फिलिप्पियो 1:1 - मंडयाली नंऊँआं नियम

¹ हांऊँ पौलुस, तिमिथियुस साउगी ये चिठ्ठी लिखी करहा, होर आस्से यीसू मसीह रे सेऊआदार ऐं। हांऊँ ये चिठ्ठी फिलिप्पी सैहरा मन्झ रैहणे वाले परमेसरा रे पवित्र लोका रे कठे होर कलीसिया रे अगुवे होर सेऊआदारा रे नांऊँ लिख्या करहा।

फिलिप्पियो 1:1 Cross References

मरकुस 13:34

तेसरा आऊंणा तेस माह्णुं साहीं हूंणां, जिहां एक माह्णुं परदेसा जांदे वक्त आपणा घर छाडी जाए। होर आपणे नौकरा जो हक दे, होर हर एकी जो तेसरा काम समझाई दे, होर चौकीदारा जो जागदे रैहणे रा हुक्म दे।

यहून्ना 12:26

अगर जो कोई मेरी सेऊआ करणा चाहां, ता से आई किन्हें मेरा चेला बणे; होर जेथी हांऊँ आ तेथी मेरा सेऊआ करणे वाल़ा भी हूंणां। अगर कोई मेरी सेऊआ करघा, ता बापू तेसरी इज्जत करणी।”

चुणिरे चेले रे काम 1:20

क्यूंकि भजन संहिता मन्झ दाउद लिख्हा कि, तेसरा घर उजड़ी जाए, होर तेता मन्झ कोई बसणे ना पाए; होर, तेसरे अगुवे री पदवी जो कोई होर लई ले।

चुणिरे चेले रे काम 20:28

“इधी कठे आपणी होर आपणे झुंडा री चौकसी करा; जेस ले पवित्र आत्मे तिन्हा जो कलीसिया रे अगुवे ठैहराईरा: ताकि तुस्से परमेसरा री तेस कलीसिया रा ध्यान रखा, जेस जो तिन्हें आपणे खूना रे बदले खरदी लईरा था।

चुणिरे चेले रे काम 9:13

हनन्याहे जवाब दितेया, “प्रभु, मैं एस आदमी रे बारे मन्झ बौह्त लोका ले सुणिरा कि, इन्हें यरुस्लेम सैहरा मन्झ तेरे परमेसरा रे पवित्र लोका साउगी बडी-बडी बुराईया कितिरी।

रोमियो 1:1

हांऊँ पौलुस ये चिट्ठी लिख्या करहा। हांऊँ यीसू मसीहा रा सेऊआदार आ। परमेसरे एक चुणिरा चेले रे रूपा मन्झ मेरा चुणाव कितेया, होर परमेसरे हांऊँ खुसी री खबर सुनाणे रे कठे नियुक्त कितिरा।

रोमियो 1:7

ये चिठ्ठी रोम सैहरा रे लोका रे कठे ई, जिन्हा किन्हें परमेसर प्यार करहा होर आपणे पवित्र लोक हूंणे रे कठे चुणिरे। आस्से प्रार्थना करहे कि आस्सा रा बापू परमेसर होर प्रभु यीसू मसीह तुस्सा जो अनुग्रह होर सांति देंदा रहे।

1 कुरिन्थियो 16:10

अगर तिमिथियुस कुरुन्थी सैहरा मन्झ आई जाए, ता तेसरा आदर-खातर इज्जता किन्हें करेया, क्यूंकि से मेरे साहीं प्रभु रा काम करहा।

2 कुरिन्थियो 1:1

हांऊँ पौलुसा ये चिठ्ठी तुस्सा रे कठे लिख्दा लगिरा। हांऊँ परमेसरा री इच्छा ले मसीह यीसू रा चुणिरा चेला आ। होर मसीह मन्झ आस्सा रा भाई तिमिथियुस मेरे साउगी आ। हांऊँ ये चिठ्ठी कुरिन्थुस सैहरा रे परमेसरा री कलीसिया रे लोका रे कठे होर सारे अखाया ईलाके रे सब परमेसरा रे पवित्र लोका रे कठे लिखी करहा।

गलातियो 1:10

ऐबे हांऊँ सिर्फ परमेसरा री राजी चाहां, होर कोई दूजे लोका री नी, होर हांऊँ केसी माह्णुंआं जो खुस करणे री कोसिस नी करदा लगिरा। अगर हांऊँ एह्ड़ा ही करदा, ता हांऊँ मसीह रा सेऊआदार नी हुन्दा।

गलातियो 3:26

होर जेबे तुस्से मसीह रे नांऊँआ रा बपतिस्मा लितिरा था, तुस्से मसीह रे स्वभावा जो इंहां पैहनी लितेया, जिहां कोई नंऊँऐं कपड़े पैहना। इधी कठे जेबे तुस्से मसीह यीसू पर विस्वास कितेया, ता तुस्से सब परमेसरा रे बच्चे बणी गईरे।

गलातियो 3:28

इधी कठे मसीह मन्झ ऐबे ना कोई यहूदी लोक आ, होर ना कोई गैर-यहूदी लोक ऐं; ना कोई गुलाम आ, ना कोई अजाद आ; ना कोई मर्ध आ, ना कोई ज्नाने ई; क्यूंकि तुस्से सभ यीसू मसीह मन्झ एक ऐं।

इफिसियो 1:1

हांऊँ पौलुस, एस्सा चिठ्ठी जो लिखी करहा। होर हांऊँ परमेसरा री इच्छा ले यीसू मसीह रा चुणिरा चेला हूंणे रे कठे चुणिरा। हांऊँ ये चिठ्ठी इफिसुस सैहरा मन्झ रैहणे वाले तुस्से, जो परमेसरा रे पवित्र लोका ऐं, तुस्सा रे कठे लिखी करहा।

इफिसियो 1:15

परमेसरे जो कुछ कितिरा तेता री वजहा ले, जेबे मैं ये सुणेया कि तुस्से मसीह यीसू पर विस्वासा करहे, होर तुस्से सभ परमेसरा रे पवित्र लोका किन्हें प्यार करहे,

इफिसियो 6:24

हांऊँ प्रार्थना करहा जो आस्सा रे प्रभु यीसू मसीह किन्हें सच्चा प्यार करहा ऐं, परमेसर तिन्हा सभी जो आपणा अनुग्रह दे।

फिलिप्पियो 2:19

मुंजो प्रभु यीसू मन्झ आस ई कि, मां तिमिथियुसा जो झटपट तुस्सा वाले भेजी देणा, ताकि तुस्सा रा हाल सुणी किन्हें मुंजो हिम्मत मिली सके।

फिलिप्पियो 2:5

जेह्ड़ा मसीह यीसू रा स्वभाव था, तेह्ड़ा ई तुस्सा रा स्वभाव भी हो।

फिलिप्पियो 3:12

ये मतलब नी आ कि, हांऊँ ये सारी गल्ला पाई लितिरी; या सिद्ध हुई चुकिरा। पर हांऊँ कोसिस साउगी आगे बढ़दा लगिरा कि मुंजो से मिली जाए, जेसरे कठे मसीह यीसू हांऊँ चुणी लईरा।

फिलिप्पियो 3:3

क्यूंकि हकिकता मन्झ परमेसरा रे लोक आस्से ई ऐं, जो पवित्र आत्मा रे ज्रीए अराधना करहा ऐं, होर मसीह यीसू साउगी गहरी संगती रखणे मन्झ बडयाई करहा ऐं, होर आस्से आपणे कितिरे भले कामा पर भरोसा नी रख्दे।

फिलिप्पियो 3:8

क्यूंकि हांऊँ आपणे मसीह जो जाणना चाहां, जो सभ चीजा ले कीमती आ, इधी कठे मैं इन्हा सारी चीजा जो बेकार समझा। मैं सभ चीजा जो छाडी दितेया, होर तिन्हा चीजा जो हांऊँ कूड़ा सम्झहा, ताकि हांऊँ यीसू मसीह जो जाणी सकूं।

1 थिस्सलुनकियो 1:1

हांऊँ पौलुस, सिलास होर तिमिथियुस साउगी ये चिठ्ठी लिखी करहा। आस्से ये चिठ्ठी थिस्सलुनिके सैहरा री कलीसिया रे लोका रे कठे लिख्या करहा ऐं, जो बापू परमेसर होर प्रभु यीसू मसीह रे लोक ऐं। परमेसर तुस्सा जो अनुग्रह होर सांति दे।

1 थिस्सलुनकियो 2:2

बल्की तुस्से आपु ई जाणहां ऐं कि, फिलिप्पी सैहरा मन्झ दुःख उठाणे होर दंगे सैहणे ले बाद भी आस्सा जो परमेसरे एह्ड़ी हिम्मत दिती कि लोका रा घोर व्रोध करणे पर भी तुस्सा रे सैहरा मन्झ भी आस्से तुस्सा जो परमेसरा री खुसी री खबर सुणाई सके।

2 थिस्सलुनकियो 1:1

हांऊँ पौलुस, सिलास होर तिमिथियुस साउगी ये चिठ्ठी लिखी करहा। आस्से ये चिठ्ठी थिस्सलुनिके सैहरा री कलीसिया रे विस्वासी लोका रे कठे लिख्या करहा ऐं, जो आस्सा रे बापू परमेसर होर प्रभु यीसू मसीह रे लोक ऐं।

2 थिस्सलुनकियो 1:10

ये गल्ला तेबे हूणीं जेबे यीसू मसीह दबारा वापस आऊंणा, होर परमेसरा रे पवित्र लोका तेसरी बढ़ाई करणी, होर तेस पर विस्वास करणे वाले मन्झ हरानी री वजहा बणने रे कठे आऊंणा। होर तुस्से भी तिन्हा लोका साउगी हूंणा जिन्हा तेस ध्याड़े तेसरी बढ़ाई करणी, क्यूंकि तुस्से तेसरे बारे मन्झ आस्सा री गुआही पर विस्वास कितेया।

1 तिमिथियुस 1:2

हे तिमिथियुस, हांऊँ ये चिठ्ठी तुजो लिखी करहा, तू मेरे आपणे मह्ठे साहीं आ क्यूंकि तू भी मसीह पर विस्वास रखा। हांऊँ प्रार्थना करहा कि बापू परमेसर होर आस्सा रा प्रभु मसीह यीसू तुजो अनुग्रह, दया, होर सांति देंदा रहे।

1 तिमिथियुस 3:8

कलीसिया रे अगुवे साहीं कलीसिया रे सेऊआदार भी एह्ड़े लोक हो जिन्हारी लोक इज्जत करदे हो, होर जो कुछ स्यों बोलदे हो तेता मन्झ इमानदार हो, सराबी होर दूजेया जो धोखा देई किन्हें पैसे कमाणे वाले नी हो।

तितुस 1:1

हांऊँ पौलुस, एस्सा चिठ्ठी जो लिख्या करहा। हांऊँ परमेसरा रा सेऊआदार होर यीसू मसीह रा चुणिरा चेला आ। हांऊँ परमेसरा रे चुणिरे लोका रे विस्वासा जो मजबूत करणे रे कठे नियुक्त कितिरा, ताकि स्यों सच्चा जो जाणे होर परमेसरा जो खुस करणे वाली जिन्दगी जीए।

तितुस 1:7

होर एक कलीसिया रा अगुवा परमेसरा रा भंडारी हूंणे री वजहा ले बेकसूर हूंणां चहिए; ना हठी, ना गुस्सा करणे वाल़ा, ना दारुबाज, ना मारपीट करणे वाल़ा हो, होर ना दूजेया जो धोखा देई किन्हें पैसे कमाणे री इच्छा रखदा हो।

फिलेमोन 1:1

हांऊँ पौलुसा एस चिठ्ठी जो लिखी करहा। हांऊ जेल्हा मन्झ आ, क्यूंकि हांऊँ मसीह यीसू रे बारे मन्झ प्रचार करहा। मेरे होर आस्सा रे भाई तिमिथियुस री वखा ले तुस्सा जो नमस्कार। हे फिलेमोन, तू आस्सा रा लाडला दोस्त होर सहकर्मी आ। होर ये चिठ्ठी तेरे कठे ई।

इब्रानियो 13:23

तुस्से ये जाणी लऊआ कि तिमिथियुस आस्सा रा विस्वासी भाई जेल्हा ले छुटी गया होर अगर से जल्दी एथी मेरे वाले आई गया, ता मां तेस साउगी तुस्सा किन्हें मिलणे रे कठे आई जाणा।

याकूब 1:1

हांऊँ याकूब, परमेसरा होर प्रभु यीसू मसीह रा सेऊआदार आ। हांऊँ ये चिठ्ठी तिन्हा यहूदी विस्वासिया रे बारा गोत्रा जो संसारा मन्झ तितर-बितर हुई किन्हें रैंहयां ऐं लिख्दा लगिरा। तुस्सा सभी जो मेरा नमस्कार।

1 पतरस 2:25

क्यूंकि तुस्से पैहले तिन्हा भेडा साहीं थे, जो आपणे रस्ते ले भटकी गईरी थी। पर ऐबे तुस्से मसीह वाले वापस आई गईरे जो तुस्सा रा रखवाला होर पुहाल आ।

2 पतरस 1:1

हांऊँ समौन पतरस तुस्सा रे कठे ये चिठ्ठी लिखी करहा। हांऊँ यीसू मसीह रा सेऊआदार होर चुणिरा चेला आ। हांऊँ ये चिठ्ठी तुस्सा सभी रे कठे लिखी करहा, जो आस्सा साहीं तेस कीमती विस्वास रा साझा करहे, जो आस्सा जो आस्सा रे परमेसर होर उद्धारकर्ता यीसू मसीहे दितिरा। से आस्सो परमेसरा री नजरा मन्झ धर्मी बणा।

यहूदा 1:1

हांऊँ यहूदा एस चिठ्ठी जो लिखी करहा। हांऊँ यीसू मसीहा रा सेऊआदार होर याकूबा रा छोटा भाई आ। परमेसरे जिन्हा लोका जो आपणे गास विस्वास करणे रे कठे सादिरे, हांऊँ तिन्हा लोका जो ये चिठ्ठी लिखी करहा। बापू परमेसर तुस्सा किन्हें प्यार करहा होर यीसू मसीहा रे ज्रीए तुस्से सुरक्षित ऐं।

प्रकासना री गल्ला 1:1

एस कताबा मन्झ स्यों गल्ला ई जेसरा प्रकासन परमेसरे यीसू मसीह जो दितिरा। ताकि से आपणे सेऊआदारा जो स्यों लुख्ही री गल्ला जिन्हारा जल्दी हूंणा बौह्त जरूरी आ दसी सके। तेबे यीसूए आपणे स्वर्गदूता जो भेजेया कि, से इन्हा गल्ला जो तेसरे सेऊआदार यहून्ना जो दसी सके।

प्रकासना री गल्ला 1:20

इन्हा सात तारे रा जो तैं मेरे सीधे हाथा मन्झ देखिरे थे, होर तिन्हा सात सोने री दीऊदानिया एक गहरा मतलब आ, जो ऐबे मां तुस्सा जो दसणा, जो पैहले कधी भी जाहिर नी कितिरा था। स्यों सात तारे सात कलीसिया रे दूत ऐं, होर स्यों सात सोने री दीऊदानिया सात कलीसिया ई।

प्रकासना री गल्ला 19:10

होर जेबे मैं ये सुणेया ता जो मेरे किन्हें ये गल्ला करी करहा था, हांऊँ तेसरे पैरा पर पई किन्हें तेसरी अराधना करणे ही वाल़ा था। पर तिन्हें मेरे किन्हें बोल्या, “देख, एह्ड़ा मत कर, सिर्फ परमेसरा री ही अराधना कर। क्यूंकि हांऊँ तुस्सा साहीं होर तुस्सा रे सभ विस्वासी भाई बैहणा साहीं परमेसरा रा एक सेऊआदार आ। जिन्हारी एक ई गुआही कि यीसू ही तिन्हारा प्रभु आ।” यीसूए जो ये सच्च जाहिर कितिरा से ही लोका जो परमेसरा री खबरा री भविस्यवाणी करणे री सामर्थ देहां।

प्रकासना री गल्ला 2:12

तिन्हें मेरे किन्हें ये भी बोल्या कि, “पिरगमुन सैहरा री कलीसिया रे दूत जो ये संदेस लिख कि: हांऊँ ही आ जेस वाले तेज दोधारी तलवार ई। होर हांऊँ तुस्सा किन्हें ये बोल्हा कि:

प्रकासना री गल्ला 2:8

तिन्हें मेरे किन्हें बोल्या, “होर स्मुरना सैहरा री कलीसिया रे दूत जो ये संदेस लिख कि: हांऊँ ही आ जो पैहला होर आखरी आ; हांऊँ मरी गईरा था पर ऐबे जिउंदा हुई गईरा। होर हांऊँ तुस्सा किन्हें ये बोल्हा कि:

प्रकासना री गल्ला 22:9

होर तिन्हें मेरे किन्हें बोल्या, “देख, एह्ड़ा मत कर, सिर्फ परमेसरा री ही अराधना कर। क्यूंकि हांऊँ भी तेरे साहीं होर तुस्सा रे सभ विस्वासी भाई बैहणा साहीं आ; जो भविष्यवाणी करहे, होर एस कताबा मन्झ लिखिरी भविष्यवाणी री गल्ला मनणे वाले सभ लोका साहीं परमेसरा रा एक सेऊआदार आ।”