे वाले बलिदान रे रूपा मन्झ चढ़ाऊआ; येई परमेसरा री अराधना करणे रा सच्चा तरीका आ।

रोमियो 5:5

होर ये आस आस्सा जो दुआस नी करदी क्यूंकि परमेसरे आस्सा जो पवित्र आत्मा दितिरी, होर से पवित्र आत्मा आस्सा रे दिला जो परमेसरा रे प्यारा किन्हें भरा।

रोमियो 6:13

होर आपणे सरीरा रे अंगा जो बुरी काम करणे रे कठे पाप जो ना सौंपा, पर आपणे आपा जो मरिरे मन्झा ले जिउंदा जाणी किन्हें आपणी जिन्दगी परमेसरा जो सौंपा। आपणे सरीरा रे अंगा जो धार्मिकता रे कामा रे कठे परमेसरा जो पूरी तरहा सौंपा।

रोमियो 6:19

केसी रे गुलाम हूंणे रे उदाहरणा जो हांऊँ इधी कठे देई करहा कि आम आदमी भी बड़ी असानी किन्हें समझी सके, क्यूंकि तुस्से हाल्ले भी आत्मिक सच्चाई जो समझणे रे कठे नासमझ ऐं। जिहां तुस्सा री पुराणी जिन्दगी मन्झ तुस्सा रे सरीरा रे अंग बुरी इच्छा रे गुलाम थे होर तुस्से हर किस्मा रे असुद्ध काम करहा ऐं थे, तिहां ईं ऐबे तुस्से आपणे सरीरा रे अंगा जो धार्मिकता रे काम करणे रे कठे परमेसरा रे गुलाम बणाऊआ, ताकि तुस्से पवित्र जिन्दगी जी सको।

रोमियो 8:19

क्यूंकि सारी रचिरी चीजा बड़ी आसा ले तेस ध्याड़े रा इंतजार करेया करहा ई, जेबे परमेसरा ये जाहिर करी देणा कि तेसरे सच्चे बच्चे कुणहें?

रोमियो 9:33

जिहां परमेसर पवित्र सास्त्रा मन्झ यीसू मसीह रे बारे मन्झ बोल्हा, “देखा हांऊँ सिय्योन सैहरा मन्झ लोका जो ठेस लगणे वाल़ा एक पात्थर, होर ठोकर खाणे री चटान रख्हा, होर जो तेस पर विस्वास करघा, तेस कधी भी सर्मिन्दा नी हूंणां।”

1 कुरिन्थियो 15:31

हे भाईयो होर बैहणो, जिहां ये गल पक्की कि तुस्सा रे मसीह यीसू किन्हें जुड़ने री वजहा ले हांऊँ बडयाई करहा, ता ये गल भी पक्की हांऊँ हर रोज मरणे रे खतरे मन्झ आ।

1 कुरिन्थियो 6:20

क्यूंकि परमेसरे तुस्सा रे कठे बौह्त बडी कीमत चुकाईरी, जेबे तिन्हें यीसू मसीह जो क्रूसा प्रयाल्हे बलिदान कितेया, इधी कठे आपणे सरीरा ले परमेसरा री महिमा करा।

1 कुरिन्थियो 7:34

होर इधी कठे से दो गल्ला रे बारे मन्झ सोचदा रैहया, एक तेस जो आपणी लाड़ी जो खुस करणा होर दूजा प्रभु जो खुस करणा। ब्याहिरी होर कुआरी मन्झ भी फर्क आ: कुआरी प्रभु री सेऊआ रे बारे मन्झ सोच्दी रैंहयां ईं, ताकि किहाँ से सरीरा होर आत्मा दुंहीं किन्हें परमेसरा जो खुस करी सके; पर ब्याहिरी ज्नाने, संसारा री चीजा रे बारे मन्झ सोच्दी रैंहयां ईं कि, से आपणे लाड़े जो किहाँ खुस रखे।

2 कुरिन्थियो 10:8

क्यूंकि अगर हांऊँ तेस हका रे बारे मन्झ होर भी गर्व दस्सुं, जो प्रभुए तुस्सा रे विस्वास जो खत्म करणे रे कठे नी, पर तुस्सा जो विस्वासा मन्झ बढ़ने री मदद रे कठे दितिरा। ता एह्ड़ा करणे ले मां सर्मिन्दा नी हूंणां।

2 कुरिन्थियो 3:12

इधी कठे एह्ड़ी आस रखी किन्हें आस्से बड़ी हिम्मता साउगी बोल्हा ऐं,

2 कुरिन्थियो 4:10

आस्से हमेसा तिन्हा गल्ला जो आपणे सरीरा मन्झ सैहन करहे, जेहड़ी यीसूऐ मरदे हुए सैहीरा था; ताकि आस्सा रे कामा ले लोक यीसू री जिन्दगी रे बारे मन्झ जाणी सके।

2 कुरिन्थियो 5:15

होर मसीह इधी कठे सभी रे कठे मरी गया, ताकि जो लोक जिउंदे ऐं, स्यों अगे जो आपणे कठे नी जीये बल्की तेसरे कठे जीये, जो तिन्हारे कठे क्रूसा प्रयाल्हे मरेया होर दबारा जिउंदा हुआ।

2 कुरिन्थियो 7:14

क्यूंकि अगर मैं तितुसा रे साम्हणें तुस्सा रे बारे मन्झ कुछ गर्व कितेया हो, ता हांऊँ सर्मिन्दा नी हुआ, बल्की जिहां आस्से तुस्सा साउगी सब गल्ला सच्च -सच्च बोली दिती थी, तिहां ईं आस्सा रा गर्व जाहिर करणा तितुसा रे साम्हणें भी सच्च साबित हुआ।

2 कुरिन्थियो 7:4

हांऊँ तुस्सा किन्हें बड़ी हिम्मत रखी किन्हें बोल्या करहा, मुंजो तुस्सा पर बौह्त गर्व आ। मुंजो बौह्त तस्सली मिलिरी, आपणे सारे दुःखा मन्झ हांऊँ खुसी किन्हें भरपूर रैंहयां।

फिलिप्पियो 1:14

मेरे जेल्हा मन्झ हूंणे री वजहा ले प्रभु मन्झ बौह्त सारे विस्वासी भाई बैहणा जो होंसला मिलिरा। स्यों प्रभु पर विस्वास रखी किन्हें पैहले ले ज्यादा हिम्मता साउगी निधड़क हुई किन्हें परमेसरा रा बचन सुणां ऐ।

फिलिप्पियो 2:17

जेबे मै तुस्सा जो खुसी री खबर सुणाई तुस्से प्रभु यीसू पर विस्वास करी किन्हें आपणी जिन्दगी सेऊआ रे कठे बलिदान किती। होर एस वजहा मुंजो मरणा भी पो, तेबे भी हांऊँ खुस आ, होर तुस्सा सभी साउगी खुसी मनाणी।

कुलुस्सियो 1:24

ऐबे हांऊँ खुस आ कि हांऊँ तुस्सा रे कठे दुःख सही सक्हा। होर इधी कठे भी खुस आ कि हांऊँ आपणे सरीरा मन्झ लगातार तिन्हा दुखा जो सहेया, जो मसीहे सहीरे थे। होर ये दुःख हांऊँ मसीह री कलीसिया रे कठे सहेया जो तेसरा सरीर आ।

1 थिस्सलुनकियो 5:23

सांति देणे वाल़ा परमेसर आपु ई तुस्सा जो पूरी तरहा ले पवित्र करहे; होर तुस्सा री पूरी आत्मा होर प्राण होर सरीर आस्सा रे प्रभु यीसू मसीह रे दबारा वापस आऊणें रे ध्याड़े तक बेकसूर होर सुरक्षित रहे।

1 पतरस 4:16

पर अगर मसीहा रे लोक हूंणे री वजहा ले दुःख सहे, ता सर्मिन्दे नी हो, पर एस गल्ला रे कठे परमेसरा री बड़ाई करहा की तुस्से एक विस्वासी ऐं।

1 यहून्ना 2:28

हे लाडले भाईयो होर बैहणो, मसीह मन्झ वास करहा; कि जेबे तेस दबारा वापस आऊंणा, ता आस्सा जो हिम्मत हो, होर आस्से तेसरे साम्हणें बेजत नी हो।